Diakto Tarigagayan, ni Yongsung Kim. Pammadayaw ti Havenlight
5.
Magna iti lawag ti Dios
Taga Galacia 5:25
Agaramidkayo kadagiti nasaysayaat a pili no makitayo a nalawlawag dagiti banag. Isu a napateg unay ti silaw: nalaklaka a makita ti umno a dana no adda silaw. Inikkannakayo ti Nailangitan nga Ama iti pannakagun-od iti nailangitan a lawag—ti sagut ti Espiritu Santo—a mangtulong kadakayo a mangkita a silalawag no ania ti nasayaat ken dakes, umno ken biddut.
Dagiti Agnanayon a Kinapudno
Ngem mabalinmo ti maaddaan iti Espiritu Santo kas maysa a kadkadua. No nakumpirmaankayo a maysa a miembro ti Simbaan naawiskayo nga umawat iti “Espiritu Santo.” Ti gundaway a maaddaan iti Espiritu kas kanayon a kaduayo ket maysa kadagiti kangrunaan a sagut ti Dios kadakayo.
Ti panagaramid kadagiti nasayaat a pili ket mangpadur-as iti kabaelanyo a mangrikna iti Espiritu. Adu dagiti naimbag ken makaay-ayo a banag ditoy lubong. Kas iti pannakaapekto iti bagiyo iti no ania ti kanen ken inumenyo, nalaus ti pannakaapekto ti panunot ken espirituyo ti no ania ti basaen, buyaen, ken denggenyo.
Dagiti Awis
Maaddaan iti panawen iti Apo iti inaldaw. Agsursurokayo maipapan Kenkuana. Kanayon a manglaglagip Kenkuana. Agkararagkayo iti Nailangitan nga Amayo. Adalenyo dagiti nasantuan a kasuratan ken balikas dagiti sibibiag a propeta. Kalpasanna ikagumaanyo ti agbiag a mayannurot iti no ania ti masursuroyo.
Ikalikagumyo a gun-oden ti no ania ti makaitag-ay, makaparegta, ken mangawis iti Espiritu. Bayat ti panagpiliyo no ania ti buyaen, basaen. denggen, wenno pakidanggayanyo, panunotenyo no kasano a mariknayo daytoy. Mangyawis kadi daytoy iti nasayaat a pampanunot? Adaywanyo dagiti ania man a banag a manglais kadagiti sagrado a banag wenno imoral. Saankayo a makiraman iti ania man a banag a mangpakapuy iti kabaelanyo a mangngeddeng wenno panangrikna iti Espiritu, kas iti kinaranggas, makabartek nga inumen, ken dagiti makadangran a druga. Maaddaankayo iti tured a mangiddep iti video wenno game, mangpanaw iti maysa a pagsinean wenno pasala, mangbalbaliw iti kanta, wenno umadayo manipud iti ania man a banag a maikontra iti Espiritu.
Usarenyo ti social media a mangparegta. Mabalin ti social media a maysa a nabileg a ramit iti komunikasion. No usarenyo daytoy, agpokuskayo iti lawag, pammati, ken kinapudno. Saanyo nga idasig ti biagyo iti no ania ti kasla mapaspasaran dagiti sabali a tao. Laglagipenyo a ti pategyo aggapu iti panagbalinyo kas maysa nga anak dagiti nailangitan a nagannak, saan nga aggapu iti social media.
Agkalikagumkayo a maaddaan kadagiti nasayaat a padas ken pudno, manayon a relasion. Agannadkayo a ti panangusaryo iti teknolohia ken media ket saan a mangsukat iti panangbubosyo iti panawenyo a sangunsango iti pamilia ken gagayyemyo. Mabalin nga alaen ti kaaduan a panawenyo ti social media ken dadduma pay a teknolohia ngem awan met unay mait-itedna a pateg kas subadna. Maaddaan iti panaginana manipud iti virtual a lubong ket makipulapolkayo kadagiti tao iti pudno a biag.
Dagiti Naikari a Bendision
Maaddaankayo iti Espiritu a kanayon a kadkaduayo. Daytoy a kari ket paset ti katulagan nga aramidenyo ti tunggal kanito a makiranudkayo iti sakramento. Agpaneknekto kadakayo ti Espiritu maipapan iti Nailangitan nga Ama ken ni Jesucristo. Liwliwaen, iwanwan, ballaagan, ken pasantuennakayonto. Tulongannakanto a mangbigbig iti kinapudno ken mangkita iti kinaimbag iti lubong.
Dagiti Saludsod ken Sungbat
Kasano a maammuak no marikriknak ti Espiritu Santo? Ti panangsursuro a mangammo iti Espiritu ket agkasapulan iti panawen, panagsanay, ken panaganus. Makisao Isuna iti nadumaduma a tao iti nadumaduma a wagas. Diyo liplipatan dagiti simple a banag—ti natalna a rikna a maawatyo iti panagdengngegyo iti pammaneknek ti maysa a tao wenno ti saan a natalged a rikna a maawatyo kalpasan ti panagpiliyo iti biddut. Sukisokenyo dagiti nasantuan a kasuratan para iti nadumaduma a wagas a pannakisarita ti Espiritu, ikararaganyo daytoy, ken agtultuloy iti panangsapul kadagiti gundaway a mangrikna iti Espiritu.
Ania ti pornograpia? Apay a nasken a liklikak daytoy? Ti pornograpia ket maysa a panangibagi, iti ladawan wenno balikas, a naisangrat a mangabbukay kadagiti rikna a mainaig iti seks. Adu ti kita ti pornograpia, agraman dagiti video, ladawan, libro, ay-ayam, ken kanta. Mabalin pay daytoy a mensahe wenno ladawan a maipatulod kadagiti aggagayyem. Tratuen ti pornograpia dagiti banag a sagrado—dagiti pisikal a bagitayo ken rikna a mainaig iti seks—a buyogan ti kinaawan respeto. Mabalin a makitayo ti pornograpia nga awan kaipapananna. Makitayo man ti pornograpia a naigagara wenno saan, tallikudanyo a dagus. Mabalin a kayatyo ti makisarita iti nagannak wenno sabali pay a mapagtalkan a nataengan. Ti naigagara a panagbuya iti pornograpia ket basol ken mangdangran iti kabaelanyo a mangrikna iti Espiritu. Pakapsutenna ti panagteppelyo ken ballikugenna ti panangkitayo iti bagiyo ken iti dadduma. Addaan iti bileg ni Jesucristo a mangtulong kadakayo a mangsaranget iti pornograpia ken agbabawi. Umasidegkayo Kenkuana ken tallikudanyo ti kasipngetan. Matulongannakayo ti bishop-yo nga umawat iti pigsa ken pammakawan, babaen iti Mangisalakan. Ni Jesucristo ti pigsayo!
Kitaen iti Salmo 119:105 (Ti sao ti Dios kasla silaw iti dalantayo); Amos 5:14 (sapulen ti kinaimbag); Taga Galacia 5:22–23 (dagiti bunga ti Espiritu); Moroni 7:18–19 (ti silaw ni Cristo); Doktrina ken Katulagan 6:23 (agsao ti Apo maipapan iti talna); 20:77, 79 (dagiti kararag ti sakramento).
Saludsod iti Rekomenda iti Templo
-
Kinuna ti Apo nga amin a banag ket “aramiden a nadalus” iti imatangna (Doktrina ken Katulagan 42:41). Ikarkarigatam kadi nga aramiden a nadalus ti panunot ken galadmo?