« ៤. ភាពជាអ្នកដឹកនាំ និងក្រុមប្រឹក្សានៅក្នុងសាសនាចក្រនៃព្រះយេស៊ូវគ្រីស្ទ » ជម្រើសចេញមកពីក្បួនខ្នាតទូទៅ ( ឆ្នាំ២០២៣ ) ។
« ៤. ភាពជាអ្នកដឹកនាំ និងក្រុមប្រឹក្សានៅក្នុងសាសនាចក្រនៃព្រះយេស៊ូវគ្រីស្ទ » ជម្រើសចេញមកពីក្បួនខ្នាតទូទៅ
៤.
ភាពជាអ្នកដឹកនាំ និងក្រុមប្រឹក្សានៅក្នុងសាសនាចក្រនៃព្រះយេស៊ូវគ្រីស្ទ
៤.០
សេចក្ដីផ្ដើម
ក្នុងនាមជាអ្នកដឹកនាំនៅក្នុងសាសនាចក្រ អ្នកត្រូវបានហៅដោយការបំផុសគំនិតតាមរយៈពួកអ្នកបម្រើដែលមានសិទ្ធិអំណាចរបស់ព្រះអម្ចាស់ ។ អ្នកមានអភ័យឯកសិទ្ធិក្នុងការជួយដល់កិច្ចការរបស់ព្រះវរបិតាសួគ៌ក្នុង « [ ការ ] នាំឲ្យមានអមតភាព និងជីវិតដ៏នៅអស់កល្បជានិច្ចដល់មនុស្ស » ( ម៉ូសេ ១:៣៩ ) ។
៤.២
គោលការណ៍នៃភាពជាអ្នកដឹកនាំនៅក្នុងសាសនាចក្រ
អំឡុងការងារបម្រើនៅលើផែនដីរបស់ទ្រង់ ព្រះអង្គសង្រ្គោះបានបង្ហាញគំរូនៃភាពជាអ្នកដឹកនាំសម្រាប់សាសនាចក្ររបស់ទ្រង់ ។ ព្រះរាជបំណងដ៏សំខាន់របស់ទ្រង់គឺការធ្វើតាមព្រះទ័យរបស់ព្រះវរបិតាសួគ៌ទ្រង់ និងការជួយមនុស្សដទៃឲ្យយល់ ហើយរស់នៅតាមដំណឹងល្អរបស់ទ្រង់ ( សូមមើល យ៉ូហាន ៥:៣០; ម៉ូសាយ ១៥:៧ ) ។
៤.២.១
រៀបចំខ្លួនខាងវិញ្ញាណ
ព្រះយេស៊ូវបានរៀបចំព្រះអង្គផ្ទាល់ខាងវិញ្ញាណសម្រាប់បេសកកម្មនៅលើផែនដីរបស់ទ្រង់ ( សូមមើល លូកា ៤:១–២ ) ។ ដូចគ្នានេះដែរ អ្នករៀបចំខ្លួនខាងវិញ្ញាណដោយខិតទៅជិតនឹងព្រះវរបិតាសួគ៌តាមរយៈការអធិស្ឋាន ការសិក្សាបទគម្ពីរ និងការគោរពប្រតិបត្តិតាមបទបញ្ញត្តិទាំងឡាយរបស់ទ្រង់ ។
សូមស្វែងរកវិវរណៈដើម្បីយល់ដឹងពីសេចក្ដីត្រូវការរបស់មនុស្សដែលអ្នកដឹកនាំ និងរបៀបបំពេញកិច្ចការដែលព្រះបានហៅឲ្យអ្នកធ្វើ ។
ព្រះអម្ចាស់ក៏បានសន្យាផងដែរថា ទ្រង់នឹងប្រទានអំណោយទានខាងវិញ្ញាណដល់អ្នកដែលស្វែងរកអំណោយទានទាំងនោះ ( សូមមើល គោលលទ្ធិ និងសេចក្ដីសញ្ញា ៤៦:៨ ) ។
៤.២.២
ការផ្ដល់ការងារបម្រើដល់បុត្រាបុត្រីរបស់ព្រះទាំងអស់
សូមស្រឡាញ់មនុស្សដែលអ្នកបម្រើដូចជាព្រះយេស៊ូវបានធ្វើដែរ ។ សូមអធិស្ឋាន « ដោយអស់ពីកម្លាំងចិត្ត » ដើម្បីបានពោរពេញដោយសេចក្ដីស្រឡាញ់របស់ទ្រង់ ( មរ៉ូណៃ ៧:៤៨ ) ។
