Үйлчлэлийн номлогчийн зохион байгуулалт ба үйл ажиллагаа

Танай номлолын ерөнхийлөгч, түүний эхнэр хоёр таны номлолын удирдагчаар хамтдаа үйлчилдэг. Тэд Бурханаас дуудагдсан бөгөөд таны номлолыг удирдахаар онцгойлон адислагдсан. Тэд хамтдаа таныг хайрлаж, танд үйлчилж, номлогчийн зорилгоо биелүүлэхэд, аюулгүй, аз жаргалтай байхад тань тусалдаг.

Танай номлолын ерөнхийлөгч номлолын сүнслэг байдал, зан хандлагын хэмжүүрийг тогтоодог. Мөн тэр үйлчлэлд тань зориулсан номлогчийн туршлагыг зөвшөөрдөг . Энэ ажилд тэрээр үйлчлэлийн номлолын зөвлөхүүдтэй нягт хамтран ажилладаг.

Таны номлолын удирдагчид болон үйлчлэлийн номлолын зөвлөхүүд номлолд олон үүрэг хариуцлага хуваан хүлээдэг. Тэд хамтдаа зөвлөлийн зарчмаар ажиллахдаа:

• Таныг дэмжиж, урамшуулна.

• Таны асуудлуудыг сонсоно.

• Таны асуултуудад хариулна.

• Таны ахиц дэвшлийг үнэлж дүгнэнэ.

• Танд зөвлөнө.

• Танд сүнслэг байдлын хувьд өсч хөгжихөд тусална.

Номлолынхоо ерөнхийлөгчтэй эсвэл түүний аль нэг зөвлөхтэй ярилцлагад орох үедээ та эцэг эх, асран хамгаалагч, эсвэл үйлчлэлийн номлолын зөвлөхийг хамт байхад урьж болно.

Танай номлолын ерөнхийлөгчийн удирдлага доор танай үйлчлэлийн номлолын зөвлөхүүд хамтарсан удирдагчаар үйлчилдэг. Тэд Бурханаас дуудагдсан бөгөөд таны томилогдсон бүсийн үйлчлэлийн номлогчдыг удирдахаар онцгойлон адислагдсан. Тэд таныг хайрлаж, танд үйлчилж, номлогчийн зорилгоо биелүүлэхэд тань тусална. Танай номлолын ерөнхийлөгчтэй нягт хамтран ажилласнаар үйлчлэлийн номлолын зөвлөхүүд:

• Танд Христийнхтэй адил үйлчлэх боломжуудыг олж харахад тусална.

• Танд зориулсан номлолын хуваарь болон үүрэг даалгаврыг боловсруулахад тусална.

• Тантай долоо хоног бүр уулзана.

• Христийн шавийн хувьд болон үйлчлэлдээ гаргах таны ахиц дэвшлийг үнэлж, үүнд тань дэмжлэг үзүүлнэ.

• Таныг дэмжиж, урамшуулна.

• Санааг тань зовоож буй асуудлуудыг сонсож, асуултуудад тань хариулж, зөвлөгөө өгнө.

• Номлогчийн хувьд амжилттай байхад тань туслахын тулд сүнслэг нөлөө, илчлэлийг ашиглана.

Дүгнэж хэлэхэд, үйлчлэлийн номлолын зөвлөхүүд тантай хамтран ажиллах өдөр тутмын үүрэг хариуцлага хүлээдэг бөгөөд үр дүнд нь та амьдралыг тань өөрчлөх номлолын туршлагыг хуримтлуулах болно. Энэ удирдагчид таныг Есүс Христийн насан туршийн шавь болж өсөн хөгжихөд тань тусалж чадна.

Та үйлчлэлийн номлолын зөвлөхүүдтэй долоо хоног бүр уулзах үедээ эцэг эхээ эсвэл тухайн газрын тусламж хариуцсан зохицуулагчийг урьж оролцуулж болно.

Та гадасны мөн тойргийн гишүүн учраас танай гадасны ерөнхийлөгч, бишоп хоёр таны өмнө санваарын үүрэг хариуцлага хүлээдэг.

Таны бишоп, гадасны ерөнхийлөгч хоёр тантай зохистой байдлын ярилцлага хийх үүрэг хариуцлагатай бөгөөд тэд санваарын түлхүүрүүдийг атгадаг учир нийтийн шүүгчийн үүргийг гүйцэтгэдэг. Ноцтой гэм нүглүүдийг (бэлгийн харилцааны нүгэл гэх мэт) бишоптоо, шаардлагатай бол номлолын ерөнхийлөгчөөсөө илүүтэйгээр гадасны ерөнхийлөгчид хүлээх ёстой. Бишоптойгоо бүрэн чин шударга бай. Тэр танд хайртай бөгөөд наманчлалын баяр баясгаланг мэдрэхэд тань туслах болно (Мозая 26:29–30-ийг үзнэ үү).

