Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Sēnesi 37–41: “Pea Naʻe ʻIa Siosefa ʻa [e ʻEikí]”

“Sēnesi 37–41: ‘Pea Naʻe ʻIa Siosefa ʻa [e ʻEikí],’” Fuakava Motuʻá – Tohi Lēsoni ʻa e Faiako Seminelí (2026)

“Sēnesi 37–41: ‘Pea Naʻe ʻIa Siosefa ʻa [e ʻEikí],’” Fuakava Motuʻá – Tohi Lēsoni ʻa e Faiako Seminelí

Sēnesi 37–41: Lēsoni 33

Sēnesi 37–41

“Pea Naʻe ʻIa Siosefa ʻa [e ʻEikí]”

Neongo hono fakatau atu ʻo Siosefa ko ha pōpula, tukuakiʻi loi, mo tuku pōpulá, ka naʻá ne moʻui angatonu mo ngāue ʻaki ʻa e tui ki he ʻOtuá. Ko hono olá, naʻe tāpuakiʻi mo tokoniʻi ia ʻe he ʻEikí ʻi hono ngaahi faingataʻaʻiá. ʻE lava ke tokoni ʻa e lēsoni ko ʻení ke ongoʻi ʻe he kau akó ʻa e ʻamanaki lelei ʻe lava ke fakaʻaongaʻi ʻe he ʻOtuá honau ngaahi faingataʻaʻiá ke faitāpuekina ʻenau moʻuí.

Teuteu ʻa e tokotaha akó: Fakaafeʻi e kau akó ke fakakaukau ki ha ngaahi ʻahiʻahi pe ngaahi faingataʻa kuo nau fehangahangai mo ia pe ʻe lava ke nau fehangahangai mo ia. Fakaafeʻi kinautolu ke omi mateuteu ki he kalasí ke vahevahe ʻa e founga ʻe lava ke fakaʻaongaʻi pe kuo fakaʻaongaʻi ai ʻe he ʻEikí ʻa e ngaahi faingataʻá ke tāpuekina ʻenau moʻuí.

Ngaahi ʻEkitivitī Ako ʻOku Ala Fakahokó

Ko ha talanoa fakatātā ki ha ʻasi

Fakakaukau ke fakaʻaliʻali ha fakatātā ʻo ha ʻasi lolotonga hono lau ʻe ha tokotaha ako ʻa e palakalafi ko ʻení.

Kuo fakamatalaʻi ʻa e talanoa fakatātaá ʻo kau ki ha ʻasi naʻe tō ki ha luo. ʻI he ilifia ʻa e ʻasí kuó ne ʻefihiá, naʻá ne tangi mo longoaʻa. Hili e fekumi ʻa e tokotaha ʻoku ʻaʻaná ki ha founga ke fakahaofi ai e ʻasí, naʻe kamata ke ne tata ʻa e kelekelé ki he loto luó. Naʻe ngangana ʻa e sāvolo kelekele kotoa pē ʻi he tuʻa ʻo e ʻasí, ʻo fakalalahi ange ai ʻene tangí.

Kimuʻa pea hoko atu e talanoá, mahalo ʻe tokoni ki he kau akó ke nau kiʻi tuʻu hifo ʻo fakakaukau ki he talanoa fakatātā ko ʻení ʻaki hono tali ha ngaahi fehuʻi hangē ko ʻení:

Te ke pehē nai ko ha meʻa lelei pe ʻikai lelei ʻa e ʻū sāvolo kelekelé? Ko e hā hono ʻuhingá?
Ko e hā ʻe lava ke fakafofongaʻi ʻe he ʻū savolo fonu kelekelé ʻi heʻetau moʻuí?

Fakaafeʻi ha tokotaha ako ke ne lau ʻa e fakaʻosinga ʻo e talanoa fakatātaá ʻi he palakalafi ko ʻení.

Naʻe tupeʻi ʻe he ʻasí ʻa e kelekelé mei hono tuʻá, ʻo tupu ai ha ngaahi fokotuʻunga kelekele ʻi lalo. Naʻe toutou tupeʻi pē ʻe he ʻasí e kelekelé peá ne tuʻu ʻi he fokotuʻunga maʻolungá kae ʻoua kuó ne māʻolunga feʻunga hake ke ne lava ʻo puna ki tuʻa mei he luó.

