« សំណួរដែលចោទសួរញឹកញាប់ » សម្រាប់គ្រូបង្រៀន EnglishConnect ( ឆ្នាំ ២០២៣ )
« សំណួរដែលចោទសួរញឹកញាប់ » សម្រាប់គ្រូបង្រៀន EnglishConnect
សំណួរដែលចោទសួរញឹកញាប់
ខាងក្រោមនេះគឺជាសំណួរទូទៅមួយចំនួនអំពី EnglishConnect ។ សំណួរដែលចោទសួរញឹកញាប់បន្ថែមសម្រាប់អ្នករៀន គ្រូបង្រៀន និងថ្នាក់ដឹកនាំអាចរកបាននៅលើគេហទំព័រ englishconnect.org/help ។
តើខ្ញុំត្រូវការបទពិសោធន៍បង្រៀនដើម្បីធ្វើជាគ្រូបង្រៀន EnglishConnect ដែរឬទេ ?
តើខ្ញុំបង្រៀនអ្នករៀនដោយរបៀបណា ប្រសិនបើខ្ញុំមិនចេះភាសារបស់ពួកគេផងនោះ ?
តើយើងអាចនិយាយភាសាកំណើតក្នុងអំឡុងពេលក្រុមសន្ទនាបានដែរឬទេ ?
តើខ្ញុំបង្រៀនក្រុមពហុភាសាដោយរបៀបណា ?
តើខ្ញុំជួយអ្នករៀនអនុវត្ដភាសាអង់គ្លេសប្រចាំថ្ងៃដោយរបៀបណា ?
តើខ្ញុំរៀបចំក្រុម EnglishConnect ដោយរបៀបណា ?
តើការប្រជុំក្រុម EnglishConnect មានរយៈពេលប៉ុន្មាន ?
តើក្រុមរបស់ខ្ញុំគួរជួបគ្នាញឹកញាប់ប៉ុនណា ?
តើខ្ញុំអាចបង្រៀនមេរៀនច្រើនជាងមួយនៅក្នុងការប្រជុំក្រុមបានទេ ?
តើខ្ញុំដឹងដោយរបៀបណានូវកម្រិត EnglishConnect ដែលអ្នករៀនគួរចូលរួម ?
តើខ្ញុំអាចជួយអ្នករៀនដែលចូលរួមក្នុងក្រុមដែលកំពុងដំណើរការរួចហើយដោយរបៀបណា ?
ចុះបើអ្នករៀនខកខានការប្រជុំក្រុម ឬឈប់មកវិញនោះ ?
តើខ្ញុំគាំទ្រអ្នករៀនដែលកំពុងរៀនក្នុងល្បឿនយឺតជាងអ្នកផ្សេងទៀតក្នុងក្រុមដោយរបៀបណា ?
តើខ្ញុំគាំទ្រអ្នករៀនដែលកំពុងរៀនក្នុងល្បឿនលឿនដោយរបៀបណា ?
តើខ្ញុំគាំទ្រអ្នករៀនដែលមានសមត្ថភាពនិយាយភាសាអង់គ្លេសខុសគ្នាដោយរបៀបណា ?
តើខ្ញុំត្រូវធ្វើយ៉ាងណាពេលសិស្សសួរសំណួរអំពីវេយ្យាករណ៍ ?
តើខ្ញុំគួរកែការបញ្ចេញសំឡេងដែរឬទេ ?
តើខ្ញុំចុះឈ្មោះ និងគ្រប់គ្រងក្រុម EnglishConnect របស់ខ្ញុំដោយរបៀបណា ?
តើសិស្សទទួលបានវិញ្ញាបនបត្រ EnglishConnect ដោយរបៀបណា ?
តើខ្ញុំត្រូវការបទពិសោធន៍បង្រៀនដើម្បីធ្វើជាគ្រូបង្រៀន EnglishConnect ដែរឬទេ ?
អ្នកមិនត្រូវការបទពិសោធន៍បង្រៀនដើម្បីធ្វើជាគ្រូបង្រៀន EnglishConnect ទេ ។ ប្រហែលជាអ្នកមិនធ្លាប់បង្រៀនភាសាអង់គ្លេសពីមុនមក ហើយមានអារម្មណ៍មិនច្បាស់ថាត្រូវចាប់ផ្ដើមដោយរបៀបណា ។ នោះគឺវាមិនថ្វីទេ ។ មេរៀន EnglishConnect ត្រូវបានរៀបចំឡើងយ៉ាងយកចិត្តទុកដាក់ និងប្រកបដោយការគិតគូរ ដោយប្រើគោលការណ៍បង្រៀនភាសា និងគោលការណ៍ខាងវិញ្ញាណ ដើម្បីជួយអ្នកឲ្យទទួលបានជោគជ័យ ។ អ្នកមិនចាំបាច់ជាអ្នកជំនាញនោះទេ ។ អ្នកមិនចាំបាច់ដឹងចម្លើយគ្រប់សំណួរនោះទេ ។ តួនាទីរបស់អ្នកគឺជួយសម្រួលដល់ការអភិវឌ្ឍភាសាដោយផ្តល់ឱកាសសម្រាប់ការអនុវត្ត ។ អ្នកមិនចាំបាច់បង្រៀនវេយ្យាករណ៍ ឬយល់គ្រប់យ៉ាងអំពីភាសាអង់គ្លេសនោះទេ ។ ផ្ទុយទៅវិញ សូមផ្តោតលើការបង្កើតបរិយាកាសមួយដែលសិស្សមានអារម្មណ៍មិនខ្លាចក្នុងការនិយាយភាសាអង់គ្លេស និងរៀនពីកំហុសរបស់ពួកគេ ។
តើខ្ញុំបង្រៀនអ្នករៀនដោយរបៀបណា ប្រសិនបើខ្ញុំមិនចេះភាសារបស់ពួកគេផងនោះ ?
