Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Sēnesi 28: Ngaahi Fuakava mo e ʻEikí

“Sēnesi 28: Ngaahi Fuakava mo e ʻEikí,” Fuakava Motuʻá – Tohi Lēsoni ʻa e Faiako Seminelí (2026)

“Sēnesi 28: Ngaahi Fuakava mo e ʻEikí,” Fuakava Motuʻá – Tohi Lēsoni ʻa e Faiako Seminelí

Sēnesi 24–33: Lēsoni 31

Sēnesi 28

Ngaahi Fuakava mo e ʻEikí

Hili hono fakamanamanaʻi e moʻui ʻa Sēkopé ʻe hono taʻokete ko ʻĪsoá, naʻe fakahinohinoʻi ia ʻe heʻene ongomātuʻá ke fononga ki he fonua tupuʻanga ʻo ʻene faʻeé ke kumi hano uaifi. Lolotonga ʻene fonongá, naʻá ne maʻu ha meʻa-hā-mai naʻe tataki ai ke ne fakahoko ʻa e fuakava faka-ʻĒpalahamé mo e ʻOtuá. ʻE lava ke tokoni ʻa e lēsoni ko ʻení ke ongoʻi ʻe he kau akó ha loto-holi lahi ange ke fakahoko ha ngaahi fuakava mo e ʻOtuá ʻi he temipalé.

Teuteu ʻa e tokotaha akó: Fakakaukau ke fakaafeʻi e kau akó ke toe vakaiʻi e ngaahi talaʻofa ʻo e fuakava faka-ʻĒpalahamé (ʻĒpalahame 2:8–11). ʻE lava ke poupouʻi ʻa e kau akó ke nau feinga ke fakamatalaʻi ki ha mēmipa honau fāmilí ʻa e fuakava faka-ʻĒpalahamé pea mo e ʻuhinga ʻoku mahuʻinga ai kiate kinautolú.

Ngaahi ʻEkitivitī Ako ʻOku Ala Fakahokó

Ko e hā ʻoku totonu ke fakahoko ai ha ngaahi fuakavá?

Te ke lava ʻo kamata e kalasí ʻaki hano fakaʻaliʻali ha fakatātā ʻo ha temipale pea hivaʻi e hiva Palaimeli “Fie Siofia Ha Temipalé” (Tohi Hiva ʻa e Fānaú, 99).

Hili iá pea fakaʻaliʻali ʻa e fakakaukau ko ʻení. Fakaafeʻi e kau akó ke fili ʻa e fakamatala ʻoku moʻoni taha ʻiate kinautolú. Pe ko hoʻo vahevahe ʻa e konga ʻuluaki pē ʻo e fakakaukaú, pea ʻe lava ke fakaʻosi ʻe he kau akó ʻa e fakamatalá ʻi ha sētesi ʻe taha pe ua ʻokú ne fakahaaʻi totonu ʻenau ngaahi ongó mo e fakakaukaú.

ʻI heʻeku fakakaukau ki he ʻalu ki he temipalé ʻi he kahaʻú ke fai ha ngaahi fuakava mo e ʻOtuá, ʻoku:

ʻIkai ke u ʻilo ʻa e meʻa ke fakakaukau ki aí. ʻOku ʻikai ke u faʻa fakakaukau lahi ki ai.
ʻOku ou fiefia. ʻOku ou fakatetuʻa moʻoni ki he ʻaho ko iá.
ʻOku ou kiʻi manavasiʻi. ʻOku ʻikai ke u ʻilo ʻa e meʻa ke ʻamanaki ki aí.
ʻIkai ke u sio pe ko e hā hano mahuʻinga.

ʻOange ha taimi ki he kau akó ke hiki ʻenau ngaahi talí. Fakaafeʻi ke nau fekumi ki ha tataki fakalaumālie mei he Laumālie Māʻoniʻoní lolotonga e lēsoní. ʻE lava ke tokoniʻi kinautolu ʻe he Laumālie Māʻoniʻoní ke nau houngaʻia ʻi he mahuʻinga ʻo hono fakahoko ha ngaahi fuakava mo e ʻOtuá.

Misi ʻa Sēkopé

Fakaafeʻi ʻa e kau akó ke tohi ʻa e foʻi moʻoni taʻekakato ko ʻení ʻi heʻenau tohinoa akó. Te ke lava foki ʻo tohi ia ʻi he palakipoé pea tānaki atu ki ai lolotonga ʻa e lēsoní.