សូមជួយបុគ្គលម្នាក់ៗឲ្យពង្រឹងការប្រែចិត្តជឿ និងសេចក្ដីជំនឿរបស់ពួកគេទៅលើព្រះវរបិតាសួគ៌ និងព្រះយេស៊ូវគ្រីស្ទ ។ សូមជួយពួកគេឲ្យរៀបចំខ្លួនចុះសេចក្ដីសញ្ញានានា នៅពេលពួកគេទទួលពិធីបរិសុទ្ធបន្ទាប់ទៀតរបស់ពួកគេ ។ សូមលើកទឹកចិត្តពួកគេឲ្យរក្សាសេចក្ដីសញ្ញា ដែលពួកគេបានធ្វើ និងទទួលយកពរជ័យនៃការប្រែចិត្ត ។
៤.២.៣
បង្រៀនដំណឹងល្អរបស់ព្រះយេស៊ូវគ្រីស្ទ
ថ្នាក់ដឹកនាំទាំងអស់គឺជាគ្រូបង្រៀន ។ សូមខិតខំធ្វើតាមគំរូរបស់ព្រះអង្គសង្គ្រោះ ក្នុងនាមជាគ្រូបង្រៀនម្នាក់ ( សូមមើល ជំពូកទី ១៧; ការបង្រៀនតាមរបៀបរបស់ព្រះអង្គសង្គ្រោះ ) ។ តាមរយៈពាក្យសម្ដី និងទង្វើរបស់អ្នក សូមបង្រៀនគោលលទ្ធិរបស់ព្រះយេស៊ូវគ្រីស្ទ និងគោលការណ៍ទាំងឡាយនៃដំណឹងល្អរបស់ទ្រង់ ( សូមមើល នីហ្វៃទី៣ ១១:៣២–៣៣; គោលលទ្ធិ និងសេចក្តីសញ្ញា ៤២:១២–១៤ ) ។
សូមបង្រៀនចេញពីបទគម្ពីរ និងប្រសាសន៍របស់ពួកព្យាការីថ្ងៃចុងក្រោយ ( សូមមើល គោលលទ្ធិ និងសេចក្ដីសញ្ញា ៥២:៩ ) ។
ប្រសិនបើអ្នកត្រូវបានហៅ ឬចាត់តាំងឲ្យធ្វើជាអធិបតីនៅក្នុងការប្រជុំ ឬសកម្មភាពមួយក្នុងសាសនាចក្រ នោះសូមប្រាកដថា ការបង្រៀននោះជួយស្អាងសមាជិក និងត្រឹមត្រូវតាមគោលលទ្ធិ ( សូមមើល គោលលទ្ធិ និងសេចក្ដីសញ្ញា ៥០:២១–២៣ ) ។
៤.២.៤
ធ្វើជាអធិបតីដោយសេចក្ដីសុចរិត
អ្នកកាន់តំណែងជាអធិបតីម្នាក់ៗបម្រើនៅក្រោមការដឹកនាំរបស់បុគ្គលម្នាក់ ដែលកាន់កូនសោទាំងឡាយនៃបព្វជិតភាព ( សូមមើល ៣.៤.១ ) ។ រចនាសម្ព័ន្ធនេះផ្ដល់លំដាប់លំដោយ ឬបន្ទាត់ច្បាស់លាស់នៃកិច្ចការ និងការទទួលខុសត្រូវនៅក្នុងការធ្វើកិច្ចការរបស់ព្រះអម្ចាស់ ។
អ្នកកាន់តំណែងជាអធិបតីអាចផ្ដល់សិទ្ធិអំណាចឲ្យបុគ្គលម្នាក់ទៀត ធ្វើជាអធិបតីលើការចាត់តាំងបណ្ដោះអាសន្នមួយបាន ។
អ្នកដឹកនាំដែលធ្វើជាអធិបតីនៅក្នុងអង្គការសាសនាចក្រ ការប្រជុំ ឬសកម្មភាពមួយ ធានាថានឹងសម្រេចបានព្រះរាជបំណងរបស់ព្រះអម្ចាស់ ។ នៅក្នុងការធ្វើដូច្នេះ អ្នកដឹកនាំរូបនោះធ្វើតាមគោលការណ៍នៃដំណឹងល្អ គោលនយោបាយសាសនាចក្រ និងនៅក្រោមការដឹកនាំពីព្រះវិញ្ញាណបរិសុទ្ធ ។