ការបង្រៀនភាសាអង់គ្លេសដោយប្រើតែភាសាអង់គ្លេសគឺជារឿងធម្មតាណាស់នៅជុំវិញពិភពលោក ។ តាមពិត ការណ៍នេះអាចជាពរជ័យមួយ ព្រោះវាបង្កើនចំនួនភាសាអង់គ្លេសដែលអ្នករៀនបានឮ និងប្រើប្រាស់ ។ សូមចងចាំថា ត្រូវនិយាយភាសាអង់គ្លេសសាមញ្ញៗ ។ សូមប្រើរូបភាព កាយវិការដៃ និងភាសាកាយវិការ ដើម្បីជួយអ្នករៀនឲ្យយល់អំពីពាក្យ និងគំរូថ្មីៗនៃវាក្យសព្ទ ។ អ្នកអាចបង្ហាញរូបថត គូររូបភាព ឬធ្វើសកម្មភាព ។ អ្នកអាចចង្អុលប្រាប់អ្នករៀនឲ្យបកប្រែធនធានទាំងឡាយដែលមាននៅក្នុង EnglishConnect ១ សម្រាប់អ្នករៀន ឬ EnglishConnect ២ សម្រាប់អ្នករៀន ឬអ្នកអាចប្រើវចនានុក្រមនៅលើអនឡាញ ។ ការណ៍នេះក៏នឹងបង្រៀនអ្នករៀនពីរបៀបប្រើប្រាស់ធនធានទាំងឡាយដែលមានដើម្បីស្វែងរកចម្លើយផងដែរ ។ សូមចៀសវាងការពន្យល់វែងឆ្ងាយ ។ ផ្ទុយទៅវិញ គ្រាន់តែបង្ហាញអ្នករៀនពីអ្វីដែលត្រូវធ្វើដោយការបង្ហាញប្រាប់ ។
សូមចងចាំថា អ្នកកំពុងរៀនជាមួយគ្នា ។ សូមអញ្ជើញសិស្សឲ្យងាកទៅរកព្រះអម្ចាស់ជាទៀងទាត់ដើម្បីទទួលបានការគាំទ្រ ។ ក្នុងនាមជាគ្រូបង្រៀនរបស់ពួកគេ អ្នកអាចធ្វើជាគំរូនៃសេចក្តីជំនឿ និងការខិតខំ ។ ការនិយាយភាសាអង់គ្លេសជាមួយអ្នករៀនគឺជាទង្វើនៃសេចក្តីជំនឿ ។ ព្រះអម្ចាស់នឹងប្រទានពរដល់អ្នក និងអ្នករៀន នៅពេលអ្នកធ្វើសកម្មភាពដោយសេចក្តីជំនឿដើម្បីនិយាយភាសាអង់គ្លេស ។
តើយើងអាចនិយាយភាសាកំណើតក្នុងអំឡុងពេលក្រុមសន្ទនាបានដែរឬទេ ?
អ្នកនឹងជួយអ្នករៀនបានច្រើនបំផុតនៅពេលដែលអ្នកផ្តោតលើការនិយាយភាសាអង់គ្លេសនៅទូទាំងការសន្ទនាជាក្រុម ។ អ្នកអាចធ្វើដូចនេះបានដោយការដាក់ជាឧទាហរណ៍ ។ សូមខិតខំនិយាយតែភាសាអង់គ្លេស ។ សូមប្រើពាក្យសាមញ្ញ និងប្រយោគខ្លីៗ ។ សូមនិយាយយឺតៗ ហើយនិយាយពាក្យដដែលៗឲ្យបានញឹកញាប់ ។ សូមសរសេរពាក្យគន្លឹះ និងឃ្លានៅលើក្ដារខៀន ។ អ្នកក៏អាចប្រើជំនួយចក្ខុ គូររូបភាព ឬសម្តែងចេញផងដែរ ។ សូមចៀសវាងការពន្យល់វែងឆ្ងាយ និងបកប្រែអ្វីគ្រប់យ៉ាងដែលអ្នកនិយាយ ។ ប្រសិនបើអ្នកត្រូវប្រើភាសាកំណើត សូមសុំការអនុញ្ញាតជាមុនសិន ហើយប្រើភាសាកំណើតឲ្យតិចបំផុតតាមដែលអាចធ្វើទៅបាន ហើយបន្ទាប់មកត្រឡប់ទៅជាភាសាអង់គ្លេសវិញ ។ សូមលើកទឹកចិត្តអ្នករៀនឲ្យនិយាយភាសាអង់គ្លេសឲ្យបានច្រើនអស់ពីលទ្ធភាព និងកុំខ្លាចថាមានកំហុស ។ សូមជួយពួកគេឲ្យទទួលបានបទពិសោធន៍ជោគជ័យ ហើយសរសើររាល់ការខិតខំប្រឹងប្រែង ។ ប្រសិនបើអ្នករៀនត្រូវការជំនួយបន្ថែម សូមណែនាំពួកគេទៅកាន់សៀវភៅសិក្សាសម្រាប់អ្នករៀន ដែលពួកគេអាចស្វែងរកសម្ភារជាភាសាកំណើតរបស់ពួកគេបាន ។ នៅពេលអ្នកផ្តោតលើការជួយអ្នករៀនតាមរយៈទង្វើ នោះអ្នកនឹងមិនសូវមានតម្រូវការប្រើភាសាកំណើតទេ ។
តើខ្ញុំបង្រៀនក្រុមពហុភាសាដោយរបៀបណា ?
