Isaias 13–14; 22; 24–30; 35

Sa panahon ni Isaias, ang Babelonia usa ka gamhanang gingharian nga adunay gamhanang magmamando. Karon ang Babelonia karaan nang kasaysayan. Busa ngano nga ang mensahe ni Isaias ngadto sa Babelonia, diha sa Isaias 13–14, importante ngari kanato karon? Tungod kay ang Babelonia nagsimbolo og garbo, kahakog, ug sala, mga butang nga sa gihapon naglibot kanato karon. Paghunahuna mahitungod niini nga simbolismo samtang kamo nagbasa sa Isaias 13:1–11, 19–22; 14:1–20. Mahimo ninyong hunahunaon ang mga pangutana nga mga sama niini:

• Unsa nga mga pagkasusama ang imong makita tali sa garbo sa hari sa Babelonia ug sa garbo ni Satanas? (tan-awa sa Isaias 14:4–20; Moises 4:1–4). Unsa nga mga pasidaan ang imong nakita alang sa imong kaugalingon niini nga mga bersikulo?

• Giunsa sa Manluluwas paghatag og “pahulay gikan sa imong kasubo, ug gikan sa imong kaguol”? (Isaias 14:3).

Ang mga pagtulun-an ni Isaias kasagaran nagpasabot ngadto sa misyon sa Manluluwas, lakip sa Iyang maulaong sakripisyo, Pagkabanhaw, ug Ikaduhang Pag-anhi. Unsang mga aspeto sa Iyang misyon ang mahunahunaan samtang kamo magbasa sa mosunod nga mga bersikulo: Isaias 22:22–23; 24:21–23; 25:6–8; 26:19; 28:16? Unsa ang ubang mga tudling ang inyong nakaplagan nga nagpahinumdom kaninyo sa Manluluwas?

Diha sa Iyang kaluoy, gipadala sa Ginoo si Isaias sa pagpasidaan sa mga tawo sa pakigsaad nga sila nagpalayo gikan Kaniya. Tan-awa kon inyo bang makaplagan ang espirituhanong mga timaan nga pasidaan diha sa Isaias 24:5; 29:13; 30:8–12. Nganong kini nga mga kinaiya ug mga lihok makuyaw sa espirituhanong paagi?

Aron sa pagpasidaan mahitungod sa mga sangpotanan sa pagbiya gikan sa Ginoo, migamit si Isaias og lainlain nga halandumong mga pagtandi. Samtang kamo magtuon niini, pangutan-a ang inyong kaugalingon kon unsaon sa pagbiya gikan sa Ginoo sama sa:

• Usa ka subo, walay sulod nga yuta (Isaias 24:1–12).

• Nagasamparay (Isaias 28:7–8).

• Kagutom ug kauhaw (Isaias 29:7–10).

• Guba nga kuta o sudlanan (Isaiah 30:13–14).

Nganong kini importante nganha kaninyo ang magpabilin nga duol ngadto sa Ginoo?

Nawad-an ba kamo sukad og usa ka butang nga inyong gihunahuna nga dili na gayod ninyo makit-an og balik? O tingali usa ka butang nga nabuak, ug kamo naguol nga kini dili na gayod mamaayo. Kon kita mopalayo gikan sa Ginoo, gusto ni Satanas kanato nga maghunahuna nga kita dili na gayod makabalik o mamaayo. Bisan pa niana, gihulagway ni Isaias ang pipila sa katingalahang mga butang nga buhaton sa Ginoo sa pagtabang kanato pagbalik ngadto Kaniya. Unsa ang inyong nakat-onan gikan sa Isaias 29:13–24; 30:18–26; 35 mahitungod sa Ginoo, sa Iyang gugma, ug sa Iyang gahom? Tingali makakaplag mo og hugpong sa mga pulong niini nga mga tudling nga maghatag kaninyo og paglaom kon kamo nagkinahanglan og pagkaayo. Makapangutana usab mo diha sa mensahe ni Sister Amy A. Wright “Si Kristo Moayo Nianang Naguba” (Liahona, Mayo 2022, 81–84).

Usa ka paagi nga ang Ginoo nagpaila sa Iyang gahom ug kaluoy mao ang pinaagi sa Pagpahiuli sa Iyang ebanghelyo. Ang Isaias 29 naglangkob og daghang mga tudling nga adunay mga pagkasusama ngadto sa mga hitabo sa Pagpahiuli. Sama pananglit:

• Itandi ang Isaias 29:11–12 ngadto sa 2 Nephi 27:6–26 ug sa Joseph Smith—Kasaysayan 1:63–65.

• Itandi ang Isaias 29:13–14 ngadto sa Doktrina ug mga Pakigsaad 4 ug sa Joseph Smith—Kasaysayan 1:17–19.