Te ke ako ʻi he lēsoni ko ʻení fekauʻaki mo Sēkope ʻi he Sēnesi 28. ʻI he Sēnesi 28:3–4, 12–20, naʻe fokotuʻu ai ʻe he ʻOtuá ha fuakava mo Sēkope, ʻa ia naʻe tali ʻe Sēkope. Te tau lava ʻo ako mei he fakamatala ko ʻení ha ngaahi lēsoni mahuʻinga fekauʻaki mo e mahuʻinga ʻo hono fai ha ngaahi fuakava mo e ʻOtuá. ʻI hoʻo ako ʻa e lēsoni ko ʻení, kumi ha ngaahi founga ke fakakakato ai ʻa e moʻoni ko ʻení: ʻI heʻetau fakahoko mo tauhi ha ngaahi fuakava mo e ʻOtuá, te Ne …

Kole ki he kau akó ke vahevahe ʻa e meʻa ʻoku nau manatuʻi fekauʻaki mo e fuakava naʻe fai ʻe he ʻEikí mo ʻĒpalahamé. Ki ha ngaahi fakaikiiki pau ʻi he fuakava ko ʻení, vakai, Lēsoni 23: “Sēnesi 12, 17.” Hili e vahevahe ʻa e kau akó, fakamatalaʻi fakanounou ʻa e palakalafi ko ʻení ʻi he lea pē ʻaʻau.

Neongo ko Sēkopé ko e mokopuna tangata ia ʻo ʻĒpalahame, mahalo naʻá ne ongoʻi hangē ʻokú ne tāumamaʻo mei he ngaahi tāpuaki ʻo e fuakava ʻa ʻĒpalahamé. Naʻe teʻeki mali ʻa Sēkope ʻi he fuakavá. ʻIkai ngata aí, naʻe hoko ʻa e fekeʻikeʻi ʻi he tuʻunga mo e tāpuaki ʻo e ʻuluaki fohá ke loto ai ʻa ʻĪsoa ke toʻo e moʻui ʻa Sēkopé (Sēnesi 27:41). Ke maluʻi ʻa Sēkope mo fakapapauʻi naʻá ne maʻu ʻa e faingamālie ke mali ʻi he fuakavá, naʻe fakahinohinoʻi ʻa Sēkope ʻe heʻene ongomātuʻá ke mavahe mei ʻapi ʻo fononga ʻi ha maile ʻe laungeau ki he fonua tupuʻanga ʻo ʻene faʻeé (vakai, Sēnesi 27:42–46; 28:1–2). ʻE ʻave ʻe he fononga ko ʻení ʻa Sēkope ke ne mamaʻo mei Kēnani, ʻa e fonua naʻe talaʻofa ange ʻe he tofiʻa ʻo e ʻuluaki fohá.

Lau ʻa e Sēnesi 28:10–15, ʻo kumi e meʻa naʻe aʻusia ʻe Sēkope ʻi ha pō ʻe taha lolotonga ʻene fonongá.

Fakakaukau ke fakaafeʻi e kau akó ke tā ha fakatātā ʻo e meʻa naʻe mamata ki ai ʻa Sēkope ʻi heʻene misí. ʻE lava ke vahevahe ʻe he kau akó ʻenau ʻū fakatātaá mo hanau hoa pea fakamatalaʻi ʻa e meʻa naʻe makehe kiate kinautolu mei he ngaahi vēsí.

Hili iá te ke lava ʻo fakaʻaliʻali ʻa e ʻīmisi ko ʻení ko ha fakatātā ʻe taha ʻo e meʻa-hā-maí.

The Old Testament prophet Jacob (Israel) lying asleep under a tree. A depiction of Jacob's dream of a ladder and angels descending from heaven is portrayed in the background.

Ko e hā ha ngaahi talaʻofa mei he fuakava faka-ʻĒpalahamé naʻe fakahoko ʻe he ʻEikí kia Sēkope ʻi he ngaahi veesi ko ʻení?
Ko e hā ha ngaahi talaʻofa kehe naʻe fakahoko ʻe he ʻEikí kia Sēkope ʻi he veesi 15?

