O Lou Aafiaga Faafaifeautalai

O le auaunaga a le Faaola ua faataitai mai ai poloaiga sili e lua. O le muamua o le “alofa atu i le Alii lou Atua ma lou loto atoa, ma lou agaga atoa, ma lou mafaufau atoa.” E faapena foi le lona lua, “E te alofa atu i le lua te tuaoi, ia pei o oe lava ia te oe” (Mataio 22:37–39). E muamua ona tatou alolofa i le Atua. Ona tatou te alolofa ia te Ia, tatou te alolofa foi i Lana fanau. Ma o se tasi auala e faailoa ai lo tatou alolofa i fanau a le Atua o le auauna atu lea ia i latou o ni o tatou tuaoi.

O loo i ai sou faamoemoega patino o se faifeautalai mo auaunaga. Ua tuuina mai ia te oe e le Au Peresitene Sili. E tatau ona taitaiina ai oe i lou valaauga paia e auauna atu i fanau a le Tama Faalelagi:

• Fesoasoani i isi ia o mai ia Keriso e ala i le auauna atu ma le agalelei alofa e pei ona faia e le Faaola. Auauna atu i Lona suafa i le toatasi e ala i le mana o le Agaga Paia ma ola o se faataitaiga o le faatuatua ia Iesu Keriso, salamo, tausia o feagaiga ma le Atua, ma tumau e oo i le iuga.

O lau auaunaga e mo Iesu Keriso, ma ua valaaulia oe e auauna atu ma avea e pei o Ia.

O lau misiona e le’i amataina i le aso na vaetofia ai oe. Ma e le mae’a i le aso e faamalolo ai oe. O se misiona e sili atu nai lo nao le faia o se pineigoa i le taeao ma toe aveese pe a uma le aso.

O lau misiona e faaalia ai lou tuuto ia Iesu Keriso ma lou naunau e auauna i isi i Lona suafa. Mai lava i le taimi o lou papatisoga, ua e i ai i luga o le ala o le feagaiga e taitai atu ai i le fiafia, olioli, ma le filemu e faavavau. E mafai e lou aafiaga i le misiona ona suia oe. E tatau ona e tauaveina na suiga ma oe i lou olaga atoa.

Mai se vaaiga e faavavau, o lau misiona o se auala e fesoasoani ia te oe e avea ma soo o Iesu Keriso i le olaga atoa. Ua aoao mai le Tusi a Mamona, “Ma faauta, ua ou ta’u atu nei mea ia te outou ina ia mafai ona outou aoaoina le poto; ina ia mafai ona outou aoaoina, pe a outou auauna atu i o outou uso-a-tagata, ua na o lo outou auauna atu lava lea i lo outou Atua” (Mosaea 2:17). O lau misiona o se taimi tulaga ese lea o lou olaga e te iloaina ai le olioli o le auauna i le Alii ma isi.

Ua folafola mai e le Alii, “O le mea lea, afai o ia te outou le manao e auauna atu i le Atua ua valaauina outou i le galuega” (Mataupu Faavae ma Feagaiga 4:3 Ua e maua le avanoa e faapaiaina ai lenei taimi o lou olaga e auauna ai i le Alii e ala i le auauna atu i isi i Lona suafa. I lenei valaauga, ua e maua ai avanoa e tuuina atu ai auaunaga o le a faamanuiaina ai isi tagata, lou lava olaga, lou aiga, le Ekalesia, ma faalapotopotoga e te auauna i ai.

Ua auina mai i tatou uma taitoatasi i lenei lalolagi ma ni gafatia ma taleni eseese. Faatasi ai ma au taleni ma tomai tulaga ese, e mafai ona e faia se sao anoa i le galuega a le Atua.

Ia olioli i lou aafiaga faamisiona a o e alofa i le Atua ma lē lua te tuaoi. O le taimi lenei e olioli ai ma maua aafiaga o le fiafia e faavavau ma le filemu e ala ia Iesu Keriso.

O soo moni o Iesu Keriso e usiusitai. Na aoao mai le Faaola, “Afai tou te alofa mai ia te au, ia outou tausi mai i a’u poloaiga” (Ioane 14:15). O le tausia o poloaiga o lona uiga e te naunau ma le faamaoni e faia mea ua poloaiina e le Alii ona e te alofa ia te Ia. O le usiusitai foi o lona uiga o lou tausia lea o poloaiga ma le “olioli” ma le “fiafia ma le loto faamaoni” (Kolose 1:11; Galuega 2:46).

O Iesu Keriso o le faataitaiga o le usiusitai atoatoa. O mea uma na Ia faia sa tusa ai ma le finagalo o le Tama. Mulimuli ia te Ia e ala i lou faia o le mea silisili e tausia Ana poloaiga ma ola ai i tulaga faatonuina faafaifeautalai mo auaunaga.

O le usiusitai ma le faamaoni o lona uiga foi o lou tauivi lea e suesue, tuputupu ae, ma faaleleia atili. Faasa’o vave mea sese. Salamo e aunoa ma le faatuai. Faaali atu e te faamaoni ma usiusitai e ala i le taulimaina lelei o au lava faatinoga.

