Номлогчийн биеэ авч явах байдал

Ариун сүмд байгуулдаг гэрээнүүдээ сахих нь таныг хүчирхэгжүүлж, танд Аврагчтай илүү адилхан болоход тусална. Эдгээр гэрээнд дараах хуулиуд орно. Үүнд:

• Аравны нэгийн хууль

• Золиослолын хууль

• Есүс Христийн сайн мэдээний хууль

• Ариун явдлын хууль

• Бүхнээ зориулах хууль

  (Ерөнхий гарын авлагын 27.2-ыг үзнэ үү.)

Танд ойр ариун сүм байхгүй байсан ч ариун сүмд орохуйц зохистой хэвээр бай. Зөвшөөрлийн бичгийнхээ хугацааг дуусахаас өмнө бишоп болон гадасны ерөнхийлөгчөөсөө ариун сүмийн зөвшөөрлийн бичгийн ярилцлагад орохыг хүс.

Хишгээ хүртэн Их Эзэнтэй гэрээ байгуулсан хүмүүсийн хувьд ариун сүмийн өмсгөлийг өмсөх нь онцгой ариун нандин боломж юм. Ариун сүмийн өмсгөлийг өмсөх тухай удирдамжийг Ерөнхий гарын авлагын 38.5.5-аас үзнэ үү.

Таны ойролцоо ариун сүм байдаг бол номлолынхоо туршид орж үйлчлэхийг танд зөвлөж байна. Ийнхүү үйлчлэх нь таны үйлчлэлийн боломжуудын нэг байх боломжтой.

Ариун сүмд ордог байх нь таны номлолын туршлагыг баяжуулах болно. Та үүнийг номлогчийн бусад үүрэг даалгавартайгаа уялдуул. Та ариун сүмд үйлчилж байхдаа үүрэг даалгавраа нэр төртэй, хүндэтгэл, бишрэлтэйгээр биелүүл.

Ариун сүмд орохдоо дараах зүйлсийг сана. Үүнд:

• Хэрэв ариун сүмийн ерөнхийлөгчийн зөвлөл таныг ёслолын ажилтнаар дуудсан бол тэдний чиглүүлсний дагуу та ариун сүмд үйлчилнэ.

• Лацдан холбох ёслолд эхнэр, нөхрийг төлөөлөхөөс бусад ямар ч ариун сүмийн ёслолд та оролцож болно. Энэ нь сүнслэг мэдрэмжийг романтик мэдрэмжээс ангид байлгах зорилготой.

• Ариун сүм дотор хэрэглэхийн тулд камер, гар утас, унших зүйлс (тухайлбал патриархын адислал) авчирч болохгүй.

• Номлогчдын хувьд бөөнөөрөө цугларч эсвэл селестиел өрөөнд өвдөг сөгдөн залбирч болохгүй.

• Ариун сүмд гэр бүлийнхнийхээ нэрсийг аваачсанаар та ариун сүмийн туршлагаа нэмэгдүүлж, хөшигний нөгөө талд Израилыг цуглуулахад тусалдаг.

Порнографын олон хэлбэр бий. Урьдаас төлөвлөх болон зөв сонголтуудыг хийх нь порнографаас зайлсхийхэд тань тусалж чадна. Ийм зүйл харвал, харцаа буруулж, цахим хэрэгслээ унтраах эсвэл уг нөхцөлөөс холдон яв.

Порнографаас зайлсхийхийн тулд дараах зөвлөмжийг хэрэгжүүл. Үүнд:

• Порнографаас буюу үүнийг санал болгох зүйлсийг сонсох, унших эсвэл харах вэбсайт, материал, орчин нөхцөлөөс зайлсхий. Та үйлчлэл хийхээр томилогдсон газартаа зүй бус материал үзэж харсан тохиолдолд үйлчлэлийн номлолын зөвлөхүүдтэйгээ холбогдоно уу.

• Технологийг буруу ашиглахад хамгийн их уруу татагддаг үеүд болох ядарсан эсвэл уйдсан гэх мэт үеэ ялган таньж сур.

• Тийм үеүдэд оронд нь юу хийх талаараа төлөвлөгөө гарга. Үйлчлэлийн номлолын зөвлөхүүд тань тусалж чадна.

• Миний сайн мэдээг номло гарын авлагын 2-р бүлэг дэх “Технологийг зөв ашиглах” болон “Технологи ашиглах аюулгүйн удирдамжийг дагах” хэсгүүдийг тогтмол эргэн хар.

