Agpennek iti Balikas, ni Liz Lemon Swindle. Pammadayaw ti Havenlight
11.
Wayawayaannakayonto ti kinapudno
Juan 8:32
Ti Nailangitan nga Amayo ket maysa a Dios ti kinapudno. Isu ti makaammo iti amin. Aggapu Kenkuana ti amin a kinapudno ken agturong Kenkuana. Ipakitayo a napateg kadakayo ti kinapudno bayat ti panagsursuroyo, agbiagkayo nga addaan iti integridad, ken situtured nga agbalin a natibker iti no ania ti ammoyo nga umno—uray no nasken nga agtakderkayo nga agmaymaysa.
Dagiti Agnanayon a Kinapudno
Kayat ti Nailangitan nga Ama nga agsursuro a kanayon dagiti annakna a babbai ken lallaki. Addaankayo iti agpada a temporal ken naespirituan a gapu tapno manggun-od ken mangipateg iti panagsursuro. Saan laeng a maipapan iti panangged iti kuarta ti edukasion. Paset daytoy iti agnanayon a panggepyo a tun-oyen nga agbalin nga ad-adda a kas iti Nailangitan nga Ama.
Ti kaipapanan ti panagbiag nga addaan iti integridad ket ayatenyo no ania ti umno iti imatang ti Dios—nga ad-adda ngem iti panagayatyo iti personal a pannakagin-awa, kinalatak, wenno pagnam-ayan. Kaipapanan daytoy ti panangaramid no ania ti umno gapu ta daytoy ti umisu.
Addaankayo iti maysa a banag a napateg nga ibinglay. Adda dagiti sungbat iti ebanghelio ni Jesucristo kadagiti saludsod maipapan iti biag. Daytoy ti dalan nga agturong iti talna ken ragsak. Mabalin a saanyo nga ammo ti amin, ngem umdas ti ammoyo a mangayat iti kaarrubayo, mangiranud kadakuada kadagiti pudno a prinsipio, ken awisenyo ida nga agsursuro iti ad-adu pay.
Dagiti Awis
Ituloyyo ti agsursuro a kanayon. Mangsapulkayo kadagiti gundaway a mangpadur-as iti kapanunotanyo ken paglainganyo. Mabalin nga iraman dagitoy a gundaway ti pormal nga edukasion iti pagadalan wenno vocational training kasta met iti saan a pormal a panagsursuro manipud kadagiti mapagtalkanyo a pamataudan. Iramanyo ti Apo kadagiti panagkagumaanyo, ket iwanwannakayonto.
Sursuruenyo dagiti naespirituan a kinapudno. Bayat ti panangsursuroyo maipapan iti lubong iti aglawlawyo, agsursurokayo pay maipapan iti Mangisalakan, a nangparsua iti lubong. Adalenyo ti panagbiag ken dagiti pannursurona. Pagbalinenyo ti seminary, insititute, ken bukod a panagadal iti ebanghelio a kas paset iti panagsursuroyo agingga iti tungpal biag. Daytoy ti mabalin a mangisagana kadakayo a mangibinglay iti ebanghelio iti unos ti panagbiagyo.
Agbiagkayo nga addaan iti integridad. Saankayo nga agtakaw, agulbod, agkusit, wenno mangallilaw iti ania man a wagas—iti pagadalan, iti pagubraan, iti online, iti sadino man. Agbalinkayo a napudno a pasurot ni Jesucristo iti man publiko ken iti pribado.
Dagiti Naikari a Bendision
Ti edukasion ti mangpadur-as iti kabaelanyo nga agserbi iti Apo, agraman kas maysa a misionario. Daytoy ti mangpabileg kadakayo a mangbendision iti dadduma, nangnangruna iti pamiliayo. No ad-adu ti masursuroyo, ad-adda met a makatulongkayo iti panangbangon iti pagarian ti Dios ket makaimpluensiakayo iti lubong para iti pagimbagan.
Mangyeg ti kinapudno iti talna ken respeto iti bagi. No maitunos dagiti balikas ken tignayyo iti kinapudno, ipakitayo a mapagtalkandakayo dagiti dadduma a tao ken ti Apo.
No maitakderanyo dagiti pannursuro ni Jesucristo, makipagtakder met Isuna kadakayo. Ni Jesucristo ti pigsayo! Mabalin a saan nga umanamong iti pammatiyo dagiti dadduma, ngem makitanto ti kinatured ken kinapudnoyo. Uray man no suroten wenno saan dagiti dadduma ti pagwadanyo, pumigsanto ti pammaneknek, panagtalek iti bagi, ken pammatiyo ken ni Cristo.
Dagiti Saludsod ken Sungbat
Dakes kadi ti maaddaan kadagiti saludsod maipapan iti Simbaan? Kasano a masarakak dagiti sungbat? Ti kaadda dagiti saludsod ket saan a maysa a pakakitaan ti kinakapuy wenno kinaawan ti pammati. Kinapudnona, makatulong ti panagsaludsod a mangbangon iti pammati. Nangrugi ti Pannakaisubli ti ebanghelio idi nagsaludsod nga addaan pammati ti 14 ti tawenna a ni Joseph Smith. Sapulenyo dagiti sungbat kadagiti nasantuan a kasuratan, kadagiti balikas dagiti propeta ti Dios, manipud kadagiti lideryo ken napudno a miembro ti pamiliayo, ken manipud iti Dios Mismo. No saan a sumangbay a dagus dagiti sungbat, agtalekkayo a makasursurokayonto iti tunggal binatog. Agtultuloykayo nga agbiag iti no ania ti ammoyon, ken agtultuloykayo a mangsapul iti kinapudno.
Kasano a maitakderak no ania ti nalinteg a diak masair ti rikna dagiti sabali ti pammatida? Rugianyo babaen iti panangsiguradoyo a naparegta dagiti balikas ken tignayyo babaen iti ayat iti Dios ken dagiti annakna. Ti panangiburay iti ebanghelio nasken a saan a maaramid iti espiritu ti sinnuppiat no di ketdi babaen iti kinalawag, kinaemma, ken kinaanus. Mabalin a managayatkayo kadagiti dadduma uray no saanyo nga anamongan dagiti panniriganda. Agbalinkayo a nasayaat a pagwadan ni Jesucristo babaen ti wagas a panagbiagyo.
Kitaen iti Mateo 5:14–16 (pagsilnagenyo koma ti silawyo); Juan 14:6 (Ni Jesus ti kinapudno); 1 Pedro 3:15 (nakasaganakayo a kanayon a mangibinglay iti namnamayo ken Cristo); Doktrina ken Katulagan 88:77–80 (dagiti banag a kayat ti Apo a masursurotayo); 88:118 (sapulen ti sirib manipud kadagiti kasayaatan a libro); 93:36 (ti gloria ti Dios ket kinasaririt); 124:15 (ti kaipapanan ti integridad ket panangayat iti no ania ti umno); 130:18 (maikuyogto ti kinasaririttayo inton agungartayo).
Dagiti Saludsod iti Rekomenda iti Templo
-
Ikarkarigatam kadi ti agbalin a napudno iti amin nga ar-aramidem?
-
Supsuportaram wenno itantandudom kadi dagiti ania man a pannursuro, kannawidan, wenno doktrina a maisupiat kadagiti maisursuro iti Ti Simbaan ni Jesucristo dagiti Santo ti Ud-udina nga Aldaw?