Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Sēnesi 39: Ko Hono Ikunaʻi ʻo e ʻAhiʻahí

“Sēnesi 39: Ko Hono Ikunaʻi ʻo e ʻAhiʻahí,” Fuakava Motuʻá – Tohi Lēsoni ʻa e Faiako Seminelí (2026)

“Sēnesi 39: Ko Hono Ikunaʻi ʻo e ʻAhiʻahí,” Fuakava Motuʻá – Tohi Lēsoni ʻa e Faiako Seminelí

Sēnesi 37–41: Lēsoni 34

Sēnesi 39

Ko Hono Ikunaʻi ʻo e ʻAhiʻahí

Hili e hoko ʻa Siosefa ko ha leʻo ʻi he fale ʻo Potifaá, naʻe ʻahiʻahiʻi ia ʻe he uaifi ʻo Potifaá ke ne maumauʻi e fono ʻo e angamaʻá. Naʻe ʻiloʻi ʻe Siosefa ko e fakavaivai ki he ʻahiʻahi ko iá ko ha “halaia ia ki he ʻOtuá” pea fili ke hola mei he ʻahiʻahí (vakai, Sēnesi 39:9, 12). ʻE lava ke tokoni ʻa e lēsoni ko ʻení ke fakahaaʻi ʻe he kau akó ʻenau līʻoa ki he ʻOtuá ʻaki ʻenau tekeʻi ʻa e ʻahiʻahi ke maumauʻi e fono ʻo e angamaʻá.

Teuteu ʻa e tokotaha akó: Fakaafeʻi e kau akó ke fakakaukauloto naʻe kole ange ke nau tataki ha fealēleaʻaki ʻi heʻenau kalasi Lautohi Faka-Sāpaté fekauʻaki mo ha ngaahi founga kehekehe te nau lava ai ʻo tekeʻi e ngaahi ʻahiʻahi ʻa Sētané. Fakaafeʻi e kau akó ke fakakaukau ki ha founga ʻe tolu te nau vahevahe ai mo ʻenau kalasí.

Ngaahi ʻEkitivitī Ako ʻOku Ala Fakahokó

Ngaahi ʻahiʻahi ʻoku tau fehangahangai mo iá

Fakakaukau ke ʻai e kalasí ke nau hiki ha lisi ʻi he palakipoé ʻo e ngaahi ʻahiʻahi ʻoku fehangahangai mo e toʻu tupú he ʻahó ni. Ke tokoni ke fakakaukau lahi ange e kau akó ki he ngaahi ʻahiʻahi ʻoku nau fehangahangai fakatāutaha mo iá mo e anga ʻenau tali kiate kinautolú, te ke lava ʻo fakaafeʻi e tokotaha ako takitaha ke fakakakato ʻa e ʻekitivitī ko ʻení ʻi ha laʻipepa.

Fili ha ʻahiʻahi pea hiki ha tūkunga nounou mo moʻoni ʻe lava ke fehangahangai ai ha toʻu tupu mo e ʻahiʻahi ko iá.

Fakamāʻopoʻopo e ngaahi tūkungá pea toe tufa kinautolu ki he kalasí.

Lau hoʻo tūkunga foʻoú. Tohi ʻi he tafaʻaki ki mui ʻo e laʻipepá ʻa e meʻa ʻe ala faingataʻa ai ke tekeʻi ʻa e ʻahiʻahi ko iá. Hiki foki ha meʻa ʻe ua te ke ala poupouʻi ha taha ke ne fai ke tokoniʻi kinautolu ke nau tekeʻi pe ikunaʻi ʻa e ʻahiʻahi ko iá.

Fakamahinoʻi ange ki he kau akó neongo he ʻikai ke nau fehangahangai mo e ʻahiʻahi tatau ʻoku hiki ʻi he tūkungá, ka te nau lava ʻo fakaʻaongaʻi ʻa e faleʻi tatau ki honau ngaahi tūkungá. Tokoniʻi e kau akó ke vakaiʻi honau tuʻunga malava ke tekeʻi pe ikunaʻi e ʻahiʻahí.

Fakakaukau ki he ngaahi ʻahiʻahi ʻokú ke fehangahangai fakataautaha mo iá.

Ko e hā kuó ke fai, pe te ke lava ʻo fai, ke maʻu ha mālohi mei he Tamai Hēvaní mo Sīsū Kalaisi ke matuʻuaki e ngaahi ʻahiʻahi ko iá?

