« ១. បទពិសោធន៍ផ្សព្វផ្សាយសាសនារបស់អ្នក » បទដ្ឋានអ្នកផ្សព្វផ្សាយសាសនាសម្រាប់សិស្សរបស់ព្រះយេស៊ូវគ្រីស្ទ—ពួកអ្នកផ្សព្វផ្សាយសាសនាផ្នែកសេវាកម្ម ( ឆ្នាំ២០២៥ )

« បទពិសោធន៍អ្នកផ្សព្វផ្សាយសាសនារបស់អ្នក » បទដ្ឋានអ្នកផ្សព្វផ្សាយសាសនាសម្រាប់សិស្សរបស់ព្រះយេស៊ូវគ្រីស្ទ—ពួកអ្នកផ្សព្វផ្សាយសាសនាផ្នែកសេវាកម្ម

១

បទពិសោធន៍ផ្សព្វផ្សាយសាសនារបស់អ្នក

១.០

គោលបំណងរបស់អ្នក

ការងារបម្រើរបស់ព្រះអង្គសង្រ្គោះបង្ហាញពីគំរូនៃបទបញ្ញត្តិធំពីរ ។ បទបញ្ញត្តិទីមួយ « ត្រូវឲ្យស្រឡាញ់ព្រះអម្ចាស់ជាព្រះនៃឯងឲ្យអស់អំពីចិត្ត អស់ពីព្រលឹង ហើយអស់អំពីគំនិតឯង » ។ ហើយបញ្ញត្តិទីពីរ ក៏បែបដូចគ្នាគឺថា « ត្រូវឲ្យស្រឡាញ់អ្នកជិតខាងដូចខ្លួនឯង » (ម៉ាថាយ ២២:៣៧, ៣៩ ) ។ ដំបូងយើងស្រឡាញ់ព្រះ ។ ដោយសារយើងស្រឡាញ់ទ្រង់ នោះយើងស្រឡាញ់បុត្រាបុត្រីរបស់ទ្រង់ ។ ហើយរបៀបមួយដែលយើងបង្ហាញសេចក្តីស្រឡាញ់របស់យើងសម្រាប់បុត្រាបុត្រីរបស់ព្រះ គឺតាមរយៈការបម្រើពួកគេ ឲ្យដូចជាអ្នកជិតខាងរបស់យើង ។

អ្នកមានគោលបំណងជាក់លាក់មួយក្នុងនាមជាអ្នកផ្សព្វផ្សាយសាសនាផ្នែកសេវាកម្ម ។ គោលបំណងនេះត្រូវបានផ្ដល់ឲ្យអ្នកដោយគណៈប្រធានទីមួយ ។ សេចក្តីណែនាំនេះគួរតែដឹកនាំអ្នកនៅក្នុងការហៅដ៏ពិសិដ្ឋ ដើម្បីបម្រើបុត្រាបុត្រីរបស់ព្រះវរបិតាសួគ៌ ។

ជួយអ្នកដទៃឲ្យមកកាន់ព្រះគ្រីស្ទ ដោយការបម្រើពេញដោយសេចក្តីមេត្តាករុណាដូចជាព្រះអង្គសង្រ្គោះនឹងធ្វើ ។ ផ្ដល់ការងារបម្រើនៅក្នុងព្រះនាមរបស់ទ្រង់ទៅដល់មនុស្សម្នាក់ តាមរយៈព្រះចេស្ដានៃព្រះវិញ្ញាណបរិសុទ្ធ ហើយរស់នៅជាគំរូនៃសេចក្ដីជំនឿលើព្រះយេស៊ូវគ្រីស្ទ ការប្រែចិត្ត ការរក្សាសេចក្ដីសញ្ញាជាមួយនឹងព្រះ និងការកាន់ខ្ជាប់ដរាបដល់ចុងបំផុត ។

ការបម្រើរបស់អ្នកគឺសម្រាប់ព្រះយេស៊ូវគ្រីស្ទ ហើយអ្នកត្រូវបានអញ្ជើញឲ្យបម្រើ និងប្រែក្លាយដូចជាទ្រង់ ។

