Awtoridad ug mga Ordinansa sa Pagkapari

Ang pagkapari mao ang awtoridad ug gahom nga gihatag sa Dios sa Iyang mga anak aron sa pagpanalangin ug sa pagdala og kaluwasan sa tanan. Kini nga awtoridad gikinahanglan aron sa pagtudlo ug sa pagpangalagad sa mga ordinansa sa ebanghelyo. Ang mga lider sa pagkapari nga nakadawat ug naggamit sa mga yawe sa pagkapari adunay awtoridad sa pagkapari ug makahatag niana nga awtoridad ngadto sa uban.

“Sa Simbahan, ang tanang awtoridad sa pagkapari gigamit ubos sa direksyon niadtong naghupot sa mga yawe sa pagkapari. … Ang tanang miyembro sa Simbahan makagamit sa gidelegar nga awtoridad samtang sila i-set apart o sangonan sa pag-abag sa paghimo sa buhat sa Dios” (Kinatibuk-ang Tamdanan nga Basahon, 3.4).

Kon ang usa ka babaye i-set apart isip usa ka misyonaryo, siya molihok ubos sa awtoridad sa pagkapari aron sa pagpahigayon og buluhaton sa pagkapari. Si bisan kinsang tawo nga adunay calling nga nadawat gikan sa usa ka tawo nga naghupot sa mga yawe sa pagkapari mogamit sa gidelegar nga awtoridad sa pagkapari sa pagpahigayon sa gisangon kaniya nga mga katungdanan.

Kon ikaw usa ka naghupot sa Melchizedek nga Pagkapari, ikaw adunay mga kahigayonan sa pag-apil diha sa mga ordinansa ug mga panalangin sa pagkapari.

Kon magpahigayon sa mga ordinansa ug mga panalangin sa pagkapari, sunda ang mga lagda diha sa kapitulo 18 sa Kinatibuk-ang Tamdanan nga Basahon. Tan-awa usab sa Kinatibuk-ang Tamdanan nga Basahon, 3.4 ug 3.5, bahin sa awtoridad ug gahom sa pagkapari.