Te ke lava ʻo fakaafeʻi e kau akó ke tānaki atu ki he meʻa naʻa nau tohi ʻi he tūkungá ʻaki ʻenau ngaahi aʻusiá. Poupouʻi kinautolu ke hokohoko atu hono tānaki ha ngaahi fakakaukau ki heʻenau tūkungá ʻi heʻenau ako e Sēnesi 39. ʻAi ke nau ʻilo ʻi heʻenau fekumi ki ha tokoni mei he Laumālie Māʻoniʻoní, te Ne lava ʻo ueʻi kinautolu ʻaki ha ngaahi fakakaukau ke tekeʻi pea naʻa mo ikunaʻi ʻa e ngaahi ʻahiʻahi ʻoku nau fehangahangai mo iá.

Aʻusia ʻa Siosefa ʻi he ʻahiʻahí

Kapau naʻá ke fakaʻaongaʻi ha ngaahi fakatātā ke fakamatalaʻi fakanounou ʻaki e ngaahi meʻa naʻe hoko ʻi he moʻui ʻa Siosefá ʻi he Lēsoni 33: “Sēnesi 37–41,” fakakaukau ke toe fakaʻaliʻali kinautolu. Fakaafeʻi ha tokotaha ako ke ne fakamatalaʻi fakanounou e meʻa ʻoku nau manatuʻi fekauʻaki mo e founga naʻe tāpuakiʻi ai ʻe he ʻEikí ʻa Siosefa ʻi he fale ʻo Potifaá. Kapau ʻoku fiemaʻu tokoni ʻa e kau akó, fakaafeʻi kinautolu ke lau mo fakamatalaʻi fakanounou ʻa e Sēnesi 39:1–6.

Lau ʻa e Sēnesi 39:7–8, ʻo kumi e meʻa naʻe hoko kia Siosefa hili ʻene hoko ko e leʻo ʻi he fale ʻo Potifaá.

Ko e hā e ʻahiʻahi naʻe fehangahangai mo Siosefá?

Fakamatalaʻi ange naʻe fehangahangai ʻa Siosefa mo e ʻahiʻahi ke maumauʻi e fono ʻo e angamaʻá. Tokoni ke fakakaukau ʻa e kau akó ki he meʻa ʻoku mahino kiate kinautolu fekauʻaki mo e fono ʻo e angamaʻá ʻaki hono fakaafeʻi kinautolu ke nau fai ʻeni.

Tohi ʻi hoʻo tohinoa akó ʻa e founga te ke fakamatalaʻi ʻaki ʻa e fono ʻo e angamaʻá mo e ʻuhinga ʻoku mahuʻinga aí.

ʻI he ʻosi e tohi ʻa e kau akó, fakakaukau ke fakaʻaliʻali ʻa e fakamatala ko ʻení. Fakaafeʻi e kau akó ke lau ia ʻiate kinautolu pē, ʻo kumi e ngaahi fakakaukau te nau lava ʻo tānaki ki he meʻa ne nau hiki ʻi heʻenau tohinoa akó.

ʻOku fakamatalaʻi ʻi he Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí ʻa e ngaahi meʻá ni fekauʻaki mo e fono ʻo e angamaʻá:

ʻOku pehē ʻe he fono ʻo e angamaʻá ʻoku toki fakangofua pē ʻe he ʻOtuá ʻa e ʻekitivitī fakasekisualé ʻi he vahaʻa ʻo ha tangata mo ha fefine kuó na mali. …

Mavahe mei he mali ʻa ha tangata mo ha fefiné, ʻoku hala ke ala ki he ngaahi konga fūfūnaki mo toputapu ʻo e sino ʻo ha taha neongo kapau ʻokú ne vala. ʻI hoʻo ngaahi fili fekauʻaki mo e meʻa ʻokú ke fakahokó, sio ki aí, lau, fanongo ki aí, fakakaukau, tohi pe pōpoakí, fakaʻehiʻehi mei ha faʻahinga meʻa pē ʻokú ne fakatupu e ngaahi ongo ʻo e holi koví ʻi he niʻihi kehé pe ʻiate koe. ʻOku kau heni ʻa e ponokalafí ʻi ha faʻahinga founga pē. (Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí, 23, 25)

ʻOkú ke pehē ko e hā kuo tuku mai ai ʻe he Tamai Hēvaní ʻa e fono ʻo e angamaʻá?
Ko e hā ha ngaahi founga ʻoku ʻahiʻahiʻi ai ʻe Sētane ʻa e toʻu tupú ke nau maumauʻi e fono ʻo e angamaʻá?

