Amioga a Faifeautalai

O le tausia o feagaiga o le malumalu o le a faamanaina ai oe ma fesoasoani e te avea atili ai e faapei o le Faaola. O nei feagaiga ua aofia ai:

• O le tulafono o le usiusitai.

• O le tulafono o le taulaga.

• O le tulafono o le talalelei a Iesu Keriso.

• O le tulafono o le ola mamā.

• O le tulafono o le faapaiaga.

  (Tagai i le Tusitaulima Aoao, 27.2)

E tusa pe leai se malumalu e latalata ane ia te oe, ia tumau pea lou agavaa mo le malumalu. Talosaga i lou epikopo ma le peresitene o le siteki mo se faatalanoaga mo se pepa faataga o le malumalu ao lei mae’a le aogā o lou pepa faataga o i ai nei.

O le ofuina o ofusa o le malumalu o se avanoa paia o i latou ua osia feagaiga ma le Alii e fesootai ma le faaeega paia. Mo le taiala i le ofuina o ofusa, tagai i le Tusitaulima Aoao, 38.5.5.

Afai e lata atu se malumalu, e fautuaina oe e auai o se tagata ulu i le aluga atoa o lau misiona. O le auauna atu o se tagata ulu e mafai foi ona avea o se tasi o ou avanoa atofaina e auauna atu ai.

O le auai i le malumalu o le a faaleleia atili ai lou aafiaga i le misiona. Faatulaga faatasi ma isi ou tofiga faafaifeautalai. Ao e auauna atu i le malumalu, ia faataunuu ou tofiga ma le mamalu, faaaloalo, ma le migao.

Pe a e auai i le malumalu, ia manatua mea nei:

• Pe a tofia oe e le au peresitene o le malumalu e auauna atu o se tagata fai sauniga, o le a e galue i le malumalu e pei ona latou faatonuina.

• E mafai ona e auai i soo se sauniga lava e faatinoina i le malumalu se’i vagana ai le fai o oe ma sui o se toalua po o se ava i se sauniga o faamauga. O lenei mea e aloese ai mai le faauigaseseina o lagona faaleagaga o ni lagona o le alofa.

• Aua nei aumaia ni meapueata, telefoni feaveai, po o tusi faitau (e aofia ai faamanuiaga faapeteriaka) e faaaoga i totonu o le malumalu.

• Aua nei faapotopoto o ni faifeautalai pe tootutuli e tatalo i le potu selesitila.

• E ala i le auina atu o igoa o aiga i le malumalu, e mafai ona e fesoasoani ai e faapotopoto Isaraelu i le isi itu o le veli ma faaleleia atili ai ou aafiaga o le malumalu.

E tele ituaiga o ata matagā. O le fuafua mamao ma le faia o filifiliga amiotonu e mafai ona fesoasoani ia oe e aloese ai mai ata matagā. Afai e te vaai i ai, tilotilo ese, tape le masini, pe aluese mai lea tulaga.

Faaaoga fautuaga nei e fesoasoani ia oe e aloese ai mai ata matagā:

• Aloese mai uepisaite, anomea, ma nofoaga e te ono faalogo ai, faitau ai, po o le vaai ai i mea e faaosoosoina ai po o ata matagā. Faafesootai ou faufautua o faifeautalai mo auaunaga pe afai o e vaai i anomea e le talafeagai i le nofoaga ua tofia oe e te auauna ai.

• Aoao ina ia iloa taimi e ono faaosoosoina tele ai oe e faaaoga tekinolosi i auala le tatau, e pei o le taimi ua e lelava pe le fiafia ai.

• Fai se fuafuaga po o a mea o le a e faia i na taimi. E mafai ona fesoasoani ou faufautua o faifeautalai mo auaunaga.

• Ia fai ma toe iloilo le “Faaaoga ma le Amiotonu Tekinolosi” ma le “Mulimuli i Puipuiga mo le Faaaogaina o Tekinolosi” i le vaega e 2 o le Tala’i La’u Talalelei.

