Isaia 50–57

E ui ina sa faaalu e Isaraelu le tele o tausaga i le faatagataotauaina—ma e ui lava o le faatagataotauaina sa o se taunuuga o o latou lava filifiliga leaga—sa finagalo le Atua ia latou vaai atu i le lumanai ma le faamoemoe. O le a se mea e te maua mai i le savali a Isaia lea e avatu ai ia te oe le faamoemoe? O se siata faapenei e ono fesoasoani ia te oe e suesue ai:

Tagai foi i le Mosaea 12:20–24; 15:13–18; 3 Nifae 20:29–46; Mataupu Faavae ma Feagaiga 113:7–10; Russell M. Nelson,“Opogi le Lumanai i le Faatuatua,” Liahona, Nov. 2020, 73–76.

E laiti ni mataupu i tusitusiga paia e sili atu le matagofie o le faamatala ai o le misiona togiola a Iesu Keriso nai lo le Isaia 53. Mafaufau i gaoioiga faapenei ina ia malamalama lelei ai ma faaaoga nei aoaoga mamana:

• Mafaufau loloto pe talanoaina pe faapefea e tala ma ata tifaga ona faaalia ai toa o e laveaiina tagata. Faatusatusa na ata ma faatinoga i faamatalaga o le Faaola o loo i le Isaia 53.

• I le maea ai o le faitauina o fuaiupu taitasi, taofi e mafaufau i mea na tigaina ai le Faaola—o “tiga,” “faanoanoaga,” ma “solitulafono” sa Ia tauaveina—mo tagata uma ae faapitoa lava mo oe. Atonu e te suitulagaina upu e pei o le “tatou” ma le “matou” i le “a’u” ma le “lo’u” ao e faitau. O a ni lagona ma ni manatu e musuia ai oe e nei fuaiupu?

• Mafaufau e matamata le vitio “My Kingdom Is Not of This World” (Potutusi o le Talalelei), ma mafaufau loloto pe na faapefea ona faataunuuina valoaga o loo i le Isaia 53 . O a nisi o mea tiga ma faanoanoaga o loo tauave e le Faaola mo oe?

  

  5:28

• Saili ni ata o mea na tutupu o loo siomia ai le Togiola a Iesu Keriso (tagai i le Tusi Ata o le Talalelei, nu. 56–60). Ona mafai lea ona e maua fuaitau i le Isaia 53 lea e faamatala ai mea na tutupu o loo i ata. O a mea ua musuia ai oe e nei aoaoga e fai?

Tagai foi i le “E! Ua Maliu le Faaola,” Viiga, nu. 99.

E tofu i tatou uma ma taimi tatou te lagona ai le taumamao mai le Aili ona o a tatou agasala po o vaivaiga. O nisi lava foi ua lafoai le faamoemoe o le a Ia faamagaloina i latou. O leIsaia 54 ma le57 o ni mataupu sili e faitau i ai mo le faamautinoaga ma le faamalosiauga i taimi faapena. Aemaise lava i le Isaia 54:4–10; 57:15–19, o a upu e aoao atu ai ia te oe lagona o le Faaola e uiga ia te oe? O le a se eseesega e faia i lou olaga i le iloa ai o nei mea e uiga ia te Ia?

Na aoao mai Peresitene Dieter F. Uchtdorf:

“E le afaina pe ono oo i le faatāmaiaina atoa o o tatou olaga. E le afaina pe ‘ula’ula a tatou agasala, pe matuitui foi le oona, pe tuuatoatasi, tuulafoaiina, po o le nutimomoia o o tatou loto e ono oo i ai. E oo lava ia i latou ua aunoa ma se faamoemoe, o e o loo nonofo i le faanoanoa, o e ua faalataina le faatuatuaga, lafoai lo latou amiosa’o, pe liliu ese mai le Atua e mafai lava ona toefau. …

“O le talafou fiafia o le talalelei lenei: ona o le fuafuaga e faavavau o le fiafia ua saunia e lo tatou Tama Faalelagi alofa ma auala mai i le taulaga le i’u a Iesu le Keriso, e le gata e mafai ona togiolaina i tatou mai lo tatou tulaga pa’ū ma toefuatai i le mamā, ae mafai foi ona tatou alualu i luma e sili atu ma le mea e mafai ona mafaufauina e le tagata ma avea ai ma suli o le ola e faavavau ma ē mauaina le mamalu le mafaamatalaina o le Atua” (“O Le A Ia Tuu Oe i Luga o Ona Tau’au ma Ave Oe i le Aiga,” Liahona, Me 2016,102).

