Gawi sa Misyonaryo

Ang pagtuman sa mga pakigsaad sa templo makapalig-on kanimo ug makatabang nimo nga mahimong mas mahisama sa Manluluwas. Kini nga mga pakigsaad naglakip sa:

• Ang balaod sa pagkamasulundon.

• Ang balaod sa sakripisyo.

• Ang balaod sa ebanghelyo ni Jesukristo.

• Ang balaod sa kaputli.

• Ang balaod sa pagpahinungod.

  (Tan-awa sa Kinatibuk-ang Tamdanan nga Basahon, 27.2)

Bisan kon walay templo duol nimo, pagpabiling takos sa pagsulod sa templo. Hangyoa ang imong bishop ug presidente sa stake alang sa interbiyo kalabot sa rekomend sa templo sa dili pa mawala ang kabalido sa imong rekomend.

Ang pagsul-ob og garment sa templo mao ang sagradong pribilihiyo niadtong mihimo og mga pakigsaad ngadto sa Ginoo kauban sa pagtuga. Alang sa giya bahin sa pagsul-ob sa garment, tan-awa sa Kinatibuk-ang Tamdanan nga Basahon, 38.5.5.

Kon ang templo duol ra, giawhag ka nga motambong isip usa ka patron sa tibuok nimong misyon. Ang pagserbisyo isip usa ka patron mahimo usab nga usa sa mga oportunidad sa pagserbisyo nga gisangon kanimo.

Ang pagtambong sa templo makapalambo sa imong kasinatian sa misyon. Ikoordinar kini ngadto sa imong ubang misyonaryo nga mga buluhaton. Kon magserbisyo ka sa templo, tumana ang imong buluhaton uban sa kaligdong, respeto, ug balaang pagtahod.

Kon motambong ka sa templo, hinumdomi ang mosunod:

• Kon tawagon ka sa kapangulohan sa templo aron moserbisyo isip usa ka ordinance worker, moserbisyo ka sa templo sumala sa ilang imando.

• Mahimo ka nga moapil sa bisan unsa nga mga ordinansa nga gipahigayon diha sa templo gawas sa pag-proxy alang sa usa ka bana o asawa diha sa seremonya sa pagselyo. Aron malikayan ang sayop nga pagsabot sa espirituwal nga mga pagbati isip romantiko nga mga pagbati.

• Ayaw pagdala og mga kamera, mga cell phone, o mga materyal nga basahonon, (lakip na ang patriyarkal nga mga panalangin) aron gamiton sulod sa templo.

• Dili magpundok-pundok isip mga misyonaryo o moluhod sa pag-ampo diha sa celestial nga lawak.

• Pinaagi sa pagdala og mga ngalan sa pamilya ngadto sa templo, makatabang ka sa pagpundok sa Israel sa pikas habig sa tabil ug mapalambo ang imong kasinatian sa templo.

Adunay daghang matang sa pornograpiya. Ang pagplano daan ug paghimo og matarong nga mga pagpili makatabang nimo sa paglikay sa pornograpiya. Kon imo kining masugatan, likay, palonga ang device, o biyai ang sitwasyon.

Gamita ang mosunod nga mga sugyot aron makatabang nimo sa paglikay sa pornograpiya:

• Likayi ang mga website, mga materyal, ug mga dapit diin adunay kalagmitan nga imong madungog, mabasa, o makita ang makapadani nga mga materyal o pornograpiya. Kontaka ang imong mga tigtambag sa pangserbisyo nga misyonaryo kon ikaw nahisugamak sa dili tukma nga materyal diha sa imong mga dapit nga nadestinohan sa pagserbisyo.

• Kat-oni ang pag-ila sa mga higayon nga matintal ka pag-ayo sa sayop nga paggamit sa teknolohiya, sama sa higayon nga ikaw gikapoy o gilaay.

• Paghimo og plano kon unsay imong buhaton nianang mga higayona. Ang imong mga tigtambag sa pangserbisyo nga misyonaryo makatabang.

• Rebyoha kanunay ang “Gamita ang Teknolohiya sa Matarong nga Paagi” ug “Sunda ang mga Pag-amping sa Paggamit sa Teknolohiya” nga mga seksiyon sa kapitulo 2 sa Isangyaw ang Akong Ebanghelyo.

