Isaia 58–66

Aisea e alu ai se tasi ma le lotomalie e aunoa ma se meaai a o loo maua pea meaai? A o e suesueina le Isaia 58:3–12, atonu e te mafaufau i au mafuaaga mo le anapogi—faapea foi ma mafuaaga a le Alii mo le tuuina mai o lenei tulafono. O nisi nei o fesili e mafaufau loloto i ai:

• Aisea e mafai ai ona vaaia nisi taimi le anapogi e pei o se avega mamafa nai lo o se faamanuiaga? (tagai i le Isaia 58:3–5). E faapefea ona suia e aoaoga a le Alii i lenei mataupu lena vaaiga mo oe?

• O le a le uiga o le “tatalaina fusi na faia i le amio leaga” ma “gausia amo uma lava”? (Isaia 58:6). E mafai faapefea e le anapogi ona faamanuiaina isi? (tagai i le fuaiupu 7).

• Na faapefea ona aumaia e le anapogi ia te oe faamanuiaga o loo faamatalaina i le Isaia 58:8-12

I lana savali, “E Le o Lenei Ea le Anapogi Ou te Loto I Ai?” (Liahona, Me 2015, 22–25), na faasoa mai ai e Peresitene Henry B. Eyring ni nai faataitaiga o le auala na faamanuiaina ai tagata e ala i le anapogi ma taulaga anapogi. O faapefea ona e molimauina nei faamanuiaga talitutusa i lou olaga?

Tagai foi i le “Bless Our Fast, We Pray,” Viiga, nu. 138; Autu ma Fesili, “Anapogi ma Taulaga Anapogi,” Potutusi o le Talalelei.

Pe o le aso Sapati “o se aso fiafia” mo oe? A o e suesueina le Isaia 58:13–14, mafaufau pe faapefea ona e maua le fiafia sili atu i le aso o le Alii. Mo se faataitaiga, o le a le uiga o le liliu “mai le faia o lou lava loto, i [Lona] aso sa”? O le a le eseesega i le va o le “[fiafia] ia te oe lava i le Alii” ma le “lē faia i au lava ala”?

Tagai foi i le Russell M. Nelson, “O Le Sapati o Se Aso Fiafia,” Liahona, Me 2015, 129–32.

I leIsaia 58–66 o loo i ai ni faasinoga se tele i le misiona togiola a Iesu Keriso. Vaavaai mo na mea a o e suesue. Ae faapitoa lava, matau ia faalaniga ma upu sa faaaoga e faamatala ai le Faaola. Mo se faataitaiga:

• O le a se mea e faagaeetia ai oe e uiga i le faamatalaga o le “fautua” i le Isaia 59:16–21? E faapefea ona faatoilalo e le Faaola tulaga o loo faamatalaina i fuaiupu 9–15?

• Ina ua faailoa atu e Iesu Keriso i tagata o Nasareta o Ia o le Mesia, na Ia sii mai le Isaia 61:1–3 (tagai i le Luka 4:16–21; tagai foi i le vitio “Jesus Declares He Is the Messiah,” Potutusi o le Talalelei). Ua faapefea ona faamanuiaina oe ma isi e Iesu Keriso i auala o faamatalaina i nei fuaiupu? O faapefea ona Ia tuuina mai le matagofie e sui a’i le lefulefu?

  

  3:24

• O a le “alofa mutimutivale o le Alii” e mafai ona e “ta’ua”? (tagai i le Isaia 63:7–9).

• O a nisi faasinoga i le Faaola e te maua i le Isaia 58–66?

Tagai foi i le Mosaea 3:7; Mataupu Faavae ma Feagaiga 133:46–53.

O leIsaia 60 ma le62 o loo tautala e uiga i le malamalama ma le pogisa, mata ma le pupula, e aoao ai le ala o le a faamanuia ai e le talalelei a Iesu Keriso le lalolagi i aso e gata ai. Vaavaai mo nei manatu ae maise lava i le Isaia 60:1–5, 19–20; 62:1–2. A o e faitauina nei mataupu, mafaufau loloto pe o faapefea ona faapotopoto e le Atua Lana fanau mai le pogisa agai i Lona malamalama. O le a lau matafaioi i lenei galuega?

