Soifua Manuia Faaletino ma Faalelagona

O se misiona e mafai ona faafiafiaina ma lu’itauina. O tulaga faatonuina i lenei vaega ma i le Fetuunaiga i le Olaga Faafaifeautalai mo Auaunaga o le a fesoasoani e saunia ai lou mafaufau ma le tino e auauna atu ai ma le atoatoa i le Alii. Iloilo e le aunoa nei tulaga faatonuina i lau misiona atoa.

E taua lou soifua maloloina ma le saogalemu. Faatumau lou soifua maloloina ina ia mafai ona e auauna atu ma lou loto, manatu, mafaufau, ma le malosi atoa (tagai i le Mataupu Faavae ma Feagaiga 4:2).

O oe ma lou aiga e nafa ma pili mo manaoga faafomai. O nisi taimi o se asiasiga i se tagata tomai faapitoa i le soifua maloloina e ono tupu i le taimi o lau faasologa faafaifeautalai. I nei tulaga, faatulaga muamua le asiasiga ma ou faufautua o faifeautalai mo auaunaga.

O le faamalositino e fesoasoani e faatumau ai lou malosi ma fesoasoani e aveesea ai le atuatuvale. Ia avea le faamalositino o se vaega o lou soifuaga pe a talafeagai ma ou tulaga.

O le galuega faamisiona e ono mamafatū. O lagona atuatuvale mai lea taimi i lea taimi o se mea masani. E mafai ona e saunia lou tino ma le mafaufau ia sili atu ona lelei le taulimaina o le atuatuvale e ala i le faaaoga lelei o le lagolago a le aiga.

E mafai foi ona e fesoasoani e pulea le atuatuvale e ala i le faataitaiina o mausa o le taumafa maloloina, faamalositino masani, moe masani, malolo, ma gaoioiga faaleagaga. O ia gaoioiga e aofia ai le tatalo, mafaufau loloto, suesue, ma le auai i sauniga tapuai e le aunoa.

I lau misiona atoa, faaaoga le Fetuunaiga i le Olaga Faafaifeautalai mo Auaunaga e fesoasoani ia te oe e pulea ai lou atuatuvale. Afai e te lagona e faigata ona e taulimaina le atuatuvale, pe afai foi e faafuasei ona e maua i aafiaga o le mafaufau, faafesootai ou matua po o tagata o vaaia oe, epikopo po o ou faufautua o faifeautalai mo auaunaga.

Afai ua fai sau talavai o au fualaau e togafitia ai se aafiaga po o se gasegase, mulimuli i le talavai ma faatonuga a lou fomai.

Taulima ma le faaeteete lou soifua maloloina faaletino ma faalelagona. Ia mautinoa e te maua soo se lagolago e moomia mai ou matua po o tagata e vaaia oe mo soo se mataupu faafomai (e pei o fualaau o loo e inuina, afaina e afua i meaai ma le siosiomaga, po o gaoioiga e tatau ona e aloese ai). E mafai foi ona e faasoa atu faamatalaga faapitoa faafomai i ou faufautua o faifeautalai mo auaunaga ma ou supavaisa o gaoioiga pe a manaomia.

Afai e faafuasei ona e maua i ni aafiaga faalesoifua maloloina, ia vave ona fai ni gaoioiga masani e faaaoga lelei i ai le mafaufau mo lou saogalemu po o se tausiga lelei. Valaau le auaunaga o faalavelave faafuasei o le lotoifale (e pei o le 911 i le Iunaite Setete o Amerika) sei vagana na tuuina atu ia te oe nisi o faatonuga. I se vave e mafai ai, faafesootai ou matua po o tagata o loo vaaia oe ma faufautua o faifeautalai mo auaunaga.

Afai e te manaomia tausiga faalesoifua maloloina e le o se faalavelave faafuasei, vave valaau ou matua po o tagata e vaaia oe. O le a latou ta’u atu ia oe le mea e fai. Taumafai ia faatulaga mamao taimi o tausiga faafomai e le o se faalavelave faafuasei ina ia le faalavelaveina ai ou tofiga ma taimi faatulagaina faafaifeautalai.