ការបង្រៀនក្រុមដែលមានភាសាចម្រុះគឺជាឱកាសដ៏ល្អមួយដើម្បីលើកទឹកចិត្តឲ្យនិយាយភាសាអង់គ្លេស ពីព្រោះភាសាអង់គ្លេសគឺជាភាសារួមនៅក្នុងក្រុម ។ ក្នុងនាមជាគ្រូបង្រៀន សូមប្រើកំណែជាភាសាអង់គ្លេសនៃសៀវភៅសិក្សាសម្រាប់អ្នករៀន ។ សូមជួយអ្នករៀនប្រើប្រាស់សៀវភៅសិក្សាសម្រាប់អ្នករៀនជាភាសាកំណើតរបស់ពួកគេ ប្រសិនបើសៀវភៅនេះមាន នោះពួកគេអាចទទួលបានអត្ថប្រយោជន៍ពីការបកប្រែ ។ ប្រសិនបើអាចធ្វើបាន សូមចែកអ្នករៀនជាក្រុមតូចៗ ដើម្បីពិភាក្សាអំពីគោលការណ៍នៃការរៀនជាភាសាកំណើតរបស់ពួកគេ ប៉ុន្តែត្រូវប្រាកដថាគ្មាននរណាម្នាក់ត្រូវបានដកចេញនោះទេ ។ ប្រសិនបើមានអ្នកនិយាយភាសាជាក់លាក់ណាមួយតែម្នាក់នៅក្នុងក្រុម សូមឲ្យក្រុមនោះពិភាក្សាអំពីគោលការណ៍នៃការរៀនភាសាអង់គ្លេសសាមញ្ញ ដើម្បីឲ្យអ្នករៀនទាំងអស់បានចូលរួមចំណែក ។
តើខ្ញុំជួយអ្នករៀនអនុវត្ដភាសាអង់គ្លេសប្រចាំថ្ងៃដោយរបៀបណា ?
ដើម្បីរៀនភាសាអង់គ្លេស អ្នករៀនត្រូវបង្កើតទម្លាប់នៃការអនុវត្តជារៀងរាល់ថ្ងៃ ។ សូមលើកទឹកចិត្តអ្នករៀនឲ្យបង្កើតទម្លាប់នេះដោយស្វែងរកវិធីសាមញ្ញក្នុងការបញ្ចូលភាសាអង់គ្លេសទៅក្នុងសកម្មភាពប្រចាំថ្ងៃរបស់ពួកគេ ( សូមមើលផ្នែក « ការអនុវត្តប្រចាំថ្ងៃ » ) ។ ឧទាហរណ៍ អ្នករៀនអាចជ្រើសរើសមើលកម្មវិធីនានា ឬស្តាប់តន្ត្រីជាភាសាអង់គ្លេស ។ អ្នកអាចលើកទឹកចិត្តអ្នករៀនឲ្យប្រើបញ្ជីនៃគំនិតទាំងឡាយដើម្បីកែលម្អការសិក្សាប្រចាំថ្ងៃដែលមានបន្ទាប់ពី « Personal Study Tracker » នៅក្នុងសេចក្តីណែនាំពីសៀវភៅសិក្សាសម្រាប់អ្នករៀន ។ សូមប្រើបញ្ជីនេះដើម្បីបំផុសគំនិតអ្នករៀនឲ្យស្វែងរកវិធីសាស្រ្តប្រកបដោយភាពច្នៃប្រឌិត និងមានអត្ថន័យដើម្បីអនុវត្តប្រចាំថ្ងៃ ។
ក្នុងអំឡុងពេលការប្រជុំជាក្រុម សូមអញ្ជើញអ្នករៀនឲ្យរៀន និងអនុវត្តភាសាអង់គ្លេសជារៀងរាល់ថ្ងៃ ហើយតាមដានការខិតខំប្រឹងប្រែងរបស់ពួកគេ ។ អ្នកអាចសុំឲ្យអ្នករៀនពីរបីនាក់ចែកចាយកិច្ចការជាក់លាក់ដែលពួកគេបានធ្វើដើម្បីអនុវត្តជាប្រចាំថ្ងៃ ។ អ្នកអាចពិចារណាបង្កើតការប្រជុំតាមអ៊ីនធឺណិត ដូចជាការឈែតជាក្រុម សម្រាប់អ្នករៀនក្នុងក្រុម ។ សូមប្រឹក្សាជាមួយអ្នកដឹកនាំរបស់អ្នក ដើម្បីស្វែងរកមធ្យោបាយសមស្រប ដើម្បីជួយក្រុមនេះរក្សាទំនាក់ទំនងក្នុងអំឡុងពេលសប្តាហ៍តាមរយៈការផ្ញើសារជាក្រុម ឬវិធីសាស្រ្តផ្សេងទៀត ។ អ្នកអាចគាំទ្រដល់អ្នករៀន នៅពេលពួកគេធ្វើការដើម្បីសម្រេចគោលដៅរបស់ពួកគេ ប៉ុន្តែត្រូវចាំថា ពួកគេទទួលខុសត្រូវចំពោះការរៀនសូត្រនៅទីចុងបញ្ចប់របស់ពួកគេផ្ទាល់ ។
តើខ្ញុំរៀបចំក្រុម EnglishConnect ដោយរបៀបណា ?