Та түүнчлэн ChurchofJesusChrist.org/study/life-help/pornography дээрээс мэдээлэл авч болно.

Порнографаас зайлсхийж, салахыг эрэлхийлж байгаа хүн бүр Есүс Христийн Цагаатгалаар дамжуулан тусламж, эдгэрлийг олж авч чадна. Хэрэв танд бэрхшээл тулгарвал бишоп эсвэл гадасны ерөнхийлөгчтэйгөө ярилц. Тэд танд хайранд зөвлөж, дэмжлэг үзүүлж чадна.

Гэр бүл, найз нөхдөдөө дэмтэй байж, сайн үлгэр дуурайл болох. Урам зориг сэргээсэн болон номлолоосоо олж авч байгаа туршлагуудаа хуваалцах.

Та амжилттай үйлчлэхийн тулд таны гэр бүлийн гишүүд бие махбодын болон сэтгэл санааны хэрэгцээнд тань, тээврийн хэрэгслээр эсвэл өөр аргаар дэмжлэг үзүүлэх шаардлагатай байж магадгүй юм. Номлолын үйлчлэлийн үеэр гэр бүлийн амьдралд зарим өөрчлөлт гарна. Хамгийн утга учиртай, үр бүтээлтэй номлолын туршлага олж авахын тулд та өөрөө болон танай гэр бүлийнхэн зарим нэг золиос гаргах шаардлагатай тулгарна.

Үйлчилдэг хүмүүстээ итгэлцэл төрүүлж, утга учиртай харилцаа тогтоо. Чадварлаг мөртлөө зөөлөн ханд. Дараах жишгүүдийг дагаж мөрд. Үүнд:

• Бие махбод эсвэл сүнслэг байдалд аюултай байж болох эсвэл буруу ойлголт төрүүлэх нөхцөл байдлаас зайлсхий.

• Хэн нэгэнтэй болзож, бүжигт явж, сээтгэнэж эсвэл зохисгүй байдлаар харьцаж болохгүй. Сээтэгнэл гэж буруу ойлгогдохоор эсвэл болзоо гэж харагдахаар харьцаа хандлага гаргах, аливаа үйл ажиллагаанд оролцохоос болгоомжил.

• Соёлтой боловсон үг хэллэг хэрэглэ. Бүдүүлэг үг хэллэг хэрэглэхээс зайлсхий. Бусдад хандахдаа зохих албан нэршлийг хэрэглэ. Жишээ нь: Бусад номлогч мөн үйлчлэлийн номлолын зөвлөхүүд рүү хандахдаа “Ахлагч” эсвэл “Эгч” гэсэн албан нэршлийг хэрэглэ. Энэ бол тэдний дуудлагыг хүндэтгэж байгаа хэлбэр юм.

Өөрийнхөө болон хүүхэд, эрсдэлт бүлгийн насанд хүрэгчдийн аюулгүй байдлыг хангах үүднээс тэдэнтэй харилцахдаа дараах жишгүүдийг чанд мөрд. Үүнд:

• Ямар ч тохиолдолд хүүхэд эсвэл эмзэг бүлгийн насанд хүрэгчидтэй ганцаараа үлдэж болохгүй.

• Хүүхэд харж өгч, хувцаслаж, эм өгч, хувийн ариун цэврийг нь сахиулж болохгүй.

• Тэдэнд үйлчлэхдээ, зөвхөн хариуцлагатай насанд хүрсэн өөр хүний хамт үйлчил. Сүмийн эсвэл үйлчилж буй энэрлийн байгууллагынхаа аюулгүй байдлын дүрмийг дагаж мөрд.

• Хэрэв та тэдэнтэй хамт энэрлийн байгууллагад ажиллах гэж байгаа бол эхлээд хувийн хэргээ өгөх хэрэгтэй.

Эрсдэлт бүлгийн насанд хүрэгчид гэж нөхцөл байдлыг ойлгох, хүчирхийлэл, үл хүндлэл, мөлжлөгөөс өөрийгөө хамгаалах чадварт нь ихээхэн нөлөөлөх сэтгэцийн болон бие махбодын бэрхшээлтэй хүмүүсийг хэлнэ. Эрсдэлт бүлгийн насанд хүрэгч гэдэгт хэл, соёлын ялгааг ойлгохгүй дүрвэгчдийг мөн хамааруулна.

Номлолынхоо ерөнхийлөгчийн удирдамж зааврын дагуу та бүсийн чуулганууд болон бусад уулзалт цуглаан дээр заах дуудлагатай номлогчидтой хамтран ажиллах болно. Заах дуудлагатай номлогчидтой хамтран ажиллах нь танд адислал болох болно. Мөн та ч тэдэнд адислал байх болно.

