Mga Panultihon 1–4; 15–16; 22; 31; Ecclesiastes 1–3; 11–12

Ang mga basahon sa Mga Proverbio ug Ecclessiastes napuno sa mga panabot mahitungod sa kaalam. Hunahunaa ang pagmarka sa pulong nga “kaalam” ug sa kalabot nga mga pulong, sama sa “kahibalo” ug “pagsabot,” sa inyong pagkaplag niini sa Mga Proverbio 1–4; 15–16; Ecclesiastes 1–3; 11–12. Sa unsa nga paagi kini nga mga kapitulo nag-apekto sa paagi nga kamo naghunahuna mahitungod sa kaalam? Base sa unsay inyong nakaplagan, unsaon ninyo paghulagway ang kaalam nga “ang Ginoo naghatag”? (Mga Proverbio 2:6). Unsa nga mga panalangin ang nagagikan sa kaalam sa Dios?

Tan-awa usab sa Mateo 7:24–27; 25:1–13.

Lain nga tema nga makaplagan sa tibuok Mga Proverbio ug Ecclessiastes mao ang “kahadloki ang Ginoo.” Bantayi kini nga hugpong sa mga pulong samtang kamo magbasa. Unsa kaha sa paminaw ninyo ang gipasabot sa kahadloki ang Ginoo? Pangita og mga panabot diha sa mensahe ni Elder David A.Bednar “Busa Sila Mihupay sa Ilang mga Kahadlok” (Liahona, Mayo 2015, 46–49). Sa unsang paagi ang pagkahadlok sa Ginoo lahi gikan sa ubang mga matang sa kahadlok?

Tan-awa usab sa Mga Proverbio 8:13.

Unsaon ninyo pagpaningkamot sa pagdani sa usa ka tawo nga kini mas maayo ang “pagsalig diha sa Ginoo” kaysa “pagsalig … sa [atong] kaugalingong salabutan”? (Mga Proverbio 3:5). Unsa nga mga pagtandi o mga leksiyon nga naggamit og butang ang inyong gamiton? Samtang kamo mamalandong sa Mga Proverbio 3:5–7, paghunahuna og mga paagi nga mahimo ninyong kompletohon ang mga kapahayag sama niini: Ang pagsalig sa Ginoo sama sa … Ang pagsalig sa atong kaugalingong salabutan sama sa …

Nganong dili maalamon ang pagsalig sa atong kaugalingong panabot? Giunsa ninyo pagdiskobre nga ang Ginoo kasaligan?

Bisan pa niana, mahimo nato kining mahibaloan nga malisod usahay ang pagsalig sa Ginoo. Ngano kana? Nagsugyot si Elder Gerrit W. Gong og pipila ka rason, uban sa makatabang nga tambag, sa “Salig Pag-usab” (Liahona, Nob. 2021, 97–99). Unsa nga mga istorya o mga pagtulun-an ang inyong makaplagan niini nga mensahe nga mahimong motabang sa usa ka tawo sa pagpahiuli sa ilang pagsalig diha sa Ginoo?

Ang Mga Proverbio 3:6 ug Mga Proverbio 4 nagtandi sa kinabuhi ngadto sa usa ka “dalan” o usa ka “agianan.” Sa inyong hunahuna unsa ang gipasabot sa pagtugot sa Ginoo sa “pagdumala sa [inyong] mga dalan”? (Mga Proverbio 3:6). Unsa ang inyong nakaplagan sa kapitulo 4 nga nagtabang kaninyo sa “pagpamalandong sa dalan sa [inyong] mga tiil”? (bersikulo 26). Sama pananglit, unsa ang gitudlo sa mga bersikulo 11–12 ug 18–19 mahitungod sa mga panalangin sa pagsunod sa hustong dalan? Unsa ang gipasabot sa mga bersikulo 26–27 nganha kaninyo?

Tan-awa usab ang 2 Nephi 31:18–21; “Sundon Ko Ikaw Ginoo,” Mga Himno, nu. 133.

Ang pipila ka ideya sa Mga Proverbio 15–16 mahimong modasig kaninyo sa pagpalambo sa paagi nga kamo makigsulti sa uban, ilabi na sa mga minahal. Sama pananglit, paghunahuna mahitungod sa piho nga mga panahon nga ang “tubag nga malumo” mitabang nga “[makahupay] sa kapungot” (Mga Proverbio 15:1).

Mahimo usab kamo nga maghunahuna og mga panahon nga ang Manluluwas mipakita og ehemplo sa mga pagtulun-an sa Mga Proverbio 15:1–4, 18 (tan-awa sa Marcos 12:13–17; Juan 8:1–11). Unsaon ninyo nga makasunod sa Iyang ehemplo samtang kamo nakig-istorya ngadto sa uban?