សូមប្រឹក្សាជាមួយថ្នាក់ដឹកនាំសាសនាចក្រក្នុងតំបន់ ដើម្បីធ្វើការសម្រេចចិត្តអំពីការរៀបចំ និងដំណើរការជាក្រុម EnglishConnect ។ ជាទូទៅ គ្រូបង្រៀនជាមជ្ឈិមវ័យពីរនាក់ត្រូវបានចាត់តាំងឲ្យក្រុមនីមួយៗ ។ សូមពិចារណាពីតម្រូវការរបស់អ្នករៀន និងសមត្ថភាពក្នុងតំបន់ នៅពេលអ្នកធ្វើការជ្រើសរើសអំពីទីតាំង កាលវិភាគ និងល្បឿន ។
តើការប្រជុំក្រុម EnglishConnect មានរយៈពេលប៉ុន្មាន ?
មេរៀន EnglishConnect អាចមានចាប់ពី ៦០ ទៅ ៩០ នាទី ។ សូមអនុវត្តតាមកាលវិភាគពេលវេលាដែលបានរាយបញ្ជីសម្រាប់សកម្មភាពនីមួយៗ ។ សូមកុំលុបសកម្មភាពណាមួយឡើយ គ្រាន់តែប្រើពេលវេលាតិចបំផុតដែលបានស្នើសម្រាប់ការប្រជុំក្រុមខ្លីជាង ហើយប្រើពេលវេលាយូរជាងដែលបានស្នើប្រសិនបើមានពេល ។។
ចំណាំ ៖ ប្រឹក្សាជាមួយអ្នកដែលមើលការខុសត្រូវលើកម្មវិធីនេះ ហើយពិចារណាពីតម្រូវការរបស់អ្នករៀន និងសមត្ថភាពក្នុងតំបន់ នៅពេលអ្នកធ្វើការសម្រេចចិត្តទាំងនេះ ។
តើក្រុមរបស់ខ្ញុំគួរជួបគ្នាញឹកញាប់ប៉ុនណា ?
ជាទូទៅ ក្រុមប្រជុំម្តងក្នុងមួយសប្តាហ៍ ។ ប្រសិនបើចង់បាន ក្រុមអាចជួបញឹកញាប់ជាងមុនបាន ។ ដើម្បីឲ្យការប្រជុំជាក្រុមមានប្រសិទ្ធភាពបំផុត អ្នករៀនត្រូវមានពេលវេលាគ្រប់គ្រាន់រវាងការប្រជុំដើម្បីបំពេញផ្នែក « Personal Study » ។
EnglishConnect ១ និង ២ មេរៀននីមួយៗមាន ២៥ មេរៀន ។ ប្រសិនបើក្រុមប្រជុំម្តងក្នុងមួយសប្តាហ៍ វានឹងចំណាយពេលប្រាំមួយខែដើម្បីបញ្ចប់កម្រិតមួយ ។ ប្រសិនបើក្រុមជួបគ្នាពីរដងក្នុងមួយសប្តាហ៍ វានឹងចំណាយពេលបីខែ ។ ប្រសិនបើចង់បាន អ្នកអាចបំបែកកម្មវិធីនេះទៅជាផ្នែកតូចៗ ឬជាមុខវិជ្ជា ។ ឧទាហរណ៍ អ្នកអាចជ្រើសរើសចាប់ផ្តើមក្រុមដែលនឹងជួបគ្នាត្រឹមតែបីខែម្តងក្នុងមួយសប្តាហ៍ ដើម្បីបញ្ចប់មេរៀនពី ១ ដល់ ៣ ។ ការប្រើវិធីសាស្រ្តនេះអាចជួយឲ្យអ្នករៀនរក្សាការតាំងចិត្តបាន ។
ចំណាំ ៖ នៅពេលរៀបចំកាលវិភាគការប្រជុំក្រុមដែលមិនចាប់ផ្តើមជាមួយមេរៀនទី ១ សូមពិចារណាចាប់ផ្តើមកាលវិភាគមេរៀនក្រុមរបស់អ្នកជាមួយមេរៀនទី ១ ។ វានឹងជួយអ្នករៀនតម្រង់ទិសអំពីរបៀបប្រើសៀវភៅសិក្សានេះ ។ សូមប្រឹក្សាជាមួយអ្នកដែលមើលការខុសត្រូវលើកម្មវិធីនេះ ហើយពិចារណាពីតម្រូវការរបស់អ្នករៀន និងសមត្ថភាពក្នុងតំបន់ នៅពេលអ្នកធ្វើការសម្រេចចិត្តទាំងនេះ ។
តើខ្ញុំអាចបង្រៀនមេរៀនច្រើនជាងមួយនៅក្នុងការប្រជុំក្រុមបានទេ ?