Te ke lava ʻo fakaafeʻi e kau akó ke tānaki e ngaahi talaʻofa ko ʻení ki heʻenau foʻi moʻoní. ʻE lava ke ke lisi ha ngaahi tali ʻi he palakipoé. ʻE lava ke kau ʻi he ngaahi talí ʻa e fakataha mo kitautolu, maluʻi mo tauhi kitautolu, ʻikai mavahe meiate kitautolu.
ʻOkú ke pehē ko e hā naʻe fuʻu mahuʻingamālie ai e ngaahi talaʻofa ko ʻení kia Sēkope he taimi ko ʻení?

Ke tokoni ke mahino lelei ange ki he kau akó ʻa e ngaahi talaʻofa ko ʻení, fakaafeʻi ke nau fakakakato ʻa e ʻekitivitī ko ʻení ʻi ha ngaahi hoa pe kulupu iiki. Mahalo te ke fie poupouʻi e kau akó ke fekumi ha ngaahi potufolofola pe fakamatala kehe ʻokú ne fakapapauʻi mai e ngaahi talaʻofa ko ʻení.

Ako e ngaahi potufolofola mo e fakamatala ko ʻení, ʻo kumi e founga ʻoku nau fakaloloto ai hoʻo mahino ki he ngaahi talaʻofa naʻe fai ʻe he ʻEikí kia Sēkopé.

Sione 14:18

Ngāue 17:27 (fakatokangaʻi e Liliu ʻa Siosefa Sāmitá)

Naʻe pehē ʻe ʻEletā Teili G. Lenilani ʻo e Kōlomu ʻo e Kau ʻAposetolo ʻe Toko Hongofulu Mā Uá:

ʻI hoʻo ʻaʻeva ʻi he hala ʻo e fuakavá, mei he papitaisó ki he temipalé pea mo e toenga hoʻo moʻuí, ʻoku ou palōmesi atu ʻa e mālohi ke ke fakafepakiʻi ʻa e ngaahi tōʻonga angamaheni ʻo e māmaní—ʻa e mālohi ke ke ako, mālohi ke ke fakatomala pea fakamaʻa koe, mo e mālohi ke maʻu ʻa e ʻamanaki lelei, nonga, mo e fiefia ʻi hoʻo fehangahangai mo e ngaahi pole ʻo e moʻuí. ʻOku ou palōmesi atu te ke malu mo hoʻo fāmilí mei he ivi tākiekina ʻo e filí, tautautefito ki he taimi ʻokú ke ʻai ai ʻa e temipalé ke fakatefito ai hoʻo moʻuí. (“Ko Hono Maʻu ʻa e Mālohi ʻo e ʻOtuá ʻi he Ngaahi Fuakavá,” Liahona, Mē 2023, 37)

ʻE ala tokoni ke mahino ki he kau akó ʻoku ʻikai taʻofi kitautolu ʻe he fakahoko ʻo e ngaahi fuakavá mei he ngaahi faingataʻa ʻo e moʻuí. Ka neongo ia, naʻe akoʻi ʻe ʻEletā D. Toti Kulisitofasoni ʻoku ʻomi ʻe he ngaahi fuakava ko ʻení ʻa e “ʻamanaki lelei taha ʻoku tau maʻu ki hono taʻofi ʻo e ngaahi meʻa fakamamahi ʻoku malava ʻo taʻofí pea ʻi he tafaʻaki ʻe tahá ko hono ikunaʻi ʻo e ngaahi faingataʻa ʻo e moʻuí ʻoku ʻikai malava ʻo taʻofí” (“ʻUhinga e Hala ʻo e Fuakavá,” Liahona, Mē 2021, 117).

Ko e fē ʻi he ngaahi palōmesi ko ʻení ʻoku ʻuhingamālie taha kiate koé?

Ngaahi ongo ʻa Sēkope fekauʻaki mo ʻene aʻusiá

ʻE ala tokoni ke fakaʻaliʻali e potufolofola mo e ongo fehuʻi ko ʻení. Fakaafeʻi ʻa e kau akó ke lau mo aleaʻi ʻeni ʻi ha ngaahi hoa pe fanga kiʻi kulupu iiki. Fakakaukau ke vahevahe mo e kau akó ʻoku fakahaaʻi ʻe he ongo foʻi lea “manavahē” mo e “fakamanavaheé” naʻe ʻohovale ʻa Sēkope. ʻOku lelei ange ke liliu ʻa e “fakamanavaheé” ko e “ofo fakalaumālie.”)

