« ៣. អាកប្បកិរិយារបស់អ្នកផ្សព្វផ្សាយសាសនា » បទដ្ឋានអ្នកផ្សព្វផ្សាយសាសនាសម្រាប់សិស្សរបស់ព្រះយេស៊ូវគ្រីស្ទ—ពួកអ្នកផ្សព្វផ្សាយសាសនាផ្នែកសេវាកម្ម ( ឆ្នាំ២០២៥ )
« អាកប្បកិរិយារបស់អ្នកផ្សព្វផ្សាយសាសនា » បទដ្ឋានអ្នកផ្សព្វផ្សាយសាសនា—ពួកអ្នកផ្សព្វផ្សាយសាសនាផ្នែកសេវាកម្ម
៣
អាកប្បកិរិយារបស់អ្នកផ្សព្វផ្សាយសាសនា
៣.០
សេចក្តីផ្ដើម
វគ្គនេះពិពណ៌នាអំពីបទដ្ឋានអ្នកផ្សព្វផ្សាយសាសនាស្ដីពីបុគ្គលិកលក្ខណៈ និងគុណលក្ខណៈដូចជាព្រះគ្រីស្ទ ។ ខិតខំរស់នៅតាមបទដ្ឋានទាំងនេះ ។ ខិតខំបណ្ដុះគុណលក្ខណៈដូចជាព្រះគ្រីស្ទនៅក្នុងកិច្ចខិតខំរបស់អ្នក ដើម្បីកាន់តែប្រែក្លាយជាសិស្សដ៏លះបង់របស់ព្រះគ្រីស្ទ ។ ដូចជាព្យាការីមរមន បានប្រឹក្សាថា « នឹកចាំពីព្រះបន្ទូលនៃព្រះដែលចែងថា ដោយកិច្ចការរបស់គេ នោះអ្នករាល់គ្នានឹងស្គាល់ពួកគេហើយ ដ្បិតបើសិនជាកិច្ចការរបស់គេល្អ នោះពួកគេក៏ជាមនុស្សល្អដែរ » ( មរ៉ូណៃ ៧:៥ ) ។
៣.១
ឥរិយាបថដូចជាព្រះគ្រីស្ទ
« គុណលក្ខណៈដូចជាព្រះគ្រីស្ទគឺជាអំណោយទានមកពីព្រះ ។ ដូចជាការណ៍ល្អគ្រប់យ៉ាងដែរ អំណោយទានទាំងនេះបានមកតាមរយៈ ‹ ព្រះគុណនៃព្រះវរបិតា និងព្រះយេស៊ូវគ្រីស្ទ និងព្រះវិញ្ញាណបរិសុទ្ធ › » ( ប្រកាសដំណឹងល្អរបស់យើង ជំពូកទី ៦ )
សូមមើលគុណលក្ខណៈដូចជាព្រះគ្រីស្ទដែលបានពិពណ៌នានៅក្នុងព្រះគម្ពីរទាំងឡាយ ការបង្រៀនរបស់ពួកព្យាការី និងពួកសាវកដែលនៅរស់ និង ប្រកាសដំណឹងល្អរបស់យើង ជំពូកទី ៦ ។ គុណលក្ខណៈទាំងនេះមួយចំនួនគឺ សេចក្តីជំនឿលើព្រះយេស៊ូវគ្រីស្ទ សេចក្តីសង្ឃឹម សេចក្តីសប្បុរស និងសេចក្តីស្រឡាញ់ គុណធម៌ សេចក្តីសុចរិត ចំណេះដឹង ការអត់ធ្មត់ ការបន្ទាបខ្លួន ការឧស្សាហ៍ព្យាយាម និងការគោរពប្រតិបត្តិ ។ « ផ្ដោតលើព្រះគ្រីស្ទ ពេលអ្នកខិតខំដើម្បីបណ្ដុះគុណលក្ខណៈរបស់ទ្រង់ ។ … អ្នកអាចទទួលគុណលក្ខណៈទាំងនោះ នៅពេលអ្នកខិតខំដើម្បីកាន់តែប្រែក្លាយជាសិស្សដ៏លះបង់របស់ព្រះយេស៊ូវគ្រីស្ទ » ( ជំពូកទី ៦ ) ។
ចូរមានចិត្តល្អ វិជ្ជមាន និងលើកស្ទួយ ។ ចូរមានការគិតគូរអំពីស្ថានភាពរបស់មនុស្សម្នាក់ៗ ។ អ្នកគឺជាភ្ញៀវនៅក្នុងទីតាំងដែលអ្នកបម្រើ ។ ប្រព្រឹត្តិចំពោះមនុស្ស និងទីកន្លែងទាំងនោះដោយការគោរព និងការកោតសរសើរ ។
ខណៈកំពុងបម្រើនៅក្នុងសហគមន៍ សូមគោរពប្រពៃណី ជំនឿសាសនា និងការអនុវត្តរបស់មនុស្សដទៃជានិច្ច ។ ចៀសវាងធ្វើឲ្យមនុស្សដទៃអាក់អន់ចិត្ត ។ អ្វីដែលអ្នកនិយាយ និងអ្វីដែលអ្នកធ្វើអំឡុងកិច្ចការបម្រើរបស់អ្នកអាចត្រូវបានស្ដាប់ឮ សង្កេត និងកត់ត្រាទុក ។ នៅទីកន្លែងណាដែលអ្នកបម្រើ នោះអ្នកគឺជាអ្នកតំណាងរបស់ព្រះយេស៊ូវគ្រីស្ទ និងសាសនាចក្រដែលបានស្ដារឡើងវិញរបស់ទ្រង់ ។
៣.២
ភាពស័ក្ដិសមសម្រាប់ព្រះវិហារបរិសុទ្ធ
ពួកអ្នកផ្សព្វផ្សាយសាសនាគួរតែមានភាពស័ក្ដិសមដើម្បីចូលព្រះវិហារបរិសុទ្ធពេញមួយបេសកកម្មរបស់ពួកគេ ។
ព្រះអម្ចាស់ព្រះយេស៊ូវគ្រីស្ទអញ្ជើញអ្នកឲ្យ « រៀបចំខ្លួន ហើយប្រុងប្រៀបខ្លួន ហើយញែកខ្លួនជាបរិសុទ្ធ មែនហើយ ចូរជម្រះចិត្តរបស់អ្នកឲ្យបានបរិសុទ្ធ ហើយលាងដៃរបស់អ្នក និងជើងរបស់អ្នកនៅចំពោះយើងចុះ ប្រយោជន៍ឲ្យយើងអាចធ្វើឲ្យអ្នកបានជ្រះស្អាត » ( គោលលទ្ធិ និងសេចក្ដីសញ្ញា ៨៨:៧៤ ) ។ ផ្នែកនៃការរៀបចំនេះ រួមមានការរក្សាសេចក្តីសញ្ញាពិធីបុណ្យជ្រមុជទឹក និងព្រះវិហារបរិសុទ្ធរបស់អ្នក ( ប្រសិនបើអ្នកបានទទួលអំណោយទានពិសិដ្ឋរបស់អ្នកក្នុងព្រះវិហារបរិសុទ្ធ ) ។
៣.២.១
សេចក្ដីសញ្ញាក្នុងព្រះវិហារបរិសុទ្ធ ( ប្រសិនបើបានទទួលអំណោយទានពិសិដ្ឋ )
