Organisasyon ug mga Kalihokan sa Pangserbisyo nga Misyonaryo

Ang imong presidente sa misyon ug ang iyang asawa, magserbisyo isip imong mga lider sa misyon. Sila gitawag sa Dios ug gi-set apart aron mangulo sa misyon. Silang duha nahigugma ug moserbisyo kanimo, motabang kanimo sa pagtuman sa imong katuyoan isip usa ka misyonaryo, ug motabang kanimo nga ang imong kaugalingon magpabiling luwas ug malipayon.

Ang imong presidente sa misyon mopahiluna sa espirituwal ug sa gidahoman nga mga pamatasan atol sa imong misyon. Siya moaprobar usab sa gipahiangay nga kasinatian sa misyonaryo alang sa imong pagserbisyo. Makigtambayayong siya sa mga tigtambag sa pangserbisyo nga misyonaryo sa paghimo niini.

Ang imong mga lider sa misyon ug ang mga tigtambag sa pangserbisyo nga misyonaryo magtinabangay sa daghang mga responsibilidad alang sa misyon. Magtinabangay sila sa pakigtambag aron:

• Mosuporta ug modasig kanimo.

• Maminaw sa imong mga kabalaka.

• Motubag sa imong mga pangutana.

• Mosusi sa imong kalamboan.

• Mohatag nimo og tambag.

• Motabang nimo nga motubo sa espirituhanong paagi.

Kon ikaw adunay interbiyo sa imong presidente sa misyon o sa usa sa iyang mga magtatambag, mahimo nimong dapiton ang imong mga ginikanan, mga tigbantay, o mga tigtambag sa pangserbisyo nga misyonaryo aron moapil sa interbiyo.

Ang imong mga tigtambag sa pangserbisyo nga misyonaryo makigtinabangay isip isigka mga lider ubos sa direksyon sa imong presidente sa misyon. Sila gitawag sa Dios ug gi-set apart aron mangulo sa pangserbisyo nga mga misyonaryo sa inyong gisangon nga dapit. Silang duha mohigugma kanimo, moserbisyo kanimo, ug motabang kanimo nga matuman ang imong katuyoan isip usa ka misyonaryo. Nakigtambayayong sa imong presidente sa misyon, ang mga tigtambag sa pangserbisyo nga misyonaryo:

• Motabang sa pag-ila og mga oportunidad sa paghatag og Kristohanong pagserbisyo.

• Motabang nga mapalambo ang imong gipahiangay nga eskedyul ug mga buluhaton sa misyonaryo.

• Makigkita nimo matag semana.

• Mosusi ug mosuporta sa imong kalamboan sa imong pagserbisyo ug isip usa ka disipulo ni Kristo.

• Mosuporta ug modasig kanimo.

• Maminaw sa imong mga kabalaka, motubag sa imong mga pangutana, ug mohatag og tambag.

• Mogamit og inspirasyon ug pagpadayag sa pagtabang nimo nga magmalamposon isip usa ka misyonaryo.

Sa katingbanan [summary], ang mga tigtambag sa pangserbisyo nga misyonaryo adunay inadlaw-adlaw nga responsibilidad sa pakigtambayayong nimo aron matabangan ka nga makabaton og makapausab sa kinabuhi nga kasinatian sa misyon. Kini nga mga lider makatabang nimo nga motubo isip tibuok kinabuhi nga disipulo ni Jesukristo.

Kon makigkita ka matag semana sa imong mga tigtambag sa pangserbisyo nga misyonaryo, mahimo nimong dapiton ang imong mga ginikanan o ang usa ka suporta nga superbisor nga anaa sa dapit aron moapil sa interbiyo.

Tungod kay sakop ka sa usa ka ward ug stake, ang imong bishop ug presidente sa stake adunay responsibilidad sa pagkapari alang nimo.

Ang imong bishop ug presidente sa stake mao ang responsable alang sa mga interbiyo bahin sa katakos. Tungod kay ang imong bishop ug presidente sa stake naghupot sa mga yawe sa pagkapari, sila molihok isip mga maghuhukom sa kadaghanan. Ang bug-at nga mga sala (sama sa kalapasan sa pakighilawas) kinahanglang ikompisal ngadto sa imong bishop ug kon gikinahanglan sa imong presidente sa stake, imbes sa imong presidente sa misyon. Magmatinuoron sa hingpit ngadto sa imong bishop. Siya nahigugma nimo ug motabang nimo nga masinati ang kalipay sa paghinulsol (tan-awa sa Mosiah 26:29–30).

