Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Sēnesi 24: Ko e Tāpuaki ʻo e Mali Fuakavá

“Sēnesi 24: Ko e Tāpuaki ʻo e Mali Fuakavá,” Fuakava Motuʻá – Tohi Lēsoni ʻa e Faiako Seminelí (2026)

“Sēnesi 24: Ko e Tāpuaki ʻo e Mali Fuakavá,” Fuakava Motuʻá – Tohi Lēsoni ʻa e Faiako Seminelí

Sēnesi 24–33: Lēsoni 29

Sēnesi 24

Ko e Tāpuaki ʻo e Mali Fuakavá

Neongo naʻe ngali taʻemalava ʻa e foʻi fakakaukau ʻo ha mali taʻengatá kia ʻAisake, ka naʻe teuteu ʻe he ʻEikí ha founga maʻana. Te tau lava foki ʻo falala ki he ʻEikí mo falala te Ne lava ʻo tokoniʻi kitautolu ke tau teuteu pea maʻu ʻi ha ʻaho ʻa e ngaahi tāpuaki ʻo e mali taʻengatá. ʻE lava ke tokoni ʻa e lēsoni ko ʻení ke mahino ki he kau akó ʻa e mahuʻinga ʻo e mali taʻengata mo fuakavá ʻi he palani ʻa e Tamai Hēvaní.

Teuteu ʻa e tokotaha akó: Fakaafeʻi e kau akó ke hiki ha fehuʻi ʻoku nau maʻu pe maʻu ʻe ha taha ʻoku nau ʻilo fekauʻaki mo e mali temipalé pea omi ki he kalasí ʻi he faʻa lotu ʻo fekumi ki ha tali ki he fehuʻi ko iá.

Ngaahi ʻEkitivitī Ako ʻOku Ala Fakahokó

mali temipalé

Koeʻuhí ʻe lava ke faingataʻa ki ha niʻihi ʻo e kau akó ke talanoa fekauʻaki mo e malí, fakalaulauloto ʻi he faʻa lotu ki ha ngaahi founga ke teuteuʻi mo akoʻi ai e kaveingá ni ʻi he ongoʻingofua mo e ʻofa.

Ke teuteuʻi e kau akó ke aleaʻi e tefito ʻo e nofo-malí, fakakaukau ke fakaʻaliʻali e fakatātā ʻi he kamataʻanga ʻo e lēsoní, fakataha mo e tūkunga ko ʻení.

Fakakaukauloto ʻoku pehē ʻe ha kaungāmeʻa: “ʻOku mahuʻinga moʻoni nai ke mali ʻi he temipalé? ʻOku faingataʻa ke u fakakaukau te u mali ai; ʻoku ngali taumamaʻo ia kiate au. ʻOku ou fie kumi pē ha taha ʻoku ou ʻofa aí.”

Ko e hā ha ngaahi fakakaukau ʻe ala maʻu ʻe hoʻo kaungāmeʻá fekauʻaki mo e mali temipalé?
Ko e hā ha ngaahi moʻoni ʻe ala mahino ki ho kaungāmeʻá fekauʻaki mo e ʻOtuá mo e mali temipalé?

Fakaafeʻi ʻa e kau akó ke nau tali ʻa e ongo fehuʻi ko ʻení ʻi heʻenau tohinoa akó.
Ko e hā hoʻo ongo fakataautaha fekauʻaki mo e mali temipalé?
Ko e hā ha ngaahi fehuʻi pe hohaʻa ʻokú ke maʻu fekauʻaki mo e mali temipalé?

ʻI hoʻo ako ʻa e Sēnesi 24, fakaafeʻi ʻa e Laumālié ke tokoni atu ke mahino kiate koe ʻa e mahuʻinga ʻo e mali temipalé. Fekumi ki ha fakakaukau ki he founga ʻe lava ke tokoniʻi ai koe ʻe he ʻEikí ke ke maʻu ha mali temipale ʻoku taʻengatá.