Номлолын тань төгсгөлд гадасны ерөнхийлөгч тань таныг чөлөөлж, номлолын үйлчлэлд тань талархал илэрхийлнэ.

Таны номлолын ерөнхийлөгч болон үйлчлэлийн номлолын зөвлөхүүд сүнслэг өдөөлтөөр ажлыг зохион байгуулдаг. Тэд номлогчдыг бусад үйлчлэлийн номлогчийг удирдуулахаар томилж болно. Мөн танаас үйл ажиллагаа эсвэл олон нийтийн ажлыг удирдан чиглүүлэхийг эсвэл сургалт явуулахыг хүсэж болох юм.

Номлолын тань нөхцөл байдлаас шалтгаалж танай номлолд бүсийн удирдагч, эгч нарыг сургах удирдагч, дүүргийн удирдагч зэрэг удирдагч залуу номлогчид байж болно. Бүх номлогчийн адилаар тэд “бүхий л зүрх сэтгэл, чадавх, оюун ухаан болон хүч чадлаараа [Бурханд] үйлч[ил]” гэсэн Есүс Христийн зөвлөгөөг дагадаг. Эдгээр удирдагч “итгэл, ариун журам, мэдлэг, өөрийгөө захирах байдал, тэвчээр, ах дүүсийн нинжин сэтгэл, бурханлаг чанар, төгс хайр, даруу байдал, шаргуу байдлыг [санадаг]” (Сургаал ба Гэрээнүүд 4:2, 6).

Удирдлагын томилгоо нь тусгай сайшаал, амжилтыг мөн номлогчийн үнэ цэний тусгалыг илэрхийлдэггүй.

Удирдах номлогчийн хүлээх үүрэг хариуцлага:

• Есүс Христийн шавийн хувьд үлгэр жишээ үзүүлнэ.

• Биеэ авч явах байдлын талаарх номлогчийн жишгийн дагуу үлгэр жишээ үзүүлнэ (3-р хэсгийг үзнэ үү).

• Номлолын ерөнхийлөгчийн эсвэл үйлчлэлийн номлолын зөвлөхүүдийн чиглүүлсний дагуу бусад номлогчийг сургахад дэмжлэг үзүүлнэ.

• Бусад номлогчийг хайрлаж, тэдэнтэй нөхөрлөнө.

• Хичээл зүтгэлийнхээ үнэ цэнийг мэдэхэд нь бусад номлогчид тусална.

• Бусад номлогчийн санааг зовоож буй асуудлуудыг сонсож, тэдний хэрэгцээний талаар үйлчлэлийн номлолын зөвлөхүүдтэй ярилцана.

• Удирдах үүргийнхээ талаар үйлчлэлийн номлолын зөвлөхүүдэд тайлагнана.

• Номлолын ерөнхийлөгчийн эсвэл үйлчлэлийн номлолын зөвлөхүүдийн удирдлага доор чуулган, хурал, үйл ажиллагаануудыг зохион байгуулж, явуулахад дэмжлэг үзүүлнэ.

Удирдлагын томилгоо авсан ахлагч, эгч нар Аврагчийн адилаар удирдан чиглүүлэх ёстой. Аливаа номлогчийн, тэр дундаа удирдах номлогчийн биеэ авч явах байдал зарлигуудтай болон номлогчийн жишигтэй нийцэхгүй мэт санагдвал энэ асуудлын талаар зөвхөн үйлчлэлийн номлолын зөвлөхүүдтэйгээ ярилцана. Ийм асуудлын талаар бусад номлогч, эцэг эх, асран хамгаалагч, найз нөхөдтэйгөө бүү ярилц.

“Их Эзэнд өөрсдийн албан тушаалыг эрхэмлэн биелүүл…” (Иаков 1:19). Сүнслэг байдлын хувьд бие даахад мөн Сүнсийг дагаж Их Эзэнд итгэснээр “өөрийн[хөө] төлөө үйлдэх[эд]” суралц (2 Нифай 2:16).

• Та асуулт эсвэл санаа зовоосон асуудалтай тулгарсан үедээ “…үүнийг оюундаа тунгаан бод…; дараа нь энэ нь зөв үү гэдгийг … надаас асуу…” (Сургаал ба Гэрээнүүд 9:8) гэдэг сургаалыг хэрэгжүүл.

