Amosa; Opetaia; Iona

I le Amosa 3:3–6, o loo tuuina mai ai e le perofeta o Amosa ni faataitaiga o faaiuga e mafai ona tatou maua mai faailoga tatou te faalogo i ai pe vaai i ai: pe a tagi mai se leona, atonu na ia pueina ni mea e faoa; afai e maua se manulele i se mailei, atonu sa i ai se maunu iina. I fuaiupu 7–8, sa faatatau ai e Amosa lenei upumoni i perofeta. O a ni faaiuga e mafai ona tatou maua mai pe a vavalo se perofeta? O a nisi mea na e aoaoina e uiga i perofeta ao e faitau mai le Amosa 7:10–15?

O le a se mea ua faaali mai e le Alii ia te oe e ala mai i Ana perofeta?

Na saunoa Elder Ulisses Soares e faapea “o le i ai o perofeta o se faailoga lea o le alofa o le Atua” (“E Saunoa Perofeta i le Mana o le Agaga Paia,” Liahona, Me 2018, 99). Mafaufau pe faapefea ona e faamae’aina le fuaiupu lenei: “Ou te iloa e alofa le Atua ia te a’u, aua na te auina mai perofeta o e …” O nisi nei o mau e mafai ona fesoasoani: Teuteronome 18:18; Esekielu 3:16–17; Efeso 4:11–14; 1 Nifae 22:2; Mataupu Faavae ma Feagaiga 21:4–6; 84:36–38; 107:91–92.

O le a sau tala e fai atu i se tasi e lagona e le manaomia perofeta i aso nei?

Tagai foi i Autu ma Fesili, ‟Perofeta” Potutusi o le Talalelei.

E tusa ai ma le Amosa 4:6–13, o le a le mea na faamoemoe le Alii o le a tupu pe a uma ona oo le fanauga a Isaraelu i tofotofoga? (tagai foi i le Helamana 12:3). E ui atonu o ou tofotofoga e le’i auina mai e le Atua, o faapefea ona tuuina atu ai ia te oe ni avanoa e liliu atu ai o Ia?

A o e faitauina le Amosa 5:4, 14–15, mafaufau loloto pe na faapefea ona agalelei mai le Alii ia te oe. Na faapefea ona e maua ai le ola i le sailia o Ia?

A o e faitauina le Amosa 8:11–12, mafaufau pe aisea e avea ai le oge ma se faatusatusaga lelei mo le ola e aunoa ma le afioga a le Atua (tagai foi i le Ioane 6:26–35; 2 Nifae 9:50–51; 32:3; Enosa 1:4–8). E mafai faapefea ona e iloa ua e fiaai faaleagaga?

O nei fuaiupu e mafai foi ona faatatau i le Liliuese Tele (tagai i le Autu ma Fesili, “Liliuese,” Potutusi o le Talalelei). Na faapefea ona aafia fanau a le Atua i lena “oge” faaleagaga? Na faapefea e le Toefuataiga ona malie ai lou fiaai faaleagaga?

Tagai foi i le “The Great Apostasy” (vitio), Potutusi o le Talalelei.

16:32

I le faasino atu i le Opetaia 1:21, na faamalamalama mai ai e Peresitene Gordon B. Hinckley e faapea, e avea i tatou ma faaola i luga o le Mauga o Siona pe a tatou maua sauniga mo e ua maliliu i le malumalu (tagai i le “Tuleiga Faaiu,” Liahona, Nov. 2004, 105). E faapefea ona tutusa le faia o lena galuega—pe afai e na o sina auala itiiti—ma le mea na faia e le Faaola mo i tatou? E faapefea i le faatinoina o lenei galuega ona fesoasoani ia te oe e te lagona ai le latalata atu atili ia Iesu Keriso?

Tagai foi i le “Holy Temples on Mount Zion,” Viiga, nu. 289.

O Nineva sa o se vaega ma fili o Isaraelu, sa lauiloa mo lona faatupu vevesi ma le saua. Iā Iona, sa foliga mai e lē moni le faapea ua latou saunia e salamō. Atonu e aoga le faatusatusa o le uiga faaalia o Iona (tagai i le Iona 1; 3–4) i lagona o Alema ma atalii o Mosaea (tagai i le Mosaea 28:1–5; Alema 17:23–25). O le a se mea e te aoao mai i le Iona 3 lea e musuia ai oe e faasoa atu le talalelei e oo lava ia i latou foi o e e foliga mai e le’i sauni e sui?

