Faatulagaga ma Gaoioiga a Faifeautalai mo Auaunaga

O lau peresitene o le misiona ma lona faletua e galulue faatasi o ni ou taitai misiona. Ua valaauina i la’ua e le Atua ma vaetofia e taitai le misiona. La te alolofa ma tausi ia te oe, fesoasoani ia te oe e faataunuu ou faamoemoega o se faifeautalai, ma fesoasoani ia te oe ina ia e tausia oe lava ia saogalemu ma fiafia.

O lau peresitene o le misiona na te faatulagaina le faaleagaga ma amioga e manaomia o lau misiona. E na te faamaoniaina foi se fuafuaga mo lau auaunaga. E galulue vavalalata o ia ma faufautua o faifeautalai mo auaunaga i le faia o lea mea.

E fefaasoaai e ou taitai o le misiona ma faufautua o faifeautalai mo auaunaga le tele o tiutetauave mo le misiona. E galulue faatasi i latou i fautuaga e:

• Lagolago ai ma faamalosiau ia te oe.

• Faalogo i ou popolega.

• Tali au fesili.

• Iloilo lou alualu i luma.

• Tuu atu ia te oe fautuaga.

• Fesoasoani ia te oe ia tuputupu ae faaleagaga.

Pe a faia sau faatalanoaga ma lau peresitene o le misiona po se tasi o ona fesoasoani, e mafai ona e valaauliaina ou matua, tagata o loo vaaia oe, po o faufautua o faifeautalai mo auaunaga ina ia auai.

O ou faufautua o faifeautalai mo auaunaga e galulue faatasi o ni taitai i lalo o le taitaiga a lou peresitene o le misiona. Ua valaauina ma vaetofia i latou e le Atua e taitai faifeautalai mo auaunaga i lau eria atofaina. Latou te alolofa ia te oe, auauna ia te oe, ma fesoasoani ia te oe e faataunuu lou faamoemoega o se faifeautalai. O le galulue vavalalata ai ma lou peresitene o le misiona, faufautua o faifeautalai mo auaunaga:

• E fesoasoani ina ia iloa avanoa mo oe e tuuina atu ai auaunaga faaKeriso.

• Fesoasoani e atiae lau faatulagaga faafaifeautalai ma ou tofiga.

• Feiloai ma oe faalevaiaso.

• Iloilo ma lagolago lou alualu i luma i lau auaunaga ma le avea ai o se soo o Keriso.

• Lagolago ma faamalosiau ia te oe.

• Faalogo atu i ou atugaluga, tali i au fesili, ma tuu atu ni fautuaga.

• Faaaoga musumusuga ma faaaliga e fesoasoani ia te oe ia manuia ao avea ai o se faifeautalai.

I le aotelega, o faufautua o faifeautalai mo auaunaga ua ia i latou le tiutetauave o aso taitasi o le galulue faatasi ma oe ina ia mafai ona e maua se aafiaga o lau misiona mo se suiga o lou olaga. O ni taitai e mafai ona fesoasoani ia te oe e tuputupua’e o se soo o Iesu Keriso i le olaga atoa.

Pe a outou fono i vaiaso taitasi ma ou faufautua o le misiona mo auaunaga, e mafai ona valaaulia ou matua po o se isi supavaisa lagolago o i ai e auai.

Ona o oe o se tagata o le uarota ma le siteki, ua i ai i lou epikopo ma lou peresitene o le siteki le tiutetauave faaleperisitua mo oe.

O lou epikopo ma le peresitene o le siteki e nafa ma faatalatalanoaga o tulaga o le agavaa. Ona o lou epikopo ma le peresitene o le siteki o loo umia ki o le perisitua, e galulue i la’ua o ni faamasino. O agasala matuia (e pei o le agasala tau feusuaiga) e tatau ona faailoa atu i lou epikopo ma i lou peresitene o le siteki pe a tatau ai, nai lo lou peresitene o le misiona. Ia e matuai faamaoni i lou epikopo. E alofa o Ia ia te oe ma o le a fesoasoani ia te oe ia lagonaina le olioli e maua i le salamo (tagai i le Mosaea 26:29–30).

I le mae’a ai o lau misiona, o lou peresitene o le siteki e faamaloloina oe ma faafetai atu mo lau auaunaga faafaifeautalai.

E faaaoga e lou peresitene o le misiona ma faufautua o faifeautalai mo auaunaga musumusuga e faatulaga ai le galuega. E mafai ona latou tofia faifeautalai e avea ma taitai i isi faifeautalai mo auaunaga. E mafai foi ona talosagaina oe e taitai pe tuuina atu ni aoaoga faamasani i lau vaega po o tofiga i alalafaga.

E faalagolago i le tulaga o lau misiona, e mafai ona i ai ni ou taitai misiona talavou e aofia ai taitai sone, taitai e aoaoina tamaitai, ma taitai itu. E pei o faifeautalai uma, e mulimuli i latou i fautuaga a Iesu Keriso e “auauna atu [i le Atua] ma o [latou] loto atoa, mafaufau atoa, manatu atoa, ma le malosi atoa.” O nei taitai latou te “manatua le faaatuatua, amiomama, poto, faautauta, onosai, agalelei faaleuso, amioatua, alofa mama, lotomaualalo, [ma le] filiga” (Mataupu Faavae ma Feagaiga 4:2, 6).