Imo usab nga makita ang impormasyon sa ChurchofJesusChrist.org/study/life-help/pornography.

Si bisan kinsa nga magtinguha sa paglikay o pagbuntog sa pornograpiya makakaplag og tabang ug kaayohan pinaagi sa Pag-ula ni Jesukristo. Kon ikaw nanglimbasog, pakig-istorya sa imong bishop o presidente sa stake. Mohatag siya og mahigugmaong tambag ug suporta.

Magmahimong kalig-on ug maayong ehemplo sa imong pamilya ug mga higala. Mopakigbahin og makadasig nga mga kasinatian ug kon unsay imong nakat-onan gikan sa imong mga kasinatian sa misyon.

Ang mga sakop sa pamilya tingali kinahanglang motabang kanimo sa imong pisikal ug emosyonal nga mga panginahanglan, sa transportasyon, o sa ubang mga paagi aron magmalamposon ka sa imong pagserbisyo. Adunay pipila ka pagpahiangay ngadto sa kinabuhing pangpamilya atol sa imong misyonaryo nga pagserbisyo. Ikaw ug ang imong pamilya kinahanglang mohimo og pipila ka pagsakripisyo aron sa pagsiguro nga ikaw adunay labing makahuluganon ug mabungahon nga kasinatian sa misyon kutob sa mahimo.

Palig-ona ang pagsalig ug ang makahuluganon nga mga relasyon niadtong imong serbisyohan. Magmahimong propesyonal ug magmabination. Tumana ang mosunod nga mga sumbanan:

• Likayi ang mga sitwasyon nga mahimong peligroso sa pisikal o sa espirituhanon nga paagi o nga mahimong masaypan sa pagsabot.

• Dili makig-date, motambong sa mga sayaw-sayaw, mag-ibog-ibog, o makig-istorya sa dili angay nga paagi ni bisan kinsa. Mag-amping nga dili makaapil sa bisan unsa nga kalihokan o pamatasan nga mahimong masaypan isip pag-ibog-ibog o murag nakig-date tan-awon.

• Ipabiling ligdong ang imong pinulongan. Likayi ang paggamit og slang. Paggamit og tukma nga mga tawag kon mosangpit sa uban. Pananglitan, gamita ang tawag nga “Elder” o “Sister” kon mosangpit ngadto sa ubang mga misyonaryo ug sa mga tigtambag sa pangserbisyo nga mga misyonaryo. Nagpakita kini og pagtahod sa ilang mga calling.

Alang sa imong seguridad ug ingon man sa seguridad sa mga bata ug sa mahuyang nga mga hamtong, hugtanong tumanon ang mosunod nga mga sumbanan kon magtrabaho kauban niini nga mga tawo:

• Ayaw pag-inusara uban sa mga bata o mahuyang nga mga hamtong ubos sa bisan unsa nga kahimtang.

• Dili mobantay nila, mosinina nila, o mohatag og mga tambal nila, o moatiman sa paglimpyo sa ilang kaugalingon [personal hygiene].

• Serbisyohi lamang sila kon adunay laing responsable nga hamtong nga anaa. Sunda ang mga protokol sa seguridad alang sa Simbahan o sa charity nga imong giserbisyohan.

• Kon nagtrabaho ka uban nila sa usa ka manggihatagon nga organisasyon, kinahanglan una nimong kompletohon ang pagsusi sa background niini.

Ang mahuyang nga mga hamtong mao ang mga tawo nga adunay mental o pisikal nga kakulian nga mahimong makaapekto og dako sa ilang abilidad sa pagsabot sa mga sitwasyon ug sa pagpanalipod sa ilang kaugalingon gikan sa pang-abuso, pagpasagad, o pagpahimulos. Ang mahuyang nga hamtong nagpasabot usab sa mga bakwit [refugee] nga tingali dili makasabot sa pinulongan o mga kalainan sa kultura.

Makig-inter-aksiyon ka sa mga tigtudlo nga mga misyonaryo atol sa mga komperensiya sa zone ug sa ubang mga kahimtang sumala sa gimando sa imong presidente sa misyon. Ang pakig-inter-aksiyon sa tigtudlo nga mga misyonaryo usa ka panalangin nimo, ug ikaw usa ka panalangin ngadto nila.