ការរក្សាសេចក្ដីសញ្ញាព្រះវិហារបរិសុទ្ធនឹងផ្តល់នូវភាពអង់អាចដល់អ្នក ហើយជួយអ្នកឲ្យក្លាយកាន់តែដូចជាព្រះអង្គសង្គ្រោះ ។ សេចក្ដីសញ្ញាទាំងនេះរួមមាន ៖
-
ក្រឹត្យវិន័យនៃការគោរពប្រតិបត្តិ ។
-
ក្រឹត្យវិន័យនៃការពលិកម្ម ។
-
ក្រឹត្យវិន័យនៃដំណឹងល្អរបស់ព្រះយេស៊ូវគ្រីស្ទ ។
-
ច្បាប់ព្រហ្មចារីភាព ។
-
ក្រឹត្យវិន័យនៃការថ្វាយ ។
( សូមមើល ក្បួនខ្នាតទូទៅ ២៧.២ ) ។
ទោះបីជាពុំមានព្រះវិហារបរិសុទ្ធនៅជិតអ្នកក្តី សូមបន្តមានភាពស័ក្តិសម ។ សូមសួរដល់ប៊ីស្សព និងប្រធានស្តេករបស់អ្នកសម្រាប់ការសម្ភាសដើម្បីទទួលបានប័ណ្ណចូលព្រះវិហារបរិសុទ្ធមួយ ពីមុនប័ណ្ណបច្ចុប្បន្នរបស់អ្នកផុតកំណត់ ។
ការស្លៀកសម្លៀកបំពាក់ពិសិដ្ឋ គឺជាអភ័យឯកសិទ្ធិដ៏ពិសិដ្ឋនៃជនទំាងឡាយណាដែលបានធ្វើសេចក្ដីសញ្ញាជាមួយនឹងព្រះអម្ចាស់ទាក់ទងនឹងអំណោយទានពិសិដ្ឋ ។ សម្រាប់ការណែនាំស្តីពីការពាក់សម្លៀកបំពាក់ពិសិដ្ឋ សូមមើល ក្បួនខ្នាតទូទៅ ៣៨.៥.៥ ។
៣.២.២
ការបម្រើ និងការថ្វាយបង្គំនៅក្នុងព្រះវិហារបរិសុទ្ធ
ប្រសិនបើមានព្រះវិហារបរិសុទ្ធនៅជិត នោះអ្នកត្រូវបានលើកទឹកចិត្តឲ្យចូលរួមជាអ្នកចូលរួមពេញមួយបេសកកម្មរបស់អ្នក ។ ការបម្រើជាអ្នកចូលរួមក៏អាចជាឱកាសនៃការបម្រើក្នុងការចាត់តាំងរបស់អ្នកផងដែរ ។
ការចូលរួមក្នុងព្រះវិហារបរិសុទ្ធនឹងបង្កើនបទពិសោធន៍បេសកកម្មរបស់អ្នកផងដែរ ។ សូមសម្របសម្រួលវាជាមួយការចាត់តាំងជាអ្នកផ្សព្វផ្សាយសាសនាផ្សេងទៀតរបស់អ្នក ។ នៅពេលអ្នកកំពុងបម្រើនៅក្នុងព្រះវិហារបរិសុទ្ធ សូមបំពេញការចាត់តាំងរបស់អ្នកដោយសេចក្ដីទៀងត្រង់ ការគោរព និងគារវភាព ។
នៅពេលអ្នកចូលរួមក្នុងព្រះវិហារបរិសុទ្ធ សូមចងចាំចំណុចដូចតទៅនេះ ៖
-
ប្រសិនបើអ្នកត្រូវបានហៅដោយគណៈប្រធានព្រះវិហារបរិសុទ្ធដើម្បីបម្រើជាអ្នកធ្វើពិធីបរិសុទ្ធ អ្នកនឹងបម្រើនៅក្នុងព្រះវិហារបរិសុទ្ធតាមការដឹកនាំរបស់ពួកគាត់ ។
-
អ្នកអាចចូលរួមក្នុងពិធីបរិសុទ្ធណាមួយដែលបានធ្វើឡើងនៅក្នុងព្រះវិហារបរិសុទ្ធលើកលែងតែការធ្វើជាអ្នកជំនួសសម្រាប់ស្វាមី ឬភរិយានៅក្នុងពីធីផ្សារភ្ជាប់ប៉ុណ្ណោះ ។ ការណ៍នេះគឺដើម្បីចៀសវាងពីការបកស្រាយអារម្មណ៍ខាងវិញ្ញាណថាជាអារម្មណ៍ស្នេហា ។
-
កុំយកម៉ាស៊ីនថតរូប ទូរសព្ទដៃ ឬឯកសារអំណាន ( ព្រមទាំងពរជ័យអយ្យកោ ) ទៅប្រើនៅក្នុងព្រះវិហារបរិសុទ្ធឡើយ ។
-
កុំផ្ដុំគ្នាជាក្រុមអ្នកផ្សព្វផ្សាយសាសនា ឬលុតជង្គង់អធិស្ឋាននៅក្នុងបន្ទប់សេឡេស្ទាលឡើយ ។
-
តាមរយៈការយកឈ្មោះគ្រួសារទៅកាន់ព្រះវិហារបរិសុទ្ធ អ្នកអាចជួយប្រមូលផ្ដុំអ៊ីស្រាអែលនៅផ្នែកម្ខាងទៀតនៃវាំងនន ហើយបង្កើនបទពិសោធន៍ព្រះវិហារបរិសុទ្ធរបស់អ្នក ។
៣.៣
ច្បាប់ព្រហ្មចារីភាព
ផ្នែកសំខាន់មួយនៃការមានភាពស័ក្តិសមដើម្បីទៅព្រះវិហារបរិសុទ្ធ គឺត្រូវគោរពតាមច្បាប់ព្រហ្មចារីភាព ។ សូមធ្វើឲ្យអស់ពីសមត្ថភាពដើម្បីការពារខ្លួនអ្នកពីការល្បួងខាងផ្លូវភេទ ដែលអាចនាំទៅកាន់ការបំពានសេចក្ដីសញ្ញាដ៏ពិសិដ្ឋរបស់អ្នក ។ ការធ្វើអ្វីៗដែលបំពានច្បាប់ព្រហ្មចារីយភាព អាចត្រូវបានចាត់ទុកថាជាបទឧក្រិដ្ឋនៅក្នុងតំបន់ខ្លះ ។
សូមចៀសវាងពីគំនិត ឬទង្វើណាដែលនឹងបំបែកអ្នកចេញពីព្រះវិញ្ញាណ ។ ការណ៍នេះរួមមានចំណុចជាច្រើន ប៉ុន្តែមិនកំណត់តែទៅលើការផិតក្បត់ សហាយស្មន់ សកម្មភាពប្រតិព័ទ្ធភេទដូចគ្នា រួមភេទតាមមាត់ ការដាស់អារម្មណ៍ផ្លូវភេទ ការប៉ះពាល់ដែលមិនសមរម្យ ការផ្ញើ ឬទទួលសារ រូបភាព ឬវីដេអូ ដែលមានលក្ខណៈអសីលធម៌ ឬដែលទាក់ទងនឹងផ្លូវភេទ ការសម្រេចកាមដោយខ្លួនឯង និងការមើល ឬប្រើប្រាស់ការណ៍អាសគ្រាមនោះទេ ។ សម្រាប់ព័ត៌មានបន្ថែម សូមមើល ដើម្បីកម្លាំងនៃយុវជន ៖ សេចក្តីណែនាំដើម្បីធ្វើការជ្រើសរើស « រូបកាយរបស់អ្នកគឺពិសិដ្ឋ » ។
