Faamae’aina o Lau Misiona

Saunia nei loa oe lava e faaauau ona ola ai i lou olaga o se soo o Iesu Keriso ma o se tagata faatuatua o Le Ekalesia a Iesu Keriso o le Au Paia o Aso e Gata Ai pe a faamalolo oe. E ui o le a faamae’aina lau misiona, ae o le a faaauau lava ona e saili e faataunuuina le misiona o lou olaga o le toe foi atu ma mau faatasi ma lou Tama Faalelagi.

Ao latalata ina faamae’aina lau misiona ma faatasi ai ma le fesoasoani a ou faufautua o faifeautalai mo auaunaga, faamae’a le “O La’u Fuafuaga.” Faasoa atu i ou faufautua o faifeautalai mo auaunaga. A uma lau misiona, o le a tofia oe i se faufautua e mafai ona fesoasoani ma lagolagoina oe i le mulimuli i lau “O La’u Fuafuaga.”

Talu ai o loo avea pea oe o se faifeautalai seia faamaloloina oe e lou peresitene o le siteki, ua faamoemoeina oe e mulimuli i tulaga uma faafaifeautalai seia oo i lena taimi.

A uma lau misiona, ia faaauau pea ona ola i le talalelei ma faatumauina mausa amiotonu e fesoasoani e te latalata atu ai i le Tama Faalelagi ma Iesu Keriso. Faaaoga au taleni ma tomai ua e atiina ae e faamalolosia ai isi ma fausia ai le malo o le Atua. Ia mautinoa e te:

• Faasoa atu ou aafiaga o lau misiona i isi tagata.

• Mulimuli i lau “O La’u Fuafuaga” ma faaauau pea ona seti sini i lou olaga atoa.

• Tatalo ma suesue i le talalelei i aso uma.

• Auai ma faatasi atu i lau uarota masani po o se uarota a talavou matutua nofofua; fesili atu i lou epikopo mo se valaauga.

• Saili avanoa e auauna atu ai i le malumalu pe afai o i ai se malumalu lata ane.

• Faaauau ona saili avanoa e auauna atu ai i isi.

• Auai i le inisitituti po o isi vasega o aoaoga faalelotu.

• Saili avanoa mo aoaoga, aoaoga faamasani, ma galuega.

Ola ina ia e maua le aafiaga o le ituaiga olioli o loo faamatalaina i le Tusi a Mamona ina ua feiloai Alema le Itiiti ma uso a faifeautalai mulimuli ane i le olaga:

“A’o malaga atu Alema mai le laueleele o Kitiona agai i le itu i saute, e alu ese atu i le laueleele o Maneti, faauta, sa ofo o ia, i lona feiloai ma atalii o Mosaea, o malaga atu agai i le laueleele o Saraʼemila. …

“… O lea sa olioli tele Alema i le vaai atu i ona uso; ma o le mea na faatele atili ai lona olioli, ona sa avea pea i latou ma ona uso i le Alii; ioe, ma sa latou matua malolosi i le malamalama o le upumoni; ona o i latou o ni alii mafaufau lelei ma sa latou suesue i tusitusiga paia ma le filigā, ina ia latou iloa le afioga a le Atua.

“Ae sa le ona pau lea; sa latou tuu atu i latou lava i le tatalo tele, ma le anapogi; o lea na i ai ai ia i latou le agaga o valoaga, ma le agaga o faaaliga, ma a latou a’oa’o atu, sa latou a’oa’o atu ma le mana ma le pule mai le Atua” (Alema 17:1–3).