ኢየሱስ ክርስቶስ ይረዳችኋል

ኢየሱስ ክርስቶስ ያበረታችኋል። ፍላጎታችሁን፣ ሃሳባችሁን እና ተግባራችሁን እንድትቀይሩ ሊረዳችሁ ይችላል። ስትጨነቁ፣ ስትፈሩ ወይም በማንኛውም መንገድ ስትቸገሩ እርሱ ያጽናናችኋል። በሁሉም የሕይወታችሁ ዘርፍ ይረዳችኋል። በእርሱ ላይ እምነትን መጣል ትችላላችሁ።

ንስሐ መግባት የኃጢአት ቅጣት አይደለም፤ አዳኙ እኛን ከኃጢአት ነፃ የሚያወጣበት መንገድ ነው። ንሰሃ መግባት ማለት መለወጥ ማለት ነው—ከሃጥያት መራቅ እና ወደ እግዚአብሔር መመለስ ነው። መሻሻል እና ይቅርታን ማግኘት ማለት ነው። የዚህ አይነት ለውጥ የአንድ ጊዜ ክስተት አይደለም፤ ቀጣይነት ያለው ሂደት ነው።

ኢየሱስ ክርስቶስን የህይወታችሁ ትኩረት አድርጉ፡፡ በምታደርጉት ነገር ሁሉ እርዳታውን ፈልጉ።

ንስሀ ግቡ። ለመሻሻል ባለ ፍላጎት ወደ ጌታ ተመለሱ። የሆነ ስህተት ከሰራችሁ በሐቀኝነት በእግዚአብሔር ፊት እና እንደ አስፈላጊነቱ ለኤጲስ ቆጶሳችሁ እና ለጎዳችሁት ማንኛውም ሰው ስህተታችሁን አሳውቁ። ነገሮችን ለማስተካከል የተቻላችሁን አድርጉ።

ይበልጥ የተሻለ ለማድረግ እና ለመሆን በተሰጠው ስጦታ ተደሰቱ። ቀላል ባይሆንም እና ከምትፈልጉት በላይ ረዘም ያለ ጊዜ በሚወስድበት ጊዜም እንኳ መሞከራችሁን አታቋርጡ። መሥራታችሁን እና በጌታ መታመናችሁን ቀጥሉ። እርሱ በእያንዳንዱ መንገዳችሁ ይረዳችኋል።

የሰማይ አባት ንስሐ ስትገቡ ይቅር ይላችኋል እንዲሁም ይፈውሳችኋል። የጥፋተኝነት ስሜታችሁን በሰላምና በደስታ ይተካል። ኃጢአታችሁንም ከእንግዲህ ወዲህ አያስብም። ኢየሱስ ክርስቶስ ኃይላችሁ ነው፤ በኃይሉም ትእዛዛቱን የመጠበቅ ፍላጎታችሁን ይጨምራል።

እርሱም ህይወታችሁን እና ልባችሁን ይቀይራል። ቀስ በቀስ፣ ታድጋላችሁ እንዲሁም እንደእርሱ መሆን ትጀምራላችሁ።