“19–25 Oketopa. ’Na A’u Iloa Oe A O Le’i Faia Oe E A’u i le Manava’: Ieremia 1–3; 7; 16–18; 20,” Sau, Mulimuli Mai ia te A’u—Mo Le Aiga ma le Ekalesia: Feagaiga Tuai 2026 (2026)

“19–25 Oketopa. ’Na A’u Iloa Oe A O Le’i Faia Oe E A’u i le Manava,’” Sau, Mulimuli Mai ia te A’u: Feagaiga Tuai 2026

Ieremia, saunia e Walter Rane

19–25 Oketopa: “Na A’u Iloa Oe A O Le’i Faia Oe E A’u i le Manava”

Ieremia 1–3; 7; 16–18;20

I le amataga, sa le’i manatu Ieremia o le a avea o ia ma se perofeta lelei. “Faauta, ou te leiloa ona tautala,” sa ia tetee atu ai (Ieremia 1:6). Sa faamautinoa atu le Alii ia te ia, “Ua ou tuu atu a’u upu i lou gutu” (fuaiupu 9). Sa manatu Ieremia o ia o se “tamaitiiti” e leai se poto masani (fuaiupu 6), ae sa faamalamalama atu e le Alii o le mea moni ua leva ona saunia o ia nai lo lona iloaina—sa faauuina o ia i lenei valaauga ae le’i fanau mai o ia (tagai i le fuaiupu 5). O lea na tuu ese ai e Ieremia ona popolega ma talia le valaau. Sa ia lapataia tupu ma ositaulaga o Ierusalema, o le latou paia faafoliga o le a lē faasaoina ai i latou. O le “tamaitiiti” o lē na manatu e le mafai ona tautala na oo ina lagonaina upu a le Atua i “[lona] loto e pei o se afi mumū” ma na le mafai ona faafilemu o ia (Ieremia 20:9).

O le tala o Ieremia o lau tala foi lea. Sa silafia foi oe e le Atua, ae e te lei fanau mai ma saunia oe mo lau misiona i le olaga. Faatasi ai ma isi mea, o lena misiona e aofia ai le mea na muai vaai i ai Ieremia: o le faapotopotoina o le nuu o le Atua, taitoatasi, e “aumaia [latou] i Siona” (Ieremia 3:14). Ma e tusa pe tatou te le iloa tonu le mea e fai pe tautala atu ai, e mafai ona “aua e te fefe …; aua ou te ia te oe e laveai ia te oe, ua fetalai mai ai Ieova” (Ieremia 1:8,19).

Mo se vaaiga aoao o le tusi o Ieremia, tagai i le “Ieremia” i le Bible Dictionary.

Manatu mo le Aoaoina i le Aiga ma i le Ekalesia

Ieremia 1:4–19; 7:1–7; 20:8–10

Ua valaauina perofeta e saunoa atu i afioga a le Alii.

Vaai faalemafaufau o loo e talanoa i se uo e lei faalogo lava i perofeta, ma ua e filifili e faamatala le manatu faavae e faaaoga ai le valaauina o Ieremia e avea ma perofeta i le Ieremia 1:4–19. O le a se mea e te maua i nei fuaiupu o loo aoao mai ai se mea e uiga i perofeta a le Atua? E mafai foi ona e vaai i le Ieremia 7:1–7; 20:8–9 ma se viiga e pei o le “We Listen to a Prophet’s Voice” (Viiga, nu. 22).

Atonu foi e te manao e aoao lau uo e uiga i le perofeta soifua o aso nei. E i ai se mea i nei fuaiupu e ono fesoasoani? Mo se faataitaiga, O a mea ua “liaiina” pe “aveesea” e perofeta o o tatou aso? O a mea ua latou “faatūina” ma “totōina”? (Ieremia 1:10). Na faapefea ona e iloa o lo tatou perofeta soifua ua valaauina e le Atua?

Tagai foi i le Mataupu Faavae o le Faatuatua 1:6, 9; “Why Do We Have Prophets?” (vitio), ChurchofJesusChrist.org.

Ieremia 1:5

Sa silafia e le Atua a’u ae ou te le’i fanau mai.

O le a le mea na aoaoina e Ieremia e uiga ia te ia lava i le Ieremia 1:5? I le avea ai ma se perofeta fou ua valaauina, aisea o le a taua ai mo ia ona silafia lena faamatalaga?

O le tele o mea na aoaoina e Ieremia e uiga ia te ia lava i le Ieremia 1:5 e moni foi e uiga ia te oe. Na silafia foi oe e le Atua ae e te lei fanau mai ma saunia oe mo tiutetauave patino. Ina ia aoao atili e uiga i lou olaga ae e te lei fanau mai, faitau le Alema 13:1–4; Mataupu Faavae ma Feagaiga 138:53–56; ma le Aperaamo 3:22–23. E mafai ona e faia se lisi o upumoni ua e mauaina. Aisea e taua ai lou iloa o lenei faamatalaga?