O tofiga faaletaitai e le faailoa ai ni aloaia faapitoa po o le siitaga. Pe faailoa ai foi le taua o se faifeautalai.

O taitai i faifeautalai e i ai la latou matafaioi e:

• Faia se faataitaiga o se so’o o Iesu Keriso.

• Faia se faataitaiga o tulaga faatonuina mo amioga a faifeautalai (tagai vaega 3).

• Fesoasoani e aoao isi faifeautalai e pei ona faatonuina ai e le peresitene o le misiona po o faufautua o faifeautalai mo auaunaga.

• Alofa ma faauo i isi faifeautalai.

• Fesoasoani i isi faifeautalai ia iloa le taua o a latou taumafaiga.

• Faalogo atu i atugaluga o isi faifeautalai ma fefaasoaai manaoga ma faufautua o faifeautalai mo auaunaga.

• Lipoti atu a latou matafaioi faaletaitai i faufautua o faifeautalai mo auaunaga.

• Fesoasoani e faatulaga ma taitai konafesi, fonotaga ma gaoioiga i lalo o le taitaiga a le peresitene o le misiona po o faufautua o faifeautalai mo auaunaga.

O alii ma tamaitai faifeautalai o loo i ai tofiga faaletaitai e tatau ona latou taitai e pei ona faia e le Faaola. Afai o amioga a se tasi o faifeautalai, e aofia ai taitai faifeautalai, ua le talafeagai ma poloaiga ma tulaga faatonuina mo faifeautalai, talanoaina lenei mea ma na o faufautua o faifeautalai mo auaunaga. Aua le talanoaina ma isi faifeautalai, matua po o latou o loo vaaia, po o uo.

“Faalauteleina [lou] tofiga i le Alii” (Iakopo (TM) 1:19). Aoao ina ia avea ma se tasi e ola tutoatasi faaleagaga ma “fai mo [oe lava]” ala i le faalagolago i le Alii ma mulimuli i le Agaga (2 Nifae 2:16).

• Pe a i ai ni au fesili po o atugaluga faaaoga le aoaoga e “suesue i ai i lou mafaufau; ona … ao lea ona e ole mai ia te a’u pe ua sa’o” (Mataupu Faavae ma Feagaiga 9:8).

• Saili le taitaiga e ala i faaaliga patino, tatalo, ma suesuega o tusitusiga paia (aemaise le Tusi a Mamona), aoaoga a perofeta soifua, ma tulaga faatonuina faafaifeautalai mo auaunaga.

Talanoa ma lou epikopo po o le peresitene o le siteki e uiga i tulaga o le agavaa. Talanoa ma ou faufautua o faifeautalai mo auaunaga e uiga i atugaluga manaomia vave mo le saogalemu, e aofia ai le faasaua, faatautala, po o isi faafitauli.

Atonu e i ai ni taimi o lau misiona o le a faigata ai ona e taulai i lau galuega auauna ona o luitau o i ai nei, mataupu patino pe faaleaiga, pe o ni aafiaga foi mai taimi ua tuanai. Aua nei faatuai le faasoa atu o ou popolega i ou faufautua o faifeautalai mo auaunaga, peresitene o le siteki po o le peresitene o le misiona.

Manatua le valaaulia a le Faaola: “Vaai mai ia te a’u i mafaufauga uma; aua le masalosalo, aua le fefefe. Faauta i manuʼa ua tuia ai loʼu itu, ma tulaga fao foi i oʼu lima ma oʼu vae; ia faamaoni, tausi i aʼu poloaiga, ma o le a oulua mautofi ai i le malo o le lagi” (Mataupu Faavae ma Feagaiga 6:36–37).

O lou peresitene o le misiona po o faufautua o faifeautalai mo auaunaga e mafai ona atofaina ni soa ia faaleleia atili faatulagaga o suesuega o le talalelei ma sootaga lautele i le taimi o lau misiona. E mafai ona tofia ni soa i nofoaga o galuega faamisiona, i asiasiga mo aoaoga, i nofoaga e galulue ai, pe mo gaoioiga o auaunaga faapitoa.

Ia manatua mea nei ao outou fegalegaleai faatasi ma isi faifeautalai:

• Alofa, faaaloalo, ma faamalosiau i isi faifeautalai.

• Ia lotomaualalo ma iloa le malosiaga o le tasi ma le isi.

• Tausi le tasi i le isi e faapei ona e manao e tausia ai oe.

• Ia iloa le lelei o loo i isi faifeautalai.

• Aloese mai faitioga ma finauga.

• Aloese mai le tautala e faaleaga ai isi i isi faifeautalai mo auaunaga, tagata o le Ekalesia, po o aiga ma uo .

Afai e te matauina ni tulaga po o uiga le talafeagai, talanoa i ou faufautua o faifeautalai mo auaunaga.