E mafai foi ona e maua faamatalaga i le ChurchofJesusChrist.org/study/life-help/pornography

O soo se tasi o saili ina ia aloese pe faatoilalo ata matagā e mafai ona maua le fesoasoani ma le faamalologa e ala i le Togiola a Iesu Keriso. Afai o e tauivi, ia talanoa ma lou epikopo po o le peresitene o le siteki. O le a ia tuuina atu fautuaga alofa ma le lagolago.

Avea ma se malosiaga ma se faataitaiga lelei i lou aiga ma uo. Faasoa atu aafiaga faagaeetia ma mea o loo e aoaoina mai ou aafiaga i le misiona.

E ono mafai ona fesoasoani tagata o le aiga ia oe i manaoga faaletino ma faalelagona, i femalagaaiga, po o isi auala mo oe e auauna ai ma le manuia. O le a i ai ni fetuunaiga i olaga faaleaiga i le aluga o lau auaunaga faafaifeautalai. O oe ma lou aiga o le a manaomia ona faia ni osigataulaga e faamautinoa ai ua e maua se aafiaga anoa sili ma taua e tatau ai i le misiona.

Fausia le faatuatuaina ma ni sootaga anoa ma i latou e te auauna atu i ai. Ia atamai ma agalelei. Matau tulaga nei:

• Aloese mai tulaga e ono avea ma faafitauli faigata faaletino pe faaleagaga po o le le malamalama i ai.

• Aua le tafao faamasani, auai i siva, faatosina po o fegalegaleaiga lē talafeagai ma soo se tasi. Ia faaeteete e aua le auai i soo se gaoioiga lava po o amioga e ono mafai ona faauigasese o se faatosina pe ono matauina o se tafaoga faamasani.

• Tautuana ia tamalii lau gagana. Aloese mai le faaaogaina o ’anaga faaonaponei. Faaaoga faalagiga talafeagai pe a talanoa atu isi. Mo se faataitaiga, faaaoga le igoa “Elder” po o le “Sister” e faasino i isi faifeautalai ma faufautua o faifeautalai mo auaunaga. O lenei mea e faaalia ai le faaaloalo mo o latou valaauga.

Mo lou saogalemu ma le saogalemu o tamaiti ma tagata matutua e afaina gofie, ia tagai ma le totoa i tulaga faatonuina nei pe a galulue ma tagata nei:

• Aua lava nei tuua na o oe ma tamaiti po o tagata matutua e afaina gofie i soo se tulaga.

• Aua le vaavaaia i latou, faaofu i latou, faainuina a latou fualaau, pe taulimaina lo latou tumama patino.

• Ia faatoa auauna atu ia i latou i le taimi e i ai se isi tagata matua faatuatuaina. Mulimuli i tulafono faapitoa mo le Ekalesia po o le vaega o auaunaga alofa o loo e auauna i ai.

• Pe afai o le a e galue ma i latou i se faalapotopotoga agaalofa, e manaomia ona e faataunuuina muamua se siaki o talaaga.

O tagata matutua e afaina gofie o tagata e i ai ni faaletonu o le mafaufau pe faaletino, ia e matuiā aafiaga i o latou gafatia e malamalama ai i tulaga ma puipuia i latou mai sauaga, tuulafoaiina, po o le puleeseaina. O tagata matutua e afaina gofie e faatatau foi i tagata sulufai o e atonu e le malamalama i gagana po o ni eseesega faaleaganuu.

O le a e fegalegaleai ma faifeautalai tala’i i konafesi faalesone ma i isi tulaga e pei ona faatonuina ai e lou peresitene o le misiona. O le fegalegalea’i ai ma faifeautalai tala’i o le a avea o se faamanuiaga ia te oe ma avea ai oe o se faamanuiaga mo i latou.