ʻE lava ke kau ʻi he ngaahi tali ʻe ala ʻoatu ʻe he kau akó hono feʻaveʻaki pe tufaki e ngaahi fakatātā taʻefeʻungá, mamata pe fanongo ki he mītia ʻoku fakatupu fakakaukau kovi pe takiekina fakasekisualé, ko e ʻikai tauhi ʻo e ngaahi tuʻunga pe ongo fakasekisualé ke toputapú. Kapau ʻoku ʻi ai ha ngaahi fehuʻi ʻa e kau akó fekauʻaki mo e femanakoʻaki ʻa e tangata mo e tangata pe fefine mo e fefiné, mahalo ʻe tokoni ke fakamatalaʻi ange “ʻoku ʻikai ko ha angahala ʻa e ongoʻi femanakoʻaki ʻa e tangata mo e tangata pe fefine mo e fefiné. Kapau ʻoku maʻu ʻe [ha taha] ʻa e ngaahi ongo ko ʻení pea ʻikai ke [ke] tulifua pe fakahoko kinautolu, [ʻoku nau] moʻui ʻaki ʻa e fono toputapu ʻa e Tamai Hēvaní ki he angamaʻá” (Ki Hono Fakamālohia ʻo e Toʻu Tupú: Ko ha Fakahinohino ki Hono Faakahoko ha Ngaahi Filí, 27).

Lau ʻa e Sēnesi 39:9–12, ʻo kumi e founga naʻe tekeʻi ai ʻe Siosefa ʻa e ʻahiʻahi ke maumauʻi e fono ʻo e angamaʻá.

Ko e Sēnesi 39:9 ko ha potufolofola fakataukei fakatokāteline ia. Fakakaukau ke fakaafeʻi ʻa e kau akó ke nau fakaʻilongaʻi ʻa e ngaahi potufolofola fakataukei fakatokāteliné ʻi ha founga makehe koeʻuhí ke nau lava ʻo maʻu ngofua kinautolu.

Ko e hā naʻá ke ako mei he aʻusia ʻa Siosefá?

ʻE lava ke ʻiloʻi ʻe he kau akó ha ngaahi moʻoni hangē ko e: ʻE lava ke ʻomi ʻe heʻetau tauhi mateaki ki he ʻOtuá ha mālohi ke matuʻuaki ʻa e ʻahiʻahi ke maumauʻi e fono ʻo e angamaʻá (veesi 9).

ʻE lava ke fakaʻilongaʻi ʻe he kau akó ʻi heʻenau folofolá ʻa e meʻa naʻe hanga ʻe he līʻoa ʻa Siosefa ki he ʻOtuá ʻo ʻai ke ne malavá, hangē ko ʻení, ʻi he veesi 8 (“ʻikai loto”), veesi 10 (“ʻikai te ne tokanga”), mo e veesi 12 (“hola ia ki tuʻa”).

Ke tokoni ke tali ʻe he kau akó ʻa e fehuʻi ko ʻení, mahalo te ke fie ʻoange kiate kinautolu ha tūkunga te nau lava ʻo fakaʻaongaʻi ke vahevahe ʻa e founga ʻe lava ke fai ai ʻe ha taha ʻa e ngaahi meʻa ʻe tolu naʻe fai ʻe Siosefá. ʻE lava ke kau ʻi ha tūkunga ʻe taha ha fakaafe ki ha faiva, fakaʻaliʻali, pe koniseti ʻoku fakaʻaongaʻi ai ha ngaahi ʻīmisi taʻetaau mo ha ngaahi lea ʻuli. ʻE lava ke kau ʻi ha tūkunga ʻe taha ʻa e ongoʻi mafasia ke ʻave ha ngaahi text pe ngaahi fakatātā taʻefeʻunga ki he niʻihi kehé.
Ko e hā ha ngaahi founga te tau lava ai ʻo muimui ki he sīpinga ʻa Siosefá ʻi he taimi ʻoku tau fehangahangai ai mo e ʻahiʻahí?

Ko hono fakamālohia ʻetau malava ke tauhi e fono ʻo e angamaʻá

Fakaafeʻi e kau akó ke vahevahe ʻa e meʻa naʻa nau ako mo honau ngaahi hoá.