ʻE lava fēfē ke felāveʻi ʻa e talanoa fakatātā ko ʻení ki he ngaahi ʻahiʻahi mo e ngaahi faingataʻa ʻoku fakaʻatā ʻe he Tamai Hēvaní ke tau aʻusiá?

Fakakaukau ke fakaʻaliʻali e meʻá ni pea fakaafeʻi e kau akó ke fakakakato ia ʻiate kinautolu pē.

Fakakaukau ki ha ngaahi taimi ʻi hoʻo moʻuí naʻá ke aʻusia ai ha ngaahi ʻahiʻahi pe ngaahi taimi ʻo e loto-foʻí. Lekooti hoʻo ngaahi tali ki ha fehuʻi ʻe taha pe lahi ange mei heni ʻi hoʻo tohinoa akó:

Naʻá ke tali fēfē e ngaahi aʻusia ko iá?
Ko e hā ʻe lava ke faingataʻa ai ke manatuʻi ʻa e ʻEikí ʻi he taimi ʻokú te fehangahangai ai mo e ngaahi faingataʻá?
Mei ha vakai ʻoku taʻengatá, ʻoku malava fēfē ke fakaʻaongaʻi ʻe he Tamai Hēvaní ho ngaahi faingataʻaʻiá ke faitāpuekina ai hoʻo moʻuí?

ʻI hoʻo ako ki he moʻui ʻa Siosefá he ʻaho ní, fekumi ki ha fakahā mei he Laumālie Māʻoniʻoní ke ʻoatu ha ʻamanaki lelei ʻe lava ke liliu ʻe he Tamai Hēvaní mo Sīsū Kalaisi ʻa e ngaahi ʻahiʻahi faingataʻá ki ha ngaahi tāpuaki ʻi hoʻo moʻuí.

Vakai Fakalūkufua ʻo e Sēnesi 37–41

Ke tokoni ke mahino ki he kau akó ʻa e talanoa ʻo e Sēnesi 37–41, te ke lava ʻo fakaʻaliʻali ʻa e fakatātā ʻe nima ʻoku ʻoatu ʻi laló ʻi ha faʻahinga fakahokohoko pē. ʻE lava ke ngāue fakataha ʻa e kau akó ko ha kalasi pe ʻi ha fanga kiʻi kulupu iiki ke fokotuʻutuʻu kinautolu ʻi hono fakahokohokó. Hili iá, ʻe lava ke fakaʻaongaʻi ʻe ha niʻihi ʻo e kau akó e ngaahi fakatātaá ke fakamatalaʻi fakanounou ʻa e talanoa ʻi he Sēnesi 37–41.

ʻE lava ke fakaʻaongaʻi ʻe he kau akó ʻa e ngaahi fakamatala fakanounou ʻi laló pe ngaahi ʻuluʻi fakamatala ʻo e vahé takitaha ke tokoni ke nau fakamatalaʻi fakanounou pe fakapapauʻi ʻa e hokohoko ʻo e ngaahi fakatātaá.

ʻI he taʻu 17 ʻa Siosefá, naʻe meheka hono ngaahi taʻoketé ki he tuʻunga naʻe ʻofeina ai ia ʻe heʻena tamai ko Sēkopé. Naʻa nau fehiʻa kia Siosefa ʻi heʻene vahevahe naʻá ne maʻu ha ngaahi misi fekauʻaki mo kinautolu ʻoku nau punou ʻi hono ʻaó ʻi he kahaʻú. Naʻe aʻu ki ha taimi naʻa nau fakatau ai ʻa Siosefa ko ha pōpula (vakai, Sēnesi 37).

Naʻe fakatau ʻa Siosefa kia Potifā, ko ha ʻōfisa ki he ʻIsipite ko Feló. Naʻe faifai pea hoko ʻa Siosefa ko ha leʻo ki he fale ʻo Potifaá (vakai, Sēnesi 39:1–4).