ប្រសិនបើចង់បាន ក្រុមអាចគ្របដណ្តប់មេរៀនច្រើនជាងមួយក្នុងអំឡុងពេលប្រជុំក្រុម ។ ដើម្បីឲ្យការប្រជុំជាក្រុមមានប្រសិទ្ធភាពបំផុត អ្នករៀនត្រូវមានពេលវេលាគ្រប់គ្រាន់មុនពេលការប្រជុំក្រុមដើម្បីបំពេញផ្នែក « Personal Study » សម្រាប់មេរៀននីមួយៗ ។
សូមមើល « តើក្រុមរបស់ខ្ញុំគួរជួបគ្នាញឹកញាប់ប៉ុនណា ? » សម្រាប់ព័ត៌មានបន្ថែមអំពីកាលវិភាគមេរៀន និងល្បឿន ។
តើខ្ញុំដឹងដោយរបៀបណានូវកម្រិត EnglishConnect ដែលអ្នករៀនគួរចូលរួម ?
EnglishConnect ១ ទាមទារឲ្យចេះអក្សរជាភាសាកំណើតរបស់បុគ្គលនោះ និងសមត្ថភាពក្នុងការអានអក្សរអង់គ្លេស និងពាក្យអង់គ្លេសជាគ្រឹះ ។ EnglishConnect ២ គឺសម្រាប់អ្នករៀនដែលអាចនិយាយប្រយោគគ្រឹះ និងឆ្លើយសំណួរគ្រឹះជាភាសាអង់គ្លេស ។ ដើម្បីសម្រេចថាតើអ្នករៀនគួរចូលរួមជាមួយ EnglishConnect ១ ឬ EnglishConnect ២ អ្នកអាចប្រើការសម្ភាសន៍លើភាពស្ទាត់ជំនាញផ្ទាល់មាត់នៅក្នុង លិបិក្រម ខ ។
EnglishConnect ៣ គឺជាវគ្គរៀនកម្រិតមធ្យមដែលជួយអ្នករៀនអភិវឌ្ឍជំនាញភាសាអង់គ្លេសក្នុងការរៀន ។ ដើម្បីចូលរៀន EnglishConnect ៣ អ្នករៀនត្រូវតែអនុវត្ត និងទទួលបានពិន្ទុ ដែលមានលក្ខណៈសម្បត្តិគ្រប់គ្រាន់ក្នុងការប្រឡងចូលរៀន ។ អ្នករៀនអាចអនុវត្តនៅលើគេហទំព័រ englishconnect.org/join ។
តើ EnglishConnect ៣ ជាអ្វី ?
EnglishConnect មានកម្រិតជាច្រើន ដើម្បីជួយអ្នកចូលរួមរីកចម្រើន ។ EnglishConnect ១ និង ២ ជួយអ្នករៀនឲ្យអភិវឌ្ឍជំនាញភាសាអង់គ្លេសជាមូលដ្ឋាន ។ EnglishConnect ៣ គឺជាវគ្គរៀនកម្រិតមធ្យមដែលជួយអ្នករៀនអភិវឌ្ឍជំនាញភាសាអង់គ្លេសក្នុងការរៀន ។ វាជួយអ្នករៀនរៀបចំខ្លួនចូលរៀន BYU-Pathway Worldwide ។ ( រៀនបន្ថែមទៀតអំពី BYU–Pathway Worldwide នៅឯ byupathway.org ) ។
EnglishConnect ៣ គឺជាវគ្គរៀនតាមអនឡាញដែលមានតម្លៃទាប ដោយមានការសន្ទនាដែលជួបជុំគ្នារៀនតាមអ៊ីនធឺណិត ឬតាមសាលាប្រជុំក្នុងតំបន់ ។ EnglishConnect ៣ រួមបញ្ចូលនូវធនធានរៀនតាមអនឡាញ ដោយមានមតិកែលម្អផ្ទាល់ខ្លួនក្នុងការស្តាប់ ការនិយាយ ការអាន និងការសរសេរ ។ សិស្សអាចរៀនទៅមុខមុនវគ្គ តាមល្បឿនរបស់ពួកគេផ្ទាល់ ។ អ្នករៀនអាចរៀន EnglishConnect ៣ ឡើងវិញបានច្រើនដងតាមដែលចង់បាន ដើម្បីសម្រេចគោលដៅរបស់ពួកគេ ។ ការបញ្ចប់ EnglishConnect ៣ អនុញ្ញាតឲ្យអ្នករៀនរំលងការវាយតម្លៃលើភាសាអង់គ្លេស នៅពេលដាក់ពាក្យទៅ BYU–Pathway Worldwide ។
ដើម្បីរៀបចំខ្លួនចូលរៀន EnglishConnect ៣ អ្នករៀនគួរបំពេញ EnglishConnect ១ និង ២—រួមទាំងសកម្មភាពនៅសៀវភៅលំហាត់ ជាពិសេសសកម្មភាពអាន និងសរសេរ ។ សូមលើកទឹកចិត្តអ្នករៀន EnglishConnect ២ ឲ្យចុះឈ្មោះចូលរៀន EnglishConnect ៣ នៅ englishconnect.org/join ។
EnglishConnect ៣ ត្រូវបានផ្តល់ជូនតាមរយៈ BYU–Pathway Worldwide ដោយសហការជាមួយថ្នាក់ដឹកនាំក្នុងតំបន់ និងអ្នកផ្សព្វផ្សាយសាសនា ។ អ្នកដឹកនាំដែលមានចំណាប់អារម្មណ៍អាចធ្វើការជាមួយអ្នកគ្រប់គ្រងផ្នែកសុខុមាលភាព និងភាពខ្លួនទីពឹងខ្លួននៅក្នុងតំបន់របស់ពួកគេ ដើម្បីផ្តល់ EnglishConnect ៣ នៅក្នុងទីតាំងរបស់ពួកគេ ។
តើខ្ញុំអាចជួយអ្នករៀនដែលចូលរួមក្នុងក្រុមដែលកំពុងដំណើរការរួចហើយដោយរបៀបណា ?
