Pagkompleto sa Imong Misyon

Andama ang imong kaugalingon karon sa pagpadayon sa imong pagpakabuhi isip usa ka disipulo ni Jesukristo ug isip usa ka matinud-anon nga miyembro sa Ang Simbahan ni Jesukristo sa mga Santos sa Ulahing mga Adlaw human sa imong pagka-release. Bisan kon ang imong misyon mahuman na, magpadayon ka sa pagtinguha sa pagtuman sa imong misyon sa kinabuhi nga mao ang pagbalik og puyo uban sa Langitnong Amahan.

Samtang hapit na mahuman ang imong misyon ug uban sa tabang sa imong mga tigtambag sa pangserbisyo nga misyonaryo, kompletoha ang imong “Akong Plano.” Ipakigbahin kini sa imong mga tigtambag sa pangserbisyo nga mga misyonaryo. Human sa imong misyon, sangonan ka og usa ka mentor nga motabang ug mosuporta nimo sa pagsunod sa imong “Akong Plano.”

Tungod kay ikaw usa pa gihapon ka misyonaryo hangtod nga ikaw ma-release sa imong presidente sa stake, ikaw gilauman nga mosunod sa tanang sumbanan sa misyonaryo hangtod niana nga panahon.

Kon mahuman na ka sa imong misyon, padayon sa pagsunod sa ebanghelyo ug ipabilin ang matarong nga mga gawi nga makatabang nimo nga mapaduol ngadto sa Langitnong Amahan ug ni Jesukristo. Gamita ang imong mga talento ug mga abilidad nga imong napalambo aron sa paglig-on sa uban ug sa pagtukod sa gingharian sa Dios. Seguroa nga:

• Mopakigbahin sa imong kasinatian sa misyon ngadto sa uban.

• Masunod ang imong “Akong Plano” ug magpadayon sa pagtakda og mga tumong sa tibuok nimong kinabuhi.

• Mag-ampo ug magtuon sa mga kasulatan kada adlaw.

• Motambong ug mosalmot diha sa kaugalingong ward o ward sa young single adult; pangayo sa imong bishop og calling.

• Mangita og mga oportunidad sa pagserbisyo diha sa templo kon adunay usa nga duol ra.

• Mopadayon sa pagpangita og mga oportunidad nga makaserbisyo sa uban.

• Motambong sa institute o sa uban pa nga mga klase sa edukasyong pang-relihiyon.

• Mangita og mga oportunidad sa edukasyon, pagbansay, ug pagpanarbaho.

Magpakabuhi sa ingon nga imong masinati ang matang sa kalipay nga gihulagway diha sa Basahon ni Mormon sa dihang si Alma nga Batan-on nakahimamat sa isigka misyonaryo sa ulahing bahin sa kinabuhi:

“Samtang si Alma nagpanaw gikan sa yuta sa Gideon paingon sa habagatang bahin, paingon sa yuta sa Manti, tan-awa, sa iyang katingala, iyang nasugatan ang mga anak nga lalaki ni Mosiah nga nagpanaw paingon sa yuta sa Zarahemla. …

“… Busa si Alma nagmaya sa hilabihan sa pagkakita sa iyang mga igsoun; ug ang nakadugang sa iyang kamaya, kay sila nagpabilin gihapon nga iyang mga igsoon sa Ginoo; oo, ug sila nakaangkon og dugang kahibalo sa kamatuoran; kay mga tawo sila nga mabuot og salabotan ug makugihon silang misiksik sa mga kasulatan, aron sila makahibalo sa pulong sa Dios.

“Apan dili kini mao ang tanan; gihalad nila ang ilang kaugalingon ngadto sa hilabihan nga pag-ampo, ug pagpuasa; busa sila adunay espiritu sa pagpanagna, ug espiritu sa pagpadayag, ug kon sila nagtudlo, sila nagtudlo uban sa gahom ug awtoridad sa Dios” (Alma 17:1–3).