Naʻe holi kovi ʻa e uaifi ʻo Potifaá kia Siosefa, ka naʻe fakafisi ʻa Siosefa ke ne maumauʻi e fono ʻo e angamaʻá peá ne hola meiate ia. Naʻe tukuakiʻi loi ʻe he uaifi ʻo Potifaá ʻa Siosefa ki hono ngaohikovia iá, pea naʻe lī ia ki he fale fakapōpulá (vakai, Sēnesi 39:7–20).

Lolotonga e nofo pōpula ʻa Siosefá, naʻá ne fakaʻuhingaʻi e misi ʻa ha ongo sevāniti ʻa Felo (vakai, Sēnesi 40).

Hili ha taʻu ʻe ua mei ai, naʻe maʻu ʻe Felo ha ngaahi misi naʻe ʻikai mahino kiate ia. Naʻe talaange ʻe ha taha ʻo e kau tamaioʻeiki ʻa Feló, ʻa ia naʻe tukuange mei he fale fakapōpulá, kia Felo ʻoku lava ʻe Siosefa ʻo fakaʻuhingaʻi ʻa e ngaahi misí. Naʻe akoʻi ʻe Siosefa ʻa Felo naʻe fakafofongaʻi ʻe heʻene ngaahi misí ʻa e taʻu ʻe fitu ʻo e ututaʻu leleí mo e taʻu ʻe fitu ʻo e hongé ʻa ia ʻe vavé ni haʻane hoko ki ʻIsipite (vakai, Sēnesi 41).

Ngaahi tāpuaki mei hotau ngaahi ʻahiʻahí

Ke tokoni ke ʻiloʻi ʻe he kau akó ha ngaahi lēsoni te tau lava ʻo ako mei he aʻusia ʻa Siosefá, fakakaukau ke vahevahe ʻa e kau akó ki ha fanga kiʻi kulupu iiki pea ʻoange pe fakaʻaliʻali ʻa e ngaahi fakahinohino mo e ngaahi fehuʻi ko ʻení.

Fakatokangaʻi ange: ʻE nofotaha ʻa e Lēsoni 34, “Sēnesi 39,” ʻi he fono ʻo e angamaʻá.

Lau ʻa e ngaahi veesi ko ʻení ʻo kumi e founga naʻe tokoniʻi ai ʻe he ʻEikí ʻa Siosefa lolotonga hono ngaahi faingataʻaʻiá.
1. Sēnesi 39:1–6 (Hili hono fakatau atu ʻo Siosefa ko ha pōpula ʻe hono ngaahi tokouá)
2. Sēnesi 39:20–23 (Hili hono lī ʻo Siosefa ki he fale fakapōpulá ʻe Potifaá)
3. Sēnesi 41:14–16, 25–32 (Hili hono faifai pea tukuange ʻa Siosefa mei he fale fakapōpulá)
Tali ʻa e ngaahi fehuʻi ko ‘ení:
- Ko e hā ha ngaahi moʻoni te tau lava ʻo ako mei he tali ʻa Siosefa ki hono ngaahi faingataʻaʻiá?
- ʻOkú ke pehē ko e hā naʻe pau ai ke tatali ʻa Siosefa ʻi ha ngaahi taʻu lahi ke maʻu e ngaahi tāpuaki naʻá ne fekumi ki aí?
- Ko e hā ha fakamoʻoni ʻokú ke mamata ai ki hono tokoniʻi ʻe he ʻOtuá ʻa Siosefa ʻi hono ngaahi faingataʻaʻiá?
- ʻE tokoniʻi fēfē kitautolu ʻe he Tamai Hēvaní mo Sīsū Kalaisi ʻi he founga tatau ʻi he taimi ʻoku tau foua ai ha ngaahi taimi faingataʻá?

Lue takai ʻo fakafanongo kae aleaʻi ʻe he kau akó ʻenau ngaahi talí mo ʻenau kulupú. Fakamālō ange ʻi hono vahevahe ʻa e meʻa ne nau maʻú. Fakamanatu ki he kau akó ʻe lava ke akoʻi ʻe he Laumālie Māʻoniʻoní ki he kakaí ha ngaahi moʻoni kehekehe mei he ngaahi potufolofola tatau. ʻE nofotaha e toenga ʻo e lēsoni ko ʻení ʻi he foʻi moʻoni kapau te tau faivelenga, ʻe lava ke fakaʻaongaʻi ʻe he ʻOtuá hotau ngaahi ʻahiʻahí ke faitāpuekina ʻetau moʻuí mo e niʻihi kehé.

