Hosea 1–6; 10–14; Ioelu

O le toalua o Hosea, o Komeri, sa le faamaoni ia te ia, ma sa faaaoga e le Alii lenei mea faanoanoa e aoao ai Isaraelu i le ala e manatu ai o Ia ia te i latou ma a latou feagaiga ma Ia. Ao e faitau i le Hosea 1–3, mafaufau loloto pe o le a se finagalo o le Alii i Lana faiā ma Lona nuu o le feagaiga. E faapefea e le osia o se feagaiga ma le Alii ona pei o le ulu atu i se faaipoipoga? E faapefea e le solia o lena feagaiga ona pei o le lē faamaoni i se toalua? (tagai i le Hosea 2:5–7,13). O le a le mea ua aoao mai i le Hosea 2:14–23 ia te oe e uiga i le alofa ma le alofa mutimutivale o le Alii? E faapefea ona faaali atu lou alofa ma lou lotonuu ia te Ia?

I le Hosea 14, vaavaai mo le tele o folafolaga matagofie ua faia e le Alii ia i latou o e toe foi atu ia te Ia. O le a le uiga ia te oe o le fuaitau “alofa fua ia i latou”? (fuaiupu 4). O a mea ua aoao mai e tala faatusa i laau i fuaiupu 5–8 ia te oe e uiga i faamanuiaga a le Alii, e aofia ai faamanuiaga o le salamo? I le avea ai o se vaega o lau suesuega, mafaufau e usu pe faalogologo i se viiga e uiga i le alofa mutimutivale o le Faaola, e pei o le “O Mai ia Iesu” (Viiga, nu. 65).

Sa ofoina atu e tagata i aso o Hosea taulaga i manu, ae sa latou solia poloa’iga e sili atu ona tāua. O le a sou manatu i le uiga o le faapea, “o le alofa [e] loto i ai [le Alii], ae le o le taulaga; ia iloa foi le Atua e sili lea i lo’u manatu i taulaga mu? (Hosea 6:6). O le a sou manatu i le uiga o le, mo le amiotonu ia pei o se puao po o le pei o se sau i le taeao? (tagai i le Hosea 6:4). O le a le mea e tatau ona pei ai lo tatou amiotonu? (tagai i le Isaia 48:18; 1 Nifae 2:9–10).

E mafai foi ona e faitau i le Mataio 9:10–13; 12:1–8 e vaai pe na faapefea ona faaaoga e le Faaola le Hosea 6:6 i le taimi o Lana auaunaga. E faapefea ona fesoasoani nei fasifuaitau ina ia e malamalama ai i upu a Hosea?

Pe a faitau le Ioelu 2:12–13, atonu e fesoasoani lou iloa o le saeia po o le sasaeina o ofu o se tagata sa o se faailoga i fafo o le faavauvau po o le faanoanoa. E faapefea ona ese le saeia o o tatou loto mai le saeia o o tatou ofu?

O a ni mea e talitutusa ai o tatou aso ma le aso na muai vaai i ai Ioelu? (tagai faapitoa lava i le Ioelu 2:1–2, 11, 18–32). O le a se mea ua faagaeetia ai oe e uiga i faamanuiaga folafola atu e le Alii i fuaiupu 18–32? Aisea atonu e faapitoa ai le taua o nei faamanuiaga i aso nei?

Atonu e manaia le faitau i le mea na fai mai ai Moronae e uiga i le Ioelu 2 ina ua asiasi atu o ia ia Iosefa Samita i le 1823 (tagai i le Iosefa Samita—Talafaasolopito 1:41). O le a sou lagona i valoaga o loo i le Ioelu 2:28–32 o loo faataunuuina i o tatou aso? (tagai foi i le Galuega 2:1–21). O le a sou manatu o le a le uiga o le faapea, o le “liligi ifo [e le Alii Lona] agaga i luga o tagata uma”? (Ioelu 2:28).

Atonu e te mafaufau loloto i upu nei mai ia Peresitene Russell M. Nelson e faapea: “I aso a sau, o le a le mafai ona tatou ola faaleagaga e aunoa ma le taiala, taitaiga, faamafanafanaga, ma le faatosinaga faifai pea a le Agaga Paia” (“Faaaliga mo le Ekalesia, Faaaliga mo o Tatou Olaga,” Liahona, Me 2018, 96). Aisea e alagatatau ai faaaliga i lou ola faaleagaga?

O a mea e mafai ona e faia pe afai e te le o mauaina le tele o lena liligi ifo o le agaga? O ni isi nei o faataitaiga lea e ono fesoasoani. O le a le mea na faia e tagata o nei tusitusiga paia ina ia maua ai le liligiina mai o le Agaga o le Alii?