ប្រសិនបើអ្នកកំពុងមានការលំបាកក្នុងការរក្សាបទដ្ឋានទាំងនេះ សូមទូលសុំជំនួយពីព្រះវរបិតាសួគ៌ ហើយជួបជាមួយនឹងប៊ីស្សពរបស់អ្នកភ្លាមៗ ។
៣.៣.១
ការចៀសវាងពីការណ៍អាសគ្រាម
ការណ៍អាសគ្រាមមានទម្រង់ជាច្រើន ។ ការដាក់ផែនការទុកជាមុន និងការធ្វើការជ្រើសរើសសុចរិតអាចជួយអ្នកឲ្យចៀសវាងការណ៍អាសគ្រាមបាន ។ បើអ្នកឃើញការណ៍អាសគ្រាម សូមងាកចេញ បិទឧបករណ៍ ឬចាកចេញពីស្ថានភាពនោះ ។
សូមប្រើយោបល់ខាងក្រោមដើម្បីជួយអ្នកចៀសវាងពីការណ៍អាសគ្រាម ៖
-
ចៀសវាងពីវិបសាយ សម្ភារ និងទីតាំងដែលអ្នកទំនងជាស្ដាប់ឮ អាន ឬមើលឃើញសម្ភារដែលដាស់អារម្មណ៍ផ្លូវភេទ ឬការណ៍អាសគ្រាម ។ សូមទាក់ទងទៅអ្នកប្រឹក្សាយោបល់របស់អ្នកផ្សព្វផ្សាយសាសនាផ្នែកសេវាកម្មរបស់អ្នក ប្រសិនបើអ្នកទាក់ទងនឹងសម្ភារមិនសមរម្យនៅឯទីតាំងការចាត់តាំងរបស់អ្នក ។
-
រៀនស្គាល់ពីពេលដែលអ្នកមានការល្បួងបំផុតក្នុងការប្រើបច្ចេកវិទ្យាដោយពុំសមរម្យ ដូចជាពេលអ្នកនឿយហត់ ឬពេលអផ្សុក ។
-
មានផែនការមួយដើម្បីធ្វើអ្វីជំនួសវិញនៅពេលនោះ ។ អ្នកប្រឹក្សាយោបល់របស់អ្នកផ្សព្វផ្សាយសាសនាផ្នែកសេវាកម្មរបស់អ្នកអាចជួយបាន ។
-
សូមពិនិត្យមើលជាញឹកញាប់នូវផ្នែក « ប្រើប្រាស់បច្ចេកវិទ្យាប្រកបដោយសេចក្តីសុចរិត » និង « សូមធ្វើតាមវិធីបង្ការក្នុងការប្រើប្រាស់បច្ចេកវិទ្យា » នៅក្នុងជំពូកទី ២ នៃ ប្រកាសដំណឹងល្អរបស់យើង ។
អ្នកក៏អាចស្វែងរកព័ត៌មាននៅលើគេហទំព័រ ChurchofJesusChrist.org/study/life-help/pornographyបានផងដែរ ។
នរណាម្នាក់ដែលខិតខំចៀសវាង ឬយកឈ្នះការណ៍អាសគ្រាមអាចស្វែងរកជំនួយ និងការព្យាបាលតាមរយៈដង្វាយធួនរបស់ព្រះយេស៊ូវគ្រីស្ទ ។ ប្រសិនបើអ្នកកំពុងមានការលំបាក សូមជួបជាមួយប៊ីស្សព ឬប្រធានស្តេករបស់អ្នក ។ គាត់នឹងផ្ដល់ដំបូន្មានពេញដោយក្តីស្រឡាញ់ និងការគាំទ្រ ។
៣.៤
សេចក្តីទៀងត្រង់
យើងត្រូវបានបង្គាប់ឲ្យមានភាពស្មោះត្រង់ ។ ភាពស័ក្ដិសមសម្រាប់ព្រះវិហារបរិសុទ្ធ រួមមានការស្មោះត្រង់នៅក្នុងគ្រប់ទំនាក់ទំនងទាំងអស់របស់អ្នកជាមួយមនុស្សដទៃទៀត ។ ការមានភាពស្មោះត្រង់ រួមមាន ៖
-
ការប្រាប់ការពិត ជាពិសេសទៅកាន់ប៊ីស្សព និងប្រធានស្តេក អ្នកប្រឹក្សាអ្នកផ្សព្វផ្សាយសាសនាផ្នែកសេវាកម្មរបស់អ្នក និងប្រធានបេសកកម្មទាក់ទងនឹងការប្រព្រឹត្តិរបស់អ្នក ទីបន្ទាល់ ទម្លាប់ការងារ និងសុខភាពខាងសតិអារម្មណ៍ និងផ្លូវកាយរបស់អ្នក ។
-
ការផ្ដល់របាយការណ៍ត្រឹមត្រូវអំពីការបម្រើរបស់អ្នក និងរបៀបដែលអ្នកបានចំណាយពេលក្នុងអំឡុងសប្ដាហ៍នោះ ។
-
ការធ្វើជាមនុស្សដែលគួរឲ្យទុកចិត្ត និងមិនដែលផ្ដល់ការរាយការណ៍ ឬព័ត៌មានក្លែងក្លាយ អំពីមនុស្សណាម្នាក់ ឬពីកិច្ចការបម្រើរបស់អ្នកឡើយ ។
-
ការគោរពអ្នកដទៃដោយការមិនខ្ចី មិនយក ឬការប្រើប្រាស់របស់របរផ្ទាល់របស់ពួកគេ ( ដូចជា សម្លៀកបំពាក់ សៀវភៅ ឧបករណ៍អេឡិចត្រូនិក និងគ្រឿងអលង្ការ ) ដោយគ្មានការអនុញ្ញាតឡើយ ។
៣.៥
ការប្រាស្រ័យទាក់ទងជាមួយមនុស្សដទៃទៀត
ព្រះអង្គសង្គ្រោះបានបង្រៀនថា « នេះជាសេចក្តីបញ្ញត្តិរបស់ខ្ញុំ គឺឲ្យអ្នករាល់គ្នាស្រឡាញ់ដល់គ្នាទៅវិញទៅមក ដូចជាខ្ញុំបានស្រឡាញ់អ្នករាល់គ្នាដែរ » ( យ៉ូហាន ១៥:១២ ) ។ សូមជ្រើសរើសធ្វើតាមគំរូរបស់ព្រះអង្គសង្គ្រោះ និងប្រព្រឹត្តដោយគួរសម មានសុវត្ថិភាព និងសមរម្យសម្រាប់ស្ថានភាពនោះ ។