A o e faitau i le Iona, vaavaai mo ni faataitaiga o le alofa mutimutivale o le Alii. Aisea e te lagona ai sa “le fiafia” ma “ita tele” (Iona 4:1) ina ua tuuina atu e le Alii le alofa mutimutivale i tagata o Nineva? O le a se mea e te manatu sa taumafai le Alii e aoao atu ia te ia i le mataupu 4? Mafaufau loloto pe na faapefea ona e maua Lona alofa mutimutivale i lou olaga. O le a se mea ua e aoaoina mai ia Iona lea e mafai ona fesoasoani ia te oe e te alofa mutimutivale atili ai?

• Ina ia fesoasoani i lau fanau ia malamalama i le Amosa 3:7, e mafai ona e musumusu atu se savali faigofie i se tasi o i latou ma fai atu ia i latou e faasoa atu le savali i isi tamaiti. E faapefea ona pei le avefeau i lenei gaoioiga o se perofeta? Aisea e tuuina mai ai e le Alii ia i tatou perofeta?

• Ina ia aoao atili e uiga i mea e fai e perofeta, e mafai e oe ma lau fanau ona iloilo savali lata mai nei mai le Peresitene o le Ekalesia o loo i ai nei. E mafai ona outou usu se pese e pei o le “Mulimuli i le Perofeta” (Tusipese a Tamaiti, 58). Faasoa atu i le tasi ma le isi le mafuaaga ua e filifili ai e mulimuli i le perofeta a le Atua.

• Valaaulia lau fanau e faafoliga ua fiaaai a o e faitauina le Amosa 8:11–12. E faape’i lagona pe a tatou fiaaai mo le afioga a le Atua? Atonu e mafai ona faafoliga lau fanau o loo aai a o e faasoa atu i le tasi ma le isi nisi o mau e te fiafia i ai.

• E mafai ona e faaaogaina le Taiala i Tusitusiga Paia, “Liliuese” (Potutusi o le Talalelei), po o le “Ina ua Mavae le Feagaiga Fou” (i le O Tala o le Feagaiga Fou, 167–70) e fesoasoani ai i lau fanau ia malamalama i le “oge” lea na oo mai i le Liliuese Tele ma le auala na faaiuina ai i le Toefuataiga. Faasoa atu i le tasi ma le isi mafuaaga e te faafetai ai ona sa toefuatai mai e le Alii Lana talalelei i o tatou aso.

  

  2:52

• Ina ia fesoasoani i lau fanau e aoao le tala ia Iona, e mafai ona e toe iloiloina le “Iona le Perofeta” i O Tala o le Feagaiga Tuai; tagai foi i le itulau o gaoioiga o le vaiaso lenei). Ona mafai lea ona e fesili atu:

  • O le a le mea na tupu ina ua le usitai Iona i le Alii? (tagai i le Iona 1:4–17).

  • O le a le mea na faia e Iona e salamo ai? (tagai i le Iona 1:10–12; 2:1–4, 9; 3:1–4).

  • O le a le mea na tupu ina ua ia usitai? (tagai i le Iona 3:5).

  

  2:30

• Atonu e fiafia lau fanau e toe faamatala pe faatino le tala ia Iona. Faasoa atu i le tasi ma le isi nisi o aafiaga ina ua finagalo le Alii e te faia se mea sa faigata ia te oe. Na faapefea ona Ia fesoasoani ia te oe ia usitai ia te Ia?

• Atonu e mafai ona faafoliga lau fanau o loo latou faatalanoaina Iona e uiga i lona aafiaga. O a fesili o le a latou fesili atu ai ia te ia? Uunaia i latou e fai ni fesili e iloa ai mea na aoaoina e Iona e uiga i le Alii. Mata o le a se mea e ono fai mai ai Iona, mo se faataitaiga, e uiga i le alofa mutimutivale o le Alii? (tagai i le, mo se faataitaiga, Iona 2:7–10; 3:10; 4:2).

• Fesoasoani i lau fanau e mafaufau i ni faataitaiga na faaali atu ai le alofa mutimutivale o le Faaola i isi, pei o Mareko 2:3–12; Luka 23:33–34; ma le Ioane 8:1–11. E mafai ona e saili ma lau fanau mo ata o nei faataitaiga. O a ni avanoa o loo tatou maua ina ia tatou alofa mutimutivae atu ai i isi?