I le avea ai o se faifeautalai mo auaunaga, e mafai ona outou o faatasi ma faifeautalai tala’i i asiasiga e fai ni aoaoga. Fai lau pine o le igoa ma mulimuli i tulaga faatonuina o laei mo faifeautalai tala’i pe a e faatasi atu i asiasiga e fai ni aoaoga. Pe a outou malaga faatasi i le taavale e tasi, ia aloese mai le faalogologo i musika pe matamata i faasalalauga e le ogatusa ma tulaga faatonuina o faifeautalai tala’i.

E le mafai ona e tafao faamasani pe faatosina ao avea oe ma faifeautalai. E uunaia oe e auai i le uarota ma gaoioiga a le autalavaou matutua nofofua (YSA), ae e le tatau ona e auai i siva. Ia faaeteete e aua le auai i soo se gaoioiga lava po o amioga e ono mafai ona faauigasese o se faatosina po o se tafaoga faamasani.

O se faamamaluga ma se faamanuiaga le fai o le pine o le igoa faafaifeautalai. Ia fai i taimi uma ao e agai atu ma toe foi mai i tofiga faafaifeautalai, i ou tofiga faafaifeautalai, pe a e auai i asiasiga tala’i ma i sauniga a le Ekalesia.

O tofiga faafaifeautalai e aofia ai fonotaga ma konafesi a faifeautalai, taimi e auauna atu ai i lou aiga, ma tofiga o le Ekalesia ma auaunaga alofa e fai mai i le fale. Afai e i ai se fesili e uiga i taimi e tatau ai ona fai lau pine o le igoa faafaifeautalai, fesili i ou faufautua o faifeautalai mo auaunaga.

O faifeautalai talavou mo auaunaga e nonofo i le aiga. O le Tala’i La’u Talalelei o loo faapea mai: “E fesoasoani le talalelei a Iesu Keriso ia i tatou e atiina a’e ni sootaga malolosi atu faaleaiga. O le aiga o le nofoaga sili lea mo fanau e aoao ai mataupu faavae ma tu masani o le talalelei. O se aiga e faavae i mataupu faavae o le talalelei, o se nofoaga lea e sulufa’i i ai mo le saogalemu. O le a avea o se nofoaga e mafai ona afio ai le Agaga o le Alii.” (mataupu 3).

I le tusi o lou valaauga, sa tofia oe e te galue o se faifeautalai mo auaunaga i lou alalafaga i le lotoifale, e tuuina atu auaunaga Faa-Keriso ao nofo ai i le aiga. Ia faaaoga lenei avanoa faapitoa e faamalosia ma auauna ai ia i latou i lou aiga e latalata atili atu ai ia Iesu Keriso.

O le galuega ma le aoga—pe o le taimi atoa po o sina taimi—e le o ni vaega o le auaunaga faafaifeautalai. E tatau ona e tuuto atu lou taimi, taleni, malosi, ma punaoa tau tupe i lau misiona. O le vaega lenei o le tulafono o le faapaiaga, lea sa e osifeagaiga e usitai ai i le sauniga o le faaeega paia i le malumalu.

Ua fautuaina oe e auai i vasega inisitituti ma gaoioiga, vagana ai gaoioiga siva ma tafaoga faamasani. E mafai foi ona e lesitala i le BYU PathwayConnect pe a e mana’o ai.

O taiala saogalemu mo gaoioiga lea e faatatau i le autalavou matutua nofofua e faatatau ia te oe o se faifeautalai mo auaunaga. O loo i ai tapulaa i gaoioiga i po, asiasiga i le malumalu i fafo atu o le malumalu i lau itu atofaina, ma malaga mamao. Galulue faatasi ma ou faufautua o faifeautalai mo auaunaga, peresitene o le misiona ma le peresitene o le siteki mo nisi fetuuna’iga.