Ko ha fononga mahuʻinga

Ke tokoni ke mahino lelei ange ki he kau akó ʻa e puipuituʻa ʻo e Sēnesi 24, fakaafeʻi kinautolu ke vakai ki he mape ko ʻení. Kapau ʻoku nau maʻu e tatau ʻa e Siasí ʻo e Tohi Tapu ʻa Kingi Sēmisí, te nau lava ʻo maʻu ia ko e mape fika 9, “Ko e Māmani ʻo e Fuakava Motuʻá,” ʻi he konga ki he Ngaahi Mape ʻo e Tohi Tapú. Lau pe fakamatalaʻi fakanounou ʻa e palakalafi ko ʻení, pea fakaafeʻi e kau akó ke kumi ʻa e ngaahi feituʻu ʻokú ke lave ki aí ʻi he mapé. Kapau ʻe fiemaʻu, fakaʻaliʻali ki he kau akó ʻa e feituʻu ʻoku tuʻu ai ʻa Kēnani (fika 13) mo Hālaní (fika 8).

Naʻe nofo ʻa ʻĒpalahame mo hono fāmilí ʻi Kēnani ʻi he lotolotonga ʻo ha kakai naʻa nau lotu ki he ngaahi ʻotua tamapuá mo fai ha ngaahi tōʻonga angahala kehe. Naʻe ʻi ai ha kāinga ʻo ʻĒpalahame naʻe nofo ʻi Hālani, ʻa ia naʻe nofo ai ʻa ʻĒpalahame kimuʻa.

Lau ʻa e Sēnesi 24:1–4, 7–9, ʻo kumi e ngaahi fakahinohino naʻe fai ʻe ʻĒpalahame ki heʻene tamaioʻeikí fekauʻaki mo hono foha ko ʻAisaké.

Ko e hā naʻe fakahinohinoʻi e tamaioʻeiki ʻa ʻĒpalahamé ke ne faí?
Ko e hā ʻokú ke vakai ki ai ʻi he veesi 7 ʻokú ne fakahaaʻi naʻe tokanga ʻa e ʻEikí pe ko hai naʻe mali mo ʻAisaké?

ʻAi ke fakaʻaongaʻi ʻe he kau akó ʻa e meʻafua ʻi he mapé ke fakapapauʻi pe ko e maile pe kilomita ʻe fiha ʻa e fononga ko ʻení. Tokoni ke ʻilo ʻe he kau akó naʻe kole ʻe ʻĒpalahame ki heʻene tamaioʻeikí ke fononga ʻi ha meimei maile ʻe 1,200 (kilomita ʻe 1,931) pea toe foki ke kumi ha uaifi maʻa ʻAisake.
ʻOkú ke pehē ko e hā naʻe taau ai mo e feilaulau ke ʻoua naʻa mali ʻa ʻAisake mo ha taha ʻo e ngaahi ʻofefine Kēnaní?

ʻO ka fiemaʻu, fakamatalaʻi ange ʻi he taimi naʻe fokotuʻu ai ʻe he ʻOtuá ʻEne fuakava mo ʻĒpalahame mo Selá, naʻá Ne folofola ʻe tauhi ʻe he hako ʻo ʻĒpalahamé ʻa e fuakava mahuʻinga ko ʻení mo Ia kapau te nau mali ʻo fakatatau ki Heʻene fonó. ʻE fiemaʻu ke nau fakahoko ʻa e “fuakava foʻou mo taʻengata ʻo e malí” (vakai, Tokāteline mo e Ngaahi Fuakava 131:1–4). ʻOku tau fakahoko he ʻahó ni ʻa e fuakava ko ʻení ʻi he taimi ʻoku tau mali ai ʻi he ngaahi temipale māʻoniʻoni ʻo e ʻEikí.

Naʻe ʻikai ha taha ʻi he fonua ko Kēnaní naʻe lava ke mali mo ʻAisake ʻi he fuakavá. ʻE toki lava pē ke fakatolonga ʻa e fuakavá mo ha taha mei he fāmili ʻo ʻĒpalahame ʻi Hālaní.

Ko e tokoni ʻa e ʻEikí

Fakaʻaliʻali ʻa e fakatātā ko ʻení, pea fakaafeʻi e kau akó ke vahevahe ʻa e meʻa ʻoku nau ʻilo fekauʻaki mo e fakamatala ʻi he fakatātaá. Te ke lava ʻo lau pe fakamatalaʻi fakanounou ʻa e palakalafi ko ʻení ʻo ka fiemaʻu.

