« សារលិខិតមកពីគណៈប្រធានទីមួយ និងកូរ៉ុមនៃពួកសាវកដប់ពីរនាក់ » បទដ្ឋានអ្នកផ្សព្វផ្សាយសាសនាសម្រាប់សិស្សរបស់ព្រះយេស៊ូវគ្រីស្ទ—ពួកអ្នកផ្សព្វផ្សាយសាសនាផ្នែកសេវាកម្ម ( ឆ្នាំ២០២៥ )
« សារលិខិតមកពីគណៈប្រធានទីមួយ » បទដ្ឋានអ្នកផ្សព្វផ្សាយសាសនា—ពួកអ្នកផ្សព្វផ្សាយសាសនាផ្នែកសេវាកម្ម
សារលិខិតមកពីគណៈប្រធានទីមួយ និងកូរ៉ុមនៃពួកសាវកដប់ពីរនាក់
ជូនចំពោះអ្នកផ្សព្វផ្សាយសាសនាជាទីស្រឡាញ់ ៖
ព្រះគម្ពីរមរមនបង្រៀនថា « ហើយមើលចុះ យើងសុំប្រាប់អ្នកនូវការណ៍ទាំងនេះ ដើម្បីឲ្យអ្នករាល់គ្នាអាចមានប្រាជ្ញា ដើម្បីឲ្យអ្នករាល់គ្នាអាចបានដឹងថា កាលណាអ្នករាល់គ្នានៅក្នុងការបម្រើដល់មនុស្សទូទៅ នោះអ្នករាល់គ្នាគ្រាន់តែនៅក្នុងការបម្រើដល់ព្រះរបស់អ្នកតែប៉ុណ្ណោះ » ( ម៉ូសាយ ២:១៧ ) ។ ព្រះបានហៅអ្នកឲ្យធ្វើជាអ្នកផ្សព្វផ្សាយសាសនាផ្នែកសេវាកម្មដើម្បីជួយប្រមូលសាសន៍អ៊ីស្រាអែល តាមរយៈការបម្រើ ។ យើងមានអំណរគុណចំពោះឆន្ទៈរបស់អ្នកក្នុងការបម្រើព្រះ ដោយតាមរយៈការបម្រើមិត្តភក្តិរបស់អ្នក ។
ការបម្រើដល់បុត្រាបុត្រីរបស់ព្រះបិតាសួគ៌របស់យើង គឺជាការបង្ហាញដ៏សំខាន់នៃការដឹងគុណរបស់អ្នកចំពោះព្រះសម្រាប់ជីវិត និងដំណឹងល្អរបស់ទ្រង់ ។ វាបង្ហាញពីឆន្ទៈរបស់អ្នកដើម្បីរក្សាសេចក្តីសញ្ញាដែលអ្នកបានធ្វើជាមួយនឹងទ្រង់ ។ យើងសូមលើកទឹកចិត្តអ្នកឲ្យ « អធិស្ឋានដល់ព្រះវរបិតាដោយអស់ពីកម្លាំងចិត្ត » ដើម្បីអ្នកអាចបានពោរពេញដោយសេចក្តីស្រឡាញ់ដ៏សុទ្ធសាធនៃព្រះគ្រីស្ទ ។ សេចក្តីស្រឡាញ់នេះផ្ដល់ឲ្យដល់ « អស់អ្នកណាដែលជាអ្នកដើរតាមដ៏ពិត » របស់ព្រះយេស៊ូគ្រីស្ទ ( មរ៉ូណៃ ៧:៤៧–៤៨ ) ។ ពេលអ្នកបម្រើអ្នកដទៃក្នុងព្រះនាមរបស់ទ្រង់ នោះទ្រង់នឹងបំពេញអ្នកដោយអំណរ ។
បទដ្ឋានអ្នកផ្សព្វផ្សាយសាសនាសម្រាប់សិស្សរបស់ព្រះយេស៊ូវគ្រីស្ទ—ពួកអ្នកផ្សព្វផ្សាយសាសនាផ្នែកសេវាកម្ម ត្រូវបានផ្តល់ឲ្យដោយគណៈប្រធានទីមួយ និងកូរ៉ុមនៃពួកសាវកដប់ពីរនាក់ គឺដើម្បីដឹកនាំការបម្រើរបស់អ្នក ។ យើងសូមលើកទឹកចិត្តអ្នកឲ្យស្គាល់ក្បួនខ្នាតនេះ ហើយរស់នៅតាមបទដ្ឋានទាំងឡាយដែលមាននៅក្នុងនោះ ។ បទដ្ឋានទាំងនេះនឹងជួយការពារអ្នកខាងផ្លូវកាយ ខាងវិញ្ញាណ និងខាងសតិអារម្មណ៍ ។ វានឹងជួយអ្នកឲ្យធ្វើជាសិស្សដ៏កាន់តែស្មោះត្រង់របស់ព្រះយេស៊ូវគ្រីស្ទ ហើយប្រែក្លាយកាន់តែដូចជាទ្រង់ ។
យើងសូមអធិស្ឋានសូមឲ្យអ្នកនឹងរកឃើញសេចក្ដីសុខសាន្ត និងអំណរពិត ក្នុងការបម្រើព្រះអម្ចាស់ព្រះយេស៊ូវគ្រីស្ទ និងបុត្រាបុត្រីរបស់ព្រះវរបិតាសួគ៌ ។
ដោយសេចក្ដីស្រឡាញ់ និងអរគុណ
គណៈប្រធានទីមួយ និងកូរ៉ុមនៃពួកសាវកដប់ពីរនាក់
សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