Заах дуудлагатай номлогчдыг заахаар явах үед та үйлчлэлийн номлогчийн хувиар тэднийг дагалдан явж болно. Хамт заахаар явах үедээ та нэрийн тэмдгээ зүүн, заах дуудлагатай номлогчдын хувцаслалтын жишгүүдийг дага. Хэрэв та тэдэнтэй хамт нэг тээврийн хэрэгсэлд зорчихоор болбол заах дуудлагатай номлогчдын жишигт үл нийцэх хөгжим сонсох, мэдээлэл үзэхээс зайлсхий.

Та номлогчийн хувьд болзож эсвэл сээтгэнэж болохгүй. Таныг Ганц бие залуучуудын (ГБЗ) тойрог, үйл ажиллагаанд хамрагдахыг дэмждэг хэдий ч та бүжигт оролцох ёсгүй. Сээтэгнэл эсвэл болзоо гэж буруу ойлгогдохоор харьцаа хандлага гаргах, аливаа үйл ажиллагаанд оролцохоос болгоомжил.

Номлогчийн нэрийн тэмдэг зүүх нь нэр төрийн хэрэг бөгөөд онцгой эрх юм. Номлогчийн үүрэг даалгавраа гүйцэтгэхээр явах, буцах болон үүрэг даалгавраа гүйцэтгэж байхдаа, заах айлчлалаар явах үедээ мөн Сүмийн цуглааны үеэр нэрийн тэмдгээ үргэлж зүү.

Номлогчийн үүрэг даалгавар гэдэгт номлогчийн хурал, чуулган, гэр бүлдээ үйлчлэх цаг, гэрээсээ гүйцэтгэж буй Сүмийн болон энэрлийн байгууллагын ажлууд багтана. Хэрэв танд номлогчийн нэрийн тэмдгийг хэзээ зүүх талаар асуулт байвал үйлчлэлийн номлолын зөвлөхүүдээсээ асуугаарай.

Үйлчлэлийн залуу номлогчид гэртээ амьдардаг. Миний сайн мэдээг номло гарын авлага дээр “Есүс Христийн сайн мэдээ илүү хүчирхэг гэр бүлийн харилцааг хөгжүүлэхэд тусалдаг. Гэр орон бол сайн мэдээний зарчмуудыг заах, үүнээс суралцах хамгийн тохиромжтой газар юм. Сайн мэдээний зарчмууд дээр үндэслэсэн гэр орон хоргодох, аюулгүй амьдрах газар байх болно. Энэ нь Их Эзэний Сүнс оршиж болох газар байх болно” (3-р бүлэг) гэсэн байдаг.

Таны дуудлагын захидалд таныг гэртээ амьдрангаа Христтэй адил үйлчлэн, орон нутагтаа үйлчлэлийн номлогчоор ажиллахаар томилогдлоо гэж бичсэн байгаа. Гэр бүлийнхээ гишүүдийг хүчирхэгжүүлж, тэдэнд үйлчлэн, Есүс Христэд илүү ойртоход нь туслах энэхүү онцгой боломжийг ашигла.

Бүтэн эсвэл хагас цагаар ажил эрхлэх, сургуульд суралцах зэрэг нь бүрэн цагийн номлогчийн үйлчлэлийн нэг хэсэг биш юм. Та номлолдоо цаг зав, авьяас чадвар, эрч хүч, санхүүгийн нөөцөө зориулах ёстой. Энэ нь ариун сүмийн хишиг хүртэх үедээ таны дуулгавартай дагана хэмээн гэрээ байгуулсан бүхнээ зориулах хуулийн нэг хэсэг юм.

Үйлчлэлийн номлогчдыг бүжиг, болзооны үйл ажиллагаанаас бусдаар институтийн ангиудад болон үйл ажиллагаанд оролцохыг уриалдаг. Хэрэв та хүсвэл PathwayConnect хөтөлбөрт элсэн суралцах боломжтой.

Ганц бие залуучуудад зориулсан үйл ажиллагааны аюулгүй байдлын зааварчилгаа нь үйлчлэлийн номлогчийн хувьд танд ч мөн хамааралтай. Хоногоор зохион байгуулагддаг үйл ажиллагаанд оролцох, таны томилогдсон ариун сүмийн дүүргээс гадуурх ариун сүмд зочлох, холын аялалд явах зэрэгт хязгаарлалт тавьдаг. Аливаа асуудал тулгарсан үед үйлчлэлийн номлолын зөвлөхүүд, номлолын ерөнхийлөгч, гадасны ерөнхийлөгчтэй хамтран ажилла.