Lau ʻa e Sēnesi 28:16–21, ʻo kumi e tali ʻa Sēkope ki he meʻa naʻá ne aʻusiá.

Ko e hā ha ngaahi ongo fekauʻaki mo e ʻEikí ʻokú ke vakai ʻoku fakahaaʻi ʻe Sēkopé?
ʻE fakaʻaiʻai fēfē nai ia ʻe he ngaahi ongo ko ʻení ke ne fai ha fuakava mo e ʻEikí?

Hili hono maʻu ʻe he kau akó ha taimi ke alēleá, te ke lava ʻo fakaafeʻi ha niʻihi ke vahevahe mo e kalasí ʻa e meʻa ne nau akó.

ʻI hono ʻoange ha faingamālie ki he kau akó ke fevahevaheʻaki ai ʻa e meʻa ʻoku nau akó, ʻe lava ke fakatupulaki ai ʻenau loto-falala ke kau ki he ngaahi fepōtalanoaʻaki ʻi he ongoongoleleí. Ki ha ako lahi ange ʻi he founga ke poupouʻi ʻa e kau akó ke vahevahe mo e niʻihi kehé, vakai, “Poupouʻi e kau akó ke vahevahe e ngaahi moʻoni ʻoku nau akó” ʻi he Fakatupulaki ʻa e Ngaahi Taukei ʻa e Faiakó. (Ko e Faiako ‘i he Founga ‘a e Fakamoʻuí [2022], 35)
Ko e hā ha ngaahi foʻi lea pe kupuʻi lea mei he veesi 16–21 ʻe lava ke fekauʻaki mo e ngaahi temipale ʻo onopōní?

ʻE lava ke ʻoatu ʻe he kau akó ha ngaahi lea hangē ko e “ko e moʻoni ʻoku ʻi heni ʻa [e ʻEikí]” (veesi 16); “ko e fale ʻo e ʻOtuá” mo e “matapā ʻo e langí” (veesi 17); “Peteli” (veesi 19), ʻa ia ʻoku ʻuhinga ki he “fale ʻo e ʻOtuá”; mo e “[fai] ʻa e fuakava” (veesi 20). Mahalo te ke loto ke fakaafeʻi ʻa e kau akó ke fakaʻilongaʻi e ngaahi kupuʻi lea ko ʻení ʻi heʻenau folofolá.

ʻE lava ke tānaki e kau akó ki heʻenau ngaahi fakatātā ʻo e meʻa-hā-maí ʻaki hono tohi ʻa e “fale ʻo e ʻOtuá,” “matapā ʻo e langí,” pe “temipalé” ʻi ha feituʻu ofi ki he taupotu taha ki lalo ʻo e tuʻungá.

Ko hono fai ha ngaahi fuakava mo e ʻEikí

Fakaafeʻi e kau akó ke fai ʻa e ʻekitivitī ko ʻení ʻi heʻenau tohinoa akó. ʻE ala tokoni ke talaange ki he kau akó te nau fakakaukau ki he ngaahi tali ko ʻení ʻi ha lēsoni he kahaʻú. ʻE fakaʻaongaʻi ʻe he kau akó ʻa e meʻa ʻoku nau tohi ʻi hení ke fakakakato ha ʻekitivitī ki he siví ʻi he Lēsoni 37: “Siviʻi Hono 2 Hoʻo Akó.”

Ke teuteuʻi e kau akó ke hiki ʻenau ngaahi talí, mahalo te ke fie vahevahe ʻa e palakalafi ko ʻení ʻi he lea pē ʻaʻau.

