Եզեկիել 1–3, 33–34, 36–37, 47

Եզեկիել 3 և 34 գլուխներում Տերը Իր ժողովրդի առաջնորդներին անվանում է պահապաններ և հովիվներ: Այդ գլուխները կարդալիս մտածեք, թե այս տիտղոսներն ինչ են ասում առաջնորդ լինելու մասին:

Ովքե՞ր են այն «ոչխարները», որոնց Տերը ցանկանում է, որ դուք արածեցնեք: Ի՞նչ եք գտնում Եզեկիել 34 գլխում, որը կարող է օգնել այն մարդուն, որը պատրաստվում է ծառայել միսիայում, մեծացնել երեխաներին կամ կատարել սպասավորության հանձնարարությունը: Ինչպե՞ս կարող եք հետևել Փրկչի օրինակին՝ որպես մեր հովիվ (տես հատվածներ 11–31)։

Կարող եք նաև խորհել խորհրդանիշների մասին, որոնք կգտնեք այս գլխում: Ի՞նչ կարող են ներկայացնել «լավ արոտ» և «լավ արոտավայր» արտահայտությունները հատված 14-ում։ Ի՞նչ տարբերություն կա «կորած» ոչխարի և «մոլորված» ոչխարի միջև (հատված 16)։ Ի՞նչ այլ խորհրդանիշներ եք գտնում:

Տես նաև Հովհաննես 21.15–17 հատվածները, Գերիթ Վ. Գոնգի «Սպասավորություն» ուղերձը, Լիահոնա, մայիս 2023, 16–19։

Գերության մեջ գտնվող իսրայելացիները մտահոգված էին․ «Մեր … մեղքերը մեզ վրա են, և մենք նրանցում մաշվում ենք. ուրեմն ինչպե՞ս պիտի ապրենք»։ (Եզեկիել 33․10)։ Ի պատասխան՝ Տերը ուսուցանեց նրանց ապաշխարության և ներման մասին։ Այս հարցերը կարող են օգնել ձեզ խորհել այն մասին, թե ինչ է Նա ուսուցանել.

• Ըստ ձեզ, ի՞նչ է նշանակում «վստահի [քո] արդարությանն» (տես Եզեկիել 33․12–13)։

• Ի՞նչ կասեք այն մարդուն, որը մտածում է, որ Եզեկիել 33․12–19 հատվածներում նկարագրված մարդկանց հանդեպ վերաբերմունքն արդար չէ (տես նաև Մատթեոս 21․28–31, Ղուկաս 18․9–14)։

• Ի՞նչ եք գտնում այս հատվածներում, որոնք օգնում են ձեզ հասկանալ ապաշխարության նշանակությունը։ Ուրիշ ի՞նչ գաղափարներ եք գտնում Եզեկիել 36․26–27 և Ալմա 7․14–16 հատվածներում։

Իսրայելի հավաքումը պատկերված է Եզեկիել 37 գլխում երկու խորհրդանիշների միջոցով։ Երբ կարդաք առաջինի մասին, թե ինչպես են կենդանանում չորացած ոսկորները (տես հատվածներ 1–14), խորհեք, թե ինչ է այն ձեզ հուշում վարագույրի երկու կողմերում Իսրայելի հավաքման մասին (տես նաև Եզեկիել 36․24–30)։ Կարող եք տալ նման հարցեր.

• Ի՞նչ է Տերը փորձում իրականացնել Իսրայելի հավաքման միջոցով:

• Ինչպե՞ս է Նա իրականացնում դա։

Կարող եք ինքներդ ձեզ տալ այս նույն հարցերը՝ հատվածներ 15–28-ում երկրորդ խորհրդանիշի մասին կարդալիս։ Այդ խորհրդանիշը երկու փայտերն են, որոնք շատ գիտնականներ մեկնաբանում են որպես գրելու համար նախատեսված փայտե տախտակներ, որոնք իրար են միացված ծխնիով։ Հուդայի փայտը կարող է ներկայացնել Աստվածաշունչը (քանի որ Աստվածաշնչի մեծ մասը գրվել է Հուդայի հետնորդների կողմից), իսկ Հովսեփի փայտը՝ Մորմոնի Գիրքը (քանի որ Լեքիի ընտանիքը Եգիպտոսի Հովսեփի հետնորդն էր): Հաշվի առնելով դա, այս հատվածներն ի՞նչ են ձեզ ուսուցանում Իսրայելի հավաքման գործում սուրբ գրությունների դերի մասին:

Մտածեք, թե ինչպես են Աստվածաշունչը և Մորմոնի Գիրքը միասին աշխատել ձեր կյանքում, մասնավորապես՝ օգնելու ձեզ գալ դեպի Քրիստոսը: Ո՞ր հատվածներն են առավել իմաստալից ձեզ համար:

Տես նաև 2 Նեփի 3․11–13, 29․14, «Israel, Israel, God Is Calling» օրհներգը, Հիմներ, հմր. 7, Թեմաներ և հարցեր բաժնի «Աստվածաշունչ», «Մորմոնի Գիրք» նյութերը, Ավետարանի գրադարան, «The Book of Mormon Gathers Scattered Israel» (տեսանյութ), Ավետարանի գրադարան։