១.១

សេចក្តីផ្ដើម

បេសកកម្មរបស់អ្នកពុំបានចាប់ផ្ដើមនៅថ្ងៃដែលអ្នកបានទទួលពិធីញែកចេញនោះទេ ។ ហើយវានឹងមិនបញ្ចប់នៅថ្ងៃដែលអ្នកត្រូវបានដោះលែងនោះដែរ ។ បេសកកម្មគឺលើសពីការពាក់ស្លាកឈ្មោះនៅពេលព្រឹក និងដកវាចេញនៅពេលយប់ទៅទៀត ។

បទពិសោធន៍បេសកកម្មរបស់អ្នកបង្ហាញពីការតាំងចិត្តរបស់អ្នកចំពោះព្រះយេស៊ូវគ្រីស្ទ និងបំណងប្រាថ្នារបស់អ្នកដើម្បីបម្រើមនុស្សដទៃនៅក្នុងព្រះនាមរបស់ទ្រង់ ។ ចាប់តាំងពីពិធីបុណ្យជ្រមុជទឹករបស់អ្នកមក អ្នកបានស្ថិតនៅលើផ្លូវនៃសេចក្ដីសញ្ញា ដែលនាំទៅកាន់សុភមង្គល អំណរ និងសេចក្ដីសុខសាន្តដ៏នៅអស់កល្បជានិច្ច ។ បទពិសោធន៍បេសកកម្មរបស់អ្នកអាចផ្លាស់ប្តូរអ្នកបាន ។ អ្នកគួរតែយកការផ្លាស់ប្តូរទាំងនោះទៅជាមួយអ្នកអស់មួយជីវិត ។

ចេញពីទស្សនៈដ៏អស់កល្បមួយ នោះបេសកកម្មរបស់អ្នកគឺជារបៀបដើម្បីជួយអ្នកឲ្យធ្វើជាសិស្សរបស់ព្រះយេស៊ូវគ្រីស្ទពេញមួយជីវិត ។ ព្រះគម្ពីរមរមនបង្រៀនថា « យើងសុំប្រាប់អ្នកនូវការណ៍ទាំងនេះ ដើម្បីឲ្យអ្នករាល់គ្នាអាចមានប្រាជ្ញា ដើម្បីឲ្យអ្នករាល់គ្នាអាចបានដឹងថា កាលណាអ្នករាល់គ្នានៅក្នុងការបម្រើដល់មនុស្សទូទៅ នោះអ្នករាល់គ្នាគ្រាន់តែនៅក្នុងការបម្រើដល់ព្រះរបស់អ្នកតែប៉ុណ្ណោះ » ( ម៉ូសាយ ២:១៧ ) ។ បេសកកម្មរបស់អ្នកគឺជាពេលវេលាតែមួយគត់នៅក្នុងជីវិតរបស់អ្នកដើម្បីស្វែងយល់ពីអំណរនៃការបម្រើព្រះអម្ចាស់ និងអ្នកដទៃ ។

ព្រះអម្ចាស់បានមានព្រះបន្ទូលថា « បើសិនជាអ្នករាល់គ្នាមានបំណងចង់បម្រើព្រះ នោះអ្នករាល់គ្នាបានហៅឲ្យធ្វើកិច្ចការនោះហើយ » ( គោលលទ្ធិ និងសេចក្តីសញ្ញា ៤:៣ ) ។ អ្នកមានអភ័យឯកសិទ្ធិក្នុងការលះបង់រយៈពេលនេះក្នុងជីវិតរបស់អ្នកដើម្បីបម្រើព្រះអម្ចាស់ ដោយការបម្រើអ្នកដទៃក្នុងព្រះនាមរបស់ទ្រង់ ។ នៅក្នុងការហៅនេះ អ្នកនឹងមានឱកាសផ្ដល់ការបម្រើដែលនឹងផ្ដល់ពរដល់មនុស្សដទៃ ជីវិតរបស់អ្នកផ្ទាល់ គ្រួសាររបស់អ្នក សាសនាចក្រ និងអង្គការដែលអ្នកបម្រើ ។

យើងម្នាក់ៗត្រូវបានចាត់មកផែនដីនេះជាមួយនឹងសមត្ថភាព និងទេពកោសល្យខុសៗគ្នា ។ អ្នកអាចធ្វើការចូលរួមចំណែកដ៏មានអត្ថន័យចំពោះកិច្ចការរបស់ព្រះជាមួយនឹងទេពកោសល្យ និងសមត្ថភាពដ៏វិសេសវិសាលរបស់អ្នក ។