Tagai foi i le Patrick Kearon, “O Le Faamoemoega o le Atua ia Aumai Oe i le Aiga,” Liahona, Me 2024, 87–89.

Mo le tele o augatupulaga, na faailoa ai Isaraelu o le nuu o le feagaiga o le Atua. Ae peitai, o le fuafuaga a le Atua na aofia ai lava le sili atu ma le tasi se malo, aua “outou uma o e fia inu” ua valaauina e “o mai … i le vai” (Isaia 55:1). Teu i lou mafaufau le mea lenei ao e faitau i le Isaia 55 ma le56, ma mafaufau loloto i le uiga o le avea ma nuu o le Atua. O le a le savali a le Atua ia i latou o e lagona le “matuā faate’aeseina” mai ia te Ia? (Isaia 56:3). Mafaufau e faailoga fuaiupu o loo faamatala ai uiga ma amioga a i latou o e “taofi mau i la’u feagaiga” (tagai Isaia 56:4–7).

• Atonu o se mea malie mo lau fanau le mauaina o fuaitau e pei o le “ala mai ia,” “tulai mai,” ma le “ofu i lou malosi” i le Isaia 51:9, 17; 52:1–2, 9 ona faatino lea o na fuaitau. A uma ona faia lena mea, e mafai ona e talanoa pe o le a le uiga o le ala mai ia, tulai mai, ma ofu i le malosi faaleagaga. O le a le mea ua talosaga mai le Alii i nei fuaiupu tatou te faia?

• E mafai foi ona faitau e lau fanau le Isaia 51:1,4, 7 ma faailoa mai poʻo ai o loʻo fetalai i ai le Alii ma mea o loo finagalo o Ia latou te faia. O le a le uiga o le “faalogo mai ia” i le Alii? Faapefea ona tatou faaali i le Alii tatou te “faalogo atu ia” te Ia?

• E mafai ona e vaavaai ma lau fanau i nai ata o loo faaalia ai le puapuaga ma le maliu o Iesu Keriso (tagai i le, mo se faataitaiga, Tusi Ata o le Talalelei, nu. 56, 57,58). Ona mafai lea ona outou faitau faatasi le Isaia 53:3–6, 9 ma vaavaai mo upu lea o loo faamatala ai le mea o loo tupu i ata. Fesoasoani i lau fanau ia malamalama na faasoa mai e Isaia nei upumoni i le faitau selau o tausaga ae latou te lei tutupu. Aisea e taua ai i tagata ona iloa nei mea i le tele o tausaga muamua atu? (tagai i le Alema 39:15–19).

• A uma ona faitau mai le Isaia 53:4, “Ua Na tauaveina o tatou tiga, ma na tauave o tatou faanoanoa,” e mafai e lau fanau ona taumafai e sii i luga se mea mamafa (pe faafoliga e sii i luga se mea). Talanoa e faapefea e le “tiga” ma le “mafatia” po o o le faanoanoa ona lagonaina le mamafa ma faigata ona tauaveina. Aisea na tauveina ai e Iesu o tatou “tiga,” “faanoanoa,” ma “amioletonu” po o agasala? (tagai foi i le Alema 7:11–12).

• Ina ia aoao lau fanau e uiga i le Isaia 55:6, e mafai ona e nanāina se ata o Iesu i se mea i totonu o le potu. E mafai ona e valaaulia lau fanau e sue le ata ma ta’u mai se auala se tasi e mafai ona latou “saili … ia Ieova manu o mafai ona maua o ia.” O se pese e pei o le “Saili Vave Le Alii” (Tusipese a Tamaiti, 67) e mafai ona avatu ai ia i latou ni manatu. Ona mafai lea ona e tuu atu i se tasi o tamaiti e nanā le ata ma toe fai le gaoioiga.

• A uma ona faitau le Isaia 55:9, atonu o se mea malie mo lau fanau le tutu i luga o se nofoa ma talanoa e uiga i foliga ese o mea pe a e “maualuga atu.” Pe mafai foi ona latou tusia se ata o le uiga o le Isaia 55:9 ia i latou. Ona mafai lea ona e talanoaina ma tamaiti nisi o ala a le Alii e maualuga atu nai lo tatou ala. Mo se faataʻitaʻiga, o le a Lana auala e taulima ai tagata agasala? (tagai Mareko 2:15–17). O le a Lana auala e taʻitaʻia ai isi? (tagai Mataio 20:25–28). Tau atu i lau fanau le auala ua e aʻoaʻo ai e faatuatuaina ala ma mafaufauga maualuga a le Alii.