ʻE lava ke tokoniʻi kitautolu ʻe he Fakamoʻuí ke ikunaʻi ʻa e ʻahiʻahí

Mahalo ʻe ʻi ai ha kau ako ʻoku nau fefaʻuhi mo e talangofua ki he fono ʻo e angamaʻá pea fiemaʻu ke nau ongoʻi ha ʻamanaki lelei ʻi he fakatomala mo ikunaʻi e maʻunimaá. Fakamoʻoni ki he natula ʻofa, faʻa kātaki, mo faʻa fakamolemole ʻa e Tamai Hēvaní mo Sīsū Kalaisí. Fakakaukau ke huluʻi e foʻi vitiō “Temptation Fades as We Seek Christ in Every Thought” (2:57), ʻoku maʻu ʻi he ChurchofJesusChrist.org. Fakaafeʻi e kau akó ke kumi e founga ʻe lava ke ʻomi ai ʻe he Fakamoʻuí ha ʻamanaki lelei kiate kitautolú.

2:58

Naʻe akoʻi ʻe ʻEletā Teili G. Lenilani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e founga ʻe lava ke foaki ai ʻe he Fakamoʻuí ha ʻamanaki lelei kiate kinautolu kuo nau fefaʻuhi mo hono tauhi e ngaahi fekau ʻa e ʻOtuá.

Neongo pe ko e hā e fuoloa ʻo ʻetau mavahe mei he halá pe mamaʻo ʻo ʻetau ʻauheé, ko e momeniti pē ʻoku tau pehē ai ke tau liliú, ʻoku tokoni e ʻOtuá ke tau foki. Mei he tafaʻaki ʻa e ʻOtuá, ko ʻetau foki pē ki he halá ʻo fou ʻi he fakatomala moʻoní mo vilitaki atu kimuʻa ʻo tuʻumaʻu ʻia Kalaisi, ʻe hangē pē naʻe ʻikai ke tau mavahé. Kuo totongi ʻe he Fakamoʻuí ʻa ʻetau ngaahi angahalá mo fakatauʻatāinaʻi kitautolu mei he hōloa ʻi he fiefia mo e ngaahi tāpuaki ʻoku hanganaki maí. (“Mou Fili he ʻAhó Ni,” Liahona, Nōvema 2018, 106)

Ko e hā te ke fiemaʻu ke mahino ki ha taha ʻoku ongoʻi tuenoa koeʻuhí ko ʻenau ngaahi fili kimuʻá mei he lea ʻa ʻEletā Lenilaní?
Ko e hā kuó ne tokoniʻi koe ke ke tekeʻi ʻa e ʻahiʻahí ʻa ia te ke lava ʻo fokotuʻu ange ki he kakai kehé?

Ko hono faʻu ha palani ke tauhi e fono ʻo e angamaʻá

Ke tokoni ki he kau akó ke faʻu ha palani ke ngāueʻi e meʻa kuo akoʻi ange ʻe he Laumālié fekauʻaki mo hono tauhi e fono ʻo e angamaʻá, ʻoange ha ngaahi miniti siʻi ke nau tali e ngaahi fehuʻi ko ʻení ʻi heʻenau tohinoa akó.

Ko e hā naʻá ke ako ʻe lava ʻo tokoni atu ke ke tauhi e fono ʻo e angamaʻá pe tekeʻi e ngaahi ʻahiʻahi kehé?
Ko e hā naʻá ke ako fekauʻaki mo e līʻoa ki he ʻOtuá?
ʻE anga fēfē haʻo kamata fakaʻaongaʻi ʻa e meʻa kuó ke ako mo ongoʻi he ʻaho ní?

Poupouʻi e kau akó ke fakakau ʻa e Tamai Hēvaní mo Sīsū Kalaisi ʻi heʻenau feinga ke tekeʻi ʻa e ʻahiʻahí. Fakakaukau ke vahevahe hoʻo fakamoʻoni ki he malava ʻa e Fakamoʻuí ʻo tokoniʻi kitautolu ke tau ikunaʻi ʻa e ʻahiʻahí mo ʻEne ʻaloʻofa ʻofá ʻi hono tokoniʻi kitautolu ke tau fakatomalá.

Ako Ma‘uloto

Mahalo te ke fie tokoni ki he kau akó ke ako maʻuloto ʻa e potufolofola fakataukei fakatokāteliné mo e kupuʻi lea fakafolofola mahuʻingá lolotonga ʻa e lēsoni ko ʻení pea toe fakamanatu ia ʻi he ngaahi lēsoni ʻi he kahaʻú. Ko e kupuʻi lea folofola mahuʻingá ko e “Pea ʻe fēfē ʻeku fai ‘a e hala lahí ni, ke u halaia ai ki he ʻOtuá?” ʻOku maʻu ʻa e ngaahi fakakaukau ki he ngaahi ʻekitivitī ako maʻulotó ʻi he naunau fakalahi ʻi he “Ngaahi ʻEkitivitī Fakamanatu ʻo e Fakataukei Fakatokāteliné.”