Үйлчлэлийн үүрэг даалгавар гүйцэтгээгүй цагаараа та үйлчлэлийн номлолын зөвлөхүүдийн зөвшөөрлөөр зохих тоглоом, кино, телевизийн шоу зэргийг үзэж болно.

Номлол тань зөв дадал хэвшлийг хөгжүүлэх боломжоор хангадаг. Таны номлогчийн зорилго, амьдрал дахь Сүнсний нөлөөг сарниулах үйл ажиллагаанд оролцохгүй, мэдээлэл үзэхгүй, сонсохгүй байх нь нэн чухал юм. Та бүрэн цагийн номлогч байхаар онцгойлон адислагдсан гэдгээ бүү март. Дуудлагынхаа ариун нандин мөн чанарт нийцүүлэн биеэ авч явахыг эрмэлз.

Номлогчийн үйлчлэлээ эхлэх үедээ та Есүс Христийн шавь байхад тань нийцэх мэдээллийн хэрэгслийг ашиглах зорилго, төлөвлөгөө гарга. Номлолынхоо турш эдгээр зорилго, төлөвлөгөөг үргэлжлүүлэн гарга. Танай үйлчлэлийн номлолын зөвлөхүүд таны төлөвлөгөөг тогтмол хянаж, мэдээллийн хэрэгслийн хэрэглээнд зориулсан төлөвлөгөө гаргахад тань туслах болно. “Энэ (үйл ажиллагаа, кино, хөгжим зэрэг нь) надад амьдралдаа Сүнсний нөлөөг мэдрэхэд саад болох уу?” гэсэн асуултыг тавьдаг б айх нь чухал юм.

Номлогчоор үйлчлэх үед таны гишүүнчлэлийн бүртгэл танай тойрогт үлддэг. Танай бишоп зөвшөөрсөн тохиолдолд та бүсийнхээ ганц бие залуучуудын (ГБЗ) тойрогт сууж болно.

Үйлчлэлийн номлогчдыг институтийн ангиудад болон үйл ажиллагаанд оролцохыг урамшуулдаг. Мөн та тойрог эсвэл гадаснаас явуулж буй ганц бие залуучуудын үйл ажиллагаанд, тухайлбал гэр бүлийн үдэш, ариун сүмийн аялал, онцгой цугларалт, тоглоом, зугаалга гэх зэрэгт оролцож болно. Харин та бүжиг, болзооны үйл ажиллагаанд оролцож болохгүй.

Та номлогч гэдгээ сана. Таны оролцох үйл ажиллагаа үргэлж эрүүл, урам зориг өгсөн, энэ гарын авлагын жишгүүдэд нийцсэн байх ёстой. Тэдгээр нь Есүс Христийн төлөөлөгч байх таны дуудлагад нийцэж байх ёстой.

Амралт зугаалгын үйл ажиллагаанд оролцохдоо үргэлж аюулгүй байдлаа хангаж, бодолтой ханд. Номлолынхоо турш та ердийнхөөс илүү өндөр эрсдэлтэй үйл ажиллагаанд оролцох ёсгүй.

Танай үйлчлэлийн номлолын зөвлөхүүд, номлолын ерөнхийлөгч зөвшөөрсөн тохиолдолд та үйлчлэлийн үүрэг даалгавар гүйцэтгээгүй үедээ үйлчлэлийн бусад номлогчтой хамтдаа цугларч эсвэл ийм цугларалтад оролцож болно. Ийм төрлийн үйл ажиллагаанууд нь энэ гарын авлага дахь жишгүүдэд нийцэж байх ёстой. Энэ төрлийн үйл ажиллагаанууд хоногоор үргэлжлэх ёсгүй.

Таны номлолын зорилго бол үйлчлэх юм. Гэр бүлийн амралт зугаалгад оролцоход тохиромжтой үеүд байж болно. Гэр бүлийн амралт зугаалгын талаар үйлчлэлийн номлолын зөвлөхүүдтэй урьдчилан ярилцаж, номлолын ерөнхийлөгчөөсөө зөвшөөрөл авна. Гэр бүлийнхэнтэйгээ амралт зугаалгаар явж байх үедээ номлогчийн туршлагаа нэмэгдүүлж, номлогчийн хувьд зорилгоо биелүүлэхэд зориулсан төлөвлөгөөг эдгээр удирдагчтай хамтран гарга.