ʻI he mavahe ʻa Sēkope mei he ʻapi ʻo ʻene ongomātuʻá ʻiate ia peé, naʻá ne fai ha ngaahi fuakava mo e ʻOtuá. Naʻe talaʻofa ʻa e ʻOtuá te Ne ʻia Sēkope ʻo tokangaʻi mo maluʻi ia. ʻI ha ngaahi taʻu siʻi mei heni, te ke fehangahangai mo ha ngaahi fili lahi fekauʻaki mo e meʻa ke fai ʻi hoʻo moʻuí. ʻE kau ʻi he ngaahi fili ko ʻení ʻa e faingamālie ke fai ha ngaahi fuakava mo e ʻOtuá ʻi he temipalé. Fakakaukau ki he taimi ko ʻení ʻi ho kahaʻú ʻi hoʻo tali e ngaahi fehuʻi ko ʻení ʻi hoʻo tohinoa akó:

Ko e hā ha ngaahi tāpuaki kuo talaʻofa mai kuó ke aʻusia ʻi hoʻo feinga ke tauhi hoʻo ngaahi fuakava mo e ʻOtuá pe tokoni ʻi he temipalé?
Ko e hā ha ngaahi tūkunga te ke ala fehangahangai mo ia ʻi he kahaʻú ʻa ia ʻe ʻaonga kiate koe ʻa e tokanga mo e maluʻi ʻoku talaʻofa ʻe he ʻOtuá ki he kakai ʻoku nau fai ha ngaahi fuakava mo Iá?

Fakakaukau ke vahevahe hoʻo fakamoʻoni ki he founga kuó ke aʻusia ai e ngaahi talaʻofa fekauʻaki mo hono fakahoko mo tauhi e ngaahi fuakava mo e ʻEikí.

Ngaahi Maʻuʻanga Tokoni Kehé

Ko e hā ʻe lava ke fakafofongaʻi ʻe he tuʻunga naʻe mamata ki ai ʻa Sēkopé?

Naʻe pehē ʻe Palesiteni Melioni G. Lomenī:

Ko e ngaahi fuakava naʻe fakahoko [ʻe Sēkope] mo e ʻEikí ko e ngaahi foʻi sitepu ia ʻi he tuʻungá naʻe pau ke ne kaka ai kae lava ke ne maʻu e ngaahi tāpuaki ne talaʻofa angé—ʻa e ngaahi tāpuaki ʻe lava ai ke ne hū ki langi ʻo feohi mo e ʻEikí. (“Temples—the Gates to Heaven,” Ensign, Mar 1971, 16)

Ko e hā ha ngaahi tāpuaki kehe ki hono fakahoko mo tauhi ʻo e ngaahi fuakavá?

Naʻe vahevahe ʻe Palesiteni Lāsolo M. Nalesoni ʻo pehē:

Ko kinautolu ʻoku nau tauhi ʻenau ngaahi fuakava mo e ʻOtuá te nau hoko ko ha mālohi ʻokú ne fakafepakiʻi ʻa e angahalá! Ko kinautolu ʻoku nau tauhi ʻenau ngaahi fuakavá, te nau maʻu ʻa e mālohi ke tekeʻi ʻa e ivi tākiekina maʻu pē ʻo e māmaní. …

ʻOku liliu hotau vā fetuʻutaki mo e ʻOtuá ʻo taʻengata ʻi heʻetau fakahoko ha fuakava mo Iá. ʻOkú ne tāpuekina kitautolu ʻaki ha ʻofa mo e ʻaloʻofa lahi ange. ʻOku tokoni ki hotau tuʻunga totonú mo e founga ʻe tokoniʻi ai kitautolu ʻe he ʻOtuá ke tau aʻusia e tuʻunga te tau lava ʻo aʻusiá. (“Ko e Fuakava Taʻengatá,” Liahona, ʻOkatopa 2022, 8, 10)

Naʻe akonaki ʻa ʻEletā Teili G. Lenilani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

