« តើខ្ញុំដឹកនាំក្រុមសន្ទនាដោយរបៀបណា ? » សម្រាប់គ្រូបង្រៀន EnglishConnect ( ឆ្នាំ ២០២៣ )
« តើខ្ញុំដឹកនាំក្រុមសន្ទនាដោយរបៀបណា ? » សម្រាប់គ្រូបង្រៀន EnglishConnect
តើខ្ញុំដឹកនាំក្រុមសន្ទនាដោយរបៀបណា ?
អ្នកនឹងប្រើ EnglishConnect ១ សម្រាប់អ្នករៀន ឬ EnglishConnect ២ សម្រាប់អ្នករៀន ដើម្បីដឹកនាំក្រុម ។ មេរៀននីមួយៗមានទម្រង់ដូចគ្នានេះ ៖
ស្វាគមន៍ ៖ សូមស្វាគមន៍យ៉ាងកក់ក្តៅចំពោះអ្នករៀន និងណែនាំអ្នកចូលរួមថ្មី ។ បង្កើតការរំពឹងទុកថា អ្នកនឹងនិយាយភាសាអង់គ្លេស ហើយអញ្ជើញមនុស្សគ្រប់គ្នាឲ្យប្រើភាសាអង់គ្លេសឲ្យបានច្រើនតាមដែលអាចធ្វើទៅបាន ។ សូមណែនាំប្រធានបទនៃមេរៀនដោយសង្ខេប ។
ការអធិស្ឋាន ៖ អញ្ជើញអ្នករៀនឲ្យអធិស្ឋានឮៗ ។ ព្យាយាមជ្រើសរើសអ្នករៀនដែលមានអារម្មណ៍មិនភ័យក្នុងការអធិស្ឋានជាភាសាអង់គ្លេស ។ អ្នកអាចអញ្ជើញបុគ្គលនោះឲ្យរៀបចំជាមុនដោយការរៀន « ការអធិស្ឋានជាភាសាអង់គ្លេស » នៅក្នុងឧបសម្ព័ន្ធនៃសៀវភៅសិក្សាសម្រាប់អ្នករៀន ។
គោលការណ៍នៃការរៀនសូត្រ ៖ អាន និងពិភាក្សាពីគោលការណ៍នៃការរៀនសូត្រដែលមាននៅក្នុង « Personal Study » ផ្នែក ( ការសិក្សាផ្ទាល់ខ្លួន ) នៅក្នុងសៀវភៅសិក្សាសម្រាប់អ្នករៀន ។ គោលដៅនៃគោលការណ៍នៃការរៀនសូត្រគឺដើម្បីយាងអញ្ជើញព្រះវិញ្ញាណ នៅពេលអ្នកចែកចាយ និងរៀនសូត្រជាមួយគ្នា « ដោយសារការសិក្សា និងដោយសារសេចក្តីជំនឿផង » ( គោលលទ្ធិ និងសេចក្តីសញ្ញា ៨៨:១១៨ ) ។
សូមយកគំរូតាមរបៀបពិភាក្សាអំពីគោលការណ៍នេះ ដោយចែកចាយខ្លីៗពីរបៀបដែលអ្នកនឹងឆ្លើយសំណួរពិភាក្សាមួយ ។ ប្រើពាក្យ និងឃ្លាសាមញ្ញៗ ។
អញ្ជើញអ្នករៀនឲ្យចែកចាយគំនិត និងបទពិសោធន៍របស់ពួកគេជាមួយគ្នា ។ អ្នករៀនអាចពិភាក្សាគ្នាជាភាសាកំណើតរបស់ពួកគេ ។ ប្រសិនបើពួកគេមានអារម្មណ៍មិនខ្លាច អ្នករៀនអាចជ្រើសរើសប្រើពាក្យ ឬឃ្លាជាភាសាអង់គ្លេស នៅពេលពួកគេពិភាក្សា ។
សកម្មភាព ១ ៖ ដឹកនាំអ្នករៀនតាមរយៈសកម្មភាពនៅក្នុង « Conversation Group » ផ្នែក ( ការពិភាក្សាជាក្រុម ) នៃសៀវភៅសិក្សាសម្រាប់អ្នករៀន ។ សកម្មភាពនីមួយៗរៀបចំអ្នករៀនសម្រាប់សកម្មភាពបន្ទាប់ ។ សកម្មភាពទាំងឡាយជួយសិស្សឲ្យរីកចម្រើនពីការអនុវត្តពាក្យដដែលៗ ទៅជាការបង្កើតការសន្ទនាផ្ទាល់ខ្លួនរបស់ពួកគេ ។
នៅក្នុងសកម្មភាពទី ១ ជួយអ្នករៀនពិនិត្យមើលវាក្យសព្ទ និងលំនាំនៅក្នុងផ្នែក « ការសិក្សាផ្ទាល់ខ្លួន » នៃសៀវភៅសិក្សាសម្រាប់អ្នករៀន ។ គោលដៅគឺដើម្បីរៀបចំអ្នករៀនសម្រាប់សកម្មភាព ២ និង ៣ ដោយជួយពួកគេឲ្យយល់ពាក្យគន្លឹះមួយចំនួន និងនិយាយតាមលំនាំ ។
សកម្មភាព ២ ៖ នៅក្នុងសកម្មភាពទី ២ អ្នករៀនប្រើវាក្យសព្ទ និងលំនាំដើម្បីអនុវត្តការសួរ និងឆ្លើយសំណួរជាមួយដៃគូដោយប្រើព័ត៌មានដែលបានផ្តល់ឲ្យ ។ គោលដៅគឺសម្រាប់អ្នករៀនដើម្បីបង្កើតប្រយោគជាភាសាអង់គ្លេសឲ្យបានច្រើនតាមដែលពួកគេអាចធ្វើបាន ។
សូមលើកទឹកចិត្តអ្នករៀនឲ្យផ្លាស់ប្តូរដៃគូដើម្បីបង្កើនឱកាសអនុវត្ត ។ នៅពេលអ្នកប្រាស្រ័យទាក់ទងជាមួយអ្នករៀន សូមព្យាយាមស្វែងរកអ្នកដែលត្រូវការជំនួយបន្ថែម ។ ត្រូវលើកទឹកចិត្តនិងលើកតម្កើង ។
សកម្មភាព ៣ ៖ នៅក្នុងសកម្មភាពទី ៣ អ្នករៀនមានឱកាសប្រើវាក្យសព្ទ និងលំនាំដើម្បីធ្វើការសន្ទនាពេញលេញនៅក្នុងសាច់រឿងនៃដំណើរជីវិតពិត ។ គោលដៅគឺដើម្បីឲ្យអ្នករៀនមានការសន្ទនាប្រកបដោយអត្ថន័យជាភាសាអង់គ្លេស ។
សូមលើកទឹកចិត្តអ្នករៀនឲ្យផ្លាស់ប្តូរដៃគូឲ្យបានញឹកញាប់ ដើម្បីផ្តល់ឲ្យពួកគេនូវឱកាសអនុវត្តបន្ថែមទៀត ។ នៅចុងបញ្ចប់នៃសកម្មភាពទី ៣ ជាទូទៅ អ្នករៀនទាំងអស់និយាយភាសាអង់គ្លេសដោយមិនយោងទៅសៀវភៅសិក្សារបស់ពួកគេទេ ។ ក្រុមគួរតែមានថាមពល និងចលនា នៅពេលដែលអ្នករៀនធ្វើអន្តរកម្ម និងអនុវត្តជាមួយគ្នា ។ នៅពេលអ្នកចូលរួមជាមួយអ្នករៀន អ្នកអាចសម្គាល់ឃើញថា អ្នកខ្លះយល់ច្បាស់ និងពូកែក្នុងសកម្មភាពនេះ ។ សូមពិចារណាលើការអញ្ជើញឲ្យអ្នករៀនទាំងនេះធ្វើឲ្យការរៀនសូត្ររបស់ពួកគេកាន់តែស៊ីជម្រៅ ដោយរួមបញ្ចូលព័ត៌មានលម្អិតបន្ថែម ឬធ្វើសកម្មភាពដូចគ្នាក្នុងបរិបទផ្សេង ។ ឧទាហរណ៍ នៅពេលដែលអ្នករៀនអនុវត្តការជួបនរណាម្នាក់ សុំឲ្យពួកគេអនុវត្តសាច់រឿងខុសៗគ្នា ដូចជាការជួបមិត្តថ្មី ឬចៅហ្វាយនាយថ្មី ។
សម្រាប់សកម្មភាពនីមួយៗ ៖
-
សូមបង្ហាញពីរបៀបធ្វើសកម្មភាពនោះ ។
-
ចាត់អ្នករៀនជាគូៗ ឬក្រុមតូចៗ ដើម្បីអនុវត្ត ។
-
សង្កេតមើលក្រុមនីមួយៗ និងផ្តល់ការគាំទ្រ ។
វាយតម្លៃ ៖ ជួយអ្នករៀនវាយតម្លៃការរីកចម្រើន និងការខិតខំប្រឹងប្រែងរបស់ពួកគេ ។ សូមជួយពួកគេឲ្យមានអារម្មណ៍ទទួលបានជោគជ័យដោយចង្អុលបង្ហាញពីអ្វីដែលពួកគេអាចធ្វើដើម្បីកែលម្អ ។ សូមជួយអ្នករៀនប្រើប្រាស់ « Personal Study Tracker » ( កម្មវិធីតាមដានការសិក្សាផ្ទាល់ខ្លួន ) ដើម្បីដាក់គោលដៅសម្រាប់ការអនុវត្តប្រចាំថ្ងៃ ។