ការហៅ ឬការចាត់តាំងមួយដើម្បីធ្វើជាអធិបតីពុំធ្វើឲ្យបុគ្គលម្នាក់ដែលទទួលបានការហៅ ឬការចាត់តាំងនោះសំខាន់ ឬមានតម្លៃជាងមនុស្សដទៃនោះទេ ( សូមមើល គោលលទ្ធិ និងសេចក្ដីសញ្ញា ៨៤:១០៩–១០ ) ។
វាមិនសមរម្យឡើយដែលប្រាថ្នាធ្វើជាអធិបតីនៅក្នុងអង្គការណាមួយក្នុងសាសនាចក្ររបស់ព្រះអម្ចាស់ ( សូមមើល គោលលទ្ធិ និងសេចក្ដីសញ្ញា ១២១:៣៤–៣៧ ) ។
៤.២.៥
បែងចែកកិច្ចការ និងធានាថាមានការទទួលខុសត្រូវ
ព្រះអង្គសង្គ្រោះបានប្រទានការចាត់តាំង និងការទទួលខុសត្រូវដ៏មានអត្ថន័យដល់ពួកសិស្សរបស់ទ្រង់ ( សូមមើល លូកា ១០:១ ) ។ ទ្រង់ក៏បានប្រទានឱកាសឲ្យពួកគេទទួលខុសត្រូវលើកិច្ចការ ដែលបានប្រគល់ឲ្យពួកគេធ្វើផងដែរ ( សូមមើល លូកា ៩:១០ ) ។
ក្នុងនាមជាអ្នកដឹកនាំម្នាក់ អ្នកអាចជួយមនុស្សដទៃឲ្យរីកចម្រើនបានតាមរយៈការបែងចែកការចាត់តាំងដល់ពួកគេ ។ សូមខិតខំធ្វើឲ្យសមាជិកគ្រប់រូបចូលរួមនៅក្នុងកិច្ចការរបស់ព្រះ ។
ការបែងចែកកិច្ចការនឹងធ្វើឲ្យការបម្រើរបស់អ្នកកាន់តែមានប្រសិទ្ធភាព ។ សូមស្វែងរកការដឹកនាំពីព្រះវិញ្ញាណអំពីកិច្ចការដែលត្រូវបែងចែក ដើម្បីអ្នកអាចផ្ដោតលើអាទិភាពដ៏ខ្ពស់បំផុតរបស់អ្នក ។
៤.២.៦
រៀបចំអ្នកដទៃឲ្យក្លាយជាថ្នាក់ដឹកនាំ និងគ្រូបង្រៀន
នៅពេលពិចារណាពីមនុស្សដែលអាចបម្រើនៅក្នុងការហៅ ឬការចាត់តាំងនៅក្នុងសាសនាចក្រ សូមធ្វើការអធិស្ឋាន ។ សូមចាំថា ព្រះអម្ចាស់នឹងធ្វើឲ្យអស់អ្នកដែលទ្រង់បានហៅសមនឹងកិច្ចការនោះ ។ អ្វីដែលសំខាន់បំផុតគឺថា ពួកគេយល់ព្រមបម្រើ ពួកគេនឹងស្វែងរកជំនួយរបស់ព្រះអម្ចាស់ដោយរាបសា ហើយខិតខំធ្វើខ្លួនឲ្យមានភាពស័ក្ដិសម ។
៤.២.៧
ដាក់ផែនការសម្រាប់ការប្រជុំ មេរៀន និងសកម្មភាពដោយមានគោលបំណងច្បាស់លាស់
សូមស្វែងរកការណែនាំពីព្រះវិញ្ញាណនៅក្នុងការដាក់ផែនការសម្រាប់ការប្រជុំ មេរៀន និងសកម្មភាពដោយមានគោលបំណងច្បាស់លាស់ ។ គោលបំណងទាំងនេះគួរតែពង្រឹងដល់បុគ្គលម្នាក់ៗ និងក្រុមគ្រួសារ នាំពួកគេឲ្យខិតទៅជិតព្រះគ្រីស្ទ ហើយជួយសម្រេចកិច្ចការនៃសេចក្ដីសង្គ្រោះ និងភាពតម្កើងឡើងរបស់ព្រះ ( សូមមើល ជំពូកទី ១ និង ២ ) ។
៤.២.៨
ការវាយតម្លៃកិច្ចខិតខំរបស់អ្នក