• Itandi ang Isaias 29:18–24 ngadto sa ulohan nga pahina sa Basahon ni Mormon.

Sa inyong opinyon, ngano nga ang “katingalahan” ug “kahibulongan” (Isaias 29:14) maayo nga mga pulong sa paghulagway sa pagpahiuli sa Ginoo sa Iyang ebanghelyo? Unsaon ninyo pagtabang sa pagtuman sa mga panagna mahitungod sa Pagpahiuli? Alang sa mga ideya, tan-awa sa mensahe ni Elder Gerrit W. Gong “Tanan nga mga Kanasuran, mga Kaliwatan, ug mga Pinulongan” (Liahona, Nob. 2020, 38–41).

Tan-awa usab sa “Ang Pagpahiuli sa Kahingpitan sa Ebanghelyo ni Jesukristo: Duha ka Gatos ka Tuig nga Pamahayag ngadto sa Kalibotan” (Librarya sa Ebanghelyo); “Miabot ang Kabuntagon,” Mga Himno, nu 1.

• Unsaon ninyo pagtabang ang inyong mga bata pagkakita sa Manluluwas diha sa mga panulat ni Isaias? Makahimo kamo sa pagtabang kanila sa pagpangita sa mga hugpong sa mga pulong nga nagpahinumdom kanila Kaniya diha sa Isaias 14:3; 25:8; or 28:16. Makapares usab sila niini nga mga bersikulo gikan sa Isaias ngadto sa ubang mga bersikulo nga nagtudlo mahitungod sa Manluluwas, sama sa Mateo 11:28–30; 1 Mga Taga-Corinto 15:53–57; Helaman 5:12. Unsa nga mahinungdanong mga butang ang nabuhat sa Ginoo alang kanato?

• Human mabasa ang Isaias 25:8–9 og dungan, makatan-aw kamo sa mga hulagway sa Manluluwas diha sa Getsemani, diha sa krus, ug human sa Iyang Pagkabanhaw. Pasultiha ang inyong mga bata mahitungod sa unsay nahitabo diha sa mga hulagway ug nganong sila nahigugma ni Jesus ug “managmaya diha sa iyang kaluwasan” (verse 9).

• Mahimong mopili kamo sa pagsulti sa inyong mga bata mahitungod sa kaguol nga inyong gibati kon ang usa ka tawo nga inyong gimahal namatay. Pagpamatuod sa kahupayan nga inyong nadawat tungod ni Jesukristo. Tingali ang inyong mga bata makadrowing og usa ka naghilak nga nawong ug dayon papason ang mga luha samtang inyong basahon ang Isaias 25:8 og dungan.

• Kamo ba o ang inyong mga bata nakasinati sukad og panalangin sa usa ka luwas nga kapasilongan atol sa usa ka bagyo o landong sa usa ka mainit nga adlaw sa ting-init? O kamo nalingaw ba og usa ka lamian nga pagkaon sa dihang kamo gigutom? Paghisgot mahitungod niini nga mga kasinatian samtang magbasa kamo sa Isaias 25:4–6. Sa unsang paagi si Jesus sama niining mga butanga?

• Samtang kamo ug ang inyong mga bata nagbasa sa Isaias 29:14, pakigbahin kanila og ubang mga pulong nga nagkahulogan og samang butang sa “katingalahan” ug “kahibulongan.” Patabanga sila kaninyo sa pagpangita og mga butang o mga hulagway nga nagrepresentar og pipila ka katingalahang mga buhat sa Ginoo atol sa ulahing mga adlaw. Kini tingali maglakip og usa ka kopya sa Basahon ni Mormon, usa ka hulagway sa usa ka templo, o usa ka hulagway sa Unang Panan-awon (adunay usa diha sa sinugdanan niini nga latid). Dayon ang inyong mga bata makapili og usa ka butang ug sa pagpakigbahin kon nganong katingalahan kini ngadto kanila.

• Usa ka awit mahitungod sa Pagpahiuli sa ebanghelyo mobagay og husto sa Isaias 29, sama sa “Matahum nga Panahon sa Tingpamulak” (Songbook sa mga Bata, 57). Ug tingali usa ka personal nga kasinatian makatabang sa mga bata pagsabot unsa ang pagpahiuli nagkahulogan. Sama pananglit, kamo ug ang inyong mga bata makahisgot mahitungod sa usa ka butang nga inyong nawala ug sa unsang paagi nakit-an ninyo kini. Tabangi ang mga bata sa pagtandi niini ngadto sa Pagpahiuli sa ebanghelyo. Sumala sa Isaias 29:13–15, nganong nagkinahanglan kita sa Pagpahiuli? Unsa nga katingalahang mga buhat ang gihimo sa Ginoo sa pagpahiuli sa Iyang ebanghelyo? (tan-awa ang pahina sa kalihokan sa karon nga semana).