1.
Plano ti Dios para kadakayo
Sakbay nga immaykayo ditoy daga, nakipagnaedkayo kadagiti nailangitan a nagannakyo. Dakayo ti ay-ayatenda nga anakda. Idiay langit, naammuanyo ti maipapan iti plano ti Dios para iti pamiliana. Siraragsak nga inawatyo daytoy a plano gapu ta tulongannakayo a dumakkel ken rumang-ay nga agbalin nga ad-adda a kas iti Dios babaen ti panangawat iti pisikal a bagi, panagbalin a paset ti naindagaan a pamilia, ken panangpadas iti biag ditoy daga. Sumagmamano kadagitoy a padas ti narigat. Ammo ti Amatayo daytoy, isu a kas paset ti planona, imbaonna ti Mangisalakan, ni Jesucristo, a mangtulong kadakayo. Awagantayo daytoy iti plano ti pannakaisalakan wenno ti plano ti kinaragsak.
Dagiti Agnanayon a Kinapudno
Ti Nailangitan nga Ama ti akin-aramid iti plano. Isu ti Ama ti espirituyo, ken ay-ayatennakayo. Kayatna nga ited kadakayo ti kadakkelan a bendisionna—agnanayon a biag a kadua Isuna. Iti sabali a pannao, kayatna nga agbalinkayo nga ad-adda a kas Kenkuana ken agbiagkayo iti narag-o, nadayag a biag a kas iti biagna. Addaan Isuna iti amin a bileg, ken ammona ti amin a banag. Makapagtalekkayo Kenkuana, uray no narigat ti biag.
Aramiden ni Jesucristo a posible ti plano. Sakbay a naparsua ti lubong, pinili Isuna ti Nailangitan nga Ama tapno agbalin a Mangisalakanyo. Ni Jesucristo laeng ti agmaymaysa a makaisubli kadakayo iti Amayo iti Langit. Daytoy ti gapuna a pinilitayo ti sumurot Kenkuana. Agpannuray ti amin a banag iti dayta a pili!
Napateg ti kallaysa ken pamilia iti plano ti Dios. Pasetkayo ti pamilia ti Dios, ket umay amin dagiti espiritu nga annakna ditoy daga babaen ti maysa nga ina ken maysa nga ama. Kayat ti Dios a sangsangkamaysa a dumur-as dagiti annakna a babbai ken annakna a lallaki nga agturong iti agnanayon a kinaperpekto. Agpada a makatulong dagiti lallaki ken babbai iti maysa a naayat, nagkaykaysa a panagasawa. Ti biag ti pamilia ditoy daga—uray iti amin a kinaimperpektona—ket makaisangbay iti dakkel a rag-o. Nairanta daytoy a tumulong a mangisagana kadakayo para iti biag nga agnanayon a kadua ti Dios.
Dagiti Awis
Agtungpal iti agnanayon a pannirigan. Tunggal maipasangokayo kadagiti sulisog, pannubok, pannakaupay, wenno narigat a pili, ipalagipyo iti bagiyo ti plano ti Dios. Kitaen no kasano a dagiti agnanayon a kinapudno nga ammoyo maipapan iti planona ket makatulong kadakayo a mangkita kadagiti karityo iti sabali.
Sapulenyo ti ima ti Dios iti biagyo. Paliiwenyo dagiti wagas a bembendisionannakayo ti Dios. Mabalin a maysa daytoy a naasi nga aramid manipud iti maysa a tao, maysa a kanito ti talna, wenno maysa a sungbat iti kararag.
Pilien a suroten ti plano ti Dios. Ammuen ti maipapan iti kayat ti Nailangitan nga Amam nga aramidenyo. Sapulen ti pannarabayna bayat ti panagadalyo kadagiti nasantuan a kasuratan, balikas dagiti sibibiag a propeta, ti waragawag ti kaamaan, ken ti bendisionyo iti patriarka. Daytoyto ti mangtulong kadakayo nga agsagana nga agserbi iti Apo, kas maysa a misionario ken iti unos ti panagbiagyo. Pagbalinenyo a nangato a prioridad ti panagserbi iti Apo, agnanayon a panagasawa, ken panangpadakkel kadagiti annak. Aramidenyo ti pasetyo a maaddaan iti naragsak a pamilia itan babaen ti panangsurot kadagiti pannursuro ni Jesucristo.
Dagiti Naikari a Bendision
Mabalinyo a sanguen dagiti pannubok iti biag a buyogen ti tured ken namnama ken Cristo. Gapu ta ammoyo ti maipapan iti agnanayon a plano ti Dios, addaankayo iti napateg a ramit a makatulong kadakayo bayat dagiti narigat a panawen. Ammoyo nga ad-adu pay ti adda iti biag ngem iti no ania ti mapaspasamak iti nagbaetan ti pannakayanak ken ipapatay. Ammoyo no siasinokayo a talaga, no ania ti panggepyo, ken no siasino ti mabalinyo a pagbalinan nga addaan iti tulong ti Mangisalakan. Ni Jesucristo ti pigsayo!
Makaawatkayo iti agnanayon a biag bayat ti panangsurotyo ken ni Jesucristo. Ikkannakayo iti bileg nga agbalin nga ad-adda pay a kas Kenkuana, agsubli kadagiti nailangitan a dadakkelyo, ken agbiag a siraragsak a kadua dagiti ay-ayatenyo iti agnanayon. Agtalek ken ni Jesucristo.
Dagiti Saludsod ken Sungbat
Apay a narigat ti biag no dadduma? Kasano a masarakak ti pigsa? Dagiti padasyo iti daytoy a biag—uray dagiti karirigatan —ket mabalin a para iti pagimbaganyo. Matulongandakayo a dumakkel ken dumur-as bayat ti yaasidegyo iti Mangisalakan. Awan ti mapaspasaranyo a saan a maawatan ni Jesucristo gapu iti pangsubbot a sakripisiona. Ammona nga eksakto no kasano a tulongannakayo. Ipamaysayo ti biagyo Kenkuana, ket itag-aynakayonto iti amin a panagduadua ken panagbuteng.
No dadduma, kasla adayo unay ti kapanunotan ti kinaragsak iti pamilia ken panagasawa. Kasano a masarakak ti panagtalek? Aniaman ti kasasaadyo, dikayo sumuko iti plano ti Nailangitan nga Ama. Saanto a sumuko kadakayo. No napudnokayo iti Mangisalakan ken kadagiti katulaganyo, masarakanyonto dagiti sungbat kadagiti pannursuro ni Jesucristo. Maawatanna ti amin a banag a mapasaranyo. Babaen Kenkuana, magun-odyonto ti pigsa a mangtungpal kadagiti bilin ti Dios ken mangawat kadagiti bendision nga ikarina. Agtalekkayo Kenkuana ken iti ebangheliona.
Kitaen iti 2 Nephi 9:13 (anian a nagindaklan ti plano ti Dios!); Mosiah 2:41 (dagitay agtungpal iti bilin ket makapagnaed iti Dios iti awan patinggana a kinaragsak); Alma 12:28–34 (nagaramid ti Dios iti plano ti pannakasubbot nga ammo dagiti annakna); Abraham 3:22–26 (Karaman iti plano ti Dios ti panangibaonna kadatayo ditoy daga, a sadiay mabalintayo ti agpili para iti bagitayo a mangsurot kadagiti bilinna).
Saludsod iti Rekomenda iti Templo
-
Adda kadi pammatim ken pammaneknekmo iti Dios, ti Agnanayon nga Ama; iti Anakna, ni Jesucristo; ken iti Espiritu Santo?