Lau ʻa e Sēnesi 41:37–45, ʻo kumi e fakamoʻoni ki he founga naʻe fakaʻaongaʻi ai ʻe he ʻOtuá ʻa e ngaahi faingataʻa ʻo Siosefá ke tāpuekina ia mo e niʻihi kehé.

Naʻe tāpuekina fēfē ʻe he ʻEikí ʻa Siosefa mo e niʻihi kehé ʻi hono ngaahi faingataʻaʻiá?

Fai ha ngaahi fehuʻi ʻe lava ke tokoni ki he kau akó ke nau ako fekauʻaki mo e mālohi mo e ʻaloʻofa ʻa e ʻOtuá mei he ngaahi moʻoni ʻoku akoʻí. Ko e ngaahi fehuʻi ko ʻení ko ha ngaahi sīpinga ia te ke ala lava ʻo fakaʻaongaʻi. (Ki ha ako lahi ange ki hono tokoniʻi e kau akó ke nau ako fekauʻaki mo e ʻofa, mālohi, mo e ʻaloʻofa ʻa e ʻEikí, vakai, “Tokoniʻi e kau akó ke nau fakatokangaʻi e ʻofa, mālohi, mo e ʻaloʻofa ʻa e ʻEikí ʻi heʻenau moʻuí” ʻi he Fakatupulaki ʻa e Ngaahi Taukei ʻa e Faiakó.
ʻOkú ke pehē ko e hā ʻe fiemaʻu ʻe Siosefa ke ke ʻilo fekauʻaki mo e ʻEikí hili e ngaahi aʻusia naʻá ne fouá?
ʻE tokoni fēfē e ngaahi faingataʻá ke fakamālohia hotau vā fetuʻutaki mo e Tamai Hēvaní mo Sīsū Kalaisí?

Lau ʻa e Tokāteline mo e Ngaahi Fuakava 90:24 pea mo e lea ko ʻeni ʻa ʻEletā Tieta F. ʻUkitofa ʻo e Kōlomu ʻo e Kau ʻAposetolo ʻe Toko Hongofulu Mā Uá. Kumi e founga ʻoku nau ʻaonga ai kia Siosefa mo kinautolu kotoa ʻoku nau aʻusia e ngaahi ʻahiʻahí mo e faingataʻá.

Ko ʻeku fakamoʻoní, neongo ʻe lava ke tau ongoʻi ʻi ha ngaahi taimi ʻoku tau tanumia ʻi he ngaahi faingataʻa ʻo e moʻuí pe ʻākilotoa ʻe he ngaahi pōpōʻuli fakaelotó, ka ʻe fakahoko ʻe he ʻofa ʻa e ʻOtuá mo e ngaahi tāpuaki ʻo e ongoongolelei ʻo Sīsū Kalaisi kuo fakafoki maí ha meʻa taʻeʻamanekina. (“ʻE Fakahoko ʻe he ʻOtuá ha Meʻa Fisifisimuʻa,” Liahona, Nōvema 2020, 52)

ʻOku ʻaonga fēfē ʻa e Tokāteline mo e Ngaahi Fuakava 90:24 mo e lea ʻa ʻEletā ʻUkitofá kia Siosefá? Kiate koé?