សូមពិនិត្យមើលការទទួលខុសត្រូវ និងការរីកចម្រើនខាងវិញ្ញាណរបស់អ្នកក្នុងនាមជាថ្នាក់ដឹកនាំឲ្យបានទៀងទាត់ ។ សូមពិចារណាផងដែរពីការរីកចម្រើនរបស់មនុស្សដែលអ្នកដឹកនាំ ។
ភាពជោគជ័យរបស់អ្នកក្នុងនាមជាថ្នាក់ដឹកនាំ ត្រូវបានវាស់វែងជាចម្បងដោយការតាំងចិត្តរបស់អ្នក ដើម្បីជួយបុត្រាបុត្រីរបស់ព្រះឲ្យក្លាយជាពួកសិស្សដ៏ស្មោះត្រង់របស់ព្រះយេស៊ូវគ្រីស្ទ ។ អ្នកអាចដឹងថា ព្រះអម្ចាស់មានព្រះទ័យរីករាយចំពោះការប្រឹងប្រែងរបស់អ្នក នៅពេលអ្នកទទួលអារម្មណ៍ថា ព្រះវិញ្ញាណកំពុងធ្វើកិច្ចការតាមរយៈអ្នក ។
៤.៣
ក្រុមប្រឹក្សានៅក្នុងសាសនាចក្រ
ព្រះអម្ចាស់បានណែនាំថ្នាក់ដឹកនាំនៃសាសនាចក្ររបស់ទ្រង់ឲ្យប្រឹក្សាជាមួយគ្នាពេលធ្វើកិច្ចការរបស់ទ្រង់ ( សូមមើល គោលលទ្ធិ និងសេចក្ដីសញ្ញា ៤១:២–៣ ) ។ ក្រុមប្រឹក្សាផ្ដល់ឱកាសឲ្យសមាជិកក្រុមប្រឹក្សាទទួលបានវិវរណៈ នៅពេលពួកគេខិតខំយល់ពីតម្រូវការរបស់បុត្រាបុត្រីរបស់ព្រះ និងដាក់ផែនការពីរបៀបជួយបំពេញតាមតម្រូវការទាំងនោះ ។
៤.៤
គោលការណ៍នៃក្រុមប្រឹក្សាដែលមានប្រសិទ្ធភាព
៤.៤.១
គោលបំណងរបស់ក្រុមប្រឹក្សា
ក្រុមប្រឹក្សាសង្កត់ធ្ងន់ជាពិសេសទៅលើការជួយសមាជិកឲ្យទទួលបានពិធីបរិសុទ្ធ និងរក្សាសេចក្ដីសញ្ញាដែលទាក់ទងទាំងនោះ ។
៤.៤.២
ការរៀបចំសម្រាប់ការប្រជុំក្រុមប្រឹក្សា
គណៈប្រធាន និងក្រុមប្រឹក្សាត្រូវជួបគ្នាជាប្រចាំ ។ ថ្នាក់ដឹកនាំទាំងនេះខិតខំស្វែងរកការណែនាំពីព្រះអម្ចាស់ពេលដាក់ផែនការការប្រជុំក្រុមប្រឹក្សា ។ ពួកគាត់ក៏ខ្នះខ្នែងឲ្យមានការចូលរួមពីសមាជិកក្រុមប្រឹក្សានៅក្នុងការសម្រេចចិត្តពីអ្វីដែលត្រូវពិភាក្សាផងដែរ ។
ថ្នាក់ដឹកនាំអនុញ្ញាតឲ្យសមាជិកក្រុមប្រឹក្សាដឹងពីបញ្ហាដែលត្រូវពិភាក្សាជាមុន ។ សមាជិកក្រុមប្រឹក្សារៀបចំចែកចាយការយល់ដឹងអំពីបញ្ហាទាំងនេះ ។
៤.៤.៣
ការពិភាក្សា និងសេចក្ដីសម្រេច
អំឡុងការប្រជុំក្រុមប្រឹក្សា អ្នកដឹកនាំ ( ឬនរណាម្នាក់ដែលអ្នកដឹកនាំចាត់តាំង ) ពន្យល់ពីបញ្ហាដែលត្រូវពិចារណានោះ ។ បន្ទាប់មក អ្នកដឹកនាំនោះលើកទឹកចិត្តឲ្យមានការពិភាក្សានៅក្នុងចំណោមសមាជិកក្រុមប្រឹក្សាទាំងអស់ ដោយការសួរសំណួរ និងការប្រមូលគំនិតយោបល់នានា ។
