Makatulongkayo iti aramid ti Dios

Ti aramid ken gloria ti Dios ti mangipatungpal iti saan nga ipapatay ken agnanayon a biagyo. Ti saan nga ipapatay wenno imortalidad ket ti panagbiag nga agnanayon nga addaan iti nagungar a bagi. Ti agnanayon a biag, wenno pannakaitan-ok, ket ti panagbalin a kas iti Dios ken makipagnaed Kenkuana iti agnanayon kas pamilia. Maaramid amin daytoy gapu ken ni Jesucristo ken ti Pannubbotna. Makapagtalekkayo Kenkuana.

Makatulongkayo iti aramid ti Dios babaen ti yaasideg ken ni Cristo ken panangtulong kadagiti dadduma nga agaramid met iti kasta. Aniaman a kanito nga aramidenyo ti aniaman a panangtulong iti maysa a tao a sumurot ken Jesucristo, tumulongkayo iti aramid ti Dios.

Agbiag iti ebanghelio. Mangbangonkayo iti pammatiyo ken ni Jesucristo. Agbabawikayo iti inaldaw. Umawatkayo kadagiti ordinansa ti priesthood ti Dios ken agtungpalkayo kadagiti katulaganyo. Aramidenyo dayta a pagtuladan iti unos ti biagyo.

Aywananyo dagiti agkasapulan. Mangbirok kadagiti wagas a makapagserbi ken makapag-minister kadagiti dadduma, agraman iti pamiliayo, gagayyemyo, ken komunidadyo. Maysa a naindaklan a wagas a matulonganyo dagiti tao nga agkasapulan ket ti panagtulnog iti linteg ti panagayuno ken panangted kadagiti daton ti panagayuno.

Awisenyo ti amin nga umawat iti ebanghelio. Bay-anyo a dagiti balikas ken tignayyo ti mangyanninaw iti pammatiyo ken ni Jesucristo. Agbalinkayo a nakasagana a mangibaga iti asino man nga agdamag kadakayo maipapan iti namnanma ken kinaragsak a mariknayo kas disipulona. Para kadagiti agtutubo a lallaki, ti panagserbi iti full-time a mision ket maysa a pagrebbengan iti priesthood. Para kadagiti agtutubo a babbai, nabileg a gundaway daytoy; agkararagkayo tapno maammuanyo no kayat ti Apo nga agserbikayo. Agsaganakayo a mangibinglay iti ebanghelio iti unos ti panagbiagyo.

Pagkaykaysaenyo dagiti pamilia para iti kinaagnanayon babaen iti panagaramid iti family history ken temple work. Ammuenyo ti maipapan kadagiti kapuonanyo. Ammuenyo no siasino ti agkasapulan kadagiti ordinansa ti templo. Mapankayo iti templo a masansan agingga a kabaelanyo tapno mabuniagan ken makumpirmaan para kadakuada. No kasapulanyo ti tulong, mapankayo FamilySearch.org.

Addaankayonto iti tulong ti Dios. Saan a namnamaen ti Nailangitan nga Ama nga aramidenyo daytoy nga aramid a bukbukodyo. Kaduanakayo. No sipapakumbabakayo nga idatonyo ti panawen ken pusoyo, aramidennanto dagiti nakaskasdaaw a banag babaen kadakayo. Ni Jesucristo ti pigsayo!

Mapnokayonto iti rag-o. Narag-o nga aramid ti aramid ti Dios! Bayat ti pannakipasetyo iti daytoy, mariknayo ti rag-o a mariknana. Panunotenyo ti rag-o nga ibinglayyonto iti Nailangitan nga Ama ken kadagiti annakna a tinulonganyo nga inyeg Kenkuana!