• Mosaea 4:1–3, 19–20; 18:7–11

• Helamana 6:34–36

• Mataupu Faavae ma Feagaiga 19:37–41

A o e faitauina upu nei mai ia Elder David A. Bednar, mafaufau loloto i le uiga ia te oe o le lagonaina o se liligiina mai o le Agaga Paia i lou olaga i aso taitasi:

“E masani ona tatou faafaigatāina ia i tatou lava le mauaina o faaaliga patino. O le uiga o la’u tala o se tautoga folafolaina o le, pe a tatou faamamalu a tatou feagaiga, e mafai ona tatou maua i taimi uma le Agaga Paia e avea ma a tatou soa tumau. Ae tatou te talanoa i ai ma faia e pei o le faalogo i le siufofoga o le Alii e ala i Lona Agaga o se mea e seāseā tupu. … [O le Agaga] e tatau ona faatasi ma i tatou i taimi uma lava. E le faatele i se sekone, ae afai o loo faia e se tagata le mea sili—e le faapea ia e atoatoa—ae afai o loo e faia ma ‘ou faia le mea sili, tatou te le o solia ni agasala matuiā, ona mafai lea ona tatou faalagolago i le Agaga Paia e taialaina i tatou. …

“… E foliga mai tatou te talitonu o le Agaga Paia e matautia ma telē ma faafuasei, a e filemu ma itiiti ma faateleina i le aluga o taimi” (“Elder David A. Bednar Discussion” [afiafi ma se Pulega Aoao, 7 Fep., 2020], broadcasts.ChurchofJesusChrist.org).

Tagai foi i le Gary E. Stevenson, “Uunaiga a le Agaga,” Liahona, Nov. 2023, 42–45; “Teritori a le Fili” (vitio), Potutusi o le Talalelei.

3:38

• I le tusi a Hosea, na faatusatusa ai e le Alii Ana feagaiga ma Isaraelu i se faaipoipoga. Ina ia aoao mai lenei faatusatusaga, e mafai ona e vaai ma lau fanau i se ata o se tamaitai faaipoipo ma le alii faaipoipo ma talanoa e uiga i le auala e finagalo ai le Tama Faalelagi i se tane ma se avā e taulimaina ai e le tasi le isi. Fesoasoani i lau fanau e sue upu i le Hosea 2:19–20 lea o loo faamatala ai lagona o le Alii e uiga ia i tatou. Faafefea ona tatou faaali atu i le Alii tatou te alolofa ia te Ia ma o le a tatou faamaoni ia te Ia?

• O loo faasino atu leHosea 10:12 i le luluina, seleseleina, taimi, ma le timu e valaaulia ai i tatou e saili le Alii. Ao e faitau i lenei fuaiupu, o a manatu fatufatuai e oo mai i lou mafaufau e mafai ona musuia tamaiti e saili ia te Ia? Mo se faataitaiga, atonu e mafai e lau fanau ona tusi se uati ma tusi i lalo ni auala e mafai ona latou sailia ai le Alii i taimi eseese i le aso atoa. O se pese e pei o le “Anytime, Anywhere” (Potutusi o le Talalelei) e mafai ona fesoasoani ia te oe e aoao atu ai o se taimi lelei lava i taimi uma e saili ai le Alii.

• Pe e mafai foi e lau fanau ona faia ni faatinoga faigofie e o faatasi ma le fuaiupu, e pei o le faafoliga o loo totoina ni fatu, piki fualaau faisua, po o le tutu i le timu. Fesoasoani i lau fanau e faatusatusa le totoina o se fatu laau ma selesele ni meaʻai lelei i le ola amiotonu ma le mauaina o faamanuiaga a le Alii. Ona mafai lea ona outou ta’u atu e le tasi i le isi e uiga i faamanuiaga ua to mai e le Alii i ou luga a o e taumafai e saili ia te Ia.

• Ina ia faamamafa atu le upumoni o loo i le Hosea 13:4 lea e leai se Faaola vagana ai Iesu Keriso, e mafai ona e faaali atu i lau fanau ni ata o ni tagata se toatele, e aofia ai ma Iesu. E mafai ona feauauai lau fanau e faasino atu i le tagata o loo i ai le mana e laveai ai i tatou mai le agasala ma le oti. Faasoa atu lau molimau ia Iesu Keriso ma Lana Togiola.

• E mafai ona vaavaai lau fanau mo upu i le Hosea 13:4, 14 lea o loo faamatala ai Iesu Keriso. O le a se mea o aoao mai e nei upu e uiga ia te Ia? Mafaufau e fesoasoani i lau fanau e faaaoga le Taiala i Tusitusiga Paia e sue ai isi mau lea o loo aoao mai ai o Iesu o lo tatou Faaola ma le Togiola. Faasoa atu i le tasi ma le isi ou lagona e uiga ia Iesu Keriso.

• Atonu e mafai ona e fesoasoani i lau fanau ia malamalama i le Ioelu 2:28–29 e ala i le tuu atu ia i latou e sasaa atu se vai ona faatusatusa lea i se faatulutulu po o se sinasina lemu. Faamata o le a le uiga mo le Agaga ina ia “liligi ifo” i o tatou luga?

• A o outou faitauina faatasi le Ioelu 2:28–29 , atonu e mafai ona e valaaulia lau fanau e tuu i totonu igoa o le tasi ma le isi e sui ai fuaitau “o ou atalii” ma “o ou afafine.” Ona fesoasoani lea ia i latou e suesue i tusitusiga paia e pei o le Ioane 14:16; Moronae 10:5; Mataupu Faavae ma Feagaiga 42:17 e iloa ai pe faapefea ona fesoasoani le Agaga ia i latou.