« ៤. សុខុមាលភាពខាងរាងកាយ និងខាងសតិអារម្មណ៍ » បទដ្ឋានអ្នកផ្សព្វផ្សាយសាសនាសម្រាប់សិស្សរបស់ព្រះយេស៊ូវគ្រីស្ទ—ពួកអ្នកផ្សព្វផ្សាយសាសនាផ្នែកសេវាកម្ម ( ឆ្នាំ២០២៥ )

« សុខុមាលភាពខាងរាងកាយ និងខាងសតិអារម្មណ៍ » បទដ្ឋានអ្នកផ្សព្វផ្សាយសាសនា—ពួកអ្នកផ្សព្វផ្សាយសាសនាផ្នែកសេវាកម្ម

៤

សុខភាពខាងរាងកាយ និងខាងសតិអារម្មណ៍

៤.០

សេចក្តីផ្ដើម

បេសកកម្មអាចមានទាំងភាពរីករាយ និងឧបសគ្គ ។ បទដ្ឋាននៅក្នុងវគ្គនេះ និងនៅក្នុង ការសម្របទៅនឹងជីវិតជាអ្នកផ្សព្វផ្សាយសាសនា នឹងជួយអ្នកឲ្យរៀបចំគំនិត និងរាងកាយរបស់អ្នក ដើម្បីបម្រើព្រះអម្ចាស់ឲ្យបានប្រសើរឡើង ។ សូមរំឭកបទដ្ឋានទាំងនេះជាទៀងទាត់ ក្នុងអំឡុងបេសកកម្មរបស់អ្នក ។

៤.១

សុខភាពរាងកាយ

សុខភាព និងសុវត្ថិភាពរបស់អ្នកគឺជារឿងដ៏សំខាន់ ។ សូមថែរក្សាសុខភាពរបស់អ្នក ដើម្បីអ្នកអាចបម្រើឲ្យអស់ពីចិត្ត អស់ពីពលំ អស់ពីគំនិត ហើយអស់ពីកម្លាំង ( សូមមើល គោលលទ្ធិ និងសេចក្តីសញ្ញា ៤:២ ) ។

អ្នក និងគ្រួសាររបស់អ្នកមានការទទួលខុសត្រូវចំពោះសេចក្ដីត្រូវការផ្នែកវេជ្ជសាស្ត្ររបស់អ្នក ។ ពេលខ្លះការទៅជួបអ្នកជំនាញផ្នែកថែទាំសុខភាពអាចកើតឡើងក្នុងអំឡុងពេលកាលវិភាគបេសកកម្មរបស់អ្នក ។ ក្នុងស្ថានភាពទាំងនេះ សូមសម្របសម្រួលការទៅជួបជាមុនជាមួយអ្នកប្រឹក្សាយោបល់របស់អ្នកផ្សព្វផ្សាយសាសនផ្នែកសេវាកម្មរបស់អ្នក ។

៤.១.១

គោលការណ៍ណែនាំសម្រាប់អាហាររូបត្ថម្ភទូទៅ

គោលការណ៍ណែនាំអំពីអាហារូបត្ថម្ភខាងក្រោមគឺសម្រាប់ការប្រើប្រាស់ទូទៅ ៖

ហូបទឹកឲ្យបានគ្រប់គ្រាន់ជាប្រចាំថ្ងៃ ។ អ្នកអាចត្រូវការទឹក និងអំបិលបន្ថែមទៀត ប្រសិនបើអ្នកបែកញើសច្រើនពេញមួយថ្ងៃ ឬអំឡុងពេលហាត់ប្រាណ ។
ទទួលទានអាហារដែលមានតុល្យភាព ដូចជាបន្លែ ផ្លែឈើ គ្រាប់ធញ្ញជាតិ ខ្លាញ់ល្អ និងប្រូតេអ៊ីន ។
កំណត់លើអាហារដែលឥតបានការ ភេស្ជជៈមានជាតិកាបូន អាហារកែច្នៃ និងអាហារចម្អិនស្រាប់ ។
ធ្វើតាមការណែនាំមកពីអ្នកជំនាញវេជ្ជសាស្ត្ររបស់អ្នក ទាក់ទងនឹងរបបអាហារពិសេស ថ្នាំពេទ្យ ឬការអនុវត្តដែលជាទម្លាប់ល្អខាងសុខភាពជាក់លាក់សម្រាប់សេចក្ដីត្រូវការរបស់អ្នក ។

