యేసు క్రీస్తు ఆనందాన్ని ఇస్తారు

మీరు ఆనందం మరియు సంతోషాన్ని పొందడానికి అర్హులు. అదే మీ జీవితం యొక్క ఉద్దేశ్యం. ఇది పరలోక తండ్రి యొక్క సంతోషకర ప్రణాళిక ఉద్దేశ్యం. దీని అర్థం మీరు ఎప్పటికీ విచారపడరని లేదా కష్ట సమయాలను ఎదుర్కోరని కాదు. అయితే, కష్ట సమయాలను అధిగమించడానికి మరియు ఆనందాన్ని కనుగొనడానికి రక్షకుడు మీకు సహాయం చేయగలరని దీని అర్థం.

ఆనందం మీ పరిస్థితుల నుండి రాదు; అది యేసు క్రీస్తును అనుసరించడం ద్వారా వస్తుంది. మీకు ఒక చెడ్డ రోజు, ఒక చెడ్డ వారం లేదా ఒక చెడ్డ సంవత్సరం ఎదురుకావచ్చు. అయితే ఆనందం అనేది మీ జీవితంలో దుఃఖం లేకపోవడం కాదు; అది మీ జీవితంలో క్రీస్తు యొక్క ఉనికి.

రక్షకుని ఆనందం ఇతర ఆనందముల కంటే గొప్పది మరియు ఎక్కువ కాలం నిలిచి ఉండేది. స్వార్థపూరితమైన మార్గాలలో లేదా ప్రాపంచిక సుఖాల నుండి ఆనందాన్ని మరియు సంతృప్తిని పొందమని సాతాను మిమ్మల్ని ప్రలోభపెడతాడు. యేసు క్రీస్తుకు మరియు ఆయన ఆజ్ఞలకు విరుద్ధమైన ఏదీ మీకు నిజమైన, శాశ్వతమైన ఆనందాన్ని మరియు సంతోషాన్ని తీసుకురాలేదు. ఈ భూమిపై ఉన్న విషయాలు తాత్కాలికమైనవని గుర్తుంచుకోండి. యేసు క్రీస్తు సువార్త లోతైన, పవిత్రమైన మరియు శాశ్వతమైన ఆనందాన్ని మరియు సంతోషాన్ని అందిస్తుంది.

సంతోషాన్ని ఎంచుకొనుము. ఈ లోకంలో దుఃఖం మరియు కష్టాలు ఉన్నాయన్నది నిజమే అయినప్పటికీ, పరలోక తండ్రి ఈ లోకాన్ని అనేక అందమైన మరియు మంచి విషయాలతో కూడా నింపారు. వాటిని వెతికి పట్టుకోండి. ప్రతిరోజూ సంతోషించడానికి కారణాలను గమనించడానికి ప్రయత్నించండి—వీలైతే వాటిని రాసి పెట్టుకోండి. ఇవి పరలోకంలో ఉన్న మీ ప్రేమగల తండ్రి నుండి వచ్చిన బహుమతులు.

ఇతరులకు ఆనందాన్ని మరియు సంతోషాన్ని కలిగించండి. మనకు ఆనందాన్ని కలిగించడంలో యేసు క్రీస్తు సంపూర్ణమైన ఆనందాన్ని పొందారు. ఇతరులకు సేవ చేయడం ద్వారా ఆనందాన్ని మరియు సంతోషాన్ని పొందడం ద్వారా మీరు ఆయన మాదిరిని అనుసరించవచ్చు. ఎవరైనా ప్రేమించబడుతున్నారని అనిపించేలా వారికి సహాయం చేయండి. హృదయపూర్వక అభినందన ఇవ్వండి. కష్టాలలో ఉన్న వ్యక్తిని ప్రోత్సహించండి. మీ జీవితంలో మీకు మరింత ఆనందం అవసరమని ఎప్పుడైనా అనిపిస్తే, ఇతరుల జీవితంలోకి ఆనందాన్ని తీసుకురావడానికి ప్రయత్నించండి.

ప్రభువును ఆరాధించడంలో ఆనందంగా ఉండండి. మీరు సంఘానికి వెళ్ళినప్పుడు, యేసు క్రీస్తు మీకు ఇచ్చే ఆనందంపై దృష్టి పెట్టండి మరియు దాని కోసం ఆయనను స్తుతించండి! మీ సంఘ సమావేశాలలో ఆనందకరమైన వాతావరణాన్ని పెంపొందించడానికి మీ వంతు కృషి చేయండి. పవిత్రమైన సంగీతాన్ని మీ గృహములో మరియు సంఘములో చేసే ఆరాధనలో భాగం చేసుకోండి.

జీవితం కష్టంగా ఉన్నప్పుడు కూడా మీరు ఆనందాన్ని అనుభూతి చెందవచ్చు. ఇది ఎలా సాధ్యమని మీరు ఆశ్చర్యపోవచ్చు, కానీ ఇది నిజం. యేసు క్రీస్తుపై మరియు ఆయన స్వస్థపరిచే శక్తిపై మరియు ఆయన శాశ్వత వాగ్దానాలపై మీకు ఉన్న విశ్వాసం మీకు నిరంతర ఆనందాన్ని ఇవ్వగలదు. ఆయన ఆనందం దుఃఖాన్ని అధిగమిస్తుంది మరియు మానవులు గ్రహించలేని అతీతమైన శాంతిని ప్రసాదిస్తుంది.

దేవుని సిలెస్టియల్ రాజ్యములో సంపూర్ణమైన ఆనందం మీ కొరకు ఎదురుచూస్తుంది. నిత్య ఆనందాన్ని పొందకుండా మిమ్మల్ని అడ్డుకోగల వాటన్నింటినీ యేసు క్రీస్తు జయించారు. మీరు ఆయనను విశ్వసించి, ఆయనను అనుసరించినప్పుడు, ఈ ఆనందం మీకు లభిస్తుంది.