Ngaahi Maʻuʻanga Tokoni Kehé

Te u ikunaʻi fēfē hoku ngaahi ʻahiʻahí?

ʻOku maʻu ʻe he Tamai Hēvaní mo Sīsū Kalaisi ʻa e mālohi ke tokoniʻi koe. Fakafonu hoʻo moʻuí ʻaki e ngaahi meʻa ʻoku nau fakaafeʻi e mālohi ko iá ki hoʻo moʻuí, hangē ko e lotú, ako folofolá, mo e tokoni ki he niʻihi kehé. Tafoki kia Sīsū Kalaisi mo ʻEne ongoongoleleí pea te ke ʻiloʻi ai ʻe lava ke hoko e ngaahi vaivaí ko ha ngaahi mālohinga. Kumi tokoni mei he mātuʻá, kau takí, mo e kau faifaleʻi fakapalofesinalé ʻo ka fie maʻu. (Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí, 27)

ʻOku kaunga fēfē e fono ʻa e ʻEikí ki he angamaʻá kiate kinautolu ʻoku fetokangaʻaki ʻi honau tuʻunga tangata pe fefiné?

ʻOku ʻikai ko ha angahala ʻa e ongoʻi femanakoʻaki ʻa e tangata mo e tangatá pe fefine mo e fefiné. Kapau ʻokú ke maʻu e ngaahi ongo ko ʻení pea ʻikai ke ke tulifua pe fakahoko kinautolu, ʻokú ke moʻui ʻaki e fono toputapu ʻa e Tamai Hēvaní ki he angamaʻá. Ko ha fānau ʻofeina koe ʻa e ʻOtuá pea ko ha ākonga koe ʻa Sīsū Kalaisi. Manatuʻi ʻoku mahino ki he Fakamoʻuí ʻa e meʻa kotoa pē ʻokú ke aʻusiá. Te ke maʻu ha mālohi ke talangofua ki he ngaahi fekau ʻa e ʻOtuá mo maʻu e ngaahi tāpuaki ʻokú Ne talaʻofa maí, ʻo fakafou ʻi hoʻo fetuʻutaki ʻi he fuakava mo Iá. (Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí, 27–28)

Ko e hā naʻe tuku mai ai ʻe he Tamai Hēvaní ʻa e fono ʻo e angamaʻá?

Ko e ngaahi ongo fakasekisualé ko ha konga mahuʻinga ia ʻo e palani ʻa e ʻOtuá ke fakatupu ha nofomali ʻoku fiefiá mo ha ngaahi fāmili ʻoku taʻengata. ʻOku ʻikai ko ha angahala ʻa e ngaahi ongo ko ʻení—ʻoku toputapu ia. Koeʻuhí ʻoku fuʻu toputapu mo mālohi e ngaahi ongo fakasekisualé, kuo foaki atu ai ʻe he ʻOtuá ʻa ʻEne fono ʻo e angamaʻá ke teuteuʻi koe ke ke fakaʻaongaʻi e ngaahi ongo ko ʻení ʻo hangē ko ʻEne taumuʻá.

… ʻE malava ʻi hoʻo talangofua ki he fono ko ʻení ke ke fakalakalaka ai ki he taʻengatá pea hoko ʻo hangē ange ko hoʻo Tamai Hēvaní. ʻE tupulaki hoʻo loto falalá ʻi hoʻo moʻui ʻaki ko ha ākonga koe ʻa Sīsū Kalaisí. (Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí, 23, 26)

Ngaahi ʻEkitivitī Fakalahi ki he Akó

Fekuki mo e ngaahi ʻahiʻahi ʻi hotau kuongá

Tokoni ke ʻilo ʻe he kau akó ʻa e founga ʻe lava ke tokoniʻi ai kinautolu ʻe he Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí ke nau ikunaʻi ʻa e ngaahi ʻahiʻahí. Te ke lava ʻo fakaʻaliʻali hano tatau pea fehuʻi ange:

Ko e hā ha ngaahi ʻuhinga ʻokú ke pehē kuo faʻu ai ʻe he kau taki ʻo e Siasí ʻa e tohi fakahinohino Ki Hono Fakamālohia ʻo e Toʻu Tupú?