៤.២

ការហាត់ប្រាណ

ការហាត់ប្រាណជួយឲ្យអ្នកមានសុខភាពល្អ និងជួយកាត់បន្ថយភាពតានតឹង ។ ធ្វើឲ្យការហាត់ប្រាណក្លាយជាទម្លាប់ប្រចាំថ្ងៃរបស់អ្នក ប្រសិនបើកាលៈទេសៈអំណោយផល ។

៤.៣

សុខភាពផ្នែកសតិអារម្មណ៍

កិច្ចការផ្សព្វផ្សាយសាសនាអាចជាកិច្ចការដែលមានការទាមទារខ្លាំង ។ ការមានអារម្មណ៍តានតឹងពីមួយពេលទៅមួយពេល គឺជារឿងធម្មតា ។ អ្នកអាចរៀបចំរូបកាយ និងគំនិតរបស់អ្នកឲ្យគ្រប់គ្រងភាពតានតឹងកាន់តែប្រសើរ ដោយក្ដាប់យកឱកាសពីការគាំទ្ររបស់គ្រួសារ ។

អ្នកក៏អាចជួយគ្រប់គ្រងភាពតានតឹងដោយអនុវត្តទម្លាប់នៃការទទួលទានអាហារដែលមានសុខភាពល្អ ហាត់ប្រាណទៀងទាត់ ចូលដេកទៀងទាត់ សម្រាក និងសកម្មភាពខាងវិញ្ញាណ ។ សកម្មភាពបែបនេះរួមមានការអធិស្ឋាន ការពិចារណា ការសិក្សា និងការចូលរួមពិធីថ្វាយបង្គំជាទៀងទាត់ ។

ក្នុងអំឡុងបេសកកម្មរបស់អ្នក សូមប្រើ ការសម្របទៅនឹងជីវិតជាអ្នកផ្សព្វផ្សាយសាសនា ដើម្បីជួយអ្នកឲ្យគ្រប់គ្រងភាពតានតឹងរបស់អ្នក ។ ប្រសិនបើអ្នកមានអារម្មណ៍ថា អ្នកមានការលំបាកក្នុងការគ្រប់គ្រងភាពតានតឹង ឬប្រសិនបើអ្នកមានការបន្ទាន់ផ្នែកសុខភាពខាងផ្លូវចិត្ត ឬខាងសតិអារម្មណ៍ សូមទាក់ទងទៅអ្នកប្រឹក្សាយោបល់របស់អ្នកផ្សព្វផ្សាយសាសនាផ្នែកសេវាកម្មរបស់អ្នក ។

ប្រសិនបើអ្នកត្រូវបានចេញវេជ្ជបញ្ជាឲ្យប្រើថ្នាំដើម្បីគ្រប់គ្រងស្ថានភាព ឬជំងឺ សូមធ្វើតាមវេជ្ជបញ្ជា និងការណែនាំរបស់គ្រូពេទ្យរបស់អ្នក ។