សមាជិកចែកចាយយោបល់ និងស្តាប់គ្នាទៅវិញទៅមកដោយការគោរព ។ នៅពេលពួកគេព្យាយាមស្គាល់ព្រះហឫទ័យរបស់ព្រះអម្ចាស់ នោះវិញ្ញាណនៃការបំផុសគំនិត និងសាមគ្គីភាពអាចនឹងមានវត្តមាន ។
នៅក្នុងក្រុមប្រឹក្សាមួយដែលមានស្ដ្រី និងបុរស នោះអ្នកដឹកនាំខិតខំទទួលបានការយល់ដឹង និងយោបល់មកពីភាគីទាំងពីរ ។ ជារឿយៗ ស្ដ្រី និងបុរសមានទស្សនវិស័យខុសគ្នា ដែលផ្ដល់តុល្យភាពដ៏ចាំបាច់មួយ ។
អ្នកដឹកនាំដឹកនាំការពិភាក្សានៅក្នុងក្រុមប្រឹក្សា ។ ប៉ុន្ដែគាត់ ឬនាងគួរតែស្ដាប់ច្រើនជាងនិយាយ ។
បន្ទាប់ពីការពិភាក្សាហើយ អ្នកដឹកនាំអាចសម្រេចចិត្តធ្វើសកម្មភាពបែបណាមួយ ឬក៏ពន្យារពេលសម្រេចចិត្តសិន ដើម្បីយកពេលទៅស្វែងរកព័ត៌មាន និងការណែនាំបន្ថែមទៀត ។
៤.៤.៤
សាមគ្គីភាព
សមាជិកក្រុមប្រឹក្សាខិតខំដើម្បីមានបំណងប្រាថ្នា និងគោលបំណងតែមួយដូចគ្នានឹងព្រះវរបិតាសួគ៌ និងព្រះយេស៊ូវគ្រីស្ទដែរ ។ ពួកគាត់ខិតខំមានសាមគ្គីភាពនៅក្នុងការពិភាក្សា និងសេចក្ដីសម្រេចរបស់ពួកគាត់ ។
៤.៤.៥
សកម្មភាព និងការទទួលខុសត្រូវ
សមាជិកក្រុមប្រឹក្សាធ្វើកិច្ចការរបស់ពួកគាត់ភាគច្រើននៅមុន និងនៅក្រោយការប្រជុំក្រុមប្រឹក្សា ។ អំឡុងការប្រជុំទាំងនេះ ពួកគាត់ព្យាយាមទទួលបានការបំផុសគំនិត នៅពេលបង្កើតផែនការដើម្បីអនុម័តតាមសេចក្ដីសម្រេចនានា ។ អ្នកដឹកនាំក្រុមប្រឹក្សាអញ្ជើញសមាជិកឲ្យបំពេញតាមការចាត់តាំងនានា ដែលទាក់ទងនឹងផែនការទាំងនេះ ។
សមាជិកក្រុមប្រឹក្សារាយការណ៍អំពីការចាត់តាំងរបស់ពួកគាត់ ។ ជាធម្មតា ការរីកចម្រើនតម្រូវឲ្យមានការយកចិត្តទុកដាក់ជាបន្ដបន្ទាប់ និងការសួរនាំដល់ការចាត់តាំង ។
៤.៤.៦
ភាពសម្ងាត់
ថ្នាក់ដឹកនាំប្រើឆន្ទានុសិទ្ធិ នៅពេលចែកចាយព័ត៌មានផ្ទាល់ខ្លួនជាមួយនឹងក្រុមប្រឹក្សា ។ ជាទូទៅ ពួកគាត់ត្រូវទទួលបានការអនុញ្ញាតពីសមាជិកដើម្បីចែកចាយព័ត៌មាននេះ ។
សមាជិកក្រុមប្រឹក្សាមិនគួរចែកចាយព័ត៌មានផ្ទាល់ខ្លួននៅក្រៅក្រុមប្រឹក្សាឡើយ លុះត្រាតែវាតម្រូវឲ្យធ្វើដូច្នោះដើម្បីបំពេញការចាត់តាំងមកពីអ្នកដឹកនាំក្រុមប្រឹក្សា ។
បញ្ហាមួយចំនួនមានភាពរសើបខ្លាំងណាស់ ពេលយកមកពិភាក្សានៅមុខអង្គប្រជុំក្រុមប្រឹក្សាទាំងមូល ។