O gaoioiga i itula e te le o i ai i se tofiga auauna atu, e pei o taaloga talafeagai, ata tifaga, ma polokalama i televise, e faatagaina faatasi ai ma le faamaoniga mai ou faufautua o faifeautalai mo auaunaga.

O lau misiona e maua ai se avanoa e atiina ae ai uiga masani o le amiotonu. E matua taua tele lou le faalogologo, matamata, pe auai i gaoioiga po o ala o faasalalauga e faalavelaveina ai le uunaiga a le Agaga i lou olaga ma lou faamoemoega o se faifeautalai. Ia manatua ua uma ona vaetofia oe o se faifeautalai faamisiona. Taumafai e faaogatasi au amioga ma le natura paia o lou valaauga.

A o amata lau auaunaga faafaifeautalai, faatutu ni sini ma fai ni fuafuaga e faamautinoa ai o au mausa o ala o faasalalauga e ogatusa ma le avea ma se soo o Iesu Keriso. Faaauau ona setiina nei sini ma fai ni fuafuaga i le taimi o lau misiona. O le a iloiloina e le aunoa e ou faufautua o faifeautalai mo auaunaga au sini ma fesoasoani ia te oe e fai ni fuafuaga i lou faaaogaina o ala o faasalalauga. O se fesili taua e fai o le, “Pe o le a faalavelavea ea e lenei [gaoioiga, tifaga, musika, ma isi] mai le mauaina o le uunaiga a le Agaga i lo’u olaga?”

I le taimi o lau auaunaga o se faifeautalai, o lou pepa faamaumau e i ai pea i lau uarota tumau. I le faatagaga a lau epikopo, e mafai ona e auai i le uarota a le autalavou matutua nofofua (YSA) i lau eria.

Ua fautuaina oe e auai i vasega inisitituti ma gaoioiga. E mafai foi ona e auai i gaoioiga a le autalavou matutua nofofua ua lagolagoina e lau uarota po o le siteki e pei o afiafi faaleaiga, asiasi atu i le malumalu, faigalotu, taaloga, ma tafaoga. Ae peitai, e le mafai ona e auai i gaoioiga siva po o tafaoga faamasani.

Manatua, o oe o se faifeautalai. O au gaoioiga e tatau lava ona lelei i taimi uma, faagaeetia, ma ogatusa ma tulaga faatonuina o lenei tusitaulima. E tatau ona ogatasi ma lou valaauga e avea ma sui o Iesu Keriso.

Ia maua pea le saogalemu ma faaaoga le faautautaga lelei pe a auai i gaoioiga faafiafia. I le taimi o lau misiona e le tatau ona e auai i gaoioiga e sili atu ona lamatia nai lo le tulaga masani.

Afai e faamaonia e ou faufautua o faifeautalai mo auaunaga po o le peresitene o le misiona, e mafai ona e auai i faatasiga faaagafesootai ma isi faifeautalai mo auaunaga pe a e te le o i ai i ou tofiga faaleauaunaga. O nei gaoioiga e tatau ona mulimuli i tulaga faatonuina o loo i lenei tusitaulima. E le tatau ona faia i le po atoa.

O le faamoemoega o lau misiona o le auauna atu. Peitaʻi, atonu e i ai taimi e talafeagai ai ona auai i tafaoga faaleaiga. Ia talanoaina muamua aso mālōlō faaleaiga ma ou faufautua o faifeautalai mo auaunga ma saili se faamaoniga mai lou peresitene o le misiona. Fausia se fuafuaga ma nei taitai e faaleleia atili ai lou aafiaga i le misiona ma faataunuu lou faamoemoega faafaifeautalai a o i ai i se tafaoga faaleaiga.

Faalogologo i musika e ogatusa ma lou valaauga paia. O musika e tatau ona valaaulia ai le Agaga, fesoasoani ia oe e taulai atu ai i le galuega, ma tataia ou manatu ma lagona i le Faaola.