ការធ្វើសកម្មភាពដោយសេចក្តីជំនឿដើម្បីអនុវត្តភាសាអង់គ្លេសប្រចាំថ្ងៃ ៖ អានសម្រង់ឲ្យឮៗជាមួយក្រុមរបស់អ្នក ។ បង្ហាញសេចក្តីជំនឿរបស់អ្នកថា ព្រះអម្ចាស់អាចជួយពួកគេរៀនភាសាអង់គ្លេសបាន ។ អញ្ជើញពួកគេឲ្យអនុវត្តភាសាអង់គ្លេសជារៀងរាល់ថ្ងៃ ហើយរៀបចំសម្រាប់មេរៀនបន្ទាប់ដោយបំពេញ « Personal Study » សកម្មភាព ( ការសិក្សាផ្ទាល់ខ្លួន ) ។
ការអធិស្ឋាន ៖ អញ្ជើញអ្នករៀនឲ្យធ្វើការអធិស្ឋានបិទជាភាសាអង់គ្លេស ។ ជ្រើសរើសអ្នករៀនដែលមានអារម្មណ៍ជឿជាក់ ឬអ្នកដែលបានអញ្ជើញទុកជាមុន ។
មេរៀន EnglishConnect ត្រូវបានរចនាឡើងដោយប្រើគោលការណ៍នៃការរៀនភាសាដែលបង្ហាញឲ្យឃើញ ។ អ្នកនឹងទទួលបានជោគជ័យនៅពេលអ្នកធ្វើតាមមេរៀន និងបង្កើតបរិយាកាសនៃសេចក្តីជំនឿ ការរាប់អាន និងការរីកចម្រើន ។
ក្រុមតាមអ៊ីនធឺណិត
ប្រសិនបើចាំបាច់ ក្រុមអាចជួបតាមអនឡាញដោយប្រើវេទិកាប្រជុំពីចម្ងាយ ។ សូមចងចាំថា EnglishConnect គឺទទួលបានជោគជ័យបំផុត នៅពេលដែលអ្នករៀនទាំងអស់កំពុងធ្វើអន្តរកម្ម និងអនុវត្តការសន្ទនា ។ ត្រូវប្រាកដថាមានអន្តរកម្មទូទាំងបទពិសោធន៍ទាំងមូល ។ មធ្យោបាយដ៏ល្អបំផុតក្នុងការសម្របសម្រួលអន្តរកម្មគឺចាត់អ្នករៀនជាគូៗ ឬក្រុមតូចៗ ។ ប្រើមុខងារបំបែកក្រុម និងឧបករណ៍ផ្សេងទៀតដើម្បីជួយអ្នករៀននិយាយគ្នាឲ្យបានច្រើនតាមដែលអាចធ្វើទៅបាន ។ ជាឧទាហរណ៍ សូមបែងចែកអ្នករៀនជាពីរក្រុម ឬច្រើនក្រុម ហើយពិភាក្សាជាមួយគ្នា ជាជាងឱ្យអ្នករៀនម្នាក់និយាយ ខណៈពេលដែលក្រុមទាំងមូលកំពុងស្តាប់ ។ រួចមក ចាត់តាំងក្រុមម្តងទៀតសម្រាប់សកម្មភាពបន្ទាប់ ។ សូមលើកទឹកចិត្តមនុស្សគ្រប់គ្នាឲ្យប្រើវីដេអូ ប្រសិនបើអាចធ្វើទៅបាន ។
សូមប្រើ « សេចក្តីណែនាំដើម្បីដឹកនាំក្រុមតាមអ៊ីនធឺណិត » នៅពេលអ្នករៀបចំ និងដឹកនាំក្រុម EnglishConnect តាមអនឡាញ ។
សូមចែកចាយ « សេចក្តីណែនាំសម្រាប់អ្នកចូលរួមក្រុមតាមអ៊ីនធឺណិត » ជាមួយអ្នករៀនរបស់អ្នកដោយដាក់តំណភ្ជាប់នៅក្នុងឈែតក្នុងកំឡុងពេលនៃការប្រជុំរបស់អ្នក ។ សូមយោងទៅលើសេចក្តីណែនាំនេះតាមតម្រូវការ ។
សូមប្រើ EnglishConnect ១ និង ២ « បទបង្ហាញរបស់ក្រុមសន្ទនា » នៅឯគេហទំព័រ englishconnect.org/resources/teaching-materials ។ អ្នកអាចចាក់បទបង្ហាញនេះដើម្បីជួយណែនាំអ្នករៀនតាមរយៈសកម្មភាពនៅក្នុងមេរៀននីមួយៗ ។