Tanielu 1–7

I se faauigaga, o loo tatou nonofo uma lava i Papelonia. E masani ona tatou feagai ma faaosoosoga e fetuutuunai ai o tatou tulaga faatonuina ma liliuese ai mai le faatuatua ia Keriso. Ao e faitau i le Tanielu 1, 3, ma le6, matau le ala na faamalosia ai Tanielu, Sataraka, Mesako, ma Apeteniko e fai mea na latou iloa e sese. Na faapefea ona latou tali atu i nei tulaga? (tagai i le Tanielu 1:10–13; 3:15–18; 6:10). O a ni taunuuga o lo latou faatuatua? O le a le mea ua e aoao mai i nei aafiaga lea e mafai ona fesoasoani ia te oe e faalagolago ai i le Alii i taimi e te feagai ai ma mea faafeagai? Ma lenei foi, ia mafaufau i fesili nei:

• O anafea na e lagonaina ai le uunaia malosi e fai se mea na e iloaina e sese? O faapefea ona faamanuiaina oe e le Alii ona o le tausia o Ana poloaiga?

• Ae faapefea pe afai e le taitaia oe e lou faatuatua i vavega o loo e sailia? (mo se faataitaiga, tagai i le Alema 14:8–13). E faavae i mea e te faitauina i le Tanielu 3:13–18, o le a sou manatu, mata e faapefea ona taliina e Sataraka, Mesako, ma Apeteniko le fesili lenei? E mafai faapefea e la latou faataitaiga ona aafia ai le ala e te taulima ai ou tofotofoga?

• E mafai faapefea e au filifiliga amiotonu ona taitai atu isi i le faatuatua sili atu i le Alii? (tagai i le Tanielu 2:47; 3:28–29). Mafaufau loloto i aafiaga o au filifliga i isi.

Tagai foi i le Dieter F. Uchtdorf, “Aua le Mata’u, Tau Lava Ina Talitonu,” Liahona, Nov. 2015, 76–79.

E ala i faaaliga, na vaai ai Tanielu na muaita’u mai ai e le miti a Nepukanesa ia malo faalelalolagi i le lumanai, faapea foi ma le malo o le Atua i le lumanai, lea “e le faaumatia e faavavau” (Tanielu 2:44). Na aoao mai Elder D. Todd Christofferson, “O le Ekalesia o le malo lena na valoia i aso e gata ai e lei fausiaina e le tagata, ae na faatuina e le Atua o le lagi ma taavale atu ai e pei o se maa ‘na tofi mai le mauga e aunoa ma ni lima’ e faatumu ai le lalolagi” (“E Manaomia i Se A Le Ekalesia,” Liahona, Nov. 2015,111). Mafaufau i le malo o le Atua i aso e gata ai ao e faitau i le faamatalaga o le maa i le Tanielu 2:34–35, 44–45. O le a lau matafaioi i le fesoasoani atu i lenei valoaga ia faataunuuina?

Tagai foi i le “Faalogo, Nu’u Uma!,” Viiga, nu. 165; “God Gave Them Knowledge” (vitio), ChurchofJesusChrist.org.

13:58

A o e toe iloiloina le Tanielu 2:1–15, mafaufau po o a ni ou lagona pe afai e te i ai i le tulaga o Tanielu. O le ā le mea na faia e Tanielu? (tagai i le Tanielu 2:16–18). O a le mea e mafai ona e aoao mai le Tanielu 1:17 e uiga i le ala na saunia ai e le Atua Tanielu? O le a se mea e mafai ona e aoao mai upu ma faatinoga a Tanielu ina ua uma ona ia maua le fesoasoani a le Alii? (tagai i le Tanielu 2:19–30).

I le taimi o le galuega faalelalolagi a le Faaola, e toatele tagata Iutaia na manatu i le faalaniga “Atalii o le tagata” mai le Tanielu 7:13 e faatatau i le afio mai o le Mesia. O le a se mea ua e aoaoina e uiga i le Mesia mai le Tanielu 7:13–14? (tagai foi i le Mose 6:57).

Sa masani ona faasino atu le Faaola ia te ia lava o “le Atalii o le tagata.” Mafaufau e toe iloilo nisi o faataitaiga: Mataio 25:31; Mareko 9:31; 10:45. O le a le mea o loo Ia aoao mai e uiga ia te Ia lava i nei fuaiupu? I le Mareko 14:61–64, na faaaoga ai e Iesu lenei faalaniga i le aso mulimuli o Lona soifuaga faaletino. Matau le tali mai tagata na faalogo i Lana folafolaga. E faapefea e le valoaga a Tanielu e uiga i le Atalii o le Tagata ona aafia ai ou lagona e uiga i le mea na tupu ia te Ia i le Mareko 15?