៣.៥.១
បទដ្ឋានទូទៅសម្រាប់ការប្រាស្រ័យទាក់ទងជាមួយគ្រួសារ និងមិត្តភក្តិ
សូមធ្វើជាកម្លាំង និងជាគំរូល្អដល់គ្រួសារ និងមិត្តភក្តិរបស់អ្នក ។ ចែកចាយបទពិសោធន៍ដែលលើកស្ទួយ និងអ្វីដែលអ្នកកំពុងរៀនសូត្រចេញពីបទពិសោធន៍បេសកកម្មរបស់អ្នក ។
សមាជិកគ្រួសារអាចត្រូវជួយអ្នកក្នុងផ្នែកតម្រូវការខាងរូបកាយ និងសតិអារម្មណ៍ ជាមួយការធ្វើដំណើរ ឬរបៀបផ្សេងទៀតដើម្បីអ្នកបម្រើដោយជោគជ័យ ។ ជីវិតគ្រួសារនឹងមានការផ្លាស់ប្តូរនៅអំឡុងការផ្សព្វផ្សាយសាសនាផ្នែកសេវាកម្មរបស់អ្នក ។ អ្នក និងគ្រួសាររបស់អ្នកនឹងត្រូវធ្វើការលះបង់មួយចំនួន ដើម្បីធានាឲ្យបានថាអ្នកមានបទពិសោធន៍បេសកកម្មប្រកបដោយអត្ថន័យ និងផលិតភាពបំផុតអស់ពីលទ្ធភាព ។
៣.៥.២
បទដ្ឋានទូទៅសម្រាប់ការប្រាស្រ័យទាក់ទងជាមួយមជ្ឈិមវ័យ
សូមបង្កើតទំនាក់ទំនងដែលមានការទុកចិត្តគ្នា និងមានអត្ថន័យជាមួយមនុស្សដែលអ្នកបម្រើ ។ ត្រូវមានវិជ្ជាជីវៈ និងសណ្តានចិត្តល្អ ។ សូមគោរពតាមបទដ្ឋានដូចខាងក្រោម ៖
-
ចៀសវាងស្ថានភាពទាំងឡាយដែលអាចប្រែជាមានគ្រោះថ្នាក់ខាងរាងកាយ និងខាងវិញ្ញាណ ឬដែលអាចធ្វើឲ្យភាន់ច្រឡំ ។
-
កុំដើរលេងជាគូ ឬចូលរួមរាំ ចែចង់ ឬមានទំនាក់ទំនងដោយមិនសមរម្យជាមួយនរណាម្នាក់ឡើយ ។ ត្រូវប្រុងប្រយ័ត្នក្នុងការចូលរួមសកម្មភាពណាមួយ ឬឥរិយាបថដែលអាចយល់ខុសថាជាការចែចង់ ឬអាចមើលទៅដូចជាការដើរលេងជាគូ ។
-
រក្សាភាសារបស់អ្នកឲ្យថ្លៃថ្នូរ ។ សូមចៀងវាងពីការប្រើប្រាស់ក្រៀមភាសា ។ ប្រើងារត្រឹមត្រូវពេលហៅមនុស្សផ្សេងទៀត ។ ឧទាហរណ៍ ប្រើងារ « អែលឌើរ » ឬ « ស៊ីស្ទើរ » នៅពេលសំដៅដល់ពួកអ្នកផ្សព្វផ្សាយសាសនាផ្សេងទៀត និងអ្នកប្រឹក្សាយោបល់របស់អ្នកផ្សព្វផ្សាយសាសនាផ្នែកសេវាកម្ម ។ ការណ៍នេះបង្ហាញការគោរពចំពោះការហៅរបស់ពួកគេ ។
៣.៥.៣
បទដ្ឋានទូទៅសម្រាប់ការប្រាស្រ័យទាក់ទងជាមួយកុមារ និងមជ្ឈិមវ័យដែលងាយរងគ្រោះ
ដើម្បីជាសុវត្ថិភាពរបស់អ្នក និងសុវត្ថិភាពរបស់កុមារ និងមជ្ឈិមវ័យដែលងាយរងគ្រោះផងដែរនោះ សូមគោរពតាមបទដ្ឋានដូចខាងក្រោមនេះឲ្យបានតឹងរឹងនៅពេលធ្វើការជាមួយមនុស្សទាំងនេះ ៖
-
សូមកុំនៅជាមួយកុមារ ឬមជ្ឈិមវ័យងាយរងគ្រោះតែម្នាក់ឯងទោះស្ថិតក្រោមកាលៈទេសៈណាក៏ដោយ ។
-
សូមកុំមើលថែកូនក្មេង ស្លៀកពាក់ឲ្យពួកគេ ឲ្យពួកគេលេបថ្នាំ ឬមើលថែអនាម័យផ្ទាល់ខ្លួនរបស់ពួកគេឡើយ ។
-
បម្រើពួកគេតែពេលណាដែលមានមជ្ឈិមវ័យដែលមានទំនួលខុសត្រូវម្នាក់ទៀតមានវត្តមានតែប៉ុណ្ណោះ ។ សូមធ្វើតាមពិធីការសុវត្ថិភាពរបស់សាសនាចក្រ ឬអង្គការសប្បុរសធម៌ដែលអ្នកកំពុងបម្រើ ។
-
ប្រសិនបើអ្នកនឹងធ្វើការជាមួយពួកគេនៅក្នុងអង្គការសប្បុរសធម៌ ដំបូងអ្នកត្រូវបំពេញការពិនិត្យមើលជីវៈប្រវត្តិឲ្យសព្វគ្រប់សិន ។
មជ្ឈិមវ័យដែលងាយរងគ្រោះ គឺជាបុគ្គលដែលមានពិការភាពផ្លូវចិត្ត ឬផ្លូវកាយ ដែលជះឥទ្ធិពលយ៉ាងខ្លាំងដល់សមត្ថភាពរបស់ពួកគេក្នុងការយល់ដឹងអំពីស្ថានភាព និងការពារខ្លួនពីការរំលោភបំពាន ការធ្វេសប្រហែស ឬការកេងប្រវ័ញ្ច ។ មជ្ឈិមវ័យដែលងាយរងគ្រោះ ក៏អនុវត្តចំពោះជនភៀសខ្លួន ដែលប្រហែលជាមិនយល់ពីភាពខុសគ្នានៃភាសា ឬវប្បធម៌ផងដែរ ។
៣.៥.៤
បទដ្ឋានទូទៅសម្រាប់ការប្រាស្រ័យទាក់ទងជាមួយពួកអ្នកផ្សព្វផ្សាយសាសនាផ្នែកការបង្រៀន
អ្នកនឹងធ្វើការប្រាស្រ័យទាក់ទងជាមួយនឹងពួកអ្នកផ្សព្វផ្សាយសាសនាផ្នែកការបង្រៀននៅសន្និសីទហ្សូន និងបរិយាកាសផ្សេងទៀត តាមការណែនាំដោយប្រធានបេសកកម្មរបស់អ្នក ។ ការប្រាស្រ័យទាក់ទងជាមួយពួកអ្នកផ្សព្វផ្សាយសាសនាផ្នែកការបង្រៀននឹងផ្ដលពរដល់អ្នក ហើយអ្នកនឹងជាពរជ័យចំពោះពួកគេ ។