ចូររីករាយនឹងបទពិសោធន៍បេសកកម្មរបស់អ្នក ពេលអ្នកស្រឡាញ់ព្រះ និងស្រឡាញ់អ្នកជិតខាងរបស់អ្នក ។ នេះជាពេលដើម្បីត្រេកអរ និងដើម្បីដកពិសោធន៍សុភមង្គល និងភាពសុខសាន្តដ៏យូរអង្វែងតាមរយៈព្រះយេស៊ូវគ្រីស្ទ ។

១.២

ការគោរពប្រតិបត្តិ

សិស្សដ៏ពិតរបស់ព្រះយេស៊ូវគ្រីស្ទ គឺគោរពប្រតិបត្តិ ។ ព្រះអង្គសង្គ្រោះបានបង្រៀនថា « បើអ្នករាល់គ្នាស្រឡាញ់ខ្ញុំ ចូរកាន់តាមបញ្ញត្តិរបស់ខ្ញុំចុះ » ( យ៉ូហាន ១៤:១៥ ) ។ ការកាន់តាមបទបញ្ញត្តិមានន័យថា អ្នកនឹងធ្វើអ្វីដែលព្រះអម្ចាស់សុំដោយស្ម័គ្រចិត្ត ហើយដោយស្មោះត្រង់ ដោយសារអ្នកស្រឡាញ់ទ្រង់ ។ ការគោរពប្រតិបត្តិក៏មានន័យថា អ្នកកាន់តាមបទបញ្ញត្តិ « ដោយអំណរ » និង « ចិត្តស្មោះត្រង់ » ផងដែរ ( កូល៉ុស ១:១១; កិច្ចការ ២:៤៦ ) ។

ព្រះយេស៊ូវគ្រីស្ទគឺជាគំរូនៃការគោរពប្រតិបត្តិដ៏ល្អឥតខ្ចោះ ។ អ្វីៗដែលទ្រង់បានធ្វើគឺស្របតាមព្រះហឫទ័យរបស់ព្រះវរបិតា ។ សូមធ្វើតាមទ្រង់ដោយខិតខំអស់ពីលទ្ធភាពរបស់អ្នក ដើម្បីគោរពរាល់បទបញ្ញត្តិរបស់ទ្រង់ ហើយរស់នៅតាមបទដ្ឋានអ្នកផ្សព្វផ្សាយសាសនាផ្នែកសេវាកម្ម ។

ការគោរពប្រតិបត្តិ និងការស្មោះត្រង់ ក៏មានន័យថា អ្នកព្យាយាមរៀន លូតលាស់ និងធ្វើឲ្យប្រសើរឡើងផងដែរ ។ សូមកែតម្រូវកំហុសភ្លាមៗ ។ ប្រែចិត្តដោយគ្មានការពន្យារពេល ។ សូមបង្ហាញថា អ្នកមានភាពស្មោះត្រង់ និងគោរពប្រតិបត្តិ ដោយទទួលខុសត្រូវចំពោះសកម្មភាពរបស់អ្នក ។

អ្នកនឹងមានពរ នៅពេលអ្នកធ្វើតាមបទបញ្ញត្តិ និងបទដ្ឋានអ្នកផ្សព្វផ្សាយសាសនា ហើយប្រើសុភវិនិច្ឆ័យ ។ សូមដឹងថា សូម្បីតែនៅពេលដែលអ្នករក្សាបទបញ្ញត្តិទាំងឡាយក្តី ក៏អ្នកប្រហែលជាដកពិសោធន៍នូវការបាក់ទឹកចិត្ត ជំងឺ ឬបញ្ហាប្រឈមផ្សេងៗទៀតដែរ ( សូមមើល នីហ្វៃទី២ ៤:១៧–១៩; អាលម៉ា ២៦:២៧ ) ។ ព្រះអង្គសង្គ្រោះក៏បានដកពិសោធន៍គ្រប់រឿងទាំងនេះដែរ ( សូមមើល អាលម៉ា ៧:១១–១២; គោលលទ្ធិ និងសេចក្ដីសញ្ញា ១២២:៨ ) ។ ទ្រង់សន្យាថា « ខ្ញុំមិនចោលអ្នករាល់គ្នាឲ្យនៅកំព្រាទេ ខ្ញុំនឹងមកឯអ្នករាល់គ្នាវិញ » ( យ៉ូហាន ១៤:១៨ ) ។

