ఆయన మీతో సంభాషించాలని కోరుకుంటున్నారు.

ఆత్మ మిమ్మల్ని పరలోక తండ్రి మరియు యేసు క్రీస్తు వద్దకు నడిపిస్తుంది. ఇది పరిశుద్ధాత్మ యొక్క ఒక ముఖ్యమైన పాత్ర. పశ్చాత్తాపపడి, యేసు క్రీస్తును అనుసరించడానికి ఆయన మిమ్మల్ని ప్రేరేపిస్తారు, తద్వారా మీరు ఆయన ప్రాయశ్చిత్తం యొక్క దీవెనలను పొందగలరు. మీరు పశ్చాత్తాపపడినప్పుడు, పరిశుద్ధాత్మ మిమ్మల్ని శుద్ధి చేసి, మారడానికి మీకు సహాయం చేస్తారు.

పరిశుద్ధాత్మ మీ మనస్సు మరియు హృదయం ద్వారా నిశ్శబ్దంగా సంభాషిస్తారు. ఆత్మ నుండి వచ్చే సందేశాలు అనేక విధాలుగా మీ మనస్సుకు చేరవచ్చు—ప్రేరేపిత ఆలోచనలు, హెచ్చరికలు, స్పష్టమైన అవగాహన మరియు ఆధ్యాత్మిక జ్ఞాపకాల ద్వారా అవి రావచ్చు. పరిశుద్ధాత్మ ఆదరణ, ఆత్మవిశ్వాసం, శాంతి, ప్రేమ, ఆనందం, వినయం, కృతజ్ఞత మరియు సహనం వంటి ఉత్తేజపరిచే భావాల ద్వారా మీ హృదయంతో మాట్లాడగలరు.

“పరిశుద్ధాత్మను పొందండి.” మీరు క్రీస్తు యొక్క సంఘ సభ్యునిగా నిర్ధారించబడినప్పుడు ఈ మాటలు పలకబడ్డాయి. మీరు పరిశుద్ధాత్మను ఎలా పొందుతారు? యేసు క్రీస్తు యొక్క బోధనలను పాటించడం ద్వారా. ఆయనే మీ బలము. ఆయనను అనుసరించడం ద్వారా పరిశుద్ధాత్మను మీ జీవితంలోకి ఆహ్వానిస్తారు.

ప్రార్థన ద్వారా మీ పరలోక తండ్రిని వెతకండి. మీ హృదయాలను ఆయనకు సమర్పించుకోండి. ఆయన మీకు ప్రసాదించిన అనేక అద్భుతమైన ఆశీర్వాదాల కోసం ఆయనకు కృతజ్ఞతలు చెప్పండి. మీ ఆనందాలను, చింతలను మరియు ప్రశ్నలను ఆయనతో పంచుకోండి. ఊరకుండుడి, ఆయన సమాధానాల కోసం వినండి; అవి శాంతి భావనలుగా, మీ మనస్సులోని ఆలోచనలుగా లేదా ఏదైనా చేయాలనే ప్రేరణలుగా రావచ్చు.

లేఖనాలలో దేవుని స్వరాన్ని వినండి. లేఖనాలు మీ కొరకు దేవుని వాక్యాలు! ఆయన స్వరాన్ని తెలుసుకోవడానికి మరియు ఆయన ప్రేమను అనుభూతి చెందడానికి ప్రతిరోజూ ఆ వాక్యాల నుండి నేర్చుకోండి. మీరు చదువుతున్నప్పుడు, ఆయన మీకు ఏమి బోధిస్తున్నారో ఆలోచించండి, మరియు మీకు కలిగే భావాలను వ్రాసుకోండి. మీ జీవితాంతం లేఖనాలను—ముఖ్యంగా మోర్మన్ గ్రంథమును—అధ్యయనం చేయడాన్ని ఒక దైనందిన అలవాటుగా చేసుకోండి.

మీకు కలిగే ఆధ్యాత్మిక ప్రేరణల ప్రకారం చర్య తీసుకొండి. ఎవరికైనా మేలు చేసే మంచి పని చేయాలనే ఆలోచన లేదా ప్రేరణ ఏదైనా మీకు కలిగితే, ఆ పని చేయండి! మంచి విషయాలన్నీ దేవుడి నుండే వస్తాయి. ఆయన నుండి వచ్చే ప్రేరణలను అనుసరించడానికి మీరు నమ్మదగినవారని మీ పరలోక తండ్రికి చూపించండి.

పరిశుద్ధాత్మ మిమ్మల్ని ఆదరించి, మార్గనిర్దేశం చేస్తారు. ఆయన ఆదరణకర్త అని పిలువబడ్డారు. కష్టకాలంలో ఆయన మీకు అండగా ఉంటారు. ఏం చెప్పాలో లేదా ఏం చేయాలో తెలుసుకోవడానికి ఆయన మీకు సహాయం చేస్తారు. ఆయన ప్రభావంతో, నిజం ఏమిటో మరియు అబద్ధం ఏమిటో మీరు తేడాను గుర్తించగలరు. ఇతరులలో మరియు మీలో ఉన్న మంచిని కనుగొనడానికి ఆయన మీకు సహాయం చేయగలరు. ఆత్మ మిమ్మల్ని ప్రమాదం గురించి కూడా హెచ్చరించగలదు. ఆయన మిమ్మల్ని యేసు క్రీస్తు వైపు నడిపిస్తారు మరియు పాపం నుండి దూరం చేస్తారు.

మీరు ఆధ్యాత్మిక వరాలను పొందవచ్చు. దేవుడు తన ఆత్మ ద్వారా తన పిల్లలకు ఇచ్చే బహుమతులు అనేకం ఉన్నాయి. లేఖనాలలో పేర్కొన్న వాటిలో బయల్పాటు, యేసు క్రీస్తునందు విశ్వాసం, బోధన, వివేచన మరియు జ్ఞానం ఉన్నాయి. పరలోక తండ్రి మీకు ప్రసాదించిన ఆత్మీయ వరాల గురించి, వాటిని మీరు ఎలా అభివృద్ధి చేసుకోవాలో మరియు ఇతరులను ఆశీర్వదించడానికి వాటిని మీరు ఎలా ఉపయోగించాలని ఆయన కోరుకుంటున్నారో తెలుసుకోవడానికి ప్రార్థించండి.