Pule o le Perisitua ma Sauniga

O le perisitua o le pule ma le mana ua tuuina mai e le Atua i Ana fanau e faamanuia ma aumaia ai le faaolataga i tagata uma. O lenei pule e manaomia e a’oa’o atu ai ma faia ai sauniga o le talalelei. O taitai perisitua ua maua ma faaaogaina ki o le perisitua ua i ai le pule o le perisitua ma ua mafai ona tuuina atu lena pule i isi.

“I le Ekalesia, o le pule uma o le perisitua e faaaoga i lalo o le taitaiga a i latou o ē umia ki o le perisitua. … E mafai e tagata uma o le Ekalesia ona faaaoga le pule faamatuu, pe a vaetofiaina pe tofiaina foi i latou e fesoasoani i le faataunuuina o le galuega a le Atua” (Tusitaulima Aoao, 3.4).

Pe a vaetofiaina se tamaitai e avea o se faifeautalai, e galue o ia i lalo o le pule o le perisitua e faatino ai se matafaioi faaleperisitua. Soo se tasi lava e galue i se tofi po o se valaauga na maua mai se tasi o loo umiaina ki o le perisitua ua ia faaaogaina le pule ua tuuina atu o le perisitua i le faatinoina o ona tiute atofaina.

Afai o loo e umiaina le Perisitua Mekisateko, o le a e maua avanoa e auai i sauniga ma faamanuiaga faaleperisitua.

Pe a faatinoina sauniga ma faamanuiaga o le perisitua, mulimuli i taiala o loo i le mataupu 18 o le Tusitaulima Aoao. Tagai foi i le Tusitaulima Aoao, 3.4 ma le 3.5, i le pule ma le mana o le perisitua.