Sa kataposan sa imong misyon, ang imong presidente sa stake mo-release nimo ug mopasalamat nimo alang sa imong misyonaryo nga pagserbisyo.

Ang imong presidente sa misyon ug ang mga tigtambag sa pangserbisyo nga misyonaryo mogamit sa inspirasyon sa pag-organisar sa buhat. Mahimo sila nga mosangon og mga misyonaryo nga mahimong mga lider ngadto sa ubang pangserbisyo nga mga misyonaryo. Ikaw mahimo usab nga hangyoon nga mangulo o mohatag og pagbansay diha sa imong kalihokan o mga buluhaton sa komunidad.

Depende sa mga kahimtang sa imong misyon, mahimong ikaw adunay mga batan-ong lider nga misyonaryo nga maglakip sa mga lider sa zone, sister nga mga lider sa pagbansay, ug mga lider sa district. Sama sa tanang misyonaryo, nagsunod sila sa tambag ni Jesukristo sa “pag-alagad sa [Dios] sa tibuok [nilang] kasingkasing, gahom, hunahuna ug kusog.” Kini nga mga lider “[nag]hinumdom sa hugot nga pagtuo, hiyas, kahibalo, pagpugong sa kaugalingon, pailob, inigsoon nga pagkamabination, pagkadiosnon, gugmang putli, pagkamapainubsanon, kakugi” (Doktrina ug mga Pakigsaad 4:2, 6).

Ang mga buluhaton sa pagpangulo wala magpakita og espesyal nga pag-ila o pag-abante. Ni nagpakita og bili sa usa ka misyonaryo.

Ang mga lider nga misyonaryo adunay responsibilidad nga:

• Mopakita og ehemplo isip usa ka disipulo ni Jesukristo.

• Mopakita og ehemplo sa mga sumbanan sa misyonaryo alang sa pamatasan (tan-awa sa seksiyon 3).

• Motabang sa pagbansay sa ubang mga misyonaryo kon gimandoan sa presidente sa misyon o sa mga tigtambag sa pangserbisyo nga misyonaryo.

• Mohigugma ug makighigala sa ubang mga misyonaryo.

• Motabang sa ubang mga misyonaryo sa pag-ila sa bili sa ilang mga paningkamot.

• Maminaw sa mga kabalaka sa ubang mga misyonaryo ug mopakigbahin sa mga gikinahanglan ngadto sa mga tigtambag sa pangserbisyo nga misyonaryo.

• Moasoy sa ilang mga katungdanan sa pagpangulo ngadto sa mga tigtambag sa pangserbisyo nga misyonaryo.

• Motabang sa pag-organisar ug sa pagpahigayon og mga komperensiya, mga miting, ug mga kalihokan ubos sa direksiyon sa presidente sa misyon o mga tigtambag sa pangserbisyo nga misyonaryo.

Ang mga elder ug mga sister nga adunay mga buluhaton sa pagpangulo kinahanglang mangulo sama sa buhaton sa Manluluwas. Kon ang gawi ni bisan kinsang misyonaryo, lakip sa mga lider nga misyonaryo, ingon og wala mahiuyon sa mga sugo ug mga sumbanan sa misyonaryo, hisgoti kini nga isyu ngadto lamang sa imong mga tigtambag sa pangserbisyo nga misyonaryo. Ayaw kini hisgoti ngadto sa ubang mga misyonaryo, mga ginikanan o mga tigbantay, o mga higala.

“Buhata ang [imong] katungdanan ngadto sa Ginoo” (Jacob 1:19). Pagkat-on nga makabarog pinaagi sa kinaugalingong paningkamot sa espirituwal nga paagi, ug “makalihok sa [imong kaugalingon]” pinaagi sa pagsalig sa Ginoo ug sa pagsunod sa Espiritu (2 Nephi 2:16).

• Kon ikaw adunay mga pangutana o mga kabalaka, gamita ang pagtulun-an nga “imo kining tun-an og maayo sa imong hunahuna; dayon … mangutana kanako kon husto ba kini” (Doktrina ug mga Pakigsaad 9:8).