ក្នុងនាមជាអ្នកផ្សព្វផ្សាយសាសនាផ្នែកសេវាកម្ម អ្នកអាចទៅបង្រៀនសួរសុខទុក្ខជាមួយពួកអ្នកផ្សព្វផ្សាយសាសនាផ្នែកបង្រៀន ។ ពាក់ស្លាកឈ្មោះរបស់អ្នក ហើយធ្វើតាមបទដ្ឋានសម្លៀកបំពាក់សម្រាប់ពួកអ្នកផ្សព្វផ្សាយសាសនាផ្នែកការបង្រៀន និងនៅពេលអ្នកចូលរួមការបង្រៀនការសួរសុខទុក្ខ ។ ប្រសិនបើអ្នកធ្វើដំណើរនៅក្នុងយានជំនិះជាមួយគ្នា សូមព្យាយាមចៀសវាងការស្ដាប់តន្រ្តី និងការមើលប្រព័ន្ធផ្សព្វផ្សាយដែលមិនត្រូវនឹងបទដ្ឋានសម្រាប់ពួកអ្នកផ្សព្វផ្សាយសាសនាផ្នែកការបង្រៀន ។
៣.៥.៥
ការណាត់ដើរលេងជាគូ
អ្នកក៏មិនអាចទៅដើរលេងជាគូ ឬចែចង់ក្នុងនាមជាអ្នកព្វផ្សាយសាសនានោះដែរ ។ អ្នកត្រូវបានលើកទឹកចិត្តឲ្យចូលរួមនៅក្នុងវួដ និងសកម្មភាពយុវមជ្ឈិមវ័យនៅលីវ ( យ.ម.ល. ) ប៉ុន្តែអ្នកមិនគួរចូលរួមនៅក្នុងការរាំរែកនោះទេ ។ ត្រូវប្រុងប្រយ័ត្នក្នុងការចូលរួមសកម្មភាពណាមួយ ឬឥរិយាបថដែលអាចយល់ខុសថាជាការចែចង់ ឬដូចជាការដើរលេងជាគូ ។
៣.៥.៦
ការពាក់ស្លាកឈ្មោះអ្នកផ្សព្វផ្សាយសាសនា
វាគឺជាកិត្តិយស និងជាអភ័យឯកសិទ្ធិដើម្បីពាក់ស្លាកឈ្មោះអ្នកផ្សព្វផ្សាយសាសនា ។ សូមពាក់ស្លាកឈ្មោះជានិច្ចខណៈដែលអ្នកធ្វើដំណើរទៅ ឬមកពីកិច្ចការផ្សព្វផ្សាយសាសនារបស់អ្នកវិញ នៅពេលកំពុងបំពេញកិច្ចការផ្សព្វផ្សាយសាសនារបស់អ្នក នៅពេលអ្នកចូលរួមការបង្រៀនការសួរសុខទុក្ខ និងការប្រជុំក្នុងសាសនាចក្រ ។
កិច្ចការអ្នកផ្សព្វផ្សាយសាសនារួមមានការប្រជុំ និងសន្និសីទអ្នកផ្សព្វផ្សាយសាសនា ម៉ោងបម្រើគ្រួសាររបស់អ្នក និងកិច្ចការសាសនាចក្រ និងសប្បុរសធម៌ដែលធ្វើពីគេហដ្ឋាន ។ ប្រសិនបើអ្នកមានសំណួរណាមួយអំពីពេលវេលាដែលត្រូវពាក់ស្លាកឈ្មោះអ្នកផ្សព្វផ្សាយសាសនារបស់អ្នក សូមសួរទៅអ្នកប្រឹក្សាយោបល់របស់អ្នកផ្សព្វផ្សាយសាសនាផ្នែកសេវាកម្មរបស់អ្នក ។
៣.៥.៧
ការរស់នៅក្នុងផ្ទះ
ពួកអ្នកផ្សព្វផ្សាយសាសនាផ្នែកការបម្រើវ័យក្មងរស់នៅឯផ្ទះ ។ ប្រកាសដំណឹងល្អរបស់យើង ថ្លែងថា « ដំណឹងល្អនៃព្រះយេស៊ូវគ្រីស្ទជួយយើងអភិវឌ្ឍទំនាក់ទំនងគ្រួសារកាន់តែរឹងមាំ ។ គេហដ្ឋានគឺជាកន្លែងដ៏ល្អបំផុតសម្រាប់បង្រៀន និងរៀនគោលការណ៍នៃដំណឹងល្អ ។ គេហដ្ឋានដែលបង្កើតឡើងនៅលើគោលការណ៍នៃដំណឹងល្អនឹងក្លាយជាកន្លែងជ្រកកោន និងសុវត្ថិភាព ។ វានឹងក្លាយជាកន្លែងដែលព្រះវិញ្ញាណនៃព្រះអម្ចាស់អាចគង់នៅ » ( ជំពូកទី ៣ ) ។
នៅក្នុងការហៅរបស់អ្នក អ្នកត្រូវបានចាត់ឲ្យធ្វើការជាអ្នកផ្សព្វផ្សាយសាសនាផ្នែកសេវាកម្មនៅក្នុងសហគមន៍ក្នុងមូលដ្ឋានរបស់អ្នក ដោយផ្តល់ការងារបម្រើដូចជាព្រះគ្រីស្ទខណៈពេលកំពុងរស់នៅឯគេហដ្ឋាន ។ ប្រើឱកាសពិសេសនេះដើម្បីពង្រឹង និងបម្រើអស់អ្នកដែលនៅក្នុងផ្ទះរបស់អ្នក និងជួយពួកគេឲ្យកាន់តែខិតជិតព្រះយេស៊ូវគ្រីស្ទ ។
៣.៥.៨
ការងារ និងការសិក្សា
ការងារ និងការសិក្សា—ទោះជាការងារពេញម៉ោង ឬក្រៅម៉ោងក្តី—គឺមិនមែនជាផ្នែកនៃការបម្រើជាអ្នកផ្សព្វផ្សាយសាសនាពេញម៉ោងឡើយ ។ អ្នកគួរលះបង់ពេលវេលា ទេពកោសល្យ កម្លាំង និងធនធានហិរញ្ញវត្ថុរបស់អ្នកដើម្បីបេសកកម្មរបស់អ្នក ។ នេះគឺជាផ្នែកនៃក្រឹត្យវិន័យនៃការថ្វាយ ដែលអ្នកបានធ្វើសេចក្ដីសញ្ញាដើម្បីគោរពតាមនៅក្នុងពីធីអំណោយទានពិសិដ្ឋក្នុងព្រះវិហារបរិសុទ្ធ ។
អ្នកត្រូវបានលើកទឹកចិត្តឲ្យចូលរួមក្នុងថ្នាក់វិទ្យាស្ថាន និងសកម្មភាពនានា លើកលែងតែការរាំរែក និងសកម្មភាពដើរលេងជាគូ ។ អ្នកក៏អាចចុះឈ្មោះចូលរៀននៅក្នុង ប៊ី.វាយ.យូ PathwayConnect បានដែរ ប្រសិនបើអ្នកមានបំណងធ្វើដូច្នោះ ។