មេរៀននេះត្រូវបានរៀបរៀងឡើងដើម្បីឲ្យអ្នករៀនថ្មីអាចចូលរួមជាមួយក្រុម EnglishConnect គ្រប់ពេលវេលា ។ ប្រសិនបើអ្នករៀនចង់ចូលរួមបន្ទាប់ពីក្រុមបានចាប់ផ្តើមរួចហើយ សូមស្វាគមន៍ពួកគេ ផ្តល់ឲ្យពួកគេនូវ EnglishConnect ១ សម្រាប់អ្នករៀន ឬ EnglishConnect ២ សម្រាប់អ្នករៀន ( ឬបង្ហាញពួកគេពីរបៀបចូលប្រើសៀវភៅសិក្សានៅក្នុងបណ្ណាល័យដំណឹងល្អ ) ហើយជួយពួកគេឲ្យចូលរួម ។ អ្នក ឬអ្នករៀនផ្សេងទៀតអាចជួយអ្នករៀនថ្មីឲ្យចូលរួមជាមួយក្រុមដោយបង្ហាញពួកគេពីរបៀបរៀបចំខ្លួនសម្រាប់មេរៀនថ្មី ។ ដូចគ្នានេះដែរ អ្នករៀនអាចជ្រើសរើសរៀនកម្រិតដដែលឡើងវិញ ប្រសិនបើពួកគេត្រូវការការអនុវត្តបន្ថែមទៀត ។
ចុះបើអ្នករៀនខកខានការប្រជុំក្រុម ឬឈប់មកវិញនោះ ?
ពេលខ្លះអ្នករៀនមានបញ្ហាប្រឈមដែលធ្វើឲ្យពិបាកក្នុងការចូលរួមក្រុម ហើយជារឿយៗពួកគេស្ទាក់ស្ទើរក្នុងការត្រឡប់មកវិញដោយសារតែខ្មាសអៀន ឬភ័យខ្លាច ។ ពួកគេអាចសន្មត់ថា ពួកគេបានខកខានច្រើនពេកហើយមិនអាចតាមទាន់បាន ។ សូមអញ្ជើញអ្នករៀនដែលអវត្តមានឲ្យមកមេរៀនបន្ទាប់ មិនថាពួកគេខកខានប៉ុន្មានដងនោះទេ ។ ផ្ដល់ការគាំទ្រ និងការលើកទឹកចិត្ត ។ ធានាដល់ពួកគេថា EnglishConnect ត្រូវបានរចនាឡើង ដើម្បីឲ្យអ្នករៀនអាចចូលរួមឡើងវិញបានគ្រប់ពេល ។ សិស្សអាចចាប់ផ្តើមម្តងទៀតដោយចូលរួមក្រុម និងរៀបចំខ្លួនសម្រាប់មេរៀនថ្មី ។ សូមពិចារណាអញ្ជើញសមាជិកម្នាក់ ឬច្រើននាក់នៃក្រុមឲ្យទាក់ទងអ្នករៀនដែលអវត្តមាន ហើយបង្ហាញការគាំទ្រ ។
ចំណាំ ៖ កុំចែកចាយព័ត៌មានទំនាក់ទំនងរបស់បុគ្គលម្នាក់ដោយគ្មានការអនុញ្ញាតជាលាយលក្ខណ៍អក្សរពីគាត់ ឬនាងឡើយ ។
តើខ្ញុំគាំទ្រអ្នករៀនដែលកំពុងរៀនក្នុងល្បឿនយឺតជាងអ្នកផ្សេងទៀតក្នុងក្រុមដោយរបៀបណា ?
អ្នករៀនខ្លះត្រូវការពេលវេលាបន្ថែមទៀតដើម្បីយល់ និងនិយាយភាសាមួយ ។ អ្នករៀនទាំងនេះនឹងទទួលបានអត្ថប្រយោជន៍បំផុតមកពីការបំពេញ ផ្នែក « Personal Study » មុនពេលចូលរួមក្នុងការសន្ទនាជាក្រុមនីមួយៗ ។ សូមអញ្ជើញពួកគេឲ្យអនុវត្តវាក្យសព្ទ និងលំនាំប្រយោគ មុនពេលជួបក្រុម ។ ក្នុងអំឡុងពេលមេរៀន សូមចាប់គូអ្នករៀនទាំងនេះជាមួយអ្នករៀនផ្សេងទៀតដែលអាចផ្តល់ការលើកទឹកចិត្ត និងការគាំទ្រ ។ សូមលើកទឹកចិត្តអ្នករៀនទាំងអស់ឲ្យធ្វើអស់ពីលទ្ធភាព និងទទួលយកកំហុសជាផ្នែកនៃដំណើរការរៀនសូត្រ ។ អ្នកក៏អាចជ្រើសរើសពិនិត្យមើល និងធ្វើសកម្មភាពឡើងវិញផងដែរ ។ សូមរំឭកអ្នករៀនទាំងអស់ឲ្យបំពេញផ្នែក « Personal Study » មុនពេលចូលរួមក្នុងការសន្ទនាជាក្រុមថ្មីគឺមានសារៈសំខាន់ចំពោះការរីកចម្រើនរបស់ពួកគេ ។
តើខ្ញុំគាំទ្រអ្នករៀនដែលកំពុងរៀនក្នុងល្បឿនលឿនដោយរបៀបណា ?