៤.៤

ការថែទាំផ្នែកវេជ្ជសាស្ត្រ

សូមយកចិត្តទុកដាក់ឲ្យហ្មត់ចត់ចំពោះសុខភាពរាងកាយ និងសតិអារម្មណ៍របស់អ្នក ។ សូមប្រាកដថា អ្នកទទួលបានការគាំទ្រដែលចាំបាច់មកពីឪពុកម្ដាយ ឬអាណាព្យាបាលរបស់អ្នកសម្រាប់បញ្ហាវេជ្ជសាស្ត្រណាមួយដែលអ្នកមាន ( ដូចជា ថ្នាំដែលអ្នកកំពុងប្រើ អាឡែស៊ីដែលអ្នកមាន ឬសកម្មភាពដែលអ្នកគួរចៀសវាង ) ។ អ្នកក៏អាចចែកចាយព័ត៌មានវេជ្ជសាស្ត្រមួយចំនួនជាមួយនឹងអ្នកប្រឹក្សាយោបល់របស់អ្នកផ្សព្វផ្សាយសាសនាផ្នែកសេវាកម្មរបស់អ្នក ឬប្រធានផ្នែកប្រតិបត្តិការផងដែរ ប្រសិនបើចាំបាច់ ។

ប្រសិនបើអ្នកមានការបន្ទាន់ខាងសុខភាព សូមធ្វើសកម្មភាពដោយមានសុភវិនិច្ឆ័យសម្រាប់សុវត្ថិភាព ឬការថែទាំបន្ទាន់របស់អ្នក ។ ទូរសព្ទទៅសេវាកម្មបន្ទាន់ក្នុងមូលដ្ឋាន ( ដូចជា ៩១១ នៅក្នុងសហរដ្ឋអាមេរិក ) លើកលែងតែអ្នកត្រូវបានផ្ដល់ការណែនាំផ្សេងទៀត ។ សូមទាក់ទងទៅឪពុកម្តាយ ឬអាណាព្យាបាល និងអ្នកប្រឹក្សាយោបល់របស់អ្នកផ្សព្វផ្សាយសាសនាផ្នែកសេវាកម្មរបស់អ្នកឲ្យបានឆាប់តាមដែលអាចធ្វើបាន ។

ប្រសិនបើអ្នកត្រូវការការថែទាំផ្នែកវេជ្ជសាស្ត្រដែលមិនបន្ទាន់អំឡុងពេលធ្វើកិច្ចការ សូមទូរសព្ទទៅឪពុកម្ដាយ ឬអាណាព្យាបាលរបស់អ្នកភ្លាម ។ ពួកគាត់នឹងប្រាប់អ្នកថាត្រូវធ្វើអ្វីខ្លះ ។ សាកល្បងធ្វើការណាត់ទុកជាមុន សម្រាប់ការមើលថែមិនបន្ទាន់ ដើម្បីកុំឲ្យរំខានដល់កិច្ចការបម្រើ ឬកាលវិភាគរបស់អ្នក ។

៤.៥

ស្ថានភាពគ្រោះថ្នាក់ និងការគំរាមកំហែង

មានគ្រោះថ្នាក់ជាច្រើនដែលអាចចៀសវាងបានតាមរយៈការអនុវត្តដោយប្រើសុភវិនិច្ឆ័យ និងដោយគោរពតាមបទដ្ឋានអ្នកផ្សព្វផ្សាយសាសនានៅក្នុងក្បួនខ្នាតនេះ ។ ទោះជាយ៉ាងណា អ្នកអាចប្រឈមមុខនឹងស្ថានភាពគ្រោះថ្នាក់ ទោះបីនៅពេលអ្នកព្យាយាមដើម្បីមានសុវត្ថិភាពក្តី ។ ប្រសិនបើមានបញ្ហាមួយ សូមរាយការណ៍ភ្លាមទៅអ្នកប្រឹក្សាយោបល់របស់អ្នកផ្សព្វផ្សាយសាសនាផ្នែកសេវាកម្មរបស់អ្នក ។

ចាកចេញភ្លាមប្រសិនបើអ្នកមានអារម្មណ៍មិនស្រណុកក្នុងចិត្តអំពីទីកន្លែង មនុស្ស ឬស្ថានភាពមួយ ។ សូមស្ដាប់តាមការបំផុសគំនិតខាងវិញ្ញាណជានិច្ច ។

