Mensahe manipud iti Umuna a Panguluen

Ay-ayatendakayo, ken adda panagtalekmi kadakayo. Pudno a maibilangkayo kadagiti espiritu a pili ti Nailangitan nga Ama, a naipatulod iti lubong iti daytoy a panawen tapno agaramid kadagiti napapateg a banag.

Napigpigsakayo ken ad-adda a makabaelkayo ngem iti mabalin nga ipagarupyo. Ket no agpannuraykayo iti Mangisalakan, dumakdakkel pay ti pigsayo. Isu ti “pigsa dagiti agtutubo.”

Tulongannakayto daytoy a pangiwanwan a mangbangon iti natibker a pundasion kadagiti panagpiliyo nga agturong iti dana ti katulagan. Tulongannakayto nga agsagana nga agaramid kadagiti sagrado a katulagan iti templo, agsagana nga agserbi iti mision, ken agsapul iti rag-o iti panangsurot ken ni Jesucristo iti unos ti panagbiagyo. Addaankayo iti napateg a lugar iti Simbaanna. Tulongannakayto ni Jesucristo a mangipatungpal kadagiti panggepna para kadakayo.

Ammomi a sibibiag ti Dios. Ikarkararagmi nga agtalinaedkayto a natibker iti dana ti katulagan—ti dana ti panagaramid ken panangtungpal kadagiti sagrado a katulagan iti Dios. Dayta ti dana a mangiturong nga agsubli iti Amayo iti Langit. No aramidenyo, agbalinkayonto nga impluensia para iti nasayaat, a mangibingbinglay iti ebanghelio a sirarag-o, mangum-ummong kadagiti annak ti Dios, ken mangisagsagana iti lubong para iti Maikadua a Yaay ti Mangisalakan. Laglagipen: Ni Jesucristo ti pigsayo!