Sa unsang paagi kaha nga ang tambag sa Mga Proverbio 15; 16:24–32 magamit sa karong digital nga komunikasyon? Tan-awa kon kamo makakaplag ba og usa ka bersikulo dinhi niini nga kapitulo nga inyong mausab ang pulong isip tambag mahitungod sa pakig-istorya pinaagi sa social media o pinaagi sa text.

Tan-awa usab sa Neil L. Andersen, “Pagsunod Kang Jesus: Pagkahimong Magbubuhat og Kadaitan,” Liahona, Mayo 2022,17–20; Ronald A. Rasband, “Ang mga Pulong Mahinungdanon,” Liahona, Mayo 2024, 70–77; Alang sa Kalig-on sa mga Kabatan-onan: Usa ka Giya alang sa Paghimo og mga Pagpili (2022), 11–12.

Mga Proverbio 31:10–31 naghulagway sa “usa ka takos nga babaye,” o sa usa ka babaye nga naghingapin ang espirituwal nga kalig-on, kasarang, ug impluwensiya. Mahimong sulayan ninyo ang pag-summarize sa inyong kaugalingong mga pulong kon unsa ang gisulti sa matag usa niini nga mga bersikulo mahitungod sa mga babaye nga takos. Hain niini nga kinaiya kamo makasunod?

Nganong bililhon alang kaninyo ang paghinumdom nga daghan dinhi niini nga kalibotan, ingon nga gibarogan sa Ecclesiastes 1–2, “pasigarbo” (o temporaryo og kasagaran dili importante)? Unsa ang inyong nakaplagan sa Ecclesiastes 12 nga naghatag sa kinabuhi og mahangturong bili?

• Sa pagtabang sa inyong mga bata nga masabtan ang mga tudling mahitungod nga mahadlok sa Dios, makapuli kamo sa pulong nga “mahadlok” ngadto sa pulong sama sa balaang pagtahod, gugma, o masulundon (tan-awa usab sa Mga Hebreohanon 12:28). Sa unsang paagi kini nag-apekto sa paagi sa atong paghunahuna mahitungod niini nga mga bersikulo? Unsaon nato pagpakita ang atong balaang pagtahod sa Ginoo?

• Kamo ug ang inyong mga bata makahimo og mga lihok nga mobagay sa Mga Proverbio 3:5–7, sama sa paghimo og usa ka kasingkasing sa imong kamot, nagsandig sa usa ka kilid, paglakaw sa lugar nga gibarogan, ug nagtudlo sa inyong mga mata. Unsaon nato pagpakita nga kita mosalig ni Jesukristo uban sa atong tibuok nga mga kasingkasing?

• Sa pagpakita kon unsa ang kahulogan sa “ayaw pagsalig sa imong kaugalingong salabutan” (Mga Proverbio 3:5), hunahunaa ang pagdapit sa inyong mga bata sa pagpasandig sa usa ka butang nga lig-on ug dili matarog, sama sa usa ka bungbong. Dayon mahimo silang mosulay sa pagsandig sa usa ka butang nga dili lig-on, sama sa silhig. O sila makasulay sa pagsandig sa usa ka sungkod, o usa ka lapis batok sa mga butang nga nagkalain–lain ang kalig-on, sama sa usa ka basahon o usa ka palid nga papel. Nganong importante nga “mosalig sa Ginoo” (bersikulo 5) ug dili sa atong “kaugalingong salabutan”?

• Tingali kamo ug ang inyong mga bata makahunahuna og mga sitwasyon sa dihang kamo o sila nahimong mibati og kasuko. Basaha ang Mga Proverbio 15:1 nga magdungan, ug tabangi ang inyong mga bata sa paggamit niini nga bersikulo ngadto sa mga sitwasyon nga ilang gihunahuna. Tingali sila makabansay og pipila ka “malumo nga mga tubag.” Usa ka awit mahitungod sa pagkamabination, sama sa “Ang Gugma Gipamulong Dinhi” (Songbook sa mga Bata, 102), makapalig-on niini nga baroganan.

• Aron makat-onan kon unsay kahulogan nga mahimong “mahinay sa pagkasuko” (Mga Proverbio 15:18), kamo ug ang inyong mga bata makapakigbahin og mga panahon sa dihang kamo (o usa ka tawo nga inyong kaila) mibati og kasuko apan mipili nga magmabination. Tabangi ang inyong mga bata sa paghunahuna og mga butang nga kita makahimong dali nga kon kita “mahinay sa pagkasuko.” Sama pananglit, kita makadali sa paghunahuna mahitungod ni Jesus, sa pagpangayo og tabang sa Langitnong Amahan, sa paghunahuna og usa ka awit sa Primary, o, kon mahimo, sa