Ngaahi sīpinga ʻo onopōní

Fakakaukau ki ha ngaahi meʻa kuó ke aʻusia, pe ko ha niʻihi kehe, ʻi ha taimi naʻá ke mamata ai ki hono fakaʻaongaʻi ʻe he Tamai Hēvaní ho ngaahi faingataʻaʻiá ke faitāpuekina hoʻo moʻuí. ‘Omi ha tali ki ha fehuʻi ʻe ua pe lahi ange mei heni ‘i hoʻo tohinoa akó:

Ko e hā ha founga kuó ke mamata ai ki hono fakaʻaongaʻi ʻe he Tamai Hēvaní ʻa e ngaahi faingataʻá ke faitāpuekina e moʻui ʻa e kakai ʻokú ke ʻiloʻí? Ko e hā kuó ke ako mei he kakai ko iá?
Kapau naʻe ʻi ai ha taha ʻi he lotolotonga ʻo ha ʻahiʻahi faingataʻa he taimí ni, ko e hā te ke fiemaʻu ke nau ʻilo fekauʻaki mo e Tamai Hēvaní mo Sīsū Kalaisí?
Ko e hā kuo tokoni ke ke kei faivelenga ai pē ki he ʻOtuá lolotonga e ngaahi ʻahiʻahi kuó ke aʻusia ʻi ho moʻuí?

ʻE lava ke fakaafeʻi e kau akó ke vahevahe ʻenau ngaahi aʻusiá fakataha mo ʻenau ngaahi ongo ki he Fakamoʻuí.

Ngaahi Maʻuʻanga Tokoni Kehé

ʻE lava fēfē ʻe heʻeku ʻamanaki lelei kia Sīsū Kalaisí ʻo tokoniʻi au ʻi he ngaahi taimi faingataʻá?

Naʻe akoʻi ʻe Palesiteni Tieta F. ʻUkitofa, ʻi heʻene kei ʻi he Kau Palesitenisī ʻUluakí ʻo pehē:

18:49

ʻOku tau ʻamanaki lelei ʻia Sīsū ko e Kalaisí, ʻi he angalelei ʻa e ʻOtuá, ʻi he ngaahi fakahā ʻa e Laumālie Māʻoniʻoní, mo ʻiloʻi ʻoku ongona pea tali e ngaahi lotú. ʻE lava ke tau ʻamanaki lelei atu ʻe tauhi ʻe he ʻOtuá ʻEne ngaahi talaʻofa kiate kitautolú ʻi he lolotongá mo e kahaʻú he kuó Ne faitotonu mo tauhi foki ʻEne ngaahi talaʻofa he kuo hilí. ʻI he taimi faingataʻá, ʻe lava ke tau piki maʻu ki he ʻamanaki lelei “ʻe fengāueʻaki fakataha ʻa e ngaahi meʻa kotoa pē koeʻuhí ko [ʻetau] leleí” (Tokāteline mo e Ngaahi Fuakava 90:24) ʻi heʻetau muimui ki he faleʻi ʻa e kau palōfita ʻa e ʻOtuá. ʻI he faʻahinga ʻamanaki lelei ko ʻeni ʻi he ʻOtuá, ʻEne leleí, pea ʻoku fakafoʻou leva ʻe Hono mālohí kitautolu ʻaki ha loto-toʻa ʻi he lolotonga ʻo e ngaahi pole faingataʻá mo foaki ivi kiate kinautolu ʻoku nau ongoʻi fakamanamanaʻi ʻe he ngaahi holisi tuʻulaki mai ʻo e manavasiʻí, veiveiuá, mo e loto-foʻí. (“Ko e Mālohi Taʻefakangatangata ʻo e ʻAmanaki Leleí,” Liahona, Nōvema 2008, 23)

Ko e hā te u lava ʻo fai ke fakamālohia ʻeku tuí lolotonga e ngaahi taimi faingataʻá?

Naʻe akonaki ʻa Sisitā Mīseli D. Keleki ʻo e Kau Palesitenisī Lahi mālōlō ʻo e Kau Finemuí ʻo pehē:

