Mabendisionankayo kadagiti tulbek ken turay ti priesthood

Umay dagiti amin a tulbek ken turay ti priesthood babaen ken ni Jesucristo. Tunggal priesthood holder ket matuntonna ti turayna nga agsubli Kenkuana. Ikeddeng ti Mangisalakan no siasino ti umawat iti daytoy a turay ken no siasino ti umawat kadagiti tulbek ti priesthood. Agtalektayo iti naan-anay a pannakaammona.

Insubli ni Jesucristo ti priesthood-na iti aldawtayo. Ibilinna no kasano a mausarto ti priesthood. Nakaawat da Adan, Moises, Pedro, ken adu a dadduma pay a propeta iti intero a pakasaritaan dagiti tulbek ti kinasaserdote. Iti aldawtayo, nakaawat ni Joseph Smith kadagiti tulbek ti priesthood manipud kada Juan Bautista, Pedro, Moises, Elias, Elijah, ken dadduma pay. Iggem ti tunggal miembro ti Umuna a Panguluen ken Korum dagiti Sangapulo-ket-dua nga Apostol ti amin a tulbek ti priesthood iti daga iti agdama. Iggem met dagiti lokal a lider ti priesthood ken dagiti presidente ti korum dagiti tulbek ti priesthood para kadagiti calling-da. Dagiti tulbek ti priesthood ti mangituray iti trabaho ti Dios. Pusgan ken pabilgenda dagiti lallaki ken babbai a tumulong iti dayta a trabaho.

Bendisionan iti turay iti priesthood ti amin nga annak ti Dios. Gapu ta naisubli ti priesthood, mabalinyo ti umawat kadagiti ordinansa ken agaramid kadagiti katulagan iti Dios. Makapagtignaykayo iti nagan ti Dios no umawatkayo iti naituding nga aramiden wenno calling manipud iti maysa a tao nga addaan turay.

Umawat kadagiti calling iti Simbaan ken agserbi a sipupudno. No umawatkayo iti calling iti Simbaan, ma-set apart-kayo iti turay manipud iti Dios nga agserbi iti dayta nga akem. Mabalinyo pay ti umawat iti panangiwanwan manipud iti Dios para iti panagserbiyo. Bayat ti panagserbiyo, ibagiyo ni Jesucristo. Itedyo Kenkuana ti amin a kabaelanyo.

Kanunoganyo dagidiay inawagan ti Dios nga agserbi. Ti panangkanunongyo kaipapananna ti ad-adda pay ngem iti panangitag-ay laeng iti imayo no maibasa ti maysa a nagan iti miting ti Simbaan. Kaipapananna ti panangsuporta ken panangtulong. Agsapulkayo kadagiti wagas a pangipakitaanyo a kanunonganyo dagiti tao nga inawagan ni Jesucristo nga agserbi iti Simbaanna.

Mangipatungpal kadagiti naidutok nga aramiden manipud kadagiti lidermo iti Simbaan—agraman manipud iti panguluenyo iti korum wenno klase. Addaanda iti turay manipud iti Dios, a pangitudinganda kadakayo iti dayta a naituding nga aramiden. Mabalin a madutokankayo nga ag-minister iti maysa a tao, mangpasangbay kadagiti tao bayat ti isasangpetda iti miting ti sakramento, wenno mangtulong iti maysa nga aktibidad. Aniaman ti naidutok nga aramiden, kitaen daytoy kas maysa a gundaway nga agbalin a disipulo ni Jesucristo ken agserbi kadagiti annak ti Dios.

Makapagtalekkayo nga autorisado ni Jesucristo dagiti ordinansa nga awatenyo. Maysa daytoy kadagiti banag a mangpabalin iti Simbaan ni Jesucristo a naisangsangayan. Babaen dagiti ordinansa ti priesthood, maiparangarang ti bileg ti Dios.

Agbalinkayto a ramit kadagiti ima ti Apo. Bayat ti panagserbiyo iti Apo babaen ti turayna ken iti babaen ti panangiturong dagiti katulonganna nga agiggem kadagiti tulbek ti priesthood, tulongannakayto a mangammo no kasano ti agserbi kadagiti dadduma iti trabahona. Ni Jesucristo ti pigsayo. Tulongannakayto ti serbisioyo nga umas-asideg Kenkuana ken mangyeg kadakayo iti rag-o.