Таны ариун нандин дуудлагад нийцсэн дуу хөгжим сонс. Дуу хөгжим нь Сүнсийг урихаас гадна ажилдаа төвлөрч, бодол санаа, мэдрэмжээ Аврагч руу чиглүүлэхэд тусалдаг байвал зохино.

Ёс суртахуунгүй байдал болон хүч хэрэглэхийг өөгшүүлдэг эсвэл зохисгүй үг хэллэгтэй дуу хөгжим бүү сонс. Дууны хэмнэл, хөгжмийн зэмсэг, дууны үг, эрчим нь таны сүнслэг мэдрэмжийг мохоосон дуу хөгжмөөс зайлсхий.

Их Эзэн Өөрийн ажлыг гүйцэлдүүлэхэд нь туслах таны технологийн хэрэглээнд итгэл хүлээлгэсэн. “Таны номлол бол технологийг ухаалгаар ашиглаж сурах сайхан боломж юм” (Миний сайн мэдээг номло гарын авлагын 2-р бүлэг).

Технологийг ухаалаг бөгөөд зөв ашиглах нь номлолын зорилгодоо хүрч, цагийг үр дүнтэй ашиглахад танд тусална. Технологи нь сайн мэдээг болон судруудыг судлах таны сургалтыг баяжуулаад зогсохгүй зорилго тавьж, төлөвлөгөө гаргахад тань туслах болно. Энэ нь мөн танд зохисгүй материалаас зайлсхийхэд тусална.

Есүс Христэд итгэх өөрийн итгэлийг болон үйлчилж байгаа хүмүүсийнхээ итгэлийг бэхжүүлэхийн тулд технологийг хэзээ, хэрхэн ашиглах тал дээр Сүнсний өдөөлтийг дага.

Бүдүүлэг, ёс суртахуунгүй, хүчирхийлэлтэй, садар самуун байдлыг харуулсан аливаа зүйлсээс зайлсхий.

Технологийг ашиглахдаа зорилготой бай. Үйлчлэлийн үүрэг даалгавар гүйцэтгэх цагаараа хувийн зорилгоор гар утсаа ашиглахаас зайлсхий.

Сошиал медиа (үүнд хамааралтай платформууд) нь номлогчийн хувьд Аврагчийг хэрхэн дагаж байгаагаа хуваалцах үр дүнтэй арга байж болох юм. Номлолын бус үйл ажиллагааны талаарх нийтлэлүүд таны номлолын дуудлагын нэр хүндэд харшлах ёсгүй.

Хэвлэл мэдээллийн хэрэгслийг ашиглахдаа ухаалгаар сонго. Таны уншиж, сонсож, үзэж байгаа бүхэн танд нөлөөлөх болно. Танд зөвхөн урам зориг өгөх мэдээллийн хэрэгслийг сонго.

Технологийн тусламжтайгаар аливаа хувийн мэдээлэл, зургаа хуваалцахдаа болгоомжтой хандаж, өөрийн болон бусдын аюулгүй байдлыг ханга. Номлогчийн зорилгоо биелүүлэхээр сошиал медиа ашиглах үедээ дараах зүйлсийг бүү хий. Үүнд:

• Сошиал медиа дээрх өөрийн аккаунт дээр “Ахлагч”, “Эгч” гэсэн албаны нэршлийг хэрэглэх

• Биечлэн хуваалцахад зохисгүй зүйлийг интернэтээр эсвэл зурвасаар хуваалцах

• Улс төрийн үзэл бодлоо хуваалцах

• Таны хуваалцсан зүйл Сүмийн албан ёсны захиас юм гэх санааг багтаах

Дуу хөгжим, кино болон зохиогчийн эрхтэй бусад зүйлийг хуваалцахдаа, тэдгээрийг журамласан хуулиудыг дага.

Интернэт, гар утас, мэдээллийн бусад хэрэгслийг ашиглахдаа хэт их цаг зарцуулахгүй байхад анхаар. Ингэх нь таныг номлогчийн зорилгоо биелүүлж, үйлчлэлийн номлогчийн үүрэг даалгавраа биелүүлэхэд тань туслах үйл ажиллагаануудад оролцоход саад учруулна.

Та аливаа нэг зүйлийг үзэх буюу сонсох нь зохистой эсэхэд эргэлзэж байвал эцэг эх, асран хамгаалагч, бишоп, үйлчлэлийн номлолын зөвлөхүүдтэйгээ ярилц. Ариун Сүнс таныг чиглүүлж, танд зөвийг сонгох хүч чадлыг өгөх болно.