• Tinguhaa ang giya pinaagi sa personal nga pagpadayag, pag-ampo, pagtuon sa mga kasulatan (ilabi na sa Basahon ni Mormon), mga pagtulon-an sa buhi nga mga propeta, ug mga sumbanan sa pangserbisyo nga misyonaryo.

Pakig-istorya sa imong bishop o sa presidente sa stake mahitungod sa mga isyu sa katakos. Pakig-istorya sa imong mga tigtambag sa pangserbisyo nga misyonaryo mahitungod sa mga kabalaka bahin sa dinaliang seguridad, sama sa pagsulong, pag-abuso, o ubang mga isyu.

Tingali adunay mga panahon atol sa imong misyon nga magkalisod ka nga matutokan ang imong buluhaton sa pagserbisyo tungod sa kasamtangan nga mga hagit, personal o mga butang kalabot sa pamilya, o mga nanglabay na nga mga kasinatian. Ayaw pagduhaduha sa pagpakigbahin sa imong mga kabalaka ngadto sa imong mga tigtambag sa pangserbisyo nga misyonaryo, presidente sa stake, o presidente sa misyon.

Hinumdomi ang imbitasyon sa Manluluwas: “Tan-aw ngari kanako sa matag hunahuna; ayaw pagduhaduha, ayaw kahadlok. Tan-awa ang mga samad nga milapos sa akong kilid, ug usab ang mga marka sa mga lansang sa akong mga kamot ug mga tiil; pagmatinud-anon, tumana ang akong mga sugo, ug kamo makapanunod sa gingharian sa langit” (Doktrina ug mga Pakigsaad 6:36–37).

Ang imong presidente sa misyon o mga tigtambag sa pangserbisyo nga misyonaryo mahimong mosangon sa mga managkompanyon sa pagpalambo sa gihan-ay nga pagtuon sa ebanghelyo ug sosyal nga pakig-inter-aksiyon atol sa imong misyon. Ang mga managkompanyon mahimong idestino sa mga dapit sa pangserbisyo nga mga misyonaryo, sa mga pagbisita aron magtudlo, sa mga dapit sa pagserbisyo, o alang sa espesyal nga mga kalihokan sa pagserbisyo.

Hinumdomi kanunay ang mosunod samtang makig-inter-aksiyon ka sa ubang mga misyonaryo:

• Higugmaa, respetoha, ug lig-ona ang ubang mga misyonaryo.

• Magmapainubsanon ug moila sa mga kalig-on nga anaa sa usag usa.

• Tagda ang usag usa sama sa pagtagad nga imong gusto.

• Ilha ang kaayo nga anaa sa ubang mga misyonaryo.

• Likayi ang pagpanaway ug panagbingkil.

• Likayi ang pagsulti og negatibo mahitungod sa usag usa ngadto sa laing pangserbisyo nga mga misyonaryo, mga miyembro sa Simbahan, o sa pamilya ug mga higala.

Kon makamatikod ka og bisan unsang dili maayo nga mga sitwasyon o pamatasan, hisgoti kini uban sa imong mga tigtambag sa pangserbisyo nga misyonaryo.

Ikaw gitawag sa Ginoo isip usa ka misyonaryo. Siya mihangyo nga ikaw moserbisyo uban sa imong tibuok kasingkasing, gahom, hunahuna, ug kusog (tan-awa sa Doktrina ug mga Pakigsaad 4:2).

Ikaw gisangonan nga moserbisyo sa usa ka gipahiangay nga kasinatian sa misyon nga gipili sa talagsaong paagi alang sa imong mga talento, mga abilidad, ug mga gasa. Atol sa imong misyon, mahimong moserbisyo ka sa dinaghan nga mga buluhaton. Mahimong maglakip sa giaprobahan nga manggihatagon nga mga organisasyon, mga operasyon sa Simbahan, mga templo, mga pagbisita aron magtudlo uban sa tigtudlo nga mga misyonaryo, ug sa gisangon sa stake nga mga oportunidad sa pagserbisyo.

Mahimong makaserbisyo ka og sobra sa usa ka dapit atol sa semana. Sa matag dapit, mo-report ka sa superbisor kinsa mohatag og pagbansay, mga himan, ug suporta nga imong gikinahanglan sa pagtuman sa imong mga responsibilidad.

Moabot ka sa gidestinohan nimo nga dapit sa tukmang oras ug andam nga moserbisyo og tarong. Magmahimong masaligan ug mapiyalan. Sunda ang mga mando sa imong mga superbisor sa mainampingon ug sa kompletong paagi.

