Mga Salmo 102–103; 110; 116–119; 127–128; 135–139; 146–150

Timan-i kon sa unsang paagi ang Mga Salmo 102:1–11 naghulagway og mga pagbati sa kabalaka ug pag-inusara nga kasagarang moabot atol sa mga hagit. Tingali kamo o ang uban nga inyong kaila nakasinati sa samang mga pagbati. Samtang kamo nagbasa sa Mga Salmo 102:12–28; 103; 116, pangita og mga hugpong sa mga pulong nga naghatag kaninyo og pagsalig sa “pagtawag sa ngalan sa Ginoo” diha sa inyong mga pagsulay (Mga Salmo 116:13). Mahimo ninyong markahan, sag-ulohon, o ipakigbahin ngadto sa uban ang mga hugpong sa mga pulong nga naghatag kaninyo og paglaom diha Kaniya.

Tan-awa usab sa Isaias 25:8; Mga Hebreohanon 2:17–18; Alma 7:11–13; Camille N. Johnson, “Si Kristo Mao ang Kahopayan,” Liahona, Mayo 2023, 81–83; “Ang Kalinaw Asa ko Pangitaa?” (Himno, nu. 75).

Ang Mga Salmo naglangkob og mga tudling nga nagtudlo ngadto sa kinabuhi ug pangalagad ni Jesukristo. Ania ang pipila ka mga ehemplo:

• Salmo 110:1–4 (tan-awa sa Mateo 22:41–45; Mga Hebreohanon 5:4–10; 6:20)

• Salmo 118:22 (tan-awa sa Mateo 21:42; Mga Buhat 4:10–11; 1 Pedro 2:7)

• Salmo 118:25–26 (tan-awa sa Mateo 21:9)

Unsa ang gitudlo niini nga mga bersikulo kaninyo mahitungod ni Jesukristo? Nganong importante nga mahibalo niining mga butanga mahitungod Kaniya?

Ang Salmo 119 naglangkob og daghang hugpong sa mga pulong nga nagtandi sa atong mga kinabuhi ngadto sa usa ka panaw pabalik ngadto sa Langitnong Amahan. Samtang kamo magbasa, pangita og mga pulong sama sa “lakaw,” “dalan,” “agianan,” “tiil,” ug “naglaaglaag.” Pamalandonga ang inyong kaugalingong panaw sa kinabuhi—diin kamo gikan, asa na kamo karon, ug asa kamo padulong. Unsa ang inyong nakat-onan gikan niini nga salmo mahitungod sa inyong panaw sa pagpauli? Unsa ang inyong nakat-onan pinaagi sa pagtan-aw sa dalan sa uban? Sumala niini nga salmo, unsa ang gihatag sa Dios aron sa pagtabang kaninyo nga magpabilin diha sa Iyang dalan?

Paghunahuna mahitungod sa usa ka panahon sa dihang ang pagsunod sa usa ka dalan o sa usa ka mapa mitabang kaninyo sa pagbiyahe sa usa ka dapit nga malampuson. Unsa ang gitudlo niana nga kasinatian kaninyo mahitungod sa pagsunod sa dalan sa Dios?

Diha sa ubang daghan nga mga kasulatan, ang Ginoo ug ang Iyang mga propeta naghisgot kabahin sa usa ka dalan. Sa ubos mao ang pipila ka ehemplo. Hunahunaa ang pagsiksik niini nga mga bersikulo ug sa pagsulat o pakigbahin ngadto sa uban unsay inyong nakat-onan.

Unsaon niini nga mga kamatuoran pagtabang kaninyo nga magpabilin diha sa dalan sa Dios?

Unsang dugang nga mga panabot ang inyong makat-onan gikan sa mosunod nga tambag gikan ni Presidente Russell M. Nelson?

“Kon ang atong panaw sa kinabuhi kinahanglang magmalampuson, kinahanglan kita nga magsunod og balaan nga direksyon. Ang Ginoo miingon, ‘Paghunahuna ngari kanako sa matag hunahuna; ayaw pagduha-duha, ayaw kahadlok’ [Doktrina ug mga Pakigsaad 6:36]. Ug ang Salmista misulat, ‘Ang imong pulong maoy suga nga magtultol kanako ug maoy kahayag sa akong dalan’ [Salmo 119:105]. …

“Diha sa inyong panaw sa kinabuhi, makasugat kamo og daghang mga babag ug makahimo og pipila ka sayop. Ang eskriptuhanong giya nagtabang kaninyo sa pag-ila sa sayop ug sa paghimo sa gikinahanglang pagkorihir. Kamo mohunong sa pagpadulong sa sayop nga direksyon. Mainampingon ninyong tun-an ang eskriptuhanong mapa sa dalan. Dayon mopadayon kamo ngadto sa paghinulsol ug sa pag-uli nga gikinahanglan aron magpabilin diha sa ‘higpit ug pig-ot nga dalan nga mopadulong sa kinabuhi nga dayon’ [2 Nephi 31:18] (” (“Living by Scriptural Guidance,” Ensign, Nob. 2000, 17).

