Ieremia 31–33; 36–39; Auega 1;3

I le Ieremia 31;33 sa faailoa mai ai e le Alii le “auega, ma le tagi lotulotu lava” (Ieremia 31:15) o le a oo i tagata Isaraelu a o latou i ai i le faatagataotauaina. Ae peitai, sa ia tuuina mai foi ni upu faamafanafana ma le faamoemoe. Vaavaai mo na mea a o e faitauina nei mataupu. O a ni folafolaga na e mauaina e aoga ia te oe?

E ui ina sa solia e tagata Isaraelu la latou feagaiga, sa valoia e Ieremia o le a toe faatu e le Alii se “feagaiga fou” ma le “faavavau” i Lona nuu (Ieremia 31:31; 32:40). O le a lena feagaiga? Mafaufau e vaavaai mo ni malamalamaaga i le Taiala i Tusitusiga Paia, ”Feagaiga Fou ma le Faavavau,” Potutusi o le Talalelei.

A o e faitauina le Ieremia 31:31–34; 32:37–42, mafaufau loloto:

• O le uiga ia te oe o le avea ma se vaega o tagata o le feagaiga a le Atua.

• O le uiga o le tusia o Lana tulafono i lou loto.

• O mea ua folafola mai e le Alii pe a e osia feagaiga ma Ia.

• O le auala e suia ai oe i lau sootaga o le feagaiga ma le Alii.

O a ni folafolaga na e faia i le Atua a o e auai i sauniga paia? O faapefea ona Ia faataunuuina Ana folafolaga ia te oe?

Tagai foi i le David A. Bednar, “[Ia] Mau Oe ia te A’u, ma A’u ia te Oe; O Lea, Savali Faatasi ma A’u,” Liahona, Me 2023, 123–26.

E tusa ai ma le Ieremia 36:2–3, aisea na poloaiina ai e le Alii ia Ieremia e faamaumau ana valoaga? Ao e faitau i le Ieremia 36, mafaufau e matau po o a ni lagona o tagata nei e uiga i nei valoaga:

• O Le Alii (tagai i le fuaiupu 1–3, 27–31)

• Ieremia (tagai i fuaiupu 4–7, 32)

• Paruka (tagai i fuaiupu 4, 8–10, 14–18)

• Ieuti ma le Tupu o Ioakima (tagai i fuaiupu 20–26)

• Elenatana, Tilaia, ma Kimaria (tagai i le fuaiupu 25)

Mafaufau loloto pe o a ni ou lagona e uiga i tusitusiga paia. Na faapefea ona fesoasoani ia te oe e te liliu ese ai mai le amioleaga?

I le Ieremia 37:1–3, 15–21; 38:1–6, 14–28, o le a se faamaoniga ua e vaaia lea na talitonu le Tupu o Setekaia o Ieremia o le perofeta moni a le Alii? O le a se faamaoniga ua e vaaia faapea e le’i talitonu Setekaia? O le a se mea ua e aoao mai i lenei faatusatusaga? A o e faitauina le Ieremia 39, mafaufau loloto i le eseesega semanu e faia pe ana faapea e mulimuli Setekaia ma lona nuu i le perofeta ma tausia poloaiga a le Alii. (Faatusatusa le mea na tupu ia Setekaia ma le mea na tupu i le aiga o Liae i le 1 Nifae 1–2.)

Na manatu taitai o le tupu o valoaga a Ieremia ua faaitiitia ai le naunau o a latou fitafita e tau, o lea na latou lafoina ai Ieremia i totonu o se falepuipui eleelea (tagai i le Ieremia 38:1–4). I le Ieremia 38:6–13, o le a se mea e faagaeetia ai oe e uiga i le tali a Epetemeleka le Aitiope? Matau foi le faamanuiaga na tuuina mai e le Alii ia Epetemeleka i le Ieremia 39:15–18.

E mafai faapefea ona e mulimuli i le faataitaiga a Epetemeleka?

O le tusi o Auega o se tuufaatasiga o solo na tusia ina ua mavae le faatafunaga o Ierusalema ma lona malumalu. Aisea e te manatu ai e taua le faasaoina o na tusiga? Mafaufau po o le a se mea na fesoasoani upu valiata o loo i le Auega 1 ma le3 e te malamalama ai e uiga i le faanoanoa tele na lagonaina e Isaraelu. O a ni savali o le faamoemoe ia Keriso ua e mauaina? (tagai faapitoa i le Auega 3:20–33; tagai foi i le Mataio 5:4; Iakopo 4:8–10; Alema 36:17–20).

