Ang Imong Kasinatian sa Pagkamisyonaryo

Ang pangalagad sa Manluluwas nagpakita og ehemplo sa duha ka dagko nga mga sugo. Ang una “higugmaa ang Ginoo nga imong Dios sa tibuok mong kasingkasing, sa tibuok mong kalag ug sa tibuok mong hunahuna.” Ang ikaduha nga labing importanteng sugo sama sa una: “Higugmaa ang imong isigkatawo sama sa imong kaugalingon” (Mateo 22:37, 39). Higugmaon nato og una ang Dios. Kay kita nahigugma man Kaniya, kita mohigugma sa Iyang mga anak. Ug usa ka paagi nga atong mapakita ang atong gugma sa mga anak sa Dios mao ang pagserbisyo kanila isip atong isigkatawo.

Ikaw adunay piho nga katuyoan isip usa ka pangserbisyo nga misyonaryo. Gihatag kini nganha nimo sa Unang Kapangulohan. Kinahanglan nga kini ang mogiya nimo sa imong sagrado nga tawag sa pagserbisyo sa mga anak sa Langitnong Amahan:

• Pagtabang sa uban sa pagduol ngadto kang Kristo pinaagi sa pagserbisyo uban sa mahigugmaong kaayo sama sa gibuhat sa Manluluwas. Pangalagad diha sa Iyang ngalan ngadto sa tawo pinaagi sa gahom sa Espiritu Santo ug magpakabuhi nga usa ka ehemplo sa hugot nga pagtuo diha ni Jesukristo, paghinulsol, pagtuman sa pakigsaad uban sa Dios, ug molahutay hangtod sa kataposan.

Ang imong pagserbisyo alang kang Jesukristo, ug ikaw gidapit nga moserbisyo ug mahimong sama Niya.

Ang imong misyon wala magsugod sa adlaw nga ikaw gi-set apart. Ug dili kini matapos sa adlaw nga ikaw i-release. Ang usa ka misyon labaw pa kaysa pagsul-ob og nametag sa buntag ug huboon kini inig tapos sa adlaw.

Ang imong kasinatian sa misyon nagpakita sa imong pasalig ni Jesukristo ug sa imong tinguha sa pagserbisyo sa uban pinaagi sa Iyang ngalan. Sukad sa imong pagbunyag, ikaw nabutang na sa dalan sa pakigsaad nga padulong ngadto sa mahangturon nga kamaya, kalipay, ug kalinaw. Ang imong kasinatian sa misyon makapausab nimo. Kinahanglang dad-on nimo kana nga mga kausaban sa tibuok nimong kinabuhi.

Gikan sa mahangtorong panglantaw, ang imong misyon usa ka paagi aron matabangan ka nga mahimong tibuok kinabuhi nga disipulo ni Jesukristo. Ang Basahon ni Mormon nagtudlo, “Gisultihan ko kamo niining mga butanga nga kamo unta makakat-on og kaalam; nga kamo unta makakat-on nga kon kamo anaa sa pag-alagad sa inyong isigka tawo kamo anaa lamang sa pag-alagad sa inyong Dios” (Mosiah 2:17). Ang imong misyon usa ka talagsaong panahon sa imong kinabuhi sa pagdiskobre sa hingpit nga kalipay sa pagserbisyo sa Ginoo ug sa uban.

Ang Ginoo miingon, “Kon kamo adunay tinguha sa pag-alagad sa Dios, kamo gitawag ngadto sa buhat” (Doktrina ug mga Pakigsaad 4:3). Ikaw adunay pribilihiyo sa pagpahinungod niining panahona sa imong kinabuhi sa pagserbisyo sa Ginoo pinaagi sa pagserbisyo sa uban pinaagi sa Iyang ngalan. Niini nga calling, ikaw adunay mga oportunidad nga mohatag og serbisyo nga makapanalangin sa ubang mga tawo, sa imong kaugalingong kinabuhi, sa imong pamilya, sa Simbahan, ug sa mga organisasyon diin ikaw nagserbisyo.

Matag usa kanato gipadala dinhi sa yuta nga adunay nagkalainlaing mga abilidad ug mga talento. Gamit ang imong talagsaong mga talento ug mga abilidad, makahimo ka og makahuluganong kontribusyon ngadto sa buhat sa Dios.

Tagamtama ang imong kasinatian sa misyon samtang ikaw mohigugma sa Dios ug mohigugma sa imong silingan. Mao kini ang panahon sa paglipay ug sa pagsinati og malungtaron nga kalipay ug kalinaw pinaagi ni Jesukristo.

Ang tinuod nga mga disipulo ni Jesukristo mga masulundon. Ang Manluluwas nagtudlo, “Kon nahigugma kamo kanako, tumana ninyo ang akong mga sugo” (Juan 14:15). Ang pagtuman sa mga sugo nagpasabot nga ikaw andam ug matinud-anong mobuhat sa unsay gipangayo sa Ginoo tungod kay ikaw nahigugma Kaniya. Ang pagkamasulundon nagpasabot usab nga ikaw motuman sa mga sugo uban sa “kamaya” ug “malipayon ug mapaubsanong kasingkasing” (Mga Taga-Colosas 1:11; Mga Buhat 2:46).

Si Jesukristo mao ang ehemplo sa hingpit nga pagkamasulundon. Ang tanan Niyang gibuhat nahisubay sa kabubut-on sa Amahan. Sunda Siya pinaagi sa pagbuhat sa imong labing maayo sa pagtuman sa Iyang mga sugo ug sunda ang mga sumbanan sa pangserbisyo nga misyonaryo.