11:15

ʻI he hoko ʻa e ngaahi taimi faingataʻá, ʻoku ou feinga ke manatuʻi ne u fili ke muimui ʻia Kalaisi kimuʻa peá u haʻu ki he māmaní pea ʻoku hoko ʻa e ngaahi pole ki heʻeku tuí, moʻui leleí, mo ʻeku kātakí kotoa ko e konga ʻo e ʻuhinga ʻoku ou ʻi heni aí. Pea ʻoku ʻikai totonu ke u teitei fakakaukau ke hoko e ngaahi faingataʻa ʻo e ʻaho ní ke u fehuʻia ai e ʻofa ʻa e ʻOtuá kiate aú pe liliu ai ʻeku tui kiate Ia ki he veiveiuá. ʻOku ʻikai ʻuhinga ʻa e ngaahi faingataʻá ʻoku ʻikai lava ʻa e palaní; ʻoku nau hoko ko e konga ʻo e palaní ʻo fakataumuʻa ke tokoniʻi au ke fekumi ki he ʻOtua. ʻOku ou hoko ʻo tatau ange mo Ia ʻi heʻeku kātaki fuoloa pea fakatauange ke u hangē ko Ia, ʻo lotu lahi ange, ʻi heʻeku faingataʻaʻiá. (“Lotó Kotoa,” Liahona, Nōvema 2022, 61–62)

ʻE tāpuekina fēfē au ʻe he Tamai Hēvaní ʻi hoku ngaahi faingataʻaʻiá?

Naʻe akoʻi ʻe Palesiteni Tōmasi S. Monisoni (1927–2018):

18:15

ʻOku tau ʻiloʻi ʻoku ʻi ai ha ngaahi taimi te tau foua ai ʻa e mamahi ʻo e lotó, ha taimi te tau loto mamahi ai, mo ha taimi ʻe ʻahiʻahiʻi ai kitautolu ʻo aʻu ki he ngataʻanga ʻo ʻetau kātakí. Ka, ʻoku hanga ʻe he ngaahi faingataʻa ko iá ʻo ʻai ke tau liliu ʻo lelei ange, ke toe fakaleleiʻi ʻetau moʻuí ʻi he founga ʻoku akoʻi ai kitautolu heʻetau Tamai Hēvaní, pea hoko ko ha faʻahinga meʻa kehe mei hotau tuʻunga ki muʻá—ʻo lelei ange mei he kuo hilí, mahino lahi ange mei he kuo hilí, ʻofa lahi ange mei he kuo hilí, mo fakamoʻoni mālohi ange ʻi ha toe taimi. (“ʻE ʻIkai Te u Fakatukutukuʻi Koe, pe Liʻaki Koe,” Liahona, Nōvema 2013, 87)

Ngaahi ʻEkitivitī Fakalahi ki he Akó

Ngaahi fakamatala fakanounou ʻo e vitioó

Kapau ʻe ʻaonga ki he kau akó haʻanau fanongo ki ha fakamatala fakanounou ʻo e ngaahi meʻa naʻe hoko ʻi he Sēnesi 37–41, te ke lava ʻo mamata ʻi he “Ngaahi Misi Ueʻi Fakalaumālie ʻa Siosefá” (2:18) mo e “Siosefa ʻi ʻIsipité” (2:51). ʻE lava ke fetongi ʻe he ongo vitiō ko ʻení ʻa e ʻekitivitī fakatātā ʻi he lēsoní.

2:17

2:50

Ko e moʻui ʻa Siosefá ko ha sīpinga ʻo Sīsū Kalaisi

Ke tokoni ke ʻiloʻi ʻe he kau akó ha ngaahi founga naʻe hoko ai e moʻui ʻa Siosefá ko ha sīpinga ʻo Sīsū Kalaisi, fakakaukau ke fakaʻaliʻali ʻa e saati ʻi laló ʻaki pē e ngaahi potufolofolá. Hili iá, te ke lava ʻo vahevahe e fānaú ki ha ngaahi hoa. ʻE lava ke takitaha e hoa takitaha ʻi ha tafaʻaki kehekehe ʻo e sātí, lau ʻa e potufolofolá, pea kumi e ngaahi meʻa ʻoku faitatau ai ʻa e moʻui ʻa Siosefá mo e moʻui ʻa Sīsū Kalaisí. ʻE lava ke tokoni hono ʻiloʻi e ngaahi faitatau ko ʻení ke fakaloloto e mahino ʻa e kau akó ki he moʻui mo e misiona ʻo Sīsū Kalaisí.

Fakatokangaʻi ange: ʻI he konga Ngaahi ʻEkitivitī Fakalahi ki he Akó ʻi he Lēsoni 35: “Sēnesi 42–46,” ʻe ʻi ai ha ʻekitivitī tatau ʻokú ne fakahaaʻi e founga ʻoku hokohoko atu ai e moʻui ʻa Siosefá ko ha sīpinga ʻo Kalaisi ʻi heʻene fakamolemoleʻi hono ngaahi tokouá mo fakahaofi hono fāmilí.

