Mensahe gikan sa Unang Kapangulohan ug sa Korum sa Napulog Duha ka Apostoles

Ang Basahon ni Mormon nagtudlo, “Ug tan-awa, gisultihan ko kamo niining mga butanga nga kamo unta makakat-on og kaalam; nga kamo unta makakat-on nga kon kamo anaa sa pag-alagad sa inyong isigkatawo kamo anaa lamang sa pag-alagad sa inyong Dios.” (Mosiah 2:17). Ang Dios mitawag kanimo nga mahimong usa ka pangserbisyo nga misyonaryo aron motabang sa pagpundok sa Israel pinaagi sa pagserbisyo. Mapasalamaton kami alang sa imong kaandam sa pagserbisyo sa Dios pinaagi sa pagserbisyo sa imong isigkatawo.

Ang pagserbisyo sa mga anak sa atong Langitnong Amahan usa ka importante nga pagpahayag sa imong pasalamat ngadto sa Dios alang sa kinabuhi ug sa Iyang ebanghelyo. Nagpakita kini sa imong kaandam sa pagtuman sa pakigsaad nga imong gihimo ngadto Kaniya. Kami nag-awhag nimo sa “pag-ampo ngadto sa Amahan uban sa tibuok kusog sa kasingkasing” nga mapuno ka sa tiunay nga gugma ni Kristo. Kini nga gugma ihatag sa “tanan kinsa tinuod nga mga sumusunod” ni Jesukristo (Moroni 7:47–48). Samtang nagserbisyo ka sa uban pinaagi sa Iyang ngalan, Siya mopuno kanimo sa hingpit nga kalipay.

Mga Sumbanan sa Misyonaryo alang sa mga Disipulo ni Jesukristo—Pangserbisyo nga mga Misyonaryo gisangkap sa Unang Kapangulohan ug Korum sa Napulog Duha ka Apostoles aron mogiya sa imong pagserbisyo. Kami nag-awhag kanimo nga mahimong pamilyar niini ug motuman sa mga sumbanan nga anaa niini. Kini nga mga sumbanan makatabang sa pagpanalipod kanimo sa pisikal, espirituhanon ug emosyonal nga paagi. Makatabang kini kanimo nga mahimong mas matinud-anon nga disipulo ni Jesukristo ug mas mahimong sama Kaniya.

Kami nag-ampo nga imong makaplagan ang tinuod nga kalinaw ug hingpit nga kalipay sa pagserbisyo ni Ginoong Jesukristo ug sa mga anak sa Langitnong Amahan.