Ang pagkamasulundon ug pagkamatinud-anon nagpasabot usab nga ikaw naningkamot nga makakat-on, mouswag, ug molambo. Korihii dayon ang mga sayop. Paghinulsol sa walay langay. Ipakita nga ikaw matinud-anon ug masulundon pinaagi sa pag-angkon sa personal nga responsibilidad alang sa imong mga binuhatan.

Ikaw mapanalanginan kon mosunod ka sa mga sugo ug sa mga sumbanan sa misyonaryo ug mogamit sa maayong paghukom. Timan-i nga bisan kon nagtuman ka sa mga sugo, mahimong makasinati ka og kasagmuyo, mga sakit, o ubang mga hagit (tan-awa sa 2 Nephi 4:17–19; Alma 26:27). Ang Manluluwas nakasinati usab niining tanang butang (tan-awa sa Alma 7:11–12; Doktrina ug mga Pakigsaad 122:8). Siya misaad, “Dili ko kamo biyaan nga daw mga ilong tuwapos: Mobalik ako kaninyo.” (Juan 14:18).

Ang Dios nahigugma kanimo. Pilia ang pagtuman sa mga sugo tungod kay ikaw nahigugma sa Dios. Ayaw pagsulay sa paghimo og pakigsabot Kaniya o isipon ang imong pagkamasulundon nga usa ka transaksyon aron makaangkon og piho nga mga panalangin.

Ang kabubut-on, o ang abilidad sa pagpili ug paglihok alang sa atong kaugalingon, usa sa labing mahinungdanon nga mga gasa sa Dios ngadto sa Iyang mga anak. Ang atong mahangtoron nga pag-uswag nag-agad kon giunsa nato paggamit kini nga gasa. Kon kita mopili sa pagsunod ni Jesukristo ug sa Iyang mga pagtulun-an, atong masinati ang hingpit nga kalipay.

Ang atong moral nga kabubut-on nagtugot kanato sa pagkat-on, pagtubo, pag-uswag, ug pagsunod sa Manluluwas. Tungod kay kita adunay gasa sa kabubut-on, kita “gawasnon nga mopili sa kalingkawasan ug sa kinabuhing dayon, pinaagi sa halangdon nga Tigpataliwala sa tanang katawhan.” (2 Nephi 2:27).

Ikaw maoy responsable sa mga desisyon nga imong himoon. Ikaw anak sa Dios nga adunay dakong kalig-on. Ikaw adunay abilidad sa pagpili sa pagkamatarong ug kalipay bisan unsa pa ang imong mga kahimtang.

Ikaw mao usab ang responsable sa pagpalambo sa mga abilidad ug mga talento nga gihatag sa Dios kanimo. Ang imong misyon mao ang panahon sa pagkat-on nga manubag ngadto Kaniya sa unsay imong gihimo sa imong mga abilidad.

Ang imong misyon mao usab ang panahon sa pagkat-on nga manubag kon giunsa nimo paggamit ang imong panahon. Ayaw usiki ang panahon pinaagi sa pagtinapolan. Magmahimong andam nga motrabaho og maayo. Pilia nga mahimong makanunayon ug masaligan. Paghimo og daghang maayo nga mga butang sa imong kaugalingong kabubut-on (tan-awa sa Doktrina ug mga Pakigsaad 58:27–28). Tan-awa sa “Ang Pagpangalagad uban sa Gahum ug Katungod sa Dios” ni Presidente Russell M. Nelson.

Ang Unang Kapangulohan mihatag sa mosunod nga mga tumong sa pangserbisyo nga misyonaryo:

• Mohatag og oportunidad sa tanang andam nga mga batan-ong babaye ug mga batan-ong lalaki sa pagserbisyo sa Ginoo ug pagpalambo sa pagpamatuod bahin Kaniya.

• Motabang sa matag pangserbisyo nga misyonaryo sa pag-andam alang sa tibuok kinabuhi nga pagserbisyo.

• Mohatag og gikinahanglan ug bililhon nga serbisyo ngadto sa Ginoo pinaagi sa pagserbisyo diha sa Simbahan ug sa mga organisasyon sa komunidad.

Matinud-anong moserbisyo sa Manluluwas diha sa Iyang ngalan ug sa Iyang paagi atol ug human sa imong misyon. “Tutok kang Kristo samtang maningkamot ka nga magpalambo sa Iyang mga hiyas. … Pag-ampo nga ang Dios mopanalangin nimo niini nga mga hiyas” (Isangyaw ang Akong Ebanghelyo, 142). Kini nga mga hiyas motabang nimo nga matuman ang imong misyonaryo nga katuyoan ug mahimong mas maunongon nga disipulo ni Jesukristo.

Atol sa imong misyon, ikaw adunay mga oportunidad sa pag-ugmad og bag-o nga mga kahanas sa espirituwal, sosyal, pisikal, ug intelektuwal. Kini nga mga kahanas mopanalangin ug moimpluwensya nimo sa tanang aspeto sa imong kinabuhi.

Ang Dios nagdapit kanimo sa pagpahinungod sa imong kaugalingon ngadto Kaniya sa tibuok nimong kinabuhi. Ang mga sumbanan sa misyon sama sa personal nga pagtuon, pagtakda og tumong, ug ang matarong nga paggamit sa teknolohiya makapanalangin kanimo diha sa imong misyon ug sa tibuok nimong kinabuhi.

Tugoti nga ang mga sugo diha sa mga kasulatan ug kining mga sumbanan sa misyonaryo mamahimong giya nga mga baroganan sa tibuok kinabuhi. Samtang magsunod ka sa mga sugo ug mga sumbanan sa Dios, Siya motudlo, mopanalangin, ug mogiya kanimo sa tibuok nimong kinabuhi.