Pisikal ug Emosyonal nga Kaayohan

Ang usa ka misyon mahimong makapalipay ug mahagiton. Ang mga sumbanan dinhi niining seksiyon ug diha sa Pagpahiangay ngadto sa Kinabuhi sa Pangserbisyo nga Misyonaryo makatabang nimo sa pag-andam sa imong panghunahuna ug panglawas aron mas makaserbisyo og maayo sa Ginoo. Rebyoha kanunay kining mga sumbanan sa tibuok nimong misyon.

Ang imong kahimsog ug seguridad importante. Pagpabiling himsog aron makaserbisyo ka sa tibuok nimong kasingkasing, gahom, hunahuna, ug kusog (tan-awa sa Doktrina ug mga Pakigsaad 4:2).

Ikaw ug ang imong pamilya mao ang responsable alang sa pag-atiman sa imong medikal nga mga panginahanglan. Usahay ang pagbisita sa usa ka propesyonal alang sa pag-atiman sa kahimsog mahitabo atol sa imong misyonaryo nga eskedyul. Niini nga mga sitwasyon, ipahibalo daan ang pagbisita ngadto sa imong mga tigtambag sa pangserbisyo nga misyonaryo.

Ang pag-ehersisyo makatabang nimo nga magpabiling himsog ug makatabang nga mawala ang kaluya. Himoa ang pag-ehersisyo nga kabahin sa imong inadlaw-adlaw nga tulumanon kutob sa itugot sa imong mga kahimtang.

Ang misyonaryo nga buhat mahimong lisod kaayo. Ang pagbati og kaluya sa matag karon ug unya normal ra. Makaandam ka sa imong panglawas ug panghunahuna aron mas madumala ang kaluya pinaagi sa pagpahimulos sa suporta sa pamilya.

Makatabang ka usab sa pagdumala sa kaluya pinaagi sa pagpraktis og mga gawi sa pagkaon og makapahimsog, kanunay nga pag-ehersisyo, saktong pagkatulog, pagrelaks, ug espirituhanong mga kalihokan. Ang ingon niana nga mga kalihokan naglakip sa pag-ampo, pagpamalandong, pagtuon, ug pagtambong sa regular nga mga tulumanon sa pagsimba.

Sa tibuok nimong misyon, gamita ang Pagpahiangay ngadto sa Kinabuhi sa Pangserbisyo nga Misyonaryo aron matabangan ka sa pagdumala sa imong kaluya. Kon imong gibati nga ikaw naglisod sa pagdumala sa kaluya, o kon ikaw adunay emerhensiya sa mental ug emosyonal nga kahimsog, kontaka ang imong mga ginikanan o mga tigbantay, bishop, o mga tigtambag sa pangserbisyo nga misyonaryo.

Kon giresitahan ka og tambal sa pagdumala sa usa ka kahimtang o sakit, sunda ang giresita ug ang gitudlo sa imong doktor.

Atimana ang imong pisikal ug emosyonal nga kahimsog sa seryoso nga paagi. Seguroa nga makakuha ka og bisan unsa nga gikinahanglang suporta gikan sa imong mga ginikanan o mga tigbantay alang sa bisan unsang medikal nga mga problema nimo (sama sa mga tambal nga imong gitumar, mga allergy nimo, o mga kalihokan nga kinahanglan nimong likayan). Mahimo usab nimong ipakigbahin ang piho nga medikal nga impormasyon ngadto sa imong mga tigtambag sa pangserbisyo nga misyonaryo ug sa mga superbisor sa operasyon kon gikinahanglan.

Kon aduna kay mga emerhensiya sa panglawas, gamita ang sentido komon alang sa imong dinalian nga kasiguroan o pag-atiman. Tawag sa lokal nga emergency services (sama sa 911 sa Estados Unidos) gawas kon nahatagan ka og laing mga instruksyon. Sa labing dali nga panahon, kontaka ang imong mga ginikanan o mga tigbantay ug ang mga tigtambag sa pangserbisyo nga misyonaryo.

Kon nagkinahanglan ka og medikal nga pag-atiman nga dili pang-emerhensiya atol sa usa ka buluhaton, tawaga dayon ang imong mga ginikanan o mga tigbantay. Mosulti sila nimo kon unsay buhaton. Sulayi ang pag-eskedyul daan sa dili pang-emerhensiya nga pag-atiman aron dili kini makabalda sa imong mga buluhaton o eskedyul sa pagserbisyo.