Tan-awa usab sa Dieter F. Uchtdorf, “Ang Nahisalaag ug ang Mga Pagpili nga Makapagpasig-uli Kanato sa Dios,” Liahona, Nob. 2023, 86–88.

Bantayi kon ngano, sumala sa Salmo 135:15–18, kini binuang ang pagsalig sa mini nga mga dios-dios. Sa unsa kaha kamo mahimong matental sa pagsalig diha niana nga susama sa usa ka dios-dios? Tingali makahimo kamo og lista sa mga butang nga mahimo sa Ginoo, sama sa gibuhat sa mga salmista diha sa Mga Salmo 134–36. Unsa nga gamhanang mga butang ang Iyang nahimo alang kaninyo?

Unsa ang inyong nakaplagan sa Salmo 139 nga nagtabang kaninyo sa pagsabot nga ang Ginoo nakaila kaninyo—sa inyong mga hunahuna ug mga lihok, mga kalig-on ug mga kahuyang? Sa unsa nga paagi kini nga kamatuoran nag-impluwensiya sa inyong kinabuhi ug sa inyong mga pagpili?

Samtang nagbasa kamo niining kataposang mga salmo sa pagdayeg, paghunahuna mahitungod og mga rason nga kamo kinahanglang modayeg sa Ginoo. Nganong importante nga modayeg Kaniya? Unsa ang mga paagi kamo makadayeg Kaniya?

• Kamo o usa sa inyong mga bata makabasa sa Salmo 102:1–2, mangita alang sa giunsa sa Ginoo pagtabang kanato atol sa atong mga kalisod. Sa unsang paagi kita makakaplag sa Iyang panabang? Kamo makahimo usab sa pagpakigbahin sa usag usa og mga panahon nga inyong gikinahanglan ang panabang ug gibati nga gidungog sa Dios ang inyong mga pag-ampo.

• Ang inyong mga bata tingali malingaw sa paghisgot mahitungod kon sama sa unsa ang bation nga maanaa sa ngitngit. O sila makahisgot og mga butang nga malisod buhaton diha sa ngitngit. Mahimo kamong modapit og usa ka bata sa pagsulay sa pagbuhat og usa ka butang nga ang iyang mga mata gipiyong, sama sa pagdrowing og usa ka hulagway. Unsa ang atong makat-onan gikan sa Salmo 119:105 mahitungod sa kahayag ug sa pulong sa Dios?

• Pangita og usa ka butang nga nahatag sa Langitnong Amahan kanato sa pagtabang nga magpabilin kita sa Iyang dalan diha sa mosunod nga mga bersikulo: Mga Salmo 119:47–48; 119:105; 1 Nephi 11:25; 2 Nephi 31:20. Unsay atong mahimo nga makapabilin diha sa dalan sa Dios?

• Ang inyong mga bata tingali malingaw sa pagtan-aw og mga hulagway sa mga butang nga gihisgotan sa Salmo 119:105. Makahimo sila sa pagbutang sa mga hulagway sa hustong han-ay samtang ilang basahon ang bersikulo. Makakanta usab kamo og dungan sa usa ka may kalabot nga awit, sama sa “Tudloi Ko sa Paglakaw sa Kahayag” (Songbook sa mga Bata, 70) o “I Will Walk with Jesus” (Gospel Library).

• Hunahunaa ang paghimo og mubo nga mga lista sa mga butang nga inyong nahibaloan mahitungod sa matag usa sa imong mga bata. Samtang inyong basahon og tinagsa ang mga lista, hangyoa ang mga kabataan sa pagtagna kinsa ang imong gihulagway. Dayon, human mabasa ang Salmo 139:1–3 og dungan, makalista kamo sa mga butang nga nahibaloan sa Langitnong Amahan ug ni Jesus mahitungod kanato.

• Isulat ang mga pulong sa Salmo 139:23–24 sa usa ka pirasong papel o board. Dapita ang inyong mga bata sa paglinya sa mga pulong nga naghulagway sa mga butang nga ang Dios makabuhat alang kanato. Nganong kita gusto nga ang Dios ang mobuhat niining mga butanga?

• Tingali ang inyong mga bata makapakigbahin og mga kasinatian sa dihang usa ka tawo midayeg kanila o misulti kanila nga sila mihimo og maayong trabaho. Ipakigbahin ang pipila ka maayong mga butang gikan sa Salmo 146:6–9 nga nabuhat sa Ginoo (tabangi ang inyong mga bata sa pagsabot sa dili pamilyar nga mga pulong). Dapita ang inyong mga bata sa paghisgot mahitungod sa ubang mga butang nga Siya naghimo alang kanato. Unsaon nato pagdayeg Kaniya alang niadtong mga butanga?