• Хувийн илчлэл, залбирал, судрууд (ялангуяа Мормоны Ном), амьд бошиглогчдын сургаал болон үйлчлэлийн номлогчийн жишгүүдээр дамжуулан удирдамж эрэлхийл.

Зохистой байдлын асуудлаар бишоп эсвэл гадасны ерөнхийлөгчтэйгөө ярилц. Халдлага, хүчирхийлэл зэрэг аюулгүй байдлын талаарх санаа зовоосон яаралтай асуудлаа үйлчлэлийн номлолын зөвлөхүүдтэйгээ ярилц.

Номлолын тань явцад тулгарч буй сорилт бэрхшээл, хувийн болон гэр бүлийн асуудлаас эсвэл өнгөрсөн явдлаас үүдэн үйлчлэлийн үүрэг даалгавартаа төвлөрөхөд хэцүү үе танд тохиож мэднэ. Санааг тань зовоож буй асуудлуудынхаа талаар үйлчлэлийн номлолын зөвлөхүүд, гадасны болон номлолын ерөнхийлөгчтэйгөө ярилцахаас бүү эмээ.

Аврагчийн урилгыг сана. “Бодол болгондоо надад хандагтун; бүү эргэлз, бүү ай. Миний хавирган талыг цоо хатгасан шархыг, мөн түүнчлэн миний гар мөн хөлөн дэх хадаасны ормуудыг болгоогтун; үнэнч байгтун, миний зарлигуудыг сахигтун, мөн та хоёр тэнгэрийн хаант улсыг өвлөх болно” (Сургаал ба Гэрээнүүд 6:36–37).

Сайн мэдээнээс төлөвлөгөөтэй суралцах төдийгүй бусадтай харилцах харилцааны чадварыг тань сайжруулах зорилгоор номлолын тань дундуур танай номлолын ерөнхийлөгч эсвэл үйлчлэлийн номлолын зөвлөхүүд танд хамтрагч томилж өгч болно. Хамтрагчдыг үйлчлэлийн номлолын өөр бүсүүдээс, заах айлчлалууд мөн үйлчлэл үзүүлэх газруудад эсвэл тусгай үйлчлэлийн үйл ажиллагаанд зориулан томилж болно.

Бусад номлогчтой харилцахдаа дараах зүйлийг үргэлж санаарай. Үүнд:

• Бусад номлогчийг хайрлаж, хүндэлж, хүчирхэгжүүлэх

• Даруу байж, нэг нэгнийхээ давуу талыг таньж мэдэх

• Өөрт чинь хэрхэн хандахыг хүсдэг шигээ бие биедээ тийнхүү хандах

• Бусад номлогчийн эерэг талыг олж харах

• Шүүмжлэл, маргаанаас зайлсхий.

• Үйлчлэлийн бусад номлогч, Сүмийн гишүүд, гэр бүл, найз нөхдөдөө бие биеийнхээ талаар сөрөг зүйл хэлэхээс зайлсхийх зэрэг юм.

Та ямар нэгэн зохисгүй зан авир, нөхцөл байдлыг анзаарвал энэ талаар үйлчлэлийн номлолын зөвлөхүүдтэй ярилцаарай.

Их Эзэн таныг номлогчоор дуудсан билээ. Тэр танаас бүхий л зүрх сэтгэл, чадавх, оюун ухаан болон хүч чадлаараа үйлчлэх[ийг] хүсдэг билээ (Сургаал ба Гэрээнүүд 4:2-ыг үзнэ үү).

Таны авьяас, ур чадвар, бэлэгт зориулж онцгойлон сонгосон тусгай номлолд та үйлчлэхээр томилогдсон. Та номлолынхоо туршид олон үүрэг хариуцлага хүлээн авч үйлчлэх болно. Тэдгээрт энэрлийн байгууллагууд, Сүмийн үйл ажиллагаа, ариун сүм, заах дуудлагатай номлогчидтой хамт заах айлчлал хийх, гадаснаас хуваарилсан үйлчлэлийн боломжууд зэрэг орно.

Та долоо хоногт нэгээс олон газарт үйлчилж магадгүй. Үйлчлэх газар бүрдээ та удирдагчид тайлагнах ба тэрээр үүрэг хариуцлага биелүүлэхэд шаардлагатай сургалт, багаж хэрэгсэл, дэмжлэг туслалцааг үзүүлнэ.