The Old Testament figure Rebekah pouring water from a jug into a cup. The cup is held by the servant of Abraham. The servant is depicted seeking a wife for Isaac, the son of Abraham.

Naʻe fononga mamaʻo ʻa e tamaioʻeiki ʻa ʻĒpalahamé ki Hālani ke kumi ha uaifi maʻa ʻAisake. Lolotonga ʻene tatali ʻi ha vaitupú, naʻá ne lotu ʻo kole ki he ʻOtuá ke ne lava ʻo ʻiloʻi pe ko hai ʻe finangalo e ʻEikí ke ne kumí.

Te ke lava ʻo fakaafeʻi e kau akó ke lau e ngaahi veesi ko ʻení fakafoʻituitui, tauhoa, pe fakakalasi.

ʻI he ʻekitivitī ʻi laló, mahalo ʻe tokoni ke fakamatalaʻi ange ko e huafa “Sihova” ʻi he Liliu ʻa Kingi Sēmisi ʻo e Tohi Tapú ʻoku faʻa tohi ia ko e ʻEiki. ʻI he tafaʻaki ʻe tahá, ʻe lava ke ʻuhinga ʻa e ongo foʻi lea “ʻEikí” pe “ʻeikí”, ki ha taha ʻokú ne maʻu ʻa e mālohi, mafai, pe ivi tākiekina, hangē ko ha ʻeiki pe pule. (Vakai, Bible Dictionary, “Jehovah”)

Lau ʻa e Sēnesi 24:12–27, ʻo kumi e founga naʻe tokoniʻi ai ʻe he ʻEikí e tamaioʻeiki ʻa ʻĒpalahamé ke maʻu ha uaifi maʻa ʻAisaké. ʻE ala tokoni ke fakaʻilongaʻi ʻa e taimi ʻokú ke sio ai ki he foʻi lea ko e Sihova.

Ko e hā e meʻa naʻá ke maʻú?

Fakakaukau ke fakamatalaʻi fakanounou ʻa e toenga ʻo e Sēnesi 24 ʻaki hano vahevahe ʻa e palakalafi ko ʻení.

Naʻe fetaulaki e tamaioʻeiki ʻa ʻĒpalahamé mo e tuongaʻane mo e tamai ʻo Lepeká. Naʻá ne fakamatalaʻi ange ko hai ia pea mo e founga naʻe tokoniʻi ai ia ʻe he ʻEikí ke kumi ʻa Lepeká. ʻI he ʻaho hono hokó, naʻe fili ʻa Lepeka ʻi he loto-toʻa ke foki mo e tamaioʻeikí pea ke fakamaʻu ia kia ʻAisake ʻi he fuakava ʻo e mali taʻengatá (vakai, Sēnesi 24:29–67).

Ko e hā e meʻa ʻokú ke ako fekauʻaki mo e ʻEikí ʻo fakafou ʻi he fakamatala kia ʻAisake mo Lepeka pea mo ʻena mali taʻengatá?

ʻE lava ke tali ʻa e kau akó ʻaki ha ngaahi moʻoni kehekehe, kae fakapapauʻi ʻoku mahino kiate kinautolu ʻe tokoniʻi kitautolu ʻe he ʻEikí ʻi heʻetau feinga ke fakahoko e fuakava ʻo e mali taʻengatá.
ʻE lava fēfē ke tokoniʻi ʻe he ʻEikí ha taha ʻoku fāifeinga ke mali taʻengata ka ʻoku hohaʻa he ʻikai ke ne teitei maʻu ʻa e tāpuaki ko ʻení?
‘Okú ke pehē ko e hā e ʻuhinga ʻoku mahuʻinga fau ai ki he ʻEikí ʻa e mali taʻengatá?

Ko e hā e ʻuhinga ʻoku mahuʻinga ai ʻa e mali taʻengatá?

Ke tokoni ke mahino lelei ange ki he kau akó e mahuʻinga ʻo e mali taʻengatá, fakaafeʻi kinautolu ke tā ʻi heʻenau tohinoa akó ha fakatātā faingofua ʻo ha temipale, hangē ko ia ʻi laló.