Tagai foi i le 1 Nifae 22:3–12; 3 Nifae 18:24; Mataupu Faavae ma Feagaiga 14:9; Bonnie H. Cordon,“Ina Ia Latou Vaai,” Liahona, Me 2020, 78–80.

Sa tautala Isaia e uiga i se aso o le a “galo muai puapuaga” (Isaia 65:16). E ui o lenei valoaga e tele ni faataunuuga, ae i lona uiga atoatoa, e lei oo mai lena aso—o le a toe foi mai ai Iesu Keriso. Na faamatala e Isaia lenei aso o loo loma i le Isaia 64:1–5; 65:17–25;66. Matau lona faaaogaina soo o upu e pei o le “olioli” ma le “fiafia.” E faapefea ona avea le toe afio mai o le Faaola o se aso o le olioli mo oe? O le a se mea e mafai ona e faia e saunia ai mo Lona afio mai?

Tagai foi i le Mataupu Faavae o le Faatuatua 1:10; Russell M. Nelson, “O Le Lumanai o le Ekalesia: Sauniaina o le Lalolagi mo le Afio Mai Faalua o le Faaola,” Ensign, Ape. 2020, 13–17.

• Atonu o le auala sili e uunaia ai lau fanau e anapogi—pe a latou saunia—o le fesoasoani lea ia i latou ia malamalama i faamoemoega o le Alii mo lenei tulafono. Mafaufau e faitau faatasi le Isaia 58:6–11 e sue ai tali i fesili nei: Aisea tatou te anapogi ai? E faapefea ona tatou anapogi? E mafai foi ona e vaai i le “Anapogi” i le Taiala i Tusitusiga Paia.

• Afai na e maua se aafiaga anoa i le anapogi, faasoa atu i lau fanau. E mafai foi ona e fesili atu ia i latou pe faapefea ona latou faamatala atu i se uo le mafuaaga na tuuina mai ai e le Alii ia i tatou lenei tulafono.

• A uma ona faitau le Isaia 58:13–14, e mafai ona e faasino atu i aso o le vaiaso i luga o se kalena ma valaaulia lau fanau e faaleo faatasi mai ma oe ia aso. A e taunuu i le Sapati, fai atu ia i latou e ta’u lena aso “o se mea fiafia.” Ta’u i tamaiti pe aisea e avea ai le Sapati o se mea fiafia ia te oe.

• Faasoa atu i le tasi ma le isi ni auala e mafai ona e “fiafia ia te oe lava i le Alii” i le Sapati. Atonu e mafai e lau fanau ona tusi o latou manatu ma tuu i totonu o se “pusa o mea fiafia o le Sapati.” A latou manaomia la ni manatu e uiga i mea e fai i le Sapati, e mafai ona latou aumaia se manatu mai le pusa.

• E mafai ona e valaauina lau fanau e moeiini o latou mata a o e faitauina le Isaia 60:1–3. Fai atu ia i latou e pupula o latou mata pe a latou faalogoina le upu “malamalama” ma toe moeiini pe a latou faalogoina le upu “pogisa.” Faamatala atu o Iesu Keriso ma Lana talalelei ua pei o se malamalama lea e fesoasoani tatou te iloa ai lo tatou ala e toe foi atu ai i le Tama Faalelagi.

• O leIsaia 65: 17–25 o loo faamatala mai ai le tulaga o le lalolagi o le a i ai pe a toe afio mai le Faaola. A o e faitauina nei fuaiupu ma lau fanau, fesoasoani ia i latou e vaavaai pe faapefea ona ese le olaga i le “lalolagi fou” na faamatalaina e Isaia. Aisea o le a avea ai lenei ma taimi e “fiafia ma olioli ai e faavavau”? (fuaiupu18).

• E mafai foi ona outou usuina faatasi se pese e faatatau i le Afio Mai Faalua, e pei o le “When the Saviour Comes Again” (Potutusi o le Talalelei). Faasoa atu i le tasi ma le isi mea o loo e tulimatai atu i ai e uiga i le toe afio mai o le Faaola. O a ni mea e mafai ona tatou faia e saunia ai mo lena aso?