13:10

ʻI hono fakahoko mo tauhi ʻo e ngaahi fuakava fakatemipalé, ʻoku tau ako lahi ange ai fekauʻaki mo e ngaahi taumuʻa ʻa e ʻEikí pea maʻu hono kakato ʻo e Laumālie Māʻoniʻoní. ʻOku tau maʻu ha fakahinohino ki heʻetau moʻuí. ʻOku tau hoko ko ha kau ākonga moʻui mateaki ange koeʻuhí ke ʻoua naʻa tau hoko ko ha kakai ʻoku hokohoko atu ʻi he taʻeʻilo. Ka ʻoku tau moʻui ʻaki ha fakakaukau ʻoku taʻengatá pea ʻoku fakalotoa ange ai kitautolu ke tau tokoni ki he ʻOtuá mo e niʻihi kehé. ʻOku tau maʻu ha ivi malava lahi ange ke fakakakato ʻetau ngaahi taumuʻa ʻi he moʻui fakamatelié. ʻOku maluʻi kitautolu mei he koví, pea ʻoku tau maʻu ha mālohi lahi ange ke tekeʻi ʻa e ʻahiʻahí pea mo fakatomala ʻi he taimi te tau fakahoko ai ha fehalaākí. ʻI he taimi te tau tō aí, ʻoku tokoni ʻa e manatu ki heʻetau ngaahi fuakava mo e ʻOtuá ke tau toe foki ai ki he halá. ʻI heʻetau fehokotaki ki he mālohi ʻo e ʻOtuá, ʻoku tau hoko ai … ʻo malava ke fakafepakiʻi ʻa e taʻau ʻo e māmaní, ʻi he toenga ʻo ʻetau moʻuí pea aʻu ki he nofo taʻengatá. ʻE iku pē ʻo liliu hotau ngaahi ikuʻangá koeʻuhí he ʻoku fakatau ʻa e hala ʻo e fuakavá ki he hakeakiʻí mo e moʻui taʻengatá. (“Ko Hono Maʻu ʻa e Mālohi ʻo e ʻOtuá ʻi he Ngaahi Fuakavá,” Liahona, Mē 2023, 36)

Ko e hā e ʻuhinga ʻoku mahuʻinga ai ʻa e ngaahi fuakavá?

Naʻe fakamatala ʻa ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

15:4

ʻE lava ke pehē ʻe ha niʻihi, “Te u lava pē ke fakahoko ha ngaahi fili lelei neongo pe te u papitaiso pe ʻikai; ʻoku ʻikai fiemaʻu ia ke u fakahoko ha ngaahi fuakava peá u toki hoko ko ha tokotaha lavameʻa.” Ko hono moʻoní, ʻoku tokolahi ha niʻihi, neongo ʻoku ʻikai ke nau ʻi he hala ʻo e fuakavá, ka ʻoku nau fakafōtunga ʻi ha founga ʻoku hoʻata atu ai ʻa e ngaahi fili mo e ngaahi tokoni ʻa kinautolu ʻoku ʻi he hala ʻo e fuakavá. ʻE lava pē ke ke pehē ʻoku nau utu e ngaahi tāpuaki ʻo e ʻaʻeva ʻi ha hala “ʻoku ʻi ai maʻu pē ʻa e fuakavá”. Ko e hā leva e faikehekehe ʻo e hala ʻo e fuakavá?

Ko hono moʻoní, ko ha faikehekehe makehe mo taʻengata ia. ʻOku kau ai e natula ʻo ʻetau talangofuá, ko e tuʻunga ʻo e talaʻofa ʻa e ʻOtuá kiate kitautolú, ko e tokoni fakalangi ʻoku tau maʻú, ko e ngaahi tāpuaki ʻoku felāveʻi mo e tānaki fakataha ko ha kakai ʻo e fuakavá kae mahuʻinga tahá, ko hotau tofiʻa taʻengatá. (“ʻUhinga e Hala ʻo e Fuakavá,” Liahona, Mē 2021, 117)

Ngaahi ʻEkitivitī Fakalahi ki he Akó

Founga ʻe taha ke kamata ʻaki ʻa e lēsoní

Te ke lava ʻo kamata e kalasí ʻaki haʻo tā ha kakai ʻe toko ua ʻi he palakipoé. Te ke lava ʻo fakahingoa kinaua. Tohiʻi ʻi lalo ʻi ha toko taha ʻa e, “Ongo mālohi fekauʻaki mo e mahuʻinga ʻo ʻene ngaahi fuakava mo e ʻOtuá.” Tohiʻi ʻi lalo he tokotaha hono uá, “Ongoʻi ʻoku ʻikai fuʻu mahuʻinga e ngaahi fuakavá.”

ʻOkú ke pehē ko e hā ka ongoʻi ai ʻe he tokotaha takitaha ʻa e meʻa ʻoku nau ongoʻi fekauʻaki mo e ngaahi fuakavá?
ʻE liliu fēfē ʻe heʻena ngaahi ongo fekauʻaki mo e ngaahi fuakavá hona kahaʻu vave maí mo hona kahaʻu taʻengatá?