៣.៥.៩
គោលការណ៍ណែនាំស្ដីពីសុវត្ថិភាពសម្រាប់ធ្វើសកម្មភាពនានា
គោលការណ៍ណែនាំស្ដីពីសុវត្ថិភាពសម្រាប់ធ្វើសកម្មភាពនានាដែលអនុវត្តចំពោះយុវមជ្ឈិមវ័យនៅលីវ អនុវត្តចំពោះអ្នកក្នុងនាមជាអ្នកផ្សព្វផ្សាយសាសនាផ្នែកសេវាកម្មផងដែរ ។ ការធ្វើសកម្មភាពដែលត្រូវដេកយប់ ការទៅព្រះវិហារបរិសុទ្ធនៅក្រៅមណ្ឌលព្រះវិហារបរិសុទ្ធដែលបានចាត់តាំងដល់អ្នក និងការធ្វើដំណើរផ្លូវឆ្ងាយគឺត្រូវហាមឃាត់ ។ ធ្វើការជាមួយអ្នកប្រឹក្សាយោបល់របស់អ្នកផ្សព្វផ្សាយសាសនាផ្នែកសេវាកម្ម ប្រធានបេសកកម្ម និងប្រធានស្តេករបស់អ្នក សម្រាប់ករណីលើកលែងណាមួយ ។
៣.៦
ដំណើរកម្សាន្ត និងកម្មវិធីកម្សាន្ត
ជ្រើសរើសសកម្មភាពដែលលើកស្ទួយ ល្អសម្រាប់សុខុមាលភាពខាងវិញ្ញាណ និងខាងសតិអារម្មណ៍របស់អ្នក និងជួយឲ្យអ្នកសម្រាក ។ ធ្វើលំហាត់ប្រាណ និងមានភាពសកម្មដើម្បីរក្សារាងកាយ និងគំនិតរបស់អ្នកមាំមួនសម្រាប់ការបម្រើ ។ សូមចៀសវាងពីសកម្មភាពកម្សាន្តដែលនាំឲ្យមានរបួស និងនឿយហត់ខ្លាំង ។
៣.៦.១
ហ្គេម ភាពយន្ត និងទូរទស្សន៍
សកម្មភាពអំឡុងពេលម៉ោងដែលអ្នកមិនស្ថិតក្នុងការងារបម្រើរបស់អ្នក ដូចជា ហ្គេម ភាពយន្ត និងកម្មវិធីទូរទស្សន៍ដែលសមរម្យគឺអាចទទួលយកបានដោយមានការអនុម័តពីអ្នកប្រឹក្សាយោបល់របស់អ្នកផ្សព្វផ្សាយសាសនាផ្នែកសេវាកម្មរបស់អ្នក ។
បេសកម្មរបស់អ្នកផ្ដល់ឱកាសមួយដើម្បីអភិវឌ្ឍទម្លាប់សុចរិត ។ វាជាការចាំបាច់ដែលអ្នកមិនស្តាប់ មើល ឬចូលរួមក្នុងសកម្មភាព ឬប្រព័ន្ធផ្សព្វផ្សាយដែលបង្អាក់ពីឥទ្ធិពលនៃព្រះវិញ្ញាណក្នុងជីវិតរបស់អ្នក និងគោលបំណងរបស់អ្នកក្នុងនាមជាអ្នកផ្សព្វផ្សាយសាសនាឡើយ ។ សូមចាំថា អ្នកត្រូវបានញែកចេញជាអ្នកផ្សព្វផ្សាយសាសនាពេញម៉ោង ។ ព្យាយាមសម្របឥរិយាបថរបស់អ្នកជាមួយនឹងលក្ខណៈដ៏ពិសិដ្ឋនៃការហៅរបស់អ្នក ។
ពេលអ្នកចាប់ផ្តើមការបម្រើជាអ្នកផ្សព្វផ្សាយសាសនារបស់អ្នក សូមដាក់គោលដៅ និងដាក់ផែនការដើម្បីធានាថាទម្លាប់នៃប្រព័ន្ធផ្សព្វផ្សាយរបស់អ្នកគឺស្របនឹងការធ្វើជាសិស្សរបស់ព្រះយេស៊ូវគ្រីស្ទ ។ បន្តដាក់គោលដៅទាំងនេះ និងបង្កើតផែនការក្នុងអំឡុងពេលបេសកកម្មរបស់អ្នក ។ អ្នកប្រឹក្សាយោបល់របស់អ្នកផ្សព្វផ្សាយសាសនាផ្នែកសេវាកម្មរបស់អ្នកនឹងពិនិត្យមើលគោលដៅរបស់អ្នកជាទៀងទាត់ និងជួយអ្នកដាក់ផែនការក្នុងការប្រើប្រាស់ប្រព័ន្ធផ្សព្វផ្សាយរបស់អ្នក ។ សំណួរសំខាន់មួយដែលត្រូវសួរគឺ « តើនេះជា [ សកម្មភាព ភាពយន្ត តន្ត្រី ។ ល ។ ] ដែលបង្អាក់អ្នកចេញពីឥទ្ធិពលនៃព្រះវិញ្ញាណបរិសុទ្ធនៅក្នុងជីវិតរបស់អ្នកដែរឬទេ ? »
៣.៦.២
ការចូលរួមក្នុងវួដ និងថ្នាក់វិទ្យាស្ថាន
នៅក្នុងអំឡុងពេលនៃការបម្រើរបស់អ្នកក្នុងនាមជាអ្នកផ្សព្វផ្សាយសាសនា កំណត់ត្រាសមាជិកភាពរបស់អ្នកនៅតែមាននៅក្នុងវួដកំណើតរបស់អ្នកដដែល ។ ដោយមានការអនុម័តរបស់ប៊ីស្សពរបស់អ្នក នោះអ្នកអាចចូលរួមវួដយុវមជ្ឈិមវ័យនៅលីវ ( យ.ម.ល. ) នៅក្នុងតំបន់របស់អ្នក ។
អ្នកត្រូវបានលើកទឹកចិត្តឲ្យចូលរួមនៅក្នុងថ្នាក់វិទ្យាស្ថាន និងសកម្មភាពនានា ។ អ្នកក៏អាចចូលរួមក្នុងសកម្មភាពយុវមជ្ឈិមវ័យនៅលីវ ដែលឧបត្ថម្ភដោយវួដ ឬស្តេករបស់អ្នក ដូចជា សកម្មភាពរាត្រីជួបជុំក្រុមគ្រួសារ ដំណើរទៅព្រះវិហារបរិសុទ្ធ ការប្រជុំធម្មនិដ្ឋាន ហ្គេម និងអាហារពិចនិច ។ ទោះជាយ៉ាងណាក៏ដោយ អ្នកមិនគួរចូលរួមការរាំរែក ឬសកម្មភាពដើរលេងជាគូនោះទេ ។
៣.៦.៣