Simple drawing of the Salt Lake Temple with a mountain behnd it

Hiki ʻi lalo ʻi ho tā fakatātā ʻo e temipalé ha fehuʻi ʻe lava ʻo tokoni ke mahino lelei ange kiate koe ʻa e ngaahi moʻoni kuó ke ako he ʻaho ní. ʻE lava ke hoko ʻeni ko ha fehuʻi pē ʻaʻau, ko ha fehuʻi mei ha taha ʻokú ke ʻilo, pe ko ha taha ʻo e ngaahi meʻá ni:

Ko e hā ʻoku mahuʻinga ai ʻa e mali taʻengatá?
Ko e hā ha ngaahi tāpuaki te u lava ʻo maʻu ʻi heʻeku mali ʻi he temipalé pea feinga ke tauhi e ngaahi fuakava ko iá?
ʻE tokoniʻi fēfē au ʻe he ʻEikí ʻi ha ʻaho ke u maʻu ʻa e ngaahi tāpuaki ʻo e mali taʻengatá?

Ke tokoni ke tali hoʻo fehuʻí, fekumi ʻi ha ngaahi maʻuʻanga tokoni kehekehe ʻa e Siasí, hangē ko ʻení:

Ngaahi potufolofola fakataukei fakatokāteliné (Sēnesi 2:24; 1 Kolinitō 11:11; Tokāteline mo e Ngaahi Fuakava 131:1–4)
Ko e laʻipepa tufa “Mali Taʻengatá”
“Malí” mo e ngaahi fakamatala felāveʻi mo ia ʻi he Fakahinohino ki he Ngaahi Folofolá, pe Ngaahi Tefitó mo e Ngaahi Fehuʻí ʻi he Gospel Library
Ngaahi kupuʻi lea hangē ko e “mali fuakavá” pe “mali temipalé” ʻi he fekumi ʻi he Gospel Library

Fakaafeʻi e kau akó ke vahevahe mo e kalasí ʻa e meʻa ne nau akó.

Fakakaukau fakatāutahá

Fakakaukau ki he tūkunga mei he kamataʻanga ʻo e kalasí. Tali ‘a e ngaahi fehuʻi ko ‘ení ‘i hoʻo tohinoa ako folofolá:

Te ke tali fēfē ki he fehuʻi ho kaungāmeʻá fekauʻaki mo e ʻuhinga ʻoku mahuʻinga ai ʻa e mali temipalé?
Ko e hā e meʻa naʻá ke ako he ʻahó ni fekauʻaki mo e Tamai Hēvaní pe ko Sīsū Kalaisi te ne lava ʻo ʻoatu ha ʻamanaki lelei ʻi hoʻo feinga ke fakaafeʻi ʻa e ngaahi tāpuaki ʻo e mali temipalé?

Fakaafeʻi ha kau ako ‘oku nau loto-lelei ke nau vahevahe ‘a e meʻa ne nau tohí.

Fakakaukau ke vahevahe hoʻo fakamoʻoni ki he mahuʻinga ʻo e mali fuakavá, pea poupouʻi hoʻo kau akó ke nau kamata he taimí ni ke teuteu ki ai.

Ngaahi Maʻuʻanga Tokoni Kehé

Ko e hā ha ngaahi tāpuaki kehe ʻo ha mali fuakava?

Naʻe vahevahe ʻe Sisitā Kilisiteni M. ʻOakesi, ko e uaifi ʻo Palesiteni Tāleni H. ʻOakesí, ʻo pehē:

38:47

Ko e malí ko ha meʻaʻofa. ʻOku ʻikai ngata pē ʻi hono ʻomi ʻe he malí ʻa e faingamālie ki ha fānaú, ka ʻokú ne ʻomi ʻa e faingamālie mo e ʻuhinga ke kamataʻi ai ha fonongaʻanga ʻo e tupulaki fakatahá.