Үйлчлэх газраа цагтаа ирж, сайн үйлчлэхэд бэлтгэлтэй бай. Найдвартай, итгэл даахуйц бай. Удирдлагынхаа зааврыг анхааралтай, бүрэн дагаж мөрд.

Их Эзэний ажилд бодитой хувь нэмэр оруулахын тулд чадах бүхнээ хий. Үйлчилж мөн харилцаж байгаа хүмүүстээ эерэг нөлөө үзүүлж, урам зориг өг. Аюулгүй ажиллаж, үргэлж сайжруулахыг хичээ.

Танай номлолын ерөнхийлөгч болон үйлчлэлийн номлолын зөвлөхүүд нягт хамтран ажилласны үндсэн дээр үйлчлэлийн үүрэг даалгавруудыг номлолын тань үеэр өөрчилж болно.

Танай үйлчлэлийн номлолын зөвлөхүүд нягт хамтран ажилласны үндсэн дээр таны саналыг оролцуулан номлолын өдөр тутмын хуваарийг гаргах болно. Танай номлолын ерөнхийлөгч хуваарийг батална. Үүнд өсөлт хөгжлийн дараах даалгавар, үйл ажиллагааг багтааж болно. Эдгээр нь:

• Сүнслэг

• Нийгмийн

• Бие махбодын

• Оюун санааны талууд юм.

Номлолын өдөр тутмын хуваариа тууштай, хичээнгүйлэн дагаж мөрд. Ингэснээр та номлолд үйлчлэх явцдаа илүү их өсөж хөгжин, баяр баясгалантай байж, сүнслэгээр адислагдах болно.

Таны өдөр тутмын хуваарь дараахыг агуулж болно. Үүнд:

• Үйлчлэлийн номлолын зорилгоо тодорхойлж, бататгах

• Өдөр бүр хийх ажлаа бэлтгэх, хийж дуусгах

• Судруудыг (ялангуяа Мормоны Ном) болон амьд бошиглогч, төлөөлөгчдийн сургаалыг мөн Миний сайн мэдээг номло гарын авлагын Үйлчлэлийн номлогчийн амьдралд дасан зохицох нь зэрэг холбогдох хэсгүүд болон зөвшөөрөгдсөн бусад эх сурвалжийг судлах зэрэг орно.

Үйлчлэлийн номлолын зөвлөхүүдтэйгээ хамтран бичгээр ерөнхий хуваарь гарга. Та хэрхэн үйлчлэх, сайжруулах, өсөж хөгжихөө тодорхойлохын тулд үүрэг даалгавраа гүйцэтгэх цаг, сонгох эрхээ хэрэгжүүлэх тоог (“сонголтын цаг” гэж нэрлэдэг) хуваарьтаа оруул. Долоо хоног тутмын нэг өдрийг бэлтгэлийн өдөр болгон сонго. Өдөр бүр төлөвлөгөөгөө нягталж, дагаж мөрд.

Танай номлолын өдөр бүрийн цагийн хуваарь доорх жишээтэй төстэй байж болно. Үүнд:

Та томилогдсон газартаа үйлчлээгүй байлаа ч номлогч хэвээрээ байгаа. Биеэ авч явах байдал, бодол санаа, үйлдэл тань Есүс Христэд хандах таны үнэнч байдлыг илэрхийлэх ёстой.

Боломжтой газруудад үйлчлэлийн номлолын зөвлөхүүд зөвшөөрсөн тохиолдолд үйлчлэлийн өөр номлогчтой хамт сургалтаа хий. Номлолын ерөнхийлөгч эсвэл үйлчлэлийн номлолын зөвлөхүүд танд хэн нэгнийг томилж өгч болно. Өөр номлогчтой хамт суралцах үйл явцыг голдуу алсын зайнаас хийдэг. Гэсэн хэдий ч нөхцөл байдал бүрэлдсэн үед та биеэр уулзаж, хамтдаа суралцаж болно.

Судрууд (ялангуяа Мормоны Ном), амьд бошиглогчдын сургаал болон Миний сайн мэдээг номло гарын авлагын Үйлчлэлийн номлогчийн амьдралд дасан зохицох нь зэрэг холбогдох хэсэг болон энэ гарын авлагад анхаарлаа хандуул. Эдгээр зөвшөөрөгдсөн материал нь таны Есүс Христийн сэргээгдсэн сайн мэдээний мэдлэг, гэрчлэлийг хүчирхэгжүүлж, үйлчилж байгаа хүмүүсийн тань хэрэгцээг хангахад бэлтгэж чадна.