E pei lava ona inosia Iesu ona o le tautino atu o Ia o “le Atalii o le tagata,” e mafai foi ona e feagai ma sauaga ona o le folafola atu o le upumoni. Faatusatusa le valoaga i le Tanielu 7:13–14 ma folafolaga o loo i le Mataupu Faavae ma Feagaiga 121:29, 46.

Tagai foi i le Mataupu Faavae ma Feagaiga 49:6; Taiala i Tusitusiga Paia, “Atalii o le Tagata,” Potutusi o le Talalelei.

• Ina ia fesoasoani i lau fanau e aoao mai tala musuia o loo i le tusi a Tanielu, e mafai ona e maua ata o mea na tutupu i le Tanielu 1, 3, ma le6 (tagai i le itulau o gaoioiga o lenei vaiaso po o le Tusi Ata o le Talalelei, nu. 23, 25,26). Ona mafai lea ona e faafaō ata ma valaaulia se tamaitiiti e fuli i luga se ata se tasi ma talanoa e uiga i le tala o loo faatusa i ai. (Mo se fesoasoani, tagai i le “Tanielu ma Ana Uo,” “Sataraka, Mesako ma Apeteniko,” ma le “O Tanielu ma le Lua o Leona” i Tala o le Feagaiga Tuai, 154–56, 160–62, 163–65.)

  

  1:39

  

  1:39

  

  1:45

• Fesoasoani i lau fanau e mafaufau i tulaga e ono uunaia ai i latou e fai se filifiliga sese, e pei o Tanielu ma ana uo sa i ai i le Tanielu 1, 3, ma le6. Faasoa atu i le tasi ma le isi le auala na faamanuiaina ai oe mo le faia o le filifiliga sa’o e tusa lava pe sa faigata. E mafai ona outou usu faatasi se pese e faatatau i lenei autu, e pei o le “Filifili Tau o Mea Tonu” (Viiga, nu.149).

• O le faitauina o le tala e uiga ia Tanielu ma ana uo i le teenaina o aano o manu ma uaina a le tupu e ono musuia ai se talanoaga e uiga i le tulafono o le soifua maloloina ua tuuina mai e le Tama Faalelagi ia i tatou i aso nei (tagai i le Mataupu Faavae ma Feagaiga 89). Atonu e mafai ona e vaavaai mo faamanuiaga na maua e Tanielu ma ana uo ma faatusatusa i faamanuiaga na folafola mai i le Upu o le Poto (tagai i le Tanielu 1:15–17 ma le Mataupu Faavae ma Feagaiga 89:18–21).

• A o outou faitauina faatasi ma lau fanau le Tanielu 2:31–35, 44–45 , e mafai ona e valaaulia i latou e tusi se ata o le miti a Nepukanesa. Fesoasoani ia latou malamalama i le maa o loo i le miti e faatusa i Le Ekalesia a Iesu Keriso o le Au Paia o Aso e Gata Ai. O le a se mea ua tatou aoaoina e uiga i le Ekalesia mai lenei miti? Fai atu i lau fanau e taʻu mai ni mea na faia e le Tama Faalelagi e faatu ai Lana Ekalesia i aso e gata ai. Afai e latou te manaomia le fesoasoani, e mafai ona e faaali atu ata o mea na tutupu mai le Toefuataiga o le Ekalesia (tagai i le Tusiata o le Talalelei, nu. 90–95).

• Aisea na matua taua ai le tatalo i le Tama Faalelagi ia Tanielu? Atonu e mafai ona outou talanoa ma lau fanau e uiga i lena fesili a o outou faitau faatasi le Tanielu 6 . Ona mafai lea ona outou ta’u atu i le tasi ma le isi le mafuaaga e taua ai le tatalo ia te oe. Atonu e fiafia lau fanau e tusi ni ata o i latou lava o loo tatalo i tulaga eseese. E mafai ona latou faaaogaina a latou ata e aoao ai e le tasi le isi e mafai ona tatou tatalo i le Tama Faalelagi e tusa lava po o fea tatou te i ai po o a mea tatou te manaomia.