O le a faamanuiaina oe pe a e mulimuli i poloaiga ma tulaga faatonuina faafaifeautalai ma faaaoga le faautautaga lelei. Ia silafia, e tusa lava pe e te tausia poloaiga, o le a ono o’o ia te oe le lotovaivai, ma’i, po o isi luitau (tagai i le 2 Nifae 4:17–19; Alema 26:27). Na o’o foi le Faaola i nei mea (tagai i le Alema 7:11–12; Mataupu Faavae ma Feagaiga 122:8). Ua Ia folafola mai, “Ou te le tuua outou o matuaoti: ou te sau ia te outou” (Ioane 14:18).

E alofa le Atua ia te outou. Filifili e tausi i poloaiga ona e te alofa i le Atua. Aua e te taumafai e faia ni feutagaiga ma Ia pe fai lou usiusitai o se fefaatauaiga e maua ai faamanuiaga patino.

O le faitalia, po o le gafatia e filifili ma galue ai mo i tatou lava, o se tasi lea o meaalofa sili a le Atua i Ana fanau. O lo tatou alualu i luma e faavavau e faalagolago lea i le ala tatou te faaaoga ai lenei meaalofa. A’o tatou filifili e mulimuli ia Iesu Keriso ma Ana aoaoga, o le a tatou lagonaina le olioli.

O lo tatou faitalia e mafai ai e i tatou ona aoao, tuputupua’e, alualu i luma, ma mulimuli i le Faaola. Ona ua ia i tatou le meaalofa o le faitalia, ua tatou “saoloto e filifili le saolotoga ma le ola faavavau, e ala i le Puluvaga sili o tagata uma” (2 Nifae 2:27).

E te tali atu oe lava ia mo filifiliga e te faia. O oe o se atalii/afafine o le Atua ua i ai se malosi maoae. Ua ia te oe le gafatia e filifili ai le amiotonu ma le fiafia e tusa lava poo a tulaga o loo e i ai.

Ua ia te oe foi se matafaioi mo le atinaeina o gafatia ma taleni na tuuina atu e le Atua ia te oe. O lau misiona o se taimi lea e te aoao ai e tali ia te Ia i mea e te faaaoga i ai ou tomai.

O lau misiona foi o se taimi lea e te aoao ai ia tali atu oe lava ia i le ala e faaaoga ai ou taimi. Aua le faama’umauina le taimi e ala i le paiē. Ia naunau e galue malosi. Filifili ina ia tumau ma faatuatuaina. Ia fai ni mea lelei se tele i lou lava lotofuatiaifo (tagai i le Mataupu Faavae ma Feagaiga 58:27–28). Tagai “Auauna Atu i le Mana ma le Pule a le Atua” saunia e Peresitene Russell M. Nelson.

Ua tuuina mai e le Au Peresitene Sili faamoemoega nei o le faifeautalai mo auaunaga:

• E tuuina atu ai se avanoa mo tamaitai ma alii talavou uma e naunautai e auauna i le Alii ma faateleina a latou molimau ia te Ia.

• E fesoasoani i faifeautalai taitoatasi mo auaunaga e saunia ai mo se auaunaga i le olaga atoa.

• Tuuina atu ai auaunaga manaomia ma le taua i le Alii e ala i le auauna atu i le Ekalesia ma faalapotopotoga i alalafaga.

Auauna atu ma le faamaoni i le Faaola i Lona suafa ma i Lana ala ao faagasolo po o le mae’a ai foi o lau misiona. “Taulai atu ia Keriso a o e saili e atiina a’e Ona uiga auaumama. … Tatalo mo le Atua e faamanuia oe i nei uiga auaumama” (Tala’i La’u Talalelei, 124). O nei uiga auaumama o le a fesoasoani ia te oe e ausia lou faamoemoega o se faifeautalai ma avea ai o se soo tu’uto sili atu o Iesu Keriso.

I le taimi o lau misiona, o le a e maua ai avanoa e fausia ai tomai fou faaleagaga, faaleagafesootai, faaletino, ma faaleatamai. O nei tomai o le a faamanuiaina ma faatosinaina ai oe i vaega uma o lou olaga.

Ua valaaulia oe e le Atua e tuuto atu oe lava ia te Ia i lou olaga atoa. O tulaga faatonuina o le misiona e pei o suesuega faaletagata lava ia, faatuina o sini, ma le faaaogaina ma le amiotonu o tekinolosi o le a faamanuiaina ai oe i lau misiona ma mo lou olaga atoa.

Ia avea poloaiga i totonu o tusitusiga paia ma nei tulaga faatonuina faafaifeautalai o ni mataupu faavae taiala i le olaga atoa. A o e mulimuli i poloaiga a le Atua ma tulaga faatonuina, o le a Ia faatonutonu, faamanuia, ma taiala oe i lou olaga atoa.