Siosefa ʻo ʻIsipité	Sīsū Kalaisi
Siosefa ʻo ʻIsipité Sēnesi 37:3 (ʻOfeina ʻe heʻene tamaí)	Sīsū Kalaisi Mātiu 3:17
Siosefa ʻo ʻIsipité Sēnesi 37:4 (Fehiʻanekina ʻe ha niʻihi ʻo hono ngaahi tokouá)	Sīsū Kalaisi ʻĪsaia 53:3; Sione 1:11
Siosefa ʻo ʻIsipité Sēnesi 37:6–7 (Naʻá ne ʻiloʻi ʻe ʻi ai e ʻaho ʻe punou hifo ai hono fāmilí ʻi hono ʻaó)	Sīsū Kalaisi Loma 14:11
Siosefa ʻo ʻIsipité Sēnesi 37:26–28 (Lavakiʻi ʻe kinautolu ʻoku ofi taha kiate iá koeʻuhí ko ha paʻanga)	Sīsū Kalaisi Mātiu 26:14–16

Tāufehiʻá mo e meheká

ʻE lava ke tokoni e talanoa ʻo Siosefá ke mahino ki he kau akó ʻa e ngaahi nunuʻa ʻo e fehiʻa mo e meheka ki he niʻihi kehé. Te ke lava ʻo ʻeke ki he kau akó pe ko e hā ka fakatau atu ai ʻe he ngaahi tokoua ʻo Siosefá ia ko ha pōpula ki ʻIsipité. ʻE lava leva ke nau lau ʻa e Sēnesi 37:4–5, 8, 11 ʻo kumi, pea fakaʻilongaʻi, ʻa e ngaahi lea ʻoku nau fakamatalaʻi ʻenau ongo kia Siosefá.

Hili iá, ʻe lava ke ke huluʻi ʻa e “Ko e Kau Ngāue ʻi he Ngoue Vainé” mei he taimi 4:49 ki he 5:44 pea fanongo ki he meʻa naʻe akoʻi ʻe Palesiteni Sefilī R. Hōlani ʻo e Kōlomu ʻo e Toko Hongofulu Mā Uá fekauʻaki mo e tāufehiʻá mo e meheká.

15:23

Te ke lava ʻo fakaafeʻi e kau akó ke fakafehoanaki e ongo taʻokete ʻo Siosefa ʻo Isipité mo e taʻokete ʻo Siosefa Sāmita, ko Hailamé, mo e taʻokete ʻo Nīfai ko Samú. Ko Hailame mo Samú ko ha ongo taʻokete ia naʻá na muimui ʻi he loto-fakatōkilalo ki he fakahinohino hona ongo tehiná.

ʻE lava ke fakalaulauloto ʻa e kau akó ki ha ngaahi founga ʻe ala ʻahiʻahiʻi ai kinautolu ke nau ongoʻi tāufehiʻa pe meheka pea mo e founga ʻe lava ke tokoniʻi ai kinautolu ʻe he Fakamoʻuí ke nau ikunaʻi e ngaahi ongo ko iá.

Ngaahi vitiō ke fili mei aí

Ke tokoni ke ʻilo ʻe he kau akó ha sīpinga ʻo e founga ʻe lava ai ʻe he Tamai Hēvaní ʻo tāpuakiʻi kitautolu mo e niʻihi kehé ʻi hotau ngaahi faingataʻaʻiá, fakakaukau ke huluʻi e vitiō ko ʻení ʻi he konga ko e “Ngaahi Sīpinga ʻo Onopōní” ʻi he lēsoní.

“Wheelz: Overcoming Is Possible” (7:13)

7:13

Hili e vitioó, ʻe lava ke aleaʻi ʻe he kau akó e founga naʻe tokoniʻi ai ʻe he ʻEikí e talavou ko ʻení ke ne vakai ki hono ngaahi ʻahiʻahí mei ha fakakaukau kehe.