៤.៦

លំនៅដ្ឋាន

ជួយថែទាំផ្ទះរបស់គ្រួសារអ្នក និងជួយគ្នាធ្វើកិច្ចការផ្ទះ ។ ថែរក្សាបន្ទប់របស់អ្នកឲ្យបានស្អាត ។ ថែរក្សាទ្រព្យសម្បត្តិផ្ទាល់ខ្លួនរបស់អ្នក រួមមានឧបករណ៍អេឡិចត្រូនិកទាំងឡាយ ឲ្យដំណើរការល្អ ។

អ្នកមិនគួរចំណាយពេលដេកយប់ ឬរស់នៅជាមួយពួកអ្នកផ្សព្វផ្សាយសាសនាផ្នែកការបង្រៀនឡើយ ។

៤.៧

មធ្យោបាយធ្វើដំណើរ

សូមអនុវត្តតាមច្បាប់ចរាចរណ៍ក្នុងស្រុក ច្បាប់ និងទំនៀមទម្លាប់ទាំងឡាយ នៅពេលអ្នកធ្វើដំណើរជានិច្ច ។

មធ្យោបាយធ្វើដំណើរសាធារណៈ ជាធម្មតាមានតម្លៃថោកជាងការបើករថយន្តផ្ទាល់ខ្លួន ។ ប្រសិនបើមានមធ្យោបាយធ្វើដំណើរសាធារណៈ សូមពិចារណាប្រើវាសម្រាប់ការទៅ និងត្រឡប់មកពីកិច្ចការចាត់តាំងការបម្រើរបស់អ្នក ។

ប្រើសុភវិនិច្ឆ័យ ដឹងពីអ្វីៗដែលនៅជុំវិញខ្លួនអ្នក និងស្គាល់តំបន់របស់អ្នក ។ ធ្វើតាមបទដ្ឋានសុវត្ថិភាពទូទៅនៅក្នុងក្បួនខ្នាតនេះ ។

៤.៧.១

ការបើកបរ

ប្រសិនបើស្ថានភាពគ្រួសារអនុញ្ញាតឲ្យ អ្នកអាចបើកបររថយន្តផ្ទាល់ខ្លួន ឬរបស់គ្រួសារអ្នកដើម្បីបំពេញការចាត់តាំង និងសកម្មភាពបេសកកម្មរបស់អ្នកបាន ។ អ្នកផ្សព្វផ្សាយសាសនាផ្នែកសេវាកម្ម និងក្រុមគ្រួសាររបស់ពួកគេ ទទួលខុសត្រូវរាល់ការចំណាយលើការធ្វើដំណើរ រួមទាំងប្រេងសាំង ការថែទាំរថយន្ត និងធានារ៉ាប់រង ។

អ្នកផ្សព្វផ្សាយសាសនាផ្នែកសេវាកម្ម និងក្រុមគ្រួសាររបស់ពួកគេទទួលបន្ទុករាល់ហានិភ័យផ្ទាល់ខ្លួន នៅពេលបើកបរ ។ ប្រសិនបើអ្នកបើកបររថយន្ត សូមបើកបរដោយប្រុងប្រយ័ត្ន ។

ពួកអ្នកផ្សព្វផ្សាយសាសនាផ្នែកសេវាកម្មពុំបើករថយន្តដែលជាកម្មសិទ្ធិរបស់សាសនាចក្រកាលកំពុងបម្រើឡើយ ប៉ុន្តែអាចជិះនៅលើរថយន្តនោះបាន ។ ដោយមានការអនុម័តពីនាយកដ្ឋានអ្នកផ្សព្វផ្សាយសាសនា ពួកអ្នកផ្សព្វផ្សាយសាសនាផ្នែកការបម្រើនៅក្នុងការិយាល័យបេសកកម្ម អាចបើករថយន្តដែលជាកម្មសិទ្ធិរបស់សាសនាចក្រ បន្ទាប់ពីទទួលបានការបញ្ជាក់ត្រឹមត្រូវ ។

ផែនការបំពាក់បំប៉នតម្រូវឲ្យមាន ប្រសិនបើអ្នកបើករថយន្តសហគម៍ ឬរថយន្តរបស់អង្គការមនុស្សធម៌អំឡុងកិច្ចការបម្រើរបស់អ្នក ។

