በጉዞአችሁ የእግዚአብሔርን ብርሃን ተከተሉ

መንፈስ ቅዱስን እንደ ቋሚ ጓደኛ ማድረግ ትችላላችሁ። የቤተክርስቲያኗ አባል መሆናችሁ በተረጋገጠ ጊዜ “መንፈስ ቅዱስን እንድትቀበሉ” ተጋብዛቹሃል። መንፈስን እንደ ቋሚ ጓደኛችሁ የማግኘት እድል እግዚአብሔር ለእናንተ ከሚሰጣቸው ታላላቅ ስጦታዎች አንዱ ነው።

ጥሩ ምርጫ ማድረግ መንፈስን የመስማት ችሎታችሁን ያሻሽላል። በዚህ ዓለም ውስጥ ብዙ ጥሩ እና ጠቃሚ ነገሮች አሉ። በምትበሉትና በምትጠቱት ነገር ሰውነታችሁ እንደሚጎዳ ሁሉ፣ የምታነቡት፣ የምታዩት እና የምትሰሙት ነገሮች በአዕምሮአችሁ እና በመንፈሳችሁ ላይ በእጅጉ ተጽዕኖ ያሳድሩባችኋል።

በየቀኑ ለጌታ ጊዜ ስጡ። ከእርሱ ተማሩ። ሁልጊዜ እርሱን አስታውሱ። ወደ ሰማይ አባት ጸልዩ። ቅዱሳት መጻህፍትንና የኋለኛው ቀን ነቢያትን ቃላት አጥኑ። ከዚያም በተማራችሁት መሠረት ለመኖር ጣሩ።

መንፈስን የሚያነሳን፣ የሚያነቃቃን እና የሚጋብዝን ነገር ፈልጉ። ምን ማየት፣ ማንበብ፣ ማዳመጥ ወይም መሳተፍ እንዳለባችሁ ምርጫን ስታደርጉ ምን እንደሚሰማችሁ አስቡ። ጥሩ ሀሳቦችን ይጋብዛል? በተቀደሱ ነገሮች ላይ ከሚያፌዝ ወይም ሥነ ምግባር ከጎደለው ነገር ራቁ። እንደ አመጽ፣ አልኮል እና ጎጂ እጾች አይነት ውሳኔዎቻችሁን ወይም ለመንፈስ ያላችሁን ስሜት በሚያደበዝዝ በማንኛውም ነገሮች ውስጥ አትሳተፉ። ቪዲዮን ወይም መጫወቻን ለማጥፋት፣ ከፊልም ወይም ከዳንስ ለመውጣት፣ ሙዚቃን ለመቀየር ወይም ከመንፈስ ጋር ከማይጣጣም ከማንኛውም ነገር ለመራቅ ድፍረት ይኑራችሁ።

ማህበራዊ ሚዲያን ለማነሳሳት ተጠቀሙበት። ማህበራዊ ሚዲያ ኃይለኛ የመገናኛ መሳሪያ ሊሆን ይችላል። የምትጠቀሙት ከሆነ፣ በብርሃን፣ በእምነት እና በእውነት ላይ አተኩሩ። ሕይወታችሁን ሌሎች ሰዎች እያጋጠሟቸው ካሉ ነገሮች ጋር አታነጻጽሩ። ብቁነታችሁ የሰማይ ወላጆች ልጅ በመሆን ላይ የሚመካ ነው እንጂ ከማህበራዊ ሚዲያ የሚመጣ እንዳልሆነ አስታውሱ።

ጤናማ ልምዶችን እና እውነተኛ፣ ዘላቂ ግንኙነቶችን ፈልጉ። የቴክኖሎጂ እና የሚዲያ አጠቃቀማችሁ ከቤተሰብ እና ከጓደኞች ጋር በአካል የምታሳልፉትን ጊዜ እንዳይሻማ ተጠንቀቁ። ማህበራዊ ሚዲያ እና ሌሎች ቴክኖሎጂዎች በምላሹ ብዙ ዋጋ ሳይሰጡ ብዙ ጊዜአችሁን ሊወስዱ ይችላሉ። ከምናባዊው ዓለም ዕረፍት ውሰዱ እንዲሁም በእውነተኛ ህይወት ካሉ ሰዎች ጋር ተገናኙ።

መንፈሱ ሁል ጊዜ ከእናንተ ጋር ሊኖር ይችላል። ይህ ቃል ቅዱስ ቁርባን በተካፈላችሁ ቁጥር የምትገቡት ቃል ኪዳን አካል ነው። መንፈስ ለእናንተ ስለ ሰማይ አባት እና ስለ ኢየሱስ ክርስቶስ ይመሰክራል። እርሱም ያፅናናችኋል፣ ይመራችኋል፣ ያስጠነቅቃችኋል እንዲሁም ይቀድሳችኋል። እውነትን እንድታውቁና በዓለም ውስጥ ያለውን መልካም ነገር እንድታስተውሉ ይረዳችኋል።