នៅពេលអ្នកចូលរួមជាមួយអ្នករៀន នោះអ្នកអាចសម្គាល់ឃើញថា អ្នកខ្លះយល់ច្បាស់ ហើយអាចបំពេញសកម្មភាពអនុវត្តបានយ៉ាងងាយស្រួល ។ សូមពិចារណាលើការអញ្ជើញឲ្យអ្នករៀនទាំងនេះធ្វើឲ្យការរៀនសូត្ររបស់ពួកគេកាន់តែស៊ីជម្រៅ ដោយរួមបញ្ចូលព័ត៌មានលម្អិតបន្ថែម ឬធ្វើសកម្មភាពដូចគ្នាក្នុងបរិបទផ្សេង ។ ឧទាហរណ៍ នៅពេលដែលអ្នករៀនអនុវត្តការជួបនរណាម្នាក់ សុំឲ្យពួកគេអនុវត្តការជួបមិត្តថ្មី ឬចៅហ្វាយនាយថ្មី ។ អ្នករៀនទាំងនេះក៏អាចពង្រឹងចំណេះដឹងភាសាអង់គ្លេសរបស់ពួកគេដោយគាំទ្រអ្នករៀនដែលកំពុងរៀនក្នុងល្បឿនយឺតដែរ ។ អ្នករៀនទាំងអស់អាចទទួលបានអត្ថប្រយោជន៍ពីការបង្រៀនមិត្តភក្តិ និងជួយអ្នកដទៃអនុវត្តវាក្យសព្ទ និងគំរូជាភាសាអង់គ្លេស ។
តើខ្ញុំគាំទ្រអ្នករៀនដែលមានសមត្ថភាពនិយាយភាសាអង់គ្លេសខុសគ្នាដោយរបៀបណា ?
ការមានអ្នករៀនដែលមានកម្រិតសមត្ថភាពនិយាយភាសាអង់គ្លេសខុសៗគ្នាគឺជារឿងធម្មតា ហើយជាឱកាសសម្រាប់ពួកគេក្នុងការជួយគ្នាទៅវិញទៅមក ។ ការជួយគ្នាទៅវិញទៅមកអាចជំរុញការរាប់អាន និងការរីកចម្រើន ។ មនុស្សគ្រប់រូបមានអ្វីដែលចង់ចែកចាយ ។ ឧទាហរណ៍ អ្នករៀនខ្លះអាចជួយអ្នកដទៃឲ្យមានអារម្មណ៍ជឿជាក់ ដោយសារពួកគេសុខចិត្តធ្វើកំហុស ។ សូមចាប់គូអ្នករៀនតាមវិធីផ្សេងៗគ្នា ។ អ្នកអាចចាប់គូអ្នករៀនជាមួយនរណាម្នាក់ដែលមានកម្រិតស្រដៀងគ្នា ដើម្បីជួយពួកគេពង្រីកសមត្ថភាពរបស់ពួកគេជាមួយគ្នា ។ ឬអ្នកអាចចាប់គូអ្នករៀនជាមួយនរណាម្នាក់នៅកម្រិតផ្សេង ។ អ្នករៀនកម្រិតទាបនឹងទទួលបានអត្ថប្រយោជន៍ពីមតិកែលម្អ និងការគាំទ្រ ។ អ្នករៀនកម្រិតខ្ពស់នឹងទទួលបានអត្ថប្រយោជន៍ពីការបង្រៀនមិត្តភក្តិ និងការពន្យល់ជាភាសាអង់គ្លេស ។ សូមចងចាំថា ការមានក្រុមដែលមានសមត្ថភាពនិយាយភាសាអង់គ្លេសខុសៗគ្នាគឺជារឿងធម្មតា ហើយអាចជាឱកាសដ៏ល្អសម្រាប់អ្នករៀនដើម្បីទទួលបានអត្ថប្រយោជន៍ពីការជួយគ្នាទៅវិញទៅមក ។
តើខ្ញុំត្រូវធ្វើយ៉ាងណាពេលសិស្សសួរសំណួរអំពីវេយ្យាករណ៍ ?
ជំនួសឲ្យការផ្តល់នូវការណែនាំពីវេយ្យាករណ៍ដ៏វែង ឬចំណាយពេលច្រើននិយាយអំពីច្បាប់ សូមចង្អុលបង្ហាញអ្នករៀនត្រឡប់ទៅគំរូនេះវិញ ។ អ្នករៀននឹងចៀសវាងកំហុសជាច្រើនដោយធ្វើតាមគំរូនេះ ។ វាកាន់តែមានប្រសិទ្ធភាពក្នុងការរៀនភាសាដោយការអនុវត្តជាជាងការនិយាយអំពីវា ។ ការពន្យល់ណាមួយអំពីវេយ្យាករណ៍គួរតែសាមញ្ញ ខ្លីៗ និងអាចធ្វើសកម្មភាពបាន ។ ប្រសិនបើអ្នកបង្រៀនគោលការណ៍មួយ សូមផ្តល់ឧទាហរណ៍ជាប្រយោគៗ ហើយអញ្ជើញអ្នករៀនឲ្យអនុវត្តការធ្វើតាមគោលការណ៍នេះ ។ អ្នករៀនទទួលបានអត្ថប្រយោជន៍ច្រើនបំផុតពីការស្តាប់ និងអនុវត្តភាសាអង់គ្លេស ។
តើខ្ញុំគួរកែការបញ្ចេញសំឡេងដែរឬទេ ?
