Agaramid kadagiti naparegta a pili

Iti Para iti Pigsa dagiti Agtutubo, masarakanyonto dagiti pannursuro ni Jesucristo ken dagiti propetana. Addaan kadagitoy a kinapudno kas pangiwanwanyo, mabalinyo ti agaramid kadagiti naparegta a pili a mangbendisionto kadakayo ita ken iti unos ti kinaagnanayon.

Maysakayo a maipatpateg a naespirituan nga anak ti Dios. Ti naindaklan a planona iti kinaragsak ti mangaramid a posible a dumur-askayo a naespirituan ken dumur-as ti nadiosan a potensialyo. Imbaonna ni Jesucristo nga agbalin a Mangisalakanyo.

Agtalek kadakayo ti Amayo iti Langit. Inikkannakayo kadagiti naindaklan a bendision, agraman ti pakabuklan ti ebanghelio ken dagiti sagrado nga ordinansa ken katulagan a mangibegkes kadakayo Kenkuana ken mangyeg iti bilegna iti biagyo. Addaan kadagitoy a katulagan umay ti nayon a rag-o ken pagrebbengan. Ammona a kabaelanyo iti mangbalbaliw iti lubong, ket agkasapulan dayta, kaaduanna, ti panagbalin a naidumduma iti lubong. Kalikagumanyo a gun-oden ti pannarabay ti Nailangitan nga Ama bayat iti panagpiliyo. Bendisionannakayto iti pammaregta babaen iti Espiritu Santo.

Ni Jesucristo ti dalan nga agturong iti agnanayon a rag-o. Bayat ti panangusaryo iti wayawayayo nga agpili a mangsurot ken ni Jesucristo, addakayo iti dana nga agturong iti agnanayon a ragsak. Pagbalinenyo a pagrukodanyo ni Jesucristo, ti natibker a bato ti pundasionyo. Bangonenyo ti biagyo kadagiti pannursurona, ket rukodenyo dagiti piliyo babaen kadagitoy. Dagiti katulagan nga aramidenyo iti panagbuniag, kabayatan ti sakramento, ken iti templo ket dagitoy dagiti bato a pagbangon iti natibker a pundasionyo ken ni Cristo. Mapasaranyonto latta dagiti panagrigat ken pannulisog, ngem tulongandakayonto ti Nailangitan nga Ama ken ti Mangisalakan babaen amin kadagitoy.

Ti panggep ti Para iti Pigsa dagiti Agtutubo ket saan a mangted kadakayo iti “wen” wenno “saan” iti tunggal mabalin a pili a mabalin a maipasango kadakayo. Ketdi, aw-awisennakayo ti Apo nga agbiag iti nangatngato ken nasansantuan a wagas—maysa a biag a naipamaysa kadagiti agnanayon a kinapudno ken naikari a bendision ti Apo. Daytoy ti wagasna. Isuronakayto daytoy a pangiwanwan maipapan iti wagasna. Ilawlawagna dagiti kinapudno nga impalgakna. Pagbalinenyo dagitoy a kinapudno a pangiwanwan iti panagpiliyo—dagiti dadakkel a pili, kas iti panagaramid kadagiti katulagan iti templo ken panagserbi iti mision, kasta met kadagiti inaldaw a pili, kas iti no kasano ti panangtrato kadagiti tao wenno kasano ti panangbubos iti orasyo.

Idinto a matulongandakayo dagiti dadduma, personal ti naespirituan a panagdur-asyo. Pagrebbenganyo daytoy. Aramidenyo amin ti kabaelanyo a mapasayaat ti biagyo iti inaldaw, tungpalenyo dagiti bilin ti Dios ken dayawen dagiti katulaganyo, ken tulonganyo dagiti dadduma a makaasideg iti Mangisalakan.

Kitaen iti Mosiah 4:29–30 (dagiti wagas iti panagbasol ket di mabilang, masapul a kitaentayo a nalaing ti bagbagitayo); Helaman 5:12 (bangonenyo ti pundasionyo ken Cristo); Doktrina ken Katulagan 45:57 (kaduayo ti Espiritu Santo kas pangiwanwan); 25:13 (kumpetkayo kadagiti katulaganyo).