ʻOku tau ako ke feilaulau mo tokoni ki he lahi taha te tau lavá ʻi ha ngaahi founga kehekehe. … ʻOku ou ako ʻa e founga ke ʻofaʻi mo tokoniʻi lelei ange ai hoku husepānití; ʻoku ou maʻu ha kaungāmeʻa ke kakata mo tangi fakataha mo ia. ʻOku ʻi ai haʻaku taukapo, faiako, mo ha tokotaha fakakaekae ʻokú ne tokoniʻi foki au. Ko e nofo-malí ko ha faingamālie ia ke ako ai ʻa e fetuʻutakí mo e fakakaukaú. ʻOku fakaʻau ke toe lelei ange ʻa e moʻuí ʻi he fehokotaki ʻetau nofo-malí mo ha meʻa ʻoku maʻongoʻonga ange ʻiate kitautolu pea ofi ange ki hotau Fakamoʻuí. Ko e meʻa ia ʻoku mau fiemaʻu maʻamoutolú. (“Taukaveʻi ʻa e Moʻoní” [fakataha lotu fakaemāmani lahi maʻá e kakai lalahi kei talavoú, 21 Mē, 2023], Gospel Library)

Ko e hā ʻoku fakatupu hohaʻa ai ke fakatoloi ʻa e malí?

Naʻe akoʻi ʻe Palesiteni Tāleni H. ʻOakesi ʻo pehē:

Fakakaukau ki he meʻa ʻoku mole mei he Kāingalotu kei talavou ʻo e Siasí ʻi he taimi ʻoku nau fakataumuʻa ai ke fakatoloi ʻenau malí ʻi ha vahaʻataimi lōloá: ʻoku mole ʻa e ngaahi faingamālié pea fakatoloi mo e ngaahi tāpuakí. ʻOku ʻuhinga ʻeni ki ha fakatoloi ʻi he tupulaki fakataautaha mahuʻinga ʻoku hoko ʻi he vā fetuʻutaki ʻo ha husepāniti mo ha uaifi, ʻa e tupulaki ʻi he ngaahi ʻulungaanga hangē ko e feilaulaú mo e loto-fakatōkilaló. ʻOku ʻuhinga ia ki ha hōloa ʻi he ngaahi faingamālie ke ngāue fakataha ai ke langa hake ʻa e puleʻanga ʻo e ʻOtuá. Kae hiliō aí, ʻoku ʻuhinga ia ʻoku tokosiʻi ange ʻa e fānau ʻoku fanauʻi mai ke nau tutupu hake mo e ngaahi tāpuaki ʻo e ongoongoleleí. (“Taukaveʻi ʻa e Moʻoní” [fakataha lotu fakaemāmani lahi maʻá e kakai lalahi kei talavoú, 21 Mē 2023], Gospel Library)

Fēfē kapau te u hohaʻa naʻa ʻikai ke u maʻu ha fāmili taʻengata?

Naʻe pehē ʻe Palesiteni Henelī B. ʻAealingi ʻo e Kau Palesitenisī ʻUluakí:

Naʻe akonaki mai ʻe ha palōfita ʻa e ʻOtuá kiate au ʻo u maʻu ai ha nonga. Naʻá ku manavasiʻi naʻa hoko e ngaahi fili ʻa e niʻihi kehé ke taʻemalava ai ke nofo fakataha homau fāmilí ʻo taʻengata. Naʻá ne pehē, “ʻOkú ke hohaʻa ki he palopalema hala. Moʻui taau pē mo e nāunau fakasilesitialé, pea ʻe toe fakaʻofoʻofa ange ʻa e faʻunga ʻo e fāmilí ʻi he meʻa ʻokú ke lava ʻo mafakakaukauʻí.”

… Te mou lava he taimí ni ʻo ongoʻi pea te mou ongoʻi ʻi he maama ka hoko maí ʻa e ʻofa fakafāmili ʻoku finangalo hoʻomou Tamaí mo Hono ʻAlo ʻOfaʻangá ke mou maʻú, ʻi he mālohi ʻo e ngāue ʻa e Fakalelei ʻa Sīsū Kalaisí pea mo e fakahinohino ʻa e Laumālie Māʻoniʻoní.

ʻOku ou fakamoʻoni ko e taimi te mou moʻui taau ai mo e nāunau fakasilesitialé, ʻe ʻamoutolu ʻa e talaʻofa fakaepalōfitá “ʻe fakaʻofoʻofa ange ʻa e faʻunga ʻo e fāmilí ʻi he meʻa ʻoku [mou] lava ʻo mafakakaukauʻí.” (“Ko e ʻAmanaki Leleiʻanga ʻo e ʻOfa ʻa e Fāmili Taʻengatá,” Liahona, ʻAokosi 2016, 5)

Ko e fē feituʻu te u lava ʻo ako lahi ange ai fekauʻaki mo e tuʻunga ʻo e Siasí ʻi he mali ʻa e tangata mo e tangata pe fefine mo e fefiné?