Ina ia aoao e uiga i le auala na aafia ai le soifuaga o Elder Ahmad S. Corbitt i nei upumoni, suesue i lana savali “E Mafai Ona E Faapotopotoina Isaraelu!” Liahona, Me 2021, 75–77). E mafai faapefea e le iloaina o lou muai olaga ona aafia ai le ala e te ola ai i lou olaga i le tino?

O le mea lenei na saunoa ai Peresitene Russell M. Nelson e uiga i lou muai olaga:

“Ua loa ona silafia oe e lou Tama Faalelagi. O oe, o Lona atalii po o le afafine, sa Ia filifilia e sau i le lalolagi i le taimi tonu lava lenei, ia avea ma se taitai o Lana galuega maoae i le lalolagi. Sa filifilia oe e le ona o tulaga o lou tino ae ona o ou uiga faaleagaga e pei o le toa, lototele, loto faamaoni, o se galala mo le upumoni, o se naunau mo le poto, ma se manao e auauna atu i isi.

“Sa e atiina a’e nisi o nei uiga i le muai olaga. O isi e mafai ona e atiina a’e iinei i le lalolagi pe a e saili ma le filiga i ai” (“Filifiliga mo le Faavavau,” LIahona, Nov. 2013,107).

Mafaufau i nisi o tulaga e ono e feagai ai, lea e taua ai le manatuaina o nei upumoni e uiga i lou muai olaga. O le a se mea e mafai ona e faia e faamanatu ai ia te oe lava ia nei upumoni?

Tagai foi i le Russell M. Nelson, “Filifiliga mo le Faavavau,” Liahona, Nov. 2013, 106–9; Autu ma Fesili, “Muai Faauuga,” “Muai Olaga,” Potutusi o le Talalelei.

i le itu tauagavale, o se tagata o loo tu i totonu o se tane vai tele e leai se mea o i ai; i le itu taumatau, o se afu — I le Ieremia 2:13, na faatusaina ai e le Alii le tulaga faaleagaga o tagata i “vaieli mavaevae” ma faatusaina o Ia lava i le “puna o le vai ola.”

Ieremia 2; 7

“Ua latou tuua a’u le puna o le vai ola.”

I le pito matutū lea na nonofo ai tagata Isaraelu, sa teu e tagata le vai taua i faatanoa i lalo o le eleele na ta’ua o vaieli. O le a lou manatu mata o le a le faatusa o “vaieli mavaevae” na ta’ua i le Ieremia 2:13 ? Aisea e taua ai le maua o le vai mai se puna nai lo o le faalagolago i se vaieli? O le a le uiga o le tuua “le puna o le vai ola”? A o e faitauina le Ieremia 2 ma le7, matau le auala na lafoaia ai e tagata le vai ola a le Alii (tagai, mo se faataitaiga, Ieremia 2:26–28; 7:2–11). Aisea ua avea ai le “vai ola” o se faatusa lelei mo mea e tuuina mai e le Faaola ia te oe? Mafaufau pe faapefea ona e mauaina le vai ola.

O leIeremia 7 o loo faasino atu i tagata o e na ulufale atu i “le maota o le Alii … e ifo atu ai ia Ieova,” ae o a latou amioga sa le tutusa ma lo latou tuuto i fafo (tagai i fuaiupu 2–11). O a ni savali e te manatu e ono i ai i le Alii mo oe i fuaiupu 21–23?

Faaaoga lesona o mea faitino. E masani ona faatusatusa e perofeta a le Alii upumoni faaleagaga i mea faitino masani. Mafaufau e faia foi faapea a o e aoao mai ma aoao atu le talalelei. Mo se faataitaiga, ina ia vaai faalemafaufau i le Ieremia 2:13, e mafai ona e tuuina le vai i totonu o se koneteina ua ta’e pe īsi pe inu mai se vaipuna. E faapefea ona pei Iesu o se “puna o vai ola”? (Ieremia 2:13). E faapefea ona tatou feinu mai Lana vai ola?

Ieremia 3:14–18; 16:14–21

O le a faapotopoto e le Alii Ona tagata.

I le Ieremia 16:14–15, na faatusatusa ai e Ieremia le faapotopotoina o Isaraelu i aso e gata ai ma le Esoto mai o Isaraelu mai Aikupito. I lou manatu, aisea o le a sili atu ai ona taua le faapotopotoina i tagata o le Atua nai lo le Esoto?

O le a le mea o loo fautua mai e le Ieremia 3:14–18; 16:14–21 e uiga i le auala e tupu ai le faapotopotoina?