Aua le faalogologo i musika e uunaia ai le ola le mama, e viia ai faiga sauā, po o le faaaogaina o gagana faatiga. Aloese mai musika e faavaivaia ai lou lagona faaleagaga e ala i lona pa’ō, mea fai faili, leotele, upu, po o le malosi.

Ua tuuina atu e le Alii ia te oe le tekinolosi e fesoasoani ai i le faataunuuina o Lana galuega. “O lau misiona o se avanoa sili lea e aoao ai e faaaoga ma le atamai tekinolosi” (Tala’i La’u Talalelei, mataupu 2).

O le faaaogaina ma le atamai ma le amiotonu o tekinolosi e mafai ona fesoasoani ia te oe e faataunuu ai lou faamoemoega faafaifeautalai ma faaaoga lelei ai le taimi. O tekinolosi e mafai ona faaleleia atili ai au suesuega o le talalelei ma tusitusiga paia, faapea foi ma le fesoasoani ia te oe e faatutu ni sini ma fai ni fuafuaga. E mafai foi ona fesoasoani ia te oe e aloese ai mai anomea e le talafeagai.

Mulimuli i le Agaga e uiga i le taimi ma le auala e faaaoga ai tekinolosi i auala o le a fesoasoani e faamalosia ai lou faatuatua ia Iesu Keriso ma le faatuatua o i latou e te auauna atu i ai.

Aloese mai soo se mea e tufanua, lē mamā, sauā, pe mataga.

Ia faautauta i lou faaaogaina o lau masini feaveai. Aloese mai le faaaogaina o lau telefoni feaveai mo faamoemoega tau oe lava ia i itula o auaunaga.

O ala o faasalalauga faaagafesootai (ma isi auala o fesootaiga) e mafai ona avea ma se auala lelei e faasoa ai auala o loo e mulimuli ai i le Faaola o se faifeautalai. O tusiga e faatatau i gaoioiga e le o ni gaioiga faafaifeautalai e tatau lava ona atagia ai le mamalu o lou valaauga o le misiona.

Filifili ma le poto pe a faaaogaina ala o faasalalauga faaagafesootai. Po o a lava mea e te faitauina, faalogologo i ai, pe tilotilo i ai e aafia ai oe. Filifili na o ala o faasalalauga e siitia ai oe.

Puipui lou saogalemu ma le saogalemu o isi e ala i le faaeteete e uiga i faamatalaga patino ma ata e te faasoa atu i tekinolosi. Pe a e faaaogaina ala o faasalalauga e faataunuu ai lou faamoemoega o se faifeautalai, aua le:

• Faaaogaina le faalaniga “Elder” po o le “Sister” i le igoa o lou faitotoa i faasalalauga faaagafesootai.

• Talanoaina soo se mea i luga o le initoneti pe ala i feau tusitusia e le talafeagai ona faasoa atu faafesagai.

• Faasoaina atu ni manatu faapolokiki.

• Nei e manatu faapea o mea ua e faasalalau atu o ni fesootaiga aloaia a le Ekalesia.

Ia mautinoa e usitaia tulafono o loo lima taitaiina ai le faasoa atu o musika, ata tifaga, ma isi aitema ua taofia aia tatau e faasalalau ai.

Ia faaeteete ia aua nei faaaluina le tele o le taimi e faaaoga ai le initoneti, se masini feaveai, po o isi ala o faasalalauga. O le faia o lena mea e mafai ona taofia ai oe mai le auai i gaoioiga e fesoasoani ia te oe e faataunuu ai lou faamoemoega faafaifeautalai ma faamaea ou tofiga faafaifeautalai.

Afai e te le o mautinoa pe talafeagai se mea e matamata pe faalogologo i ai, talanoa i ou matua po o tagata o tausia oe, epikopo, po o faufautua o faifeautalai mo auaunaga. O le a taitaia oe ma tuuina atu e le Agaga Paia ia te oe le malosi e faia ai filifiliga sao.