Ngaahi Tefitó mo e Ngaahi Fehuʻí, “Same-Sex Marriage,” Gospel Library
Tohi Tuʻutuʻuni Fakakātoa: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 38.6.16, Gospel Library

Ngaahi ʻEkitivitī Fakalahi ki he Akó

Vitiō fekauʻaki mo e mali temipalé

Ke tokoni ke mahino lelei ange ki he kau akó pe ʻoku fēfē ʻa e mali temipalé, fakakaukau ke fakaʻaliʻali ange ʻa e vitiō “What Is a Temple Wedding Like?” (1:22).

1:22

Teuteu ʻi hoʻo kei talavoú ki he mali fuakavá

Ke tokoni ke ʻilo ʻe he kau akó ʻa e founga ʻe lava ke nau teuteu ai he ʻahó ni ki ha mali fuakavá, te ke lava ʻo vahevahe ʻa e aʻusia mo e ngaahi fehuʻi ko ʻení.

Naʻe manatu ʻa Brother Teti R. Kalisitā, Palesiteni Lahi mālōlō ʻo e Lautohi Faka-Sāpaté, ki he talanoa ko ʻení mei heʻene kei talavoú:

9:40

ʻI hoku taʻu 17 nai, naʻá ku tūʻulutui ʻi hoku veʻe mohengá ʻo fai ʻeku lotu efiafí. Naʻe ʻikai te u ʻiloʻi, naʻe tuʻu ʻeku fineʻeikí ʻi he veʻe matapaá. ʻI heʻene ʻosí, naʻá ne pehē mai, “Teti, ʻokú ke kole ki he ʻEikí ke tokoniʻi koe ke maʻu ha uaifi lelei?”

Naʻá ku ʻohovale ʻaupito ʻi heʻene fehuʻí. Naʻe taumamaʻo ia mei heʻeku fakakaukaú. Naʻá ku fakakaukau au ki he pasiketipoló mo e akó. Ko ia, naʻá ku tali ange, “ʻIkai,” peá ne tali mai, “foha, ʻoku totonu ke ke fai ia, he ko e fili mahuʻinga taha ia te ke faí.” Ne tō mamafa e ngaahi lea ko iá ki hoku lotó, ko ia, ʻi he taʻu ʻe ono hoko hokó naʻá ku lotua ai ke tokoniʻi au ʻe he ʻOtuá ke u maʻu ha uaifi lelei. ʻIo, pea naʻá ne tali moʻoni ʻa e lotu ko iá. (“Mātuʻá: Tefitoʻi Kau Faiako ʻo e Ongoongoleleí ki Heʻenau Fānaú,” Liahona, Nōvema 2014, 33)

ʻOkú ke pehē ko e hā ʻoku hoko ai hono maʻu ha hoa mali leleí ko e taha ʻo e ngaahi fili mahuʻinga taha te ke faí?
ʻOkú ke pehē ko e hā ʻoku mahuʻinga ai ke ke kamata teuteu he taimí ni ke fakahoko ha mali fuakavá?
Ko e hā ha meʻa te ke lava ʻo fai ʻi he taimí ni ke teuteu ki ha mali fuakavá?

Ngaahi ʻulungaanga faka-Kalaisi ʻo Lepeká

Mahalo ʻe tokoni ki he kau akó ke nau fakakaukau ki he founga naʻe fakahaaʻi ai ʻe Lepeka ʻa e ngaahi ʻulungaanga faka-Kalaisí. Fakaafeʻi e kau akó ke lau ʻa e Sēnesi 24:16–20, 55–58, ʻo kumi e ngaahi ʻulungaanga ʻo Lepeka ʻokú ne fakamanatu ki he kau akó ʻa Sīsū Kalaisí. Hili iá, ʻe lava ke vahevahe ʻe he kau akó ha ngaahi sīpinga mei he moʻui ʻa Kalaisí ʻokú ne fakahaaʻi ʻa e ʻulungaanga takitaha pea aleaʻi ʻa e ʻuhinga ʻe tokoni ai ʻa e ngaahi ʻulungaanga ko ʻení ki ha nofo-mali.