Buhata ang imong labing maayo nga makatampo sa buhat sa Ginoo sa makahuluganong mga paagi. Magmahimong positibo ug makadasig nga impluwensiya niadtong imong serbisyohan ug ika-inter-aksiyon. Pagtrabaho sa luwas nga paagi, ug kanunayng maningkamot nga molambo.

Nagtambayayong, ang imong presidente sa misyon ug mga tigtambag sa pangserbisyo nga misyonaryo mahimong mopahiangay sa imong mga buluhaton sa pagserbisyo atol sa imong misyon.

Nagtambayayong, ang imong mga tigtambag sa pangserbisyo nga misyonaryo, uban sa imong ideya, mohimo og inadlaw-adlaw nga eskedyul. Ang imong presidente sa misyon moaprobar sa eskedyul. Mahimong maglakip kini sa mga buluhaton ug mga kalihokan sa mosunod nga dapit nga palamboon:

• Espirituhanon

• Sosyal

• Pisikal

• Intelektwal

Magmakanunayon ug masaligan sa pagsunod sa imong inadlaw-adlaw nga eskedyul sa misyonaryo. Magdala kini kanimo og mas dakong kalamboan, kalipay, ug espirituhanong mga panalangin atol sa imong misyonaryo nga pagserbisyo.

Ang imong inadlaw-adlaw nga eskedyul mahimong maglakip sa:

• Pagtakda ug pagrebyo sa imong pangserbisyo nga misyonaryo nga mga tumong.

• Pagpangandam ug pagkompleto sa imong mga buluhaton matag adlaw.

• Pagtuon sa mga kasulatan (ilabi na sa Basahon ni Mormon), mga pagtulun-an sa buhi nga mga propeta ug apostoles, Pagpahiangay ngadto sa Kinabuhi sa Pangserbisyo nga Misyonaryo, may kalabotan nga mga seksiyon sa Isangyaw ang Akong Ebanghelyo, ug uban pang giaprobahan nga mga kapanguhaan (tan-awa sa 2.4.5).

Pakigtambayayong sa imong mga tigtambag sa pangserbisyo nga misyonaryo sa paghimo og usa ka sinulat nga kinatibuk-ang eskedyul. Ilakip ang imong oras sa mga buluhaton ug mga oras nga imong gamiton ang imong kabubut-on sa pagtino kon unsaon nimo sa pagserbisyo, pagpalambo, ug pag-uswag (gitawag og “mga oras sa kabubut-on”). Pagtino og usa ka adlaw sa matag semana isip adlaw sa pagpangandam. Rebyoha ug sunda ang imong mga plano matag adlaw.

Ang inadlaw-adlaw nga eskedyul alang sa imong misyon mahimong mahisama sa mosunod nga ehemplo:

Bisan kon wala ka magserbisyo sa gidestinohan nimo nga dapit, ikaw usa gihapon ka misyonaryo. Ang imong gawi, mga hunahuna, ug mga lihok kinahanglang magpakita niini ug sa imong debosyon ngadto ni Jesukristo.

Kon mahimo ug kon giaprobahan sa imong mga tigtambag sa pangserbisyo nga misyonaryo, pagtuon uban sa laing pangserbisyo nga misyonaryo. Usa ka tawo ang mahimong isangon nganha kanimo sa imong presidente sa misyon o mga tigtambag sa pangserbisyo nga misyonaryo. Ang pagtuon uban sa laing misyonaryo sa kasagaran pagahimoon sa birtuwal nga paagi. Pero, mahimo kamo nga magtuon sa personal kon itugot sa kahimtang.

Tutokan ang mga kasulatan (ilabi na ang Basahon ni Mormon), mga pagtulun-an sa buhi nga mga propeta, Pagpahiangay ngadto sa Kinabuhi sa Pangserbisyo nga Misyonaryo, may kalabotan nga mga seksiyon sa Isangyaw ang Akong Ebanghelyo, ug niining tamdanan nga basahon. Kining giaprobahan nga mga kapanguhaan makapalig-on sa imong kahibalo ug pagpamatuod sa gipahiuli nga ebanghelyo ni Jesukristo ug makatabang nimo nga maandam sa pagkab-ot sa mga panginahanglan niadtong inyong gitudloan.