សកម្មភាពវប្បធម៌ និងការកម្សាន្ត
សូមចងចាំថា អ្នកគឺជាអ្នកផ្សព្វផ្សាយសាសនា ។ សកម្មភាពរបស់អ្នកគួរតែត្រឹមត្រូវ លើកស្ទួយ និងស្របតាមបទដ្ឋាននៃក្បួនខ្នាតនេះជានិច្ច ។ វាគួរតែស្របទៅនឹងការហៅរបស់អ្នកឲ្យធ្វើជាអ្នកតំណាងរបស់ព្រះយេស៊ូវគ្រីស្ទ ។
ចូរមានសុវត្ថិភាព និងប្រើសុភវិនិច្ឆ័យជានិច្ច នៅពេលចូលរួមនៅក្នុងសកម្មភាពកម្សាន្តនានា ។ អំឡុងបេសកកម្មរបស់អ្នក អ្នកមិនគួរចូលរួមនៅក្នុងសកម្មភាពណាដែលមានហានិភ័យខ្ពស់លើសពីធម្មតានោះទេ ។
ប្រសិនបើបានអនុម័តពីអ្នកប្រឹក្សាយោបល់របស់អ្នកផ្សព្វផ្សាយសាសនាផ្នែកសេវាកម្ម ឬប្រធានបេសកកម្មរបស់អ្នក អ្នកអាចចូលរួមក្នុងការជួបជុំក្នុងសង្គមជាមួយនឹងពួកអ្នកផ្សព្វផ្សាយសាសនាផ្នែកសេវាកម្មផ្សេងទៀត នៅពេលដែលអ្នកមិននៅក្នុងកិច្ចការចាត់តាំងរបស់អ្នកឡើយ ។ សកម្មភាពទាំងនេះគួរតែអនុវត្តតាមបទដ្ឋាននៅក្នុងក្បួនខ្នាតនេះ ។ វាមិនគួរត្រូវបានប្រារព្ធឡើងពេញមួយយប់នោះទេ ។
គោលបំណងនៃបេសកកម្មរបស់អ្នកគឺដើម្បីបម្រើ ។ ទោះយ៉ាងណាក៏ដោយ វាអាចកើតមានឡើងនៅពេលដែលវាសមស្របក្នុងការចូលរួមក្នុងវិស្សមកាលជាគ្រួសារ ។ ពិភាក្សាអំពីវិស្សមកាលជាលក្ខណៈគ្រួសារជាមួយអ្នកប្រឹក្សាយោបល់របស់អ្នកផ្សព្វផ្សាយសាសនាផ្នែកសេវាកម្មរបស់អ្នកជាមុនសិន ហើយស្វែងរកការអនុម័តពីប្រធានបេសកកម្មរបស់អ្នក ។ បង្កើតផែនការជាមួយថ្នាក់ដឹកនាំទាំងនេះ ដើម្បីលើកកម្ពស់បទពិសោធន៍បេសកកម្មរបស់អ្នក និងបំពេញគោលបំណងជាអ្នកផ្សព្វផ្សាយសាសនារបស់អ្នក ខណៈពេលទៅវិស្សមកាលជាគ្រួសារ ។
៣.៦.៤
តន្ត្រី
សូមស្តាប់តន្រ្តីដែលសមស្របនឹងការហៅដ៏ពិសិដ្ឋរបស់អ្នក ។ តន្រ្តីគួរយាងអញ្ជើញព្រះវិញ្ញាណ ជួយអ្នកផ្តោតលើកិច្ចការ និងដឹកនាំគំនិត និងអារម្មណ៍របស់អ្នកទៅរកព្រះអង្គសង្រ្គោះ ។
កុំស្តាប់តន្ត្រីដែលលើកទឹកចិត្តឲ្យមានទង្វើអសីលធម៌ លើកតម្កើងអំពើហិង្សា ឬប្រើភាសាប្រមាថឡើយ ។ ចៀសវាងតន្ត្រីដែលធ្វើឲ្យបាត់បង់ការឆាប់ដឹងខាងវិញ្ញាណរបស់អ្នកតាមរយៈចង្វាក់ភ្លេង ឧបករណ៍ កម្រិតសំឡេង អត្ថបទចម្រៀង ឬសំឡេងខ្លាំងៗរបស់តន្រ្តី ។
៣.៦.៥
ឧបករណ៍អេឡិចត្រូនិក និងកុំព្យូទ័រ
ព្រះអម្ចាស់បានប្រគល់ឲ្យអ្នកនូវបច្ចេកវិទ្យា ដើម្បីជួយសម្រេចកិច្ចការរបស់ទ្រង់ ។ « បេសកកម្មរបស់អ្នកគឺជាឱកាសដ៏ល្អមួយដើម្បីរៀនប្រើប្រាស់បច្ចេកវិទ្យាដោយឈ្លាសវៃ » ( ប្រកាសដំណឹងល្អរបស់យើង ជំពូកទី ២ ) ។
ការប្រើប្រាស់បច្ចេកវិទ្យាដោយឈ្លាសវៃ និងដោយសុចរិត អាចជួយអ្នកឲ្យសម្រេចគោលបំណងជាអ្នកផ្សព្វផ្សាយសាសនានិងប្រើប្រាស់ពេលវេលាប្រកបដោយប្រសិទ្ធភាព ។ បច្ចេកវិទ្យាអាចពង្រឹងការសិក្សារបស់អ្នកអំពីដំណឹងល្អ និងបទគម្ពីរ ព្រមទាំងជួយអ្នកដាក់គោលដៅ និងដាក់ផែនការ ។ វាក៏នឹងអាចជួយអ្នកឲ្យចៀសវាងឯកសារដែលមិនសមរម្យផងដែរ ។
សូមធ្វើតាមព្រះវិញ្ញាណអំពីពេលវេលា និងរបៀបប្រើប្រាស់បច្ចេកវិទ្យាតាមរបៀបដែលនឹងជួយពង្រឹងសេចក្ដីជំនឿរបស់អ្នកទៅលើព្រះយេស៊ូវគ្រីស្ទ និងសេចក្ដីជំនឿនៃអ្នកដែលអ្នកបម្រើ ។
សូមចៀសវាងរាល់អ្វីៗដែលប្រមាថ អសីលធម៌ ហិង្សា ឬអាសអាភាស ។
ត្រូវមានគោលបំណងក្នុងការប្រើប្រាស់ឧបករណ៍របស់អ្នក ។ ចៀសវាងការប្រើទូរសព្ទដៃរបស់អ្នកសម្រាប់គោលបំណងផ្ទាល់ខ្លួនក្នុងអំឡុងពេលម៉ោងនៃការចាត់តាំង ។
៣.៦.៦
ប្រព័ន្ធផ្សព្វផ្សាយសង្គម
ប្រព័ន្ធផ្សព្វផ្សាយសង្គម ( និងវេទិកាដែលទាក់ទង ) អាចជាវិធីមួយដ៏មានប្រសិទ្ធភាពដើម្បីចែកចាយពីរបៀប ដែលអ្នកកំពុងធ្វើតាមព្រះអង្គសង្គ្រោះក្នុងនាមជាអ្នកផ្សព្វផ្សាយសាសនា ។ ការចុះផ្សាយអំពីសកម្មភាពដែលមិនមែនជាការផ្សព្វផ្សាយសាសនា គួរតែឆ្លុះបញ្ចាំងពីសេចក្តីថ្លៃថ្នូរនៃការហៅបេសកកម្មរបស់អ្នក ។