Isip usa ka pangserbisyo nga misyonaryo, mahimo ka nga mokuyog sa tigtudlo nga mga misyonaryo sa mga pagbisita aron magtudlo. Isul-ob ang imong name tag ug sunda ang mga sumbanan sa pagsinina alang sa tigtudlo nga mga misyonaryo kon mokuyog ka nila sa mga pagbisita aron magtudlo. Kon magbiyahe kamo sa sama nga sakyanan, likayi ang pagpaminaw sa musika ug ang pagtan-aw sa media nga wala mahiuyon sa mga sumbanan alang sa tigtudlo nga mga misyonaryo.

Dili ka mahimong makig-date o mag-ibog-ibog isip usa ka misyonaryo. Ikaw giawhag nga moapil sa mga ward ug mga kalihokan sa young single adult (YSA), apan kinahanglang dili ka motambong og mga sayaw-sayaw. Mag-amping nga dili makaapil sa bisan unsa nga kalihokan o pamatasan nga mahimong masaypan isip pag-ibog-ibog o pakig-date.

Usa kini ka dungog ug pribilehiyo nga magsul-ob og name tag sa misyonaryo. Kanunay kining isul-ob samtang ikaw magbiyahe paingon o gikan sa imong misyonaryo nga buluhaton, diha sa imong misyonaryo nga buluhaton,kon moapil ka sa mga pagbisita aron magtudlo, ug diha sa mga miting sa Simbahan.

Ang misyonaryo nga mga buluhaton naglakip sa misyonaryo nga mga miting ug mga komperensiya, panahon sa pagserbisyo sa imong pamilya, ug mga buluhaton sa Simbahan ug sa manggihatagong katuyoan nga gihimo diha ra sa balay. Kon ikaw adunay bisan unsang mga pangutana kon kanus-a isul-ob ang imong name tag sa pagkamisyonaryo, pangutan-a ang imong mga tigtambag sa pangserbisyo nga misyonaryo.

Ang mga batan-ong pangserbisyo nga misyonaryo nagpuyo sa panimalay. Ang Isangyaw ang Akong Ebanghelyo nag-ingon: “Ang ebanghelyo ni Jesukristo motabang kanato nga makapalambo og mas lig-on nga mga relasyon sa pamilya. Ang panimalay mao ang labing maayo nga dapit alang sa pagtudlo ug pagkat-on sa mga baroganan sa ebanghelyo. Ang usa ka panimalay nga giestablisar diha sa mga baroganan sa ebanghelyo mamahimong usa ka dapit nga kadangpan ug kasegurohan. Mahimo kining usa ka dapit diin mahimong magpuyo ang Espiritu sa Ginoo” (kapitulo 3).

Diha sa sulat sa imong pagkatawag, ikaw gisangonan aron sa pag-alagad isip pangserbisyo nga misyonaryo sa inyong lokal nga komunidad, nga maghatag og Kristohanong pagserbisyo samtang nagpuyo diha sa panimalay. Gamita kining espesyal nga oportunidad sa paglig-on ug sa pagserbisyo niadtong anaa sa imong panimalay ug tabangi sila nga mas mapaduol kang Jesukristo.

Ang pagpanarbaho ug pag-eskwela—ma-full time o part time man—dili kabahin sa pagserbisyo sa full-time nga misyonaryo. Kinahanglan ka nga mogahin sa imong panahon, mga talento, kusog, ug kapanguhaan sa pinansyal ngadto sa imong misyon. Kabahin kini sa balaod sa pagpahinungod, diin ikaw nakigsaad nga sundon didto sa pagtuga sa templo.

Giawhag ka nga moapil sa mga klase ug mga kalihokan sa institute, gawas sa mga kalihokan sa sayaw-sayaw ug pakig-date. Mahimo usab ka nga mo-enrol sa BYU PathwayConnect kon ganahan ka.

Ang mga lagda sa seguridad alang sa mga kalihokan nga magamit ngadto sa mga young single adult imong magamit isip usa ka pangserbisyo nga misyonaryo. Adunay mga restriksiyon bahin sa tibuok gabii nga mga kalihokan, mga pagbisita sa templo sa gawas sa gidestinohan nimo nga temple district, ug layo ang biyahe. Pakigtambayayong sa imong mga tigtambag sa pangserbisyo nga misyonaryo, presidente sa misyon, ug presidente sa stake alang sa bisan unsa nga mga eksepsiyon.