Daghang posible nga mga peligro ang mahimong malikayan pinaagi sa paggamit sa maayong paghukom ug pinaagi sa pagsunod sa mga sumbanan sa misyonaryo niini nga tamdanan nga basahon. Pero, mahimong mag-atubang ka og delikado nga mga sitwasyon bisan kon maningkamot ka nga mahimong luwas. Kon adunay problema, i-report dayon kini ngadto sa imong mga tigtambag sa pangserbisyo nga misyonaryo.

Biya dayon kon ikaw mobati nga dili komportable sa usa ka dapit, sa tawo, o sa sitwasyon. Paminaw kanunay sa espirituhanong mga pag-aghat.

Motabang sa pag-atiman sa panimalay sa inyong pamilya ug buhata ang imong bahin sa mga buluhaton. Ipabilin ang imong lawak nga hapsay ug limpyo. Ipadayon nga maayong pagkahan-ay ang imong personal nga mga kabtangan, lakip na ang elektronik nga mga device.

Kinahanglang dili ka matulog o magpuyo sa gipuy-an sa tigtudlo nga mga misyonaryo.

Sunda kanunay ang mga lokal nga lagda sa trapiko, mga balaod, ug mga kustombre samtang magbiyahe ka.

Ang pangpublikong transportasyon sagad mas barato kay sa magmaneho. Kon adunay pangpublikong transportasyon, ikonsiderar ang paggamit niini sa pag-adto o gikan sa imong buluhaton sa pagserbisyo.

Gamita ang maayong paghukom, kinahanglang kahibalo ka sa imong palibot, ug magmahimong pamilyar sa inyong dapit. Sunda ang kinatibuk-ang mga sumbanan sa seguridad niini nga tamdanan nga basahon.

Kon nalambigit ka og aksidente samtang nagmaneho paingon o gikan sa imong misyonaryo nga buluhaton, mga miting, o mga komperensiya, tawag sa polis o pang-emerhensiya nga mga serbisyo kon gikinahanglan. Diha-diha dayon, kontaka usab ang imong pamilya. Dayon kontaka ang imong mga tigtambag sa pangserbisyo nga misyonaryo.

Kon nalambigit ka og aksidente sa imong buluhaton sa pagserbisyo, pakig-istorya sa imong superbisor sa dapit nga giserbisyohan. Kana nga tawo motawag og polis o pang-emerhensiya nga mga serbisyo kon gikinahanglan. Diha-diha dayon, kontaka usab ang imong pamilya ug ang imong mga tigtambag sa pangserbisyo nga misyonaryo.

Ikaw giawhag nga mabinantayong mobadyet ug mogasto sa imong personal nga kwarta . Ang kwarta nga imong gigamit atol sa imong misyon nagrepresentar sa mga sakripisyo nimo, sa imong pamilya, ug sa uban.

Sunda ang mga baroganan sa pagbayad sa mga ikapulo ug mga halad ug sa pagtigom og kwarta.

Dili mangayo og kwarta alang sa personal nga suporta sa pinansyal o alang sa organisasyon nga imong giserbisyohan.

Kay ikaw usa man ka awtorisadong representante ni Jesukristo ug sa Iyang gipahiuli nga Simbahan, ang imong panagway sa kasagaran maoy unang impresyon nga madawat sa uban. Pagsul-ob og sinina nga tukma sa imong mga buluhaton sa pagserbisyo ug nahiangay sa imong sagradong calling.

Sa imong tibuok nga misyon, seguroa nga ang imong panagway ug pamatasan mosuporta sa unsay imong gisulti ug gibuhat. Kinahanglang dili kini makabalda sa imong misyonaryo nga katuyoan. Ang imong sinina ug panagway kinahanglang nagpakita og pagkamapainubsanon, respeto, ug hugot nga pagtuo.

Ang paagi nga imong ipresentar ang imong kaugalingon makaimpluwensya sa panghunahuna sa mga tawo mahitungod nimo ug sa Simbahan sa Ginoo. Mahimong makatabang usab kini sa pagpanalipod kanimo gikan sa daotan.

Ang paggamit og tukmang sinina ug personal nga pamustura usa ka importante nga kahanas sa kinabuhi nga makatabang usab nimo human sa imong misyon. Kon motambong og mga komperensiya sa zone, mga interbiyo, ug moapil sa mga pagbisita aron magtudlo, sunda ang mga sumbanan sa sinina ug pamustura diha sa Sinina ug Panagway. Kini nga website naghatag og mga ehemplo sa tukma, propesyonal nga pagsinina alang sa imong misyon. Ang imong mga lider sa misyon ug ang Kapangulohan sa Area mahimong mousab niini nga mga lagda aron sa paghatag og pagtagad sa lokal nga mga kahimtang.