“Ofi Hoku ʻOtuá”

ʻOku fakatefito ʻa e himi “Ofi Hoku ʻOtuá” (Ngaahi Himi, fika 49) ʻi he ngaahi meʻa naʻe hoko ʻi he Sēnesi 28. Fakakaukau ke hivaʻi ʻa e himi ko ʻení ʻi he kamataʻanga ʻo e kalasí pe ʻi ha taimi kehe ʻi he kalasí. ʻE ala ʻaonga foki ki he kau akó hono vakaiʻi e fakalea ʻo e himí pea fakafekauʻaki kinautolu ki he aʻusia ʻa Sēkopé. Te ke lava ʻo fakaafeʻi e kau akó ke nau muimui ʻi he ngaahi leá ʻi heʻenau fanongo ki hono hivaʻi ko ʻení.

5:24

Ko e fehokotaki ʻa e ngaahi ouaú mo e ngaahi fuakavá

ʻE ala ʻaonga ki hoʻo kau akó ha mahino kiate kinautolu ʻa e fehokotaki ʻi he ngaahi ouaú mo e ngaahi fuakavá. Fakakaukau ke fili ha ouau, aleaʻi ʻa e ngaahi ngāue fakatuʻasino ʻoku kau ki aí, pea feinga ke ʻiloʻi ʻa e ngaahi fuakava ʻoku ʻalu fakataha mo iá. Hangē ko ʻení, ʻi he ouau ʻo e papitaiso ʻi he fakaukú, ʻoku palōmesi ha taha te ne tuku hifo ʻene angahalá ʻo fakafou ʻi he fakatomalá pea hoko ko ha ākonga fuakava ʻo Sīsū Kalaisi. Hili iá te ke lava ʻo lau mo aleaʻi ʻeni.

Naʻe akoʻi ʻe Palesiteni Lāsolo M. Nalesoni e kau taki ʻo e Siasí fekauʻaki mo e taumuʻa ʻo e ngaahi ouaú:

Kuo hanga maʻu pē ʻe he [ʻOtuá] pea te Ne hanga maʻu pē ʻo fakahinohinoʻi ʻa e founga ke fakahoko ai ʻa e ngaahi ouaú koeʻuhí ke lava ʻo mahino kiate kitautolu mo moʻui ʻaki ʻetau ngaahi fuakava mo Iá. (fakataha fakatakimuʻa ʻo e Konifelenisi Lahi Fakavaeuataʻu Hono 189, 2 ʻOkatopa 2019)

ʻE tokoniʻi fēfē kitautolu ʻe he ngaahi ouaú ke mahino mo tau moʻui ʻaki ʻetau ngaahi fuakavá?

Ko e mahuʻinga ʻo e ngaahi fuakavá

Kapau ʻe ʻaonga ki hoʻo kau akó ha toe fealēleaʻaki fekauʻaki mo e mahuʻinga ʻo e ngaahi fuakava mo e ʻOtuá, fakakaukau ke vahevahe ʻa e lea meia ʻEletā D. Toti Kulisitofasoni ʻi he Ngaahi Maʻuʻanga Tokoni Kehé.

Hili iá, te ke lava ʻo vahevahe e kau akó ki ha ngaahi kulupu tautau toko nima. ʻOku ʻi ai ha konga ʻe nima ʻi he tatau kakato ʻo e lea ʻa ʻEletā Kulisitofasoní. Te ke lava ʻo ʻoange ha tatau ʻo e konga takitaha ki he kau mēmipa ʻo e kulupú koeʻuhí ke maʻu ʻe he tokotaha kotoa pē ha konga kehekehe ʻo e leá. Te ke lava ʻo fakanounou ʻa e ngaahi konga ʻoku lōloa angé. Fakaafeʻi e kau akó ke ako e konga ne vahe angé pea teuteu ke vahevahe mo ʻenau kulupú e meʻa ne nau ako fekauʻaki mo e mahuʻinga ʻo e ngaahi fuakavá.

Pe ko hoʻo vahevahe ʻa e kalasí kotoa ki ha kulupu ʻe nima, pea te ke lava ʻo vahe ki he kulupu takitaha ha konga kehekehe ʻo e leá.

ʻE lava ke ke maʻu e lea ʻa ʻEletā Kulisitofasoní heni.