E tele tulaga matautia e mafai ona aloese mai ai e ala i le faaaoga o le faautautaga lelei ma le usitaia lelei o tulaga faatonuina faafaifeautalai i lenei tusitaulima. Ae ui i lea, e mafai ona e feagai ma tulaga matautia e tusa lava pe e te taumafai ina ia e saogalemu. Afai o i ai se faafitauli, lipoti vave loa i se tasi o ou faufautua o faifeautalai mo auaunaga.

Vave aluese pe afai e te lagona le le mautonu e uiga i se nofoaga, tagata, po o se tulaga. Faalogo i taimi uma i musumusuga faaleagaga.

Fesoasoani e tausia le fale o lou aiga ma fai au feau masani. Tausia ia mama ma manaia lou potu. Tausia au meatotino patino, e aofia ai masini faaeletonika, i se tulaga lelei.

E le tatau ona e faaaluina le po pe nonofo i fale o faifeautalai tala’i.

Ia mulimuli lelei pea i tulafono o le lotoifale i taavale afi, tulafono, ma aga masani pe a e malaga.

O femalagaaiga lautele e masani lava ona taugofie atu nai lo o le aveina o se taavale. Afai o i ai auala o femalagaaiga lautele, fuafua e faaaoga lena mo le malaga atu ma le toe foi mai i ou tofiga o auaunaga.

Faaaoga le faautautaga tatau, ia nofouta i lou siosiomaga, ma ia faamasani i lau eria. Mulimuli i tulaga faatonuina lautele o le saogalemu o loo i totonu o lenei tusitaulima.

Afai e te aafia i se faalavelave faafuasei tautaavale ao e agai atu po o le toe foi mai ou tofiga faafaifeautalai, fonotaga, po o konafesi, valaau leoleo po o auaunaga o faalavelave faafuasei pe a manaomia. I se vave e mafai ai, ia faafesootai foi lou aiga. Ona faafesootai lea o ou faufautua o faifeautalai mo auaunaga.

Afai e te aafia i se faalavelave faafuasei tautaavale ao e i ai i ou tofiga faafaifeautalai, talanoa i lou supavaisa i le nofoaga o loo e auauna ai. O lena tagata o le a ia faafesootaia leoleo po o auaunaga o faalavelave faafuasei pe a manaomia. I se vave e mafai ai, ia faafesootai foi lou aiga ma ou faufautua o faifeautalai mo auaunaga.

E fautuaina oe ina ia faasoasoa ma le faautauta au tupe patino. O tupe e te faaaluina i le taimi o lau misiona o se faailoga o osigataulaga a oe, lou aiga, ma isi.

Ia ola i aoaoga faavae o le totogiina o le sefuluai ma taulaga ma le teuina o tupe.

Aua le faatauanauina tupe mo ou lava manaoga tautupe pe mo faalapotopotoga o loo e tautua ai.

Ona o oe o se sui ua faatagaina o Iesu Keriso ma Lana Ekalesia toefuataiina, o ou foliga vaaia e tele ina avea ma uluai savali e maua e isi. Laei lavalava e talafeagai ma ou tofiga o auaunaga ma fetaui ma lou valaauga paia.

I lau misiona atoa, ia mautinoa o ou foliga vaaia ma lau amio e lagolagoina mea o loo e tautala ai ma faia. E le tatau ona latou faalavelave i lou faamoemoega faafaifeautalai. O ou laei ma foliga vaaia e tatau ona avea o se faailoga o le loto maulalo, faaaloalo, ma le faatuatua

O le auala e te faailoa atu ai oe lava o se faifeautalai e aafia ai le auala e mafaufau ai tagata e uiga ia te oe ma le Ekalesia a le Alii. E mafai foi ona fesoasoani e puipuia oe mai le faamanu’aina.

O le faaaogaina o laei ma au teuga talafeagai o se tomai taua lea i le olaga o le a fesoasoani foi ia oe pe a maea lau misiona. Pe a auai i konafesi faalesone, faatalanoaga, ma auai i asiasiga tala’i, mulimuli i tulaga faatonuina o laei ma teuga i Laei ma Foliga. O lenei upega tafailagi o loo maua ai faataitaiga o laei talafeagai mo lau misiona. O ou taitai o le misiona ma le Au Peresitene o le Eria e ono faia ni suiga i nei taiala ina ia taulimaina ai tulaga i le lotoifale.