៤.៨

គ្រោះថ្នាក់

ប្រសិនបើអ្នកជួបនឹងគ្រោះថ្នាក់ខណៈកំពុងបើកបរទៅ ឬមកពីការចាត់តាំងជាអ្នកផ្សព្វផ្សាយសាសនា ការប្រជុំ ឬសន្និសីទរបស់អ្នក សូមទូរសព្ទទៅនគរបាល ឬសេវាកម្មសង្គ្រោះបន្ទាន់ ប្រសិនបើចាំបាច់ ។ ទាក់ទងទៅគ្រួសាររបស់អ្នក ឲ្យបានឆាប់បំផុតតាមដែលអាចធ្វើទៅបានផងដែរ ។ បន្ទាប់មកសូមទាក់ទងទៅអ្នកប្រឹក្សាអ្នកផ្សព្វផ្សាយសាសនាផ្នែកសេវាកម្មរបស់អ្នក ។

ប្រសិនបើអ្នកជួបនឹងគ្រោះថ្នាក់នៅឯកិច្ចការបម្រើរបស់អ្នក សូមពិភាក្សានឹងអ្នកគ្រប់គ្រងទីតាំងផ្នែកសេវាកម្មរបស់អ្នក ។ បុគ្គលនោះនឹងទូរសព្ទទៅនគរបាល ឬសេវាកម្មសង្គ្រោះបន្ទាន់ ប្រសិនបើចាំបាច់ ។ សូមទាក់ទងទៅគ្រួសារ និងទីប្រឹក្សាអ្នកផ្សព្វផ្សាយសាសនាផ្នែកសេវាកម្មរបស់អ្នក ឲ្យបានឆាប់បំផុតតាមដែលអាចធ្វើបាន ។

៤.៩

មូលនិធិផ្ទាល់ខ្លួន

អ្នកត្រូវបានលើកទឹកចិត្តឲ្យធ្វើផែនការថវិកា និងចំណាយមូលនិធិផ្ទាល់ខ្លួនរបស់អ្នក ។ ប្រាក់ដែលអ្នកប្រើនៅអំឡុងបេសកកម្មរបស់អ្នកតំណាងឲ្យពលិកម្មដែលអ្នក គ្រួសាររបស់អ្នក និងមនុស្សដទៃទៀតបានធ្វើ ។

សូមរស់នៅតាមគោលការណ៍នៃការថ្វាយដង្វាយមួយភាគក្នុង និងដង្វាយផ្សេងៗ និងការសន្សំប្រាក់ ។

សូមកុំរៃអង្គាសមូលនិធិសម្រាប់ការគាំទ្រផ្នែកហិរញ្ញវត្ថុផ្ទាល់ខ្លួន ឬសម្រាប់អង្គការដែលអ្នកបម្រើ ។

៤.១០

ការស្លៀកពាក់ និងការតុបតែងខ្លួនរបស់អ្នកផ្សព្វផ្សាយសាសនាផ្នែកសេវាកម្ម

ដោយសារអ្នកត្រូវបានអនុញ្ញាតឲ្យធ្វើជាអ្នកតំណាងនៃព្រះយេស៊ូវគ្រីស្ទ និងដំណឹងល្អរបស់ទ្រង់ដែលបានស្ដារឡើងវិញ នោះការតុបតែងខ្លួនរបស់អ្នកជាញឹកញាប់ គឺជាសារដំបូងដែលអ្នកដទៃទទួល ។ សូមស្លៀកសម្លៀកបំពាក់ឲ្យបានសមរម្យសម្រាប់កិច្ចការចាត់តាំងការបម្រើរបស់អ្នក ហើយសមស្របទៅនឹងការហៅដ៏ពិសិដ្ឋរបស់អ្នក ។