សូមកុំចំណាយពេលច្រើនក្នុងការកែតម្រូវការបញ្ចេញសំឡេងច្រើនពេក ។ សូមរំឭកអ្នករៀនថា ការយល់ គឺសំខាន់ជាងការមានការបញ្ចេញសំឡេងដ៏ល្អឥតខ្ចោះ ។ សូមលើកទឹកចិត្តអ្នករៀនឲ្យអនុវត្តការបញ្ចេញសំឡេងក្នុងអំឡុងពេលនៃការសិក្សាផ្ទាល់ខ្លួនរបស់ពួកគេ ដើម្បីពួកគេអាចអនុវត្តតាមល្បឿនរបស់ពួកគេផ្ទាល់ ។ សូមចងចាំថា ប្រសិនបើអ្នករៀនមានការព្រួយបារម្ភខ្លាំងពេកអំពីការបញ្ចេញសំឡេងរបស់ពួកគេ ពួកគេអាចស្ទាក់ស្ទើរក្នុងការអនុវត្តការសន្ទនា ។ សូមលើកទឹកចិត្តអ្នករៀនឲ្យប្រើមុខវិជ្ជាបញ្ចេញសំឡេងតាមអនឡាញ englishconnect.org/learner/resources ។
តើខ្ញុំចុះឈ្មោះ និងគ្រប់គ្រងក្រុម EnglishConnect របស់ខ្ញុំដោយរបៀបណា ?
សូមប្រើឧបករណ៍ QuickReg ( quickreg.englishconnect.org ) ដើម្បីចុះឈ្មោះ និងគ្រប់គ្រងក្រុម EnglishConnect របស់អ្នក ។ QuickReg គឺជាឧបករណ៍ចុះឈ្មោះដែលបានផ្តល់ជូនដោយសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ អ្នកអាចប្រើ QuickReg ដើម្បី ៖
-
បង្កើតក្រុម ៖ ជ្រើសរើសថ្ងៃ ពេលវេលា និងទីតាំងរបស់ក្រុមរបស់អ្នក ។
-
គ្រប់គ្រងក្រុម ៖ មើលព័ត៌មានអ្នកចូលរួម និងធ្វើបច្ចុប្បន្នភាពព័ត៌មានក្រុម ។
-
អញ្ជើញមនុស្សឲ្យចូលរួម ៖ ក្រុមរបស់អ្នកនឹងដាក់នៅលើអនឡាញ englishconnect.org/join ។ អ្នកអាចចែកចាយតំណដើម្បីអញ្ជើញមនុស្សឲ្យចុះឈ្មោះសម្រាប់ក្រុមរបស់អ្នក ។
-
ចែកវិញ្ញាបនបត្រ ៖ នៅចុងបញ្ចប់នៃក្រុមរបស់អ្នក អ្នកអាចចូលប្រើ និងបោះពុម្ពវិញ្ញាបនបត្របាន ។
តើសិស្សទទួលបានវិញ្ញាបនបត្រ EnglishConnect ដោយរបៀបណា ?
EnglishConnect ១ និង ២ ៖ នៅចុងបញ្ចប់នៃក្រុម អ្នករៀនអាចទទួលបានវិញ្ញាបនបត្រចូលរៀន ។ អ្នកដឹកនាំ អ្នកជំនាញ ឬគ្រូបង្រៀនអាចចែកចាយវិញ្ញាបនបត្របាន ។ ប្រទេសមួយចំនួនប្រហែលជាមិនអនុញ្ញាតឲ្យចែកវិញ្ញាបនបត្រ EnglishConnect ទេ ។ សូមពិនិត្យមើលតម្រូវការផ្នែកច្បាប់ក្នុងតំបន់ មុនពេលផ្តល់វិញ្ញាបនបត្រ ( សូមមើល englishconnect.org/leader/approved-locations ) ។
ចំណាំ ៖ ដើម្បីចូលប្រើ និងចែកវិញ្ញាបនបត្រ ក្រុមរបស់អ្នកត្រូវតែចុះឈ្មោះនៅក្នុងឧបករណ៍ QuickReg នៅគេហទំព័រ quickreg.englishconnect.org ។ ( សូមមើល « តើខ្ញុំចុះឈ្មោះ និងគ្រប់គ្រងក្រុម EnglishConnect របស់ខ្ញុំដោយរបៀបណា ? » នៅក្នុងផ្នែក ស.ស.ញ. នេះ ) ។
EnglishConnect ៣ ៖ សិស្សអាចទទួលបានវិញ្ញាបនបត្រនៃការបញ្ចប់ការសិក្សានៅពេលពួកគេបំពេញកម្រិតដែលតម្រូវនៅក្នុងវគ្គសិក្សានេះ ។ ការបញ្ចប់ EnglishConnect ៣ អនុញ្ញាតឲ្យអ្នករៀនរំលងការវាយតម្លៃលើភាសាអង់គ្លេស នៅពេលដាក់ពាក្យទៅ BYU–Pathway Worldwide ។