I lana savali “Faamoemoe o Isaraelu,” na aoao mai ai Peresitene Russell M. Nelson, e pei o Ieremia, o le faapotopotoina o Isaraelu “o le mea aupito sili lea ona taua o loo tupu i le lalolagi i aso nei” (faigalotu a le autalavou i le lalolagi atoa, 3 Iuni, 2018, Potutusi o le Talalelei). Faitau pe faalogo i lana savali, ma vaai pe mafai ona e iloa (a) le auala na faauigaina ai e Peresitene Nelson le faapotopotoina o Isaraelu, (e) le auala na ia faamatalaina ai lona taua, ma le (i) pe faapefea ona avea oe ma se vaega o le faapotopotoina.

Mo nisi manatu, tagai i le lomiga o lenei masina i mekasini o le Liahona ma le Mo Le Malosi o le Autalavou .

Fautuaga mo le Aoaoina o Tamaiti

Ieremia 1:5

Na silafia a’u e le Tama Faalelagi ae ou te le’i fanau mai.

Ina ia faailoa atu le upumoni taua o loo aoaoina i le Ieremia 1:5, e mafai ona e faaali atu i lau fanau se ata o se pepe (pe, afai e mafai, e mafai ona e vaai i ata o lau fanau a o pepe i latou). Fesili i lau fanau pe latou te iloa le mea sa latou nonofo ai ae latou te lei fananau mai. E mafai foi ona outou usuina faatasi se pese e aoao mai ai e uiga i lo tatou muai olaga, e pei o le “I Lived in Heaven” (Tusipese a Tamaiti, 4).
Afai e fia aoao atili lau fanau, e mafai ona e fesoasoani ia i latou e sue le “Olaga i le Muai Olaga” i le O Le Taiala i Tusitusiga Paia. E mafai ona latou vaavaai mo tali i fesili “o ai,” “o afea,” ma le “o le a” e uiga i le muai olaga.

Ieremia 1:4–19

Ua valaauina perofeta e saunoa i afioga a le Alii.

Mafaufau e faaali atu ata o le perofeta soifua po o perofeta mai tusitusiga paia (e mafai ona e maua nisi i mekasini a le Ekalesia, le Tusi Ata o le Talalelei, ma le Sau, Mulimuli Mai ia te A’u). Fesili atu i lau fanau pe o le a se mea latou te iloa e uiga i nei perofeta.
Ina ia aoao atu e uiga i mea e fai e perofeta, e mafai ona e filifilia nisi o fuaiupu aoga mai le Ieremia 1, e pei o fuaiupu 5, 7, 10, ma le19. E mafai e lau fanau ona filifili taitasi se fuaiupu se tasi, faitau, ma faasoa mai se mea ua latou aoaoina e uiga i perofeta.

Ieremia 16:14–16

E mafai ona ou fesoasoani i fanau a le Tama Faalelagi ia toe foi atu ia te Ia.

A o e faitauina ma lau fanau le Ieremia 16:16, e mafai e lau fanau ona faafoliga o loo “fai faiva” pe “tutuli” mo mea faitino o loo siomia ai le potu. Na faatusatusa e Peresitene Russell M. Nelson ia faifaiva ma tagata tulimanu i lenei fuaiupu i faifeautalai (tagai i le “O Le Faapotopotoina o Isaraelu Ua Faataapeapeina,” Liahona, Nov. 2006, 81). O a mea a faifeautalai e fai? E mafai faapefea ona tatou fesoasoani e “fai faiva” ma “tutuli” mo Isaraelu ua faataapeapeina? (tagai i le “A Message for Children from President Russell M. Nelson” [vitio], ChurchofJesusChrist.org).

3:30
Video: A Message for Children from President Russell M. Nelson

Ieremia 18:1–6

E mafai ona ou faatagaina le Alii e taialaina lo’u olaga, e pei o se fai ipu omea e mamanuina le omea.

Ina ia suesueina nei fuaiupu, e mafai ona e talanoaina pe faaali atu le auala e fai ai ipu omea (tagai i le ata i le faaiuga o lenei otootoga). O le a le savali o loo i ai i le Alii mo tatou i le Ieremia 18:1–6? O le a le uiga o le ia avea ma omea i aao o le Alii? (tagai foi i le Isaia 64:8). Mo se isi tala e faatusatusa ai i tatou i le omea a le fai ipu omea, tagai i le savali a Elder Richard J. Maynes “O Le Olioli i le Ola ai i se Olaga e Faatotonugalemu ia Keriso” (Liahona, Nov. 2015, 27–30).

Mo nisi manatu, tagai i le lomiga o lenei masina o le mekasini o le Uo .

lima e mamanuina ai ipu omea i se uili — “Faauta, le aiga o Isaraelu e, e pei o le omea i le lima o le fai ipu omea, e faapea foi outou i lo’u lima” (Ieremia 18:6).

Itulau o gaoioiga a le Peraimeri: E mafai ona ou fesoasoani i fanau a le Tama Faalelagi ia toe foi atu ia te Ia — “Faauta, le aiga o Isaraelu e, e pei o le omea i le lima o le fai ipu omea, e faapea foi outou i lo’u lima” (Ieremia 18:6).