សូមជ្រើសរើសដោយឈ្លាសវៃ នៅពេលប្រើប្រាស់ប្រព័ន្ធផ្សព្វផ្សាយ ។ អ្វីក៏ដោយដែលអ្នកអាន ស្តាប់ ឬមើលប៉ះពាល់ដល់អ្នក ។ ជ្រើសរើសតែប្រព័ន្ធផ្សព្វផ្សាយដែលលើកស្ទួយអ្នកតែប៉ុណ្ណោះ ។
សូមការពារសុវត្ថិភាពរបស់អ្នក និងសុវត្ថិភាពអ្នកដទៃដោយប្រយ័ត្នប្រយែងអំពីព័ត៌មានផ្ទាល់ខ្លួន និងរូបភាពដែលអ្នកចែកចាយតាមរយៈបច្ចេកវិទ្យា ។ នៅពេលប្រើប្រាស់ប្រព័ន្ធផ្សព្វផ្សាយសង្គមដើម្បីបំពេញគោលបំណងផ្សព្វផ្សាយសាសនារបស់អ្នក សូមកុំ ៖
-
ប្រើងារ « អែលឌើរ » ឬ « ស៊ីស្ទើរ » នៅក្នុងឈ្មោះគណនីប្រព័ន្ធផ្សព្វផ្សាយសង្គមរបស់អ្នកឡើយ ។
-
ទំនាក់ទំនងអ្វីមួយតាមអ៊ីនធឺណិត ឬតាមរយៈការផ្ញើសារដែលមិនសមរម្យក្នុងការចែកចាយដោយផ្ទាល់ឡើយ ។
-
ចែកចាយទស្សនៈខាងនយោបាយ ។
-
បញ្ជាក់ថា ការចុះផ្សាយរបស់អ្នកគឺជាការទំនាក់ទំនងជាផ្លូវការរបស់សាសនាចក្រ ។
ត្រូវគោរពតាមច្បាប់ដែលគ្រប់គ្រងពីការចែកចាយតន្ត្រី ភាពយន្ត និងច្បាប់កម្មសិទ្ធិបញ្ញាផ្សេងៗទៀត ។
ត្រូវប្រយ័ត្នកុំចំណាយពេលប្រើប្រាស់អ៊ីនធឺណិត ឧបករណ៍ចល័ត ឬប្រព័ន្ធផ្សព្វផ្សាយផ្សេងទៀតច្រើនពេក ។ ការធ្វើដូច្នេះអាចរារាំងអ្នកពីការចូលរួមក្នុងសកម្មភាពដែលជួយអ្នកបំពេញគោលបំណងជាអ្នកផ្សព្វផ្សាយសាសនារបស់អ្នក និងបំពេញកិច្ចការផ្សព្វផ្សាយសាសនារបស់អ្នក ។
ប្រសិនបើអ្នកមិនច្បាស់ថាតើអ្វីសមរម្យដើម្បីមើល ឬស្តាប់ សូមជួបជាមួយឪពុកម្ដាយ ឬអាណាព្យាបាល ប៊ីស្សព ឬអ្នកប្រឹក្សាយោបល់របស់អ្នកផ្សព្វផ្សាយសាសនាផ្នែកសេវាកម្មរបស់អ្នក ។ ព្រះវិញ្ញាណបរិសុទ្ធក៏នឹងដឹកនាំអ្នក ហើយប្រទានកម្លាំងដល់អ្នកដើម្បីធ្វើការជ្រើសរើសត្រឹមត្រូវផងដែរ ។
៣.៧
ការលើកលែងផ្នែកគោលនយោបាយ
ប្រសិនបើអ្នកមានអារម្មណ៍ថា មានការលើកលែងមួយចំពោះបទដ្ឋាននៅក្នុងក្បួនខ្នាតនេះដែលគួរតែត្រូវបានលើកមកពិចារណា សូមពិភាក្សាជាមួយអ្នកប្រឹក្សាយោបល់របស់អ្នកផ្សព្វផ្សាយសាសនាផ្នែកសេវាកម្មរបស់អ្នក ។ ករណីលើកលែងមួយចំនួនអាចទាមទារការអនុម័តពីប្រធានបេសកកម្មរបស់អ្នក ឬនាយកដ្ឋានអ្នកផ្សព្វផ្សាយសាសនា ។
៣.៨
ទំនាក់ទំនងជាមួយថ្នាក់ដឹកនាំបេសកកម្ម អ្នកប្រឹក្សាយោបល់របស់អ្នកផ្សព្វផ្សាយសាសនាផ្នែកសេវាកម្ម ថ្នាក់ដឹកនាំបព្វជិតភាព និងអ្នកគ្រប់គ្រងទីតាំងផ្នែកសេវាកម្ម ។
ការបម្រើជាអ្នកផ្សព្វផ្សាយសាសនារួមមានការទទួលខុសត្រូវចំពោះព្រះអម្ចាស់ និងថ្នាក់ដឹកនាំរបស់អ្នក ។ អ្នកធ្វើដូច្នេះដោយផ្តល់របាយការណ៍អ្នកផ្សព្វផ្សាយសាសនាជាទៀងទាត់ រួមទាំងរបាយការណ៍អ៊ីមែលប្រចាំសប្តាហ៍ ទៅកាន់អ្នកប្រឹក្សាយោបល់របស់អ្នកផ្សព្វផ្សាយសាសនាផ្នែកសេវាកម្មរបស់អ្នក ។ របាយការណ៍ទាំងនេះអាចមាន ៖
-
កិច្ចការ និងកាលវិភាគកិច្ចការផ្សព្វផ្សាយសាសនារបស់អ្នក ។
-
សុខុមាលភាពខាងផ្លូវកាយ និងខាងសតិអារម្មណ៍របស់អ្នក ។
-
បទពិសោធន៍ខាងវិញ្ញាណ និងការអភិវឌ្ឍរបស់អ្នក ។
-
ជោគជ័យ និងឧបសគ្គនាពេលថ្មីៗរបស់អ្នក ។
ជូនដំណឹងទៅអ្នកគ្រប់គ្រងទីតាំងផ្នែកសេវាកម្មរបស់អ្នក និងអ្នកប្រឹក្សាយោបល់របស់អ្នកផ្សព្វផ្សាយសាសនាផ្នែកសេវាកម្មរបស់អ្នក រាល់ពេលអ្នកមិនអាចចូលរួមនៅក្នុងការចាត់តាំងការបម្រើរបស់អ្នក ។ ទំនាក់ទំនងនេះគួរតែធ្វើឡើងជាមុនឲ្យបានល្អ ប្រសិនបើអាចធ្វើបាន ។
នៅក្នុងបេសកកម្មរបស់អ្នក សូមប្រើគណនីអ៊ីមែលអ្នកផ្សព្វផ្សាយសាសនាដែលបានចុះឈ្មោះរបស់អ្នក ជាជាងប្រើគណនីផ្ទាល់ខ្លួនណាមួយ ។