Ang mga kalihokan atol sa mga oras nga wala ka sa buluhaton sa pagserbisyo, sama sa tukma nga mga dula, mga salida, ug mga pasundayag sa telebisyon, pwede ra kon may pagtugot sa imong mga tigtambag sa pangserbisyo nga misyonaryo.

Ang imong misyon naghatag og oportunidad sa pagpalambo sa matarong nga mga nabatasan. Giklaro nga kinahanglang dili ka maminaw, motan-aw, o moapil sa mga kalihokan o media nga makabalda sa impluwensya sa Espiritu sa imong kinabuhi ug sa imong katuyoan isip misyonaryo. Hinumdomi nga ikaw gi-set apart isip usa ka full-time nga misyonaryo. Paningkamot sa pagpahiuyon sa imong pamatasan nganha sa sagrado nga matang sa imong calling.

Samtang imong sugdan ang imong misyonaryo nga pagserbisyo, pagtakda og mga tumong ug paghimo og mga plano sa pagseguro nga ang imong mga gawi sa media nahisubay sa pagkahimong usa ka disipulo ni Jesukristo. Padayon sa pagtakda niini nga mga tumong ug paghimo og mga plano atol sa imong misyon. Ang imong mga tigtambag sa pangserbisyo nga misyonaryo kanunay nga morebyo sa imong mga tumong ug motabang nimo sa paghimo og mga plano sa imong paggamit sa media. Ang usa ka importante nga pangutana mao, “Kini nga [kalihokan, salida, musika, ubp.] makabalda ba sa pagbaton sa impluwensya sa Espiritu sa akong kinabuhi?”

Atol sa imong pagserbisyo isip misyonaryo, ang imong mga rekord sa pagkamiyembro magpabilin sa imong kaugalingong ward. Uban sa pagtugot sa imong bishop, mahimo ka nga motambong sa ward sa mga young single adult (YSA) sa imong dapit.

Ikaw giawhag nga moapil sa mga klase ug mga kalihokan sa institute. Ikaw mahimo usab nga moapil sa mga kalihokan sa mga young single adult nga gipasiugdahan sa inyong ward o stake, sama sa mga kalihokan sa home evening, mga pagbiyahe ngadto sa templo, mga debosyonal, mga dula, ug mga piknik. Pero, dili ka mahimong moapil sa mga kalihokan sa sayaw-sayaw o sa pakig-date.

Hinumdomi, ikaw usa ka misyonaryo. Ang imong mga kalihokan kinahanglang maayo, makapadasig, ug nahiuyon sa mga sumbanan niining tamdanan nga basahon. Kinahanglang nahisubay kini sa imong calling nga mahimong representante ni Jesukristo.

Kanunayng mag-amping ug gamiton ang maayong paghukom kon moapil sa mga kalihokan sa paglingaw-lingaw. Atol sa imong misyon kinahanglang dili ka moapil sa mga kalihokan nga adunay dakong risgo.

Kon gitugotan sa imong mga tigtambag sa pangserbisyo nga misyonaryo o presidente sa misyon, mahimo ka nga moapil sa sosyal nga mga panagtigom kuyog sa ubang pangserbisyo nga mga misyonaryo kon ikaw wala sa imong mga buluhaton sa pagserbisyo. Kini nga mga kalihokan kinahanglang nagsunod sa mga sumbanan niini nga tamdanan nga basahon. Kinahanglang dili kini ipahigayon sa tibuok gabii.

Ang katuyoan sa imong misyon mao ang pagserbisyo. Pero, adunay mga higayon nga tukma ang pag-apil sa mga bakasyon uban sa pamilya. Hisgoti daan ang mga bakasyon uban sa pamilya ngadto sa imong mga tigtambag sa pangserbisyo nga misyonaryo ug pangayo og pagtugot gikan sa imong presidente sa misyon. Pagmugna og usa ka plano kauban niini nga mga lider aron mapalambo ang imong kasinatian sa misyon ug matuman ang imong misyonaryo nga katuyoan samtang anaa sa bakasyon uban sa pamilya.