Ua valaauina oe o se faifeautalai e le Alii. Ua ia finagalo ina ia e auauna atu ma lou loto atoa, mafaufau atoa, manatu atoa ma le malosi atoa (tagai i le Mataupu Faavae ma Feagaiga 4:2).

Ua tofia oe e auauna i se misiona ua filifilia faapitoa mo au taleni, gafatia ma meaalofa. I le taimi o lau misiona, e mafai ona e auauna atu i ni tofiga se tele. E aofia ai i nei tofiga ia faalapotopotoga o auaunaga alofa ua faamaonia, galuega a le Ekalesia, malumalu, asiasiga mo aoaoga faatasi ma faifeautalai tala’i, ma avanoa o auaunaga e tuuina mai e le siteki.

E ono mafai ona e auauna atu i le silia ma le tasi le nofoaga i le aluga o le vaiaso. I nofoaga taitasi, o le a e lipoti atu i se taitai o lē o le a saunia le aoaoga faamasani, meafaigaluega, ma lagolago oe i mea e manaomia e faataunuu ai ou tiutetauave.

Ia taunuu i lou tofiga i le taimi e tatau ai ma ia saunia lelei e auauna atu. Ia faatuatuaina ma faamoemoeina. Ia mulimuli ma le faaeteete ma le atoatoa i taitaiga mai ou taitai.

Faia le mea sili e te mafaia e saofagā ai i le galuega a le Alii i auala anoa. Avea o se faatosinaga lelei ma uunaia i latou e te auauna i ai ma fefaasoaai. Galue saogalemu, ma taumafai ia alualu i luma i taimi uma.

I le galulue vavalalata ai, e mafai e lou peresitene o le siteki ma faufautua o faifeautalai mo auaunaga ona fetuunai ou tofiga auauna atu i le faagasologa o lau misiona.

I le galulue vavalalata ai, o ou faufautua o faifeautalai mo auaunaga, faatasi ai ma ou manatu faaalia, o le a fatuina ai taimi faatulagaina o aso taitasi a faifeautalai. O lou peresitene o le misiona o le a faamaonia faatulagaga. E mafai ona aofia ai tofiga ma gaoioiga ia e i vaega o atinaega nei o loo i lalo:

• Faaleagaga

• Faaleagafesootai

• Faaletino

• Faaleatamai

Ia tumau ai ma faatuatuaina i le mulimuli ai i ou taimi faatulagaina faafaifeautalai. O le a aumaia ia te oe e lenei mea le tuputupu ae atili, olioli, ma faamanuiaga faaleagaga i le taimi o lau auaunaga faafaifeautalai.

O au taimi faatulagaina o aso taitasi e mafai ona aofia ai:

• Faatuina ma iloiloina o au sini o auaunaga faafaifeautalai.

• Saunia lelei ma ia faamaeaina ou tofiga i aso taitasi.

• O le suesueina o tusitusiga paia (aemaise lava le Tusi a Mamona), aoaoga a perofeta soifua ma aposetolo, Fetuunai i le Olaga Faafaifeautalai Auauna Atu, vaega talafeagai o le Tala’i La’u Talalelei, ma isi punaoa ua faamaoniaina (tagai i le 2.4.5).

Galulue faatasi ma ou faufautua o faifeautalai mo auaunaga e fai se faatulagaga lautele tusitusia o taimi. Faaaofia lou taimi i tofiga ma taimi e te faaaogaina ai lou faitalia e fuafua pe faapefea ona e auauna atu, faaleleia, ma le tuputupu ae (lea e ta’ua o “itula o le faitalia”). Faailoa se aso e tasi o le vaiaso e fai ma ou aso sauniuni. Iloilo ma mulimuli i lau fuafuaga i aso taitasi.

O le taimi faatulagaina o aso taitasi mo lau misiona e ono foliga faapenei:

E tusa lava pe e te le o auauna atu i lau eria na atofaina, o oe lava o se faifeautalai. O au amioga, ou mafaufauga, ma faatinoga e tatau lava ona atagia ai lou tuuto atu ia Iesu Keriso.

Pe afai e mafai ma pe a faamaonia mai e ou faufautua o faifeautalai mo auaunaga, suesue faatasi ma se isi faifeautalai mo auaunaga. E ono tofia atu ia te oe e lou peresitene o le misiona po o faufautua o faifeautalai mo auaunaga se tasi e te lua toalua. O le suesue faatasi ma se isi faifeautalai e masani ona faia i luga o upega tafailagi. Peitai, e mafai ona oulua suesue faatasi pe a faatagaina ai i isi tulaga.

Taulai atu i tusitusiga paia (aemaise lava le Tusi a Mamona), aoaoga a perofeta soifua, Fetuunai i le Olaga Faafaifeautalai Auauna Atu, vaega talafeagai o le Tala’i La’u Talalelei, ma le tusitaulima lenei. O nei punaoa ua faamaonia e mafai ona faamalosia ai lou malamalama ma le molimau o le talalelei toefuataiina a Iesu Keriso ma fesoasoani ai ia te oe e saunia e faamalieina manaoga o i latou e te auauna atu i ai.