ព្រះស្រឡាញ់អ្នក ។ ចូរជ្រើសរើសកាន់តាមព្រះបញ្ញត្តិទាំងឡាយ ដោយសារអ្នកស្រឡាញ់ព្រះ ។ សូមកុំព្យាយាមធ្វើកិច្ចព្រមព្រាងជាមួយនឹងទ្រង់ ឬចាត់ទុកការគោរពប្រតិបត្តិរបស់អ្នកជាការដោះដូរដើម្បីទទួលបានពរជ័យណាមួយឡើយ ។

១.៣

សិទ្ធិជ្រើសរើស

សិទ្ធិជ្រើសរើស ឬសមត្ថភាពដើម្បីជ្រើសរើស និងធ្វើសកម្មភាពដោយខ្លួនរបស់យើង គឺជាអំណោយទានដ៏មហិមាមួយរបស់ព្រះចំពោះបុត្រាបុត្រីរបស់ទ្រង់ ។ ការរីកចម្រើនដ៏អស់កល្បជានិច្ចរបស់យើងពឹងអាស្រ័យទៅលើរបៀបដែលយើងប្រើអំណោយទាននេះ ។ ពេលយើងជ្រើសរើសធ្វើតាមព្រះយេស៊ូវគ្រីស្ទ និងការបង្រៀនរបស់ទ្រង់ នោះយើងនឹងដកពិសោធន៍នូវអំណរ ។

សិទ្ធិជ្រើសរើសខាងសីលធម៌របស់យើងដើម្បីរៀន លូតលាស់ រីកចម្រើន និងធ្វើតាមព្រះអង្គសង្រ្គោះ ។ ដោយសារយើងមានអំណោទាននៃសិទ្ធិជ្រើសរើស នោះយើង « មានសិទ្ធិនឹងរើសយកឥស្សរភាព និងជីវិតដ៏នៅអស់កល្បជានិច្ច តាមរយៈព្រះជាអ្នកសង្រួបសង្រួមដ៏ធំរបស់មនុស្សលោកទាំងអស់ » ( នីហ្វៃទី២ ២:២៧ ) ។

អ្នកទទួលខុសត្រូវលើការសម្រេចចិត្តដែលអ្នកធ្វើ ។ អ្នកគឺជាបុត្ររបស់ព្រះដែលមានកម្លាំងដ៏អស្ចារ្យ ។ អ្នកមានសមត្ថភាពជ្រើសរើសសេចក្ដីសុចរិត និងសុភមង្គល ទោះបីជាកាលៈទេសៈរបស់អ្នកបែបណាក្ដី ។

អ្នកក៏ទទួលខុសត្រូវចំពោះការអភិវឌ្ឍសមត្ថភាព និងទេពកោសល្យដែលព្រះបានប្រទានដល់អ្នកផងដែរ ។ បេសកកម្មរបស់អ្នកគឺជាពេលវេលាមួយ ដើម្បីរៀនទទួលខុសត្រូវចំពោះទ្រង់សម្រាប់អ្វីដែលអ្នកធ្វើដោយប្រើសមត្ថភាពរបស់អ្នក ។

បេសកកម្មរបស់អ្នកក៏ជាពេលវេលាមួយ ដើម្បីរៀនទទួលខុសត្រូវចំពោះរបៀបដែលអ្នកប្រើពេលវេលារបស់អ្នកដែរ ។ សូមកុំចំណាយពេលវេលាដោយភាពខ្ជិលច្រអូស ។ ចូរមានឆន្ទៈខិតខំធ្វើការ ។ សូមជ្រើសរើសឲ្យមានភាពស្ថិតស្ថេរ និងអាចទុកចិត្តបាន ។ ធ្វើកិច្ចការល្អៗជាច្រើនតាមឆន្ទៈរបស់អ្នកផ្ទាល់ ( សូមមើល គោលលទ្ធិ និងសេចក្តីសញ្ញា ៥៨:២៧–២៨ ) ។ សូមមើល « ការបម្រើដោយព្រះចេស្ដា និងសិទ្ធិអំណាចពីព្រះ » ដោយប្រធានរ័សុល អិម ណិលសុន ។