ពេញមួយបេសកកម្មរបស់អ្នក សូមធានាឲ្យបានថា ការតុបតែងខ្លួន និងឥរិយាបថរបស់អ្នកគាំទ្រដល់អ្វីដែលអ្នកនិយាយ និងធ្វើ ។ វាមិនគួររំខានដល់គោលបំណងជាអ្នកផ្សព្វផ្សាយសាសនារបស់អ្នកឡើយ ។ ការស្លៀកពាក់ និងការតុបតែងខ្លួនរបស់អ្នក គួរតែជាការបង្ហាញពីការបន្ទាបខ្លួន ការគោរព និងសេចក្ដីជំនឿ ។

របៀបដែលអ្នកបង្ហាញខ្លួនក្នុងនាមជាអ្នកផ្សព្វផ្សាយសាសនាជះឥទ្ធិពលលើរបៀបដែលមនុស្សគិតអំពីអ្នក និងសាសនាចក្ររបស់ព្រះអម្ចាស់ ។ វាក៏អាចជួយការពារអ្នកពីគ្រោះថ្នាក់ផងដែរ ។

ការស្លៀកពាក់សមរម្យ និងការតុបតែងខ្លួនផ្ទាល់ខ្លួនគឺជាជំនាញជីវិតដ៏សំខាន់ ដែលនឹងជួយអ្នកបន្ទាប់ពីបេសកកម្មរបស់អ្នកផងដែរ ។ នៅពេលចូលរួមសន្និសីទហ្សូន ការសម្ភាស និងការចូលរួមដំណើរទស្សនកិច្ចបង្រៀន សូមអនុវត្តតាមបទដ្ឋានស្លៀកពាក់ និងការសម្អិតសម្អាងនៅឯ Dress and Appearance ។ គេហទំព័រនេះផ្តល់នូវគំរូនៃការស្លៀកពាក់សមរម្យ និងវិជ្ជាជីវៈសម្រាប់បេសកកម្មរបស់អ្នក ។ ថ្នាក់ដឹកនាំបេសកកម្មរបស់អ្នក និងគណៈប្រធានតំបន់អាចកែប្រែគោលនយោបាយទាំងនេះដើម្បីអនុលោមតាមកាលៈទេសៈក្នុងមូលដ្ឋាន ។

៤.១០.១

បទដ្ឋានទូទៅសម្រាប់ការសម្អិតសម្អាង

សូមធ្វើតាមបទដ្ឋានសម្អិតសម្អាងដែលមានផាសុកភាព ៖

ងូតទឹកជារៀងរាល់ថ្ងៃ បើអាចធ្វើបាន ។
ដុសធ្មេញជារៀងរាល់ថ្ងៃ ។
ប្រើផលិតផលបំបាត់ក្លិនក្លៀកជារៀងរាល់ថ្ងៃ ។
កក់សក់ឲ្យបានញឹកញាប់ ។
លាងដៃរបស់អ្នកជាមួយសាប៊ូឲ្យបានទៀងទាត់ រួមទាំងពីមុនការរៀបចំអាហារ និងបន្ទាប់ពីការប្រើបង្គន់ ។
លាបឡេការពារកម្តៅថ្ងៃ នៅពេលចេញទៅខាងក្រៅ និងប៉ះនឹងកាំរស្មីព្រះអាទិត្យ ។
ជ្រើសរើសម៉ូដសក់ដែលមានរបៀប និងសមរម្យ ដែលងាយក្នុងការថែទាំ ។

៤.១០.២

សម្លៀកបំពាក់ពិសិដ្ឋ

ប្រសិនបើអ្នកបានទទួលអំណោយទានពិសិដ្ឋ សូមធ្វើតាមសេចក្តីណែនាំនេះសម្រាប់ការពាក់ និងការមើលថែសម្រាប់សម្លៀកបំពាក់ពិសិដ្ឋ នៅក្នុងផ្នែក ៣៨.៥.៥ និង ៣៨.៥.៦ នៃ ក្បួនខ្នាតទូទៅ ។ ជ្រើសរើសក្រណាត់ដែលត្រូវនឹងអាកាសធាតុសម្រាប់បេសកកម្មរបស់អ្នក ។