Vahevahe naʻe akoʻi ʻe ʻEletā Tieta F. ʻUkitofa ʻo e Kōlomu ʻo e Kau ʻAposetolo ʻe Toko Hongofulu Mā Uá ʻe lava ʻa e Ki Hono Fakamālohia ʻo e Toʻu Tupú ʻo tokoniʻi ʻa e toʻu tupú ke nau “matuʻuaki lelei ange ʻa e ngaahi ʻahiʻahi mo e ngaahi faingataʻa ʻi hotau kuongá” (“Ko Sīsū Kalaisi ʻa e Mālohinga ʻo e Toʻu Tupú,” Liahona, Nōvema 2022, 10). Hili iá ʻe lava ke kumi ʻe he kau akó ʻi he konga “Fēfē nai ʻa e …?” ʻi he tohi fakahinohino Ki Hono Fakamālohia ʻo e Toʻu Tupú, ʻa e ngaahi tefito ʻoku fakamatalaʻi ʻe lava ke hoko ko ha ʻahiʻahi ki he toʻu tupú he ʻaho ní. Te nau lava ʻo kumi e ngaahi peesi ʻoku fakamatalaʻi ai e ʻahiʻahi ko iá pea vahevahe ha tefitoʻi moʻoni ʻe lava ke muimui ai e toʻu tupú ke fakaʻehiʻehi mei he ʻahiʻahí.

Ko hono faʻu ha palani ke tekeʻi ʻaki e ʻahiʻahí

Ke tokoni ki he kau akó ke faʻu ha palani ke haʻu kia Kalaisi pea tekeʻi ʻa e ʻahiʻahí, ʻe lava ke fakaʻaongaʻi ʻe he kau akó ʻa e maʻuʻanga tokoni fakaangaanga ki he Moʻui Fakafaifekaú. Te nau lava ʻo kumi ʻi he Konga F: Mapuleʻi ʻo e Ongo Fakasekisualé pe Manako ʻi ha Tahá ʻi he “Ngaahi Maʻuʻanga Tokoni ki hono Mapuleʻi ʻo e Ngaahi Fiemaʻu Fakasōsialé,” ʻo kumi ha ngaahi fakakaukau te nau lava ʻo tānaki ki heʻenau palaní. Te ke lava foki ʻo fakaafeʻi e kau akó ke fakafehokotaki e Sēnesi 39:9 ki he konga ko ʻení.

Fakakaukau taʻengatá

Mahalo ʻe ʻilo ʻe ha kau ako ʻe niʻihi naʻe lī ʻa Siosefa ki he fale fakapōpulá hili ʻene hola mei he ʻahiʻahi ke maumauʻi e fono ʻo e angamaʻá (vakai, Sēnesi 39:20). Ke tokoni ke nau vakai ki he founga naʻe tāpuekina ai ʻa Siosefa ʻi heʻene maʻu ha fakakaukau ʻoku taʻengatá, fakakaukau ke mamata ʻi he “Ko Hotau Vā fetuʻutaki mo e ʻOtuá” mei he taimi 8:41 ki he 9:42.

13:17

Ngaahi vitiō ke fili mei aí

“I Choose to Be Pure” (4:19). Ko e lea loto-tauʻatāina ha toʻu tupu tui fakalotu kehekehe ‘e toko ono ʻi he ʻuhinga kuo nau fili ai ke maʻa fakasekisualé. ʻE lava ke sio e kau akó ʻi he vitioó ʻo kumi e meʻa ʻoku ongo kiate kinautolu fekauʻaki mo e ʻuhinga ʻoku fili ai e toʻu tupu ko ʻení ke tauhi e fono ʻo e angamaʻá.

4:19

“Why is it important to live the law of chastity?” (5:42). Naʻe tali ʻe ʻEletā Teili G. Lenilani ‘o e Kōlomu ʻo e Kau ‘Aposetolo ʻe Toko Hongofulu Mā Uá mo hono uaifi ko Sisitā Lute L. Lenilaní ha fehuʻi ʻa ha finemui fekauʻaki mo e fono ʻo e angamaʻá.

5:43

“ʻAhiʻahiʻi ‘o Hoʻomou Tuí” mei he taimi 7:15 ki he 8:11. Ko e vahevahe ʻe ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e founga kuo talangofua ai hono kaungāmeʻá ki he fono ʻo e angamaʻá lolotonga ʻene aʻusia ʻa e ongoʻi femanakoʻaki ʻa e tangata mo e tangata pe fefine mo e fefiné.

14:56