១.៤

គោលដៅផ្សព្វផ្សាយសាសនា

គណៈប្រធានទីមួយបានផ្ដល់គោលដៅដូចតទៅនេះសម្រាប់ពួកអ្នកផ្សព្វផ្សាយសាសនាផ្នែកសេវាកម្មផងដែរ ៖

ផ្ដល់ឱកាសសម្រាប់យុវជន និងយុវនារីគ្រប់រូបដែលមានឆន្ទៈ ដើម្បីបម្រើព្រះអម្ចាស់ ហើយបង្កើនទីបន្ទាល់លើទ្រង់ ។
ជួយអ្នកផ្សព្វផ្សាយសាសនាផ្នែកសេវាកម្មម្នាក់ៗរៀបចំខ្លួនសម្រាប់ការបម្រើពេញមួយជីវិត ។
ផ្ដល់ការបម្រើដ៏ចាំបាច់ និងមានតម្លៃថ្វាយដល់ព្រះអម្ចាស់តាមរយៈការបម្រើនៅក្នុងសាសនាចក្រ និងអង្គការសហគមន៍ ។

ការបម្រើព្រះអង្គសង្គ្រោះដោយស្មោះត្រង់នៅក្នុងព្រះនាមរបស់ទ្រង់ និងតាមរបៀបរបស់ទ្រង់ទាំងអំឡុង និងក្រោយពេលបេសកកម្មរបស់អ្នក ។ « ផ្ដោតលើព្រះគ្រីស្ទ ពេលអ្នកខិតខំដើម្បីបណ្ដុះគុណលក្ខណៈរបស់ទ្រង់ ។ … សូមអធិស្ឋានទូលសុំឲ្យព្រះប្រទានគុណលក្ខណៈទាំងនេះដល់អ្នក » ( ប្រកាសដំណឹងល្អរបស់យើង ទំព័រ ១២៤ ) ។ គុណលក្ខណៈទាំងនេះនឹងជួយអ្នកបំពេញគោលបំណងនៃបេសកកម្មរបស់អ្នក និងធ្វើជាសិស្សរបស់ព្រះយេស៊ូវគ្រីស្ទ ដែលមានការលះបង់កាន់តែច្រើន ។

ក្នុងអំឡុងពេលបេសកកម្មរបស់អ្នក អ្នកនឹងមានឱកាសដើម្បីកសាងជំនាញថ្មីខាងវិញ្ញាណ ខាងសង្គម រាងកាយ និងខាងបញ្ញា ។ ជំនាញទាំងនេះនឹងផ្តល់ពរជ័យ និងមានឥទ្ធិពលដល់អ្នកក្នុងគ្រប់ទិដ្ឋភាពក្នុងជីវិតរបស់អ្នក ។

១.៥

បទដ្ឋានសម្រាប់ជីវិត

ព្រះអញ្ជើញអ្នកឲ្យថ្វាយខ្លួនអ្នកដល់ទ្រង់អស់មួយជីវិតរបស់អ្នក ។ បទដ្ឋានបេសកកម្ម ដូចជាការសិក្សាផ្ទាល់ខ្លួន ការដាក់គោលដៅ និងការប្រើប្រាស់បច្ចេកវិទ្យាដោយសុចរិត នឹងផ្ដល់ពរជ័យដល់អ្នកនៅក្នុងបេសកកម្មរបស់អ្នក និងសម្រាប់ពេញមួយជីវិតរបស់អ្នក ។

ចូរធ្វើឲ្យបទបញ្ញត្តិនៅក្នុងបទគម្ពីរ និងបទដ្ឋានបេសកកម្មទាំងនេះក្លាយជាគោលការណ៍ដឹកនាំពេញមួយជីវិត ។ កាលដែលអ្នកធ្វើតាមព្រះបញ្ញត្តិរបស់ព្រះ និងតាមបទដ្ឋានទាំងឡាយ នោះទ្រង់នឹងដឹកនាំ ប្រទានពរ និងណែនាំអ្នកពេញមួយជីវិតរបស់អ្នក ។