Paminaw og musika nga nahisubay sa imong sagrado nga calling. Ang musika kinahanglang makadapit sa Espiritu, makatabang nimo nga makatutok sa buhat, ug mogiya sa imong mga hunahuna ug mga pagbati ngadto sa Manluluwas.

Ayaw paminaw sa musika nga nag-awhag og imoralidad, nagmaya sa kapintas, o naggamit og makapasilo nga pinulongan. Likayi ang musika nga mopakunhod sa imong espirituhanong kasensitibo pinaagi sa tugtog niini, tukar, kalanogon, mga pulong, o gikusgon niini.

Gisaligan ka sa Ginoo sa mga teknolohiya aron motabang nga matuman ang Iyang buhat. “Ang imong misyon usa ka talagsaong oportunidad sa pagkat-on sa paggamit sa teknolohiya sa maalamon nga paagi” (Isangyaw ang Akong Ebanghelyo, kapitulo 2).

Ang maalamon nga paggamit sa teknolohiya makatabang kanimo sa pagtuman sa imong misyonaryo nga katuyoan ug sa epektibong paggamit sa oras. Ang teknolohiya makapalambo sa imong pagtuon sa ebanghelyo ug sa mga kasulatan, ingon man usab makatabang nimo sa pagtakda og mga tumong ug sa paghimo og mga plano. Makatabang usab kini kanimo nga malikayan ang dili tukma nga mga materyal.

Sunda ang Espiritu mahitungod kon kanus-a ug unsaon sa paggamit ang teknolohiya sa mga paagi nga makatabang sa pagpalig-on imong pagtuo diha ni Jesukristo ug sa pagtuo niadtong imong giserbisyohan.

Likayi ang bisan unsang butang nga hilas, imoral, bayolente, o may pornograpiya.

Pagbaton og katuyoan sa imong paggamit sa device. Likayi ang paggamit sa imong selpon alang sa personal nga mga katuyoan atol sa mga oras sa mga buluhaton sa pagserbisyo.

Ang social media (ug may kalabotan nga mga plataporma) mahimong usa ka epektibong paagi sa pagpakigbahin kon giunsa nimo pagsunod ang Manluluwas isip usa ka misyonaryo. Ang mga post mahitungod sa mga kalihokan nga dili pangmisyonaryo kinahanglang nagpakita gihapon sa kaligdong sa imong tawag sa misyon.

Maalamong mopili kon mogamit sa media. Bisan unsa ang imong basahon, paminawon, o tan-awon makaapekto nimo. Pilia lamang ang media nga makapadasig nimo.

Bantayi ang imong seguridad ug ang seguridad sa uban pinaagi sa pag-amping kon unsa nga personal nga impormasyon ug mga hulagway ang imong ipaambit gamit ang teknolohiya. Kon maggamit og social media sa pagtuman sa imong misyonaryo nga katuyoan, dili:

• Mogamit og “Elder” o “Sister” sa imong ngalan sa account sa social media.

• Moistorya og bisan unsa diha sa internet o pinaagi sa pag-text nga dili angayang ipakigbahin sa personal.

• Mopakigbahin og politikanhong mga panglantaw.

• Mopasabot nga ang imong mga gi-post mao ang opisyal nga komunikasyon sa Simbahan.

Seguroa nga nagsunod sa mga balaod nga nagdumala bahin sa pagpakigbahin sa musika, mga salida, ug ubang mga aytem nga adunay copyright.

Pag-amping nga dili mogahin og dako kaayong panahon sa paggamit sa internet, mobile device, o ubang media. Ang pagbuhat sa ingon makapugong nimo sa pag-apil sa mga kalihokan nga makatabang nimo sa pagtuman sa imong misyonaryo nga katuyoan ug sa pagkompleto sa imong pangserbisyo nga misyonaryo nga mga buluhaton.

Kon dili ka segurado kon ang usa ka butang tukma ba nga tan-awon o paminawon, pakig-istorya sa imong mga ginikanan o mga tigbantay, bishop, o mga tigtambag sa pangserbisyo nga misyonaryo. Ang Espiritu Santo mogiya usab nimo ug mohatag nimo og kalig-on sa paghimo og sakto nga mga pagpili.