Na ta’ua e Peresitene M.Russell Ballard ni tulaga e ono mafua ai ona leai se faamoemoe o nisi, ma na ia ofoina atu le fautuaga i le mea e maua ai le faamoemoe:

“O nisi o i tatou e ono iloa o o tatou olaga ua tumu i le faanoanoa, lē faamalieina, ma le faavauvau. E toatele e lagona le le mautonu e feagai ma le vevesi e foliga mai ua tumu ai le lalolagi. O isi ua feita i tagata o aiga o e ua tafefea atu i alavai i se tafega malosi, mataita o mataupu autu ua faavaivaia ma teena ai tulaga mamā. … O le toatele ua malilie i latou lava e talia le amioleaga ma le matautia o le lalolagi o se vaega e le mafai ona faaleleia. Ua leai so latou faamoemoe .…

“…O nisi o i tatou atonu ua leai atoa lava se faamoemoe ona o le agasala ma le solitulafono. E mafai e se tagata ona loloto tele le aafia i ala o le lalolagi ua ia vaai ai i le leai o se auala e sao ai ma leai atoa ai lava se faamoemoe. O la’u tatalo i e ua pa’u’ū atu i totonu o lenei mailei a le fili o le aua lava nei fiu! E tusa lava po o le a le foliga faaletonu o mea po o le popole latou te oo i ai, faamolemole talitonu mai ia te a’u, e mafai lava ona outou maua le faamoemoe i taimi uma. Taimi uma” (“The Joy of Hope Fulfilled,” Ensign, Nov. 1992, 31–32).

Tagai foi i le “Come, Ye Disconsolate,” Viiga, nu. 115.

• A o e faitauina faatasi ma lau fanau le Ieremia 31:3 , e mafai ona latou fesoasoani ia te oe e sue mea faitino (po o ata o mea faitino) lea e umi se taimi e tumau ai, e pei o se tupe siliva metale, ma nisi e leai, e pei o se fasi fualaau aina. E mafai ona e talanoa e uiga i le uiga o le “faavavau” ma faasoa atu i le tasi ma le isi le auala na e lagonaina ai le “alofa e faavavau” o le Tama Faalelagi. E mafai foi ona outou usuina faatasi le “God Is Watching Over All”(Tusipese a Tamaiti, 229).

• Atonu e fiafia lau fanau e tusi se fatu i luga o se fasi pepa ona tusi lea i totonu o le fatu o mea ua latou aoaoina mai le Ieremia 31:31–34 e uiga i le osia o feagaiga ma le Atua. Atonu e te manao e toe iloilo le feagaiga latou te osia i le papatisoga (tagai i le Mosaea 18:10, 13) ma talanoaina po o le a le uiga o le tusia o nei folafolaga i totonu o o latou loto.

• O le itulau o gaoioiga o lenei vaiaso e mafai ona fesoasoani i lau fanau e aoao ai e uiga ia Ieremia, Paruka, ma le tupu (tagai i le Ieremia 36). E mafai foi ona latou faia ni faatinoga na e o faatasi ma upu o loo i le Ieremia 36:4–10, e pei o le tusia i se tusi (tagai i le fuaiupu 4) ma le faitauina o tusitusiga paia i tagata (tagai i fuaiupu 8, 10).

• E mafai ona e vaai ma lau fanau i se tusi a tamaiti ma se kopi o tusitusiga paia ma talanoa e uiga i le eseesega o nei tusi. O le a le mea e faapitoa ai tusitusiga paia? Atonu e musuia le faasoa atu i le tasi ma le isi o nisi o fuaitau o mau na e faapitoa ia te oe.

• E mafai ona e faaaogaina le ata i le faaiuga o le otootoga e fesoasoani ai i lau fanau e vaai faalemafaufau i le tala ia Epetemeleka i le Ieremia 38:6–13. Atonu e mafai ona e fesoasoani ia i latou e sue se fuaiupu lea na faia ai e Epetemeleka se mea lototoa e fesoasoani ai i le perofeta a le Alii. O le a se mea e mafai ona tatou faia e faaali atu ai ua tatou iloa o lo tatou perofeta i aso nei ua valaauina e le Atua?

• Ina ia faailoa atu Auega, atonu e te manao e faamalamalama atu i lau fanau e faapea ona e lei salamo tagata Isaraelu, o lea na faaumatia ai Ierusalema ma le malumalu. E mafai ona outou faasoa atu i le tasi ma le isi o outou lagona pe ana faapea sa outou nonofo ai iina i lena taimi (tagai i le Auega 1:1–2, 16). E mafai faapefea e le savali i le Auega 3:22–26 ona tuuina atu ai ia te oe le faamoemoe?

• E mafai foi ona outou ta’u atu i le tasi ma le isi ni taimi na outou lagona ai le faanoanoa i se filifiliga leaga na e faia. O le a se mea tatou te maua i le Auega 3:22–26 lea e fesoasoani ia i tatou ia malamalama ai i le faamagaloga ua ofoina mai e Iesu Keriso?