1:31

Եզեկիել 47․1–12 հատվածները կարդալիս օգտակար կլինի իմանալ, որ Մեռյալ ծովն այնքան աղի է, որ ձկներն ու բույսերը չեն կարող ապրել այնտեղ: Ի՞նչն է ձեզ տպավորում հատվածներ 1–12-ում նկարագրված ջրերում (տես նաև Հայտնություն 22․1)։ Ի՞նչ կարող են խորհրդանշել այդ ջրերը: Ի՞նչ կարող են ներկայացնել հատված 12-ում նկարագրված ծառերը։

Երեց Դեյլ Գ․ Ռենլանդի «Ընտանեկան պատմության և տաճարային աշխատանք․ Կնքում և բժշկում» ուղերձն ի՞նչ է ավելացնում ձեր հասկացողությանը (տես Լիահոնա, մայիս 2018, 47–48)։ Խորհեք, թե ինչպես եք հոգևոր կյանք և բժշկություն գտել տաճարի շնորհիվ:

• Փոքր երեխաների համար կարող է հետաքրքիր լինել կատարել այնպիսի գործողություններ, որոնք համապատասխանում են Եզեկիել 3․17 հատվածում նկարագրված գործողություններին։ Օրինակ՝ նրանք կարող են ցույց տալ իրենց աչքերը, ականջները և բերանը, երբ կարդում եք «պահապան», «լսել» և «բերան» բառերը։ Նրանք կարող են նաև ցանկանալ գնալ արշավի՝ բացօթյա կամ պարզապես սենյակում: Երբ նրանք քայլում են, զգուշացրեք նրանց արահետի վրա գտնվող բաների մասին, օրինակ՝ գետերի, որոնց վրայով պետք է ցատկել, ճյուղերի, որոնց տակով անցնելիս պետք է կռանալ և ուղղվել կամ կենդանիների, որոնցից պետք է խուսափել (իրական կամ պատկերավոր): Դա կարող է զրույցի առիթ դառնալ այն մասին, թե ինչպես է Տիրոջ մարգարեն զգուշացնում մեզ այն վտանգների մասին, որոնք մենք չենք կարող տեսնել:

• Ահա Եզեկիել 3․17, 33․1–5 հատվածները ներկայացնելու ևս մեկ եղանակ։ Ձեր երեխաներից մեկը կարող է պատկերացնել, որ «պահապան» է՝ պատուհանից դուրս նայելով և բոլորին պատմելով, թե ինչ է կատարվում դրսում: Կարող եք նաև դիտել «Watchman on the Tower» տեսանյութը (ChurchofJesusChrist.org կայքում)։ Ի՞նչ առումով է մեր ապրող մարգարեն հանդիսանում մեր պահապանը։

  

  4:17

• Եզեկիել 37․15–23 հատվածները միասին կարդալուց հետո դուք և ձեր երեխաները կարող եք գտնել երկու փայտ և մեկի վրա գրել՝ Հուդայի համար (Աստվածաշունչ), իսկ մյուսի վրա՝ Հովսեփի համար (Մորմոնի Գիրք)։ Ապա կարող եք կիսվել պատմություններով կամ սուրբ գրություններով Աստվածաշնչից և Մորմոնի Գրքից, որոնք օգնում են ձեզ ավելի մոտ զգալ Փրկչին և դառնալ «[Նրա] ժողովուրդը» (հատված 23)։ Ինչո՞ւ է օգտակար ունենալ սուրբ գրությունների այս երկու գրքերն էլ:

• Եզեկիել 47 գլխում նկարագրվում է Եզեկիելի տեսիլքը՝ թե ինչպես է ջուրը հոսում տաճարից և բժշկում Մեռյալ ծովը․ ծովն այնքան աղի է, որ ձկներն ու բույսերը չեն կարող ապրել այնտեղ: Գուցե ձեր երեխաները կարողանան այդ տեսիլքից նկարել մեկ կամ երկու առարկա, օրինակ՝ տաճար, գետ, անապատ, Մեռյալ ծով, բազմաթիվ ձկներ կամ պտղաբեր ծառ: Ապա, երբ միասին կարդաք հատվածներ 1–12-ը, նրանք կարող են կիսվել իրենց նկարով, երբ հիշատակվում է այդ առարկան: Ի՞նչ օրհնություններ էին բխում գետից այս տեսիլքում։ Օգնեք երեխաներին տեսնել, թե ինչպես են այդ օրհնությունները նման այն օրհնություններին, որոնք Փրկիչը առաջարկում են նրանց, ովքեր պահում են տաճարային ուխտերը։ Կարող է օգնել «And the River Will Grow» (Ավետարանի գրադարան) տեսանյութը:

  

  3:43

• Կարող եք նաև միասին երգել մի երգ, որտեղ նկարագրվում են տաճարային օրհնությունները, օրինակ՝ «Families Can Be Together Forever» (Children’s Songbook, 188)։ Ի՞նչ է ուսուցանում այս երգն այն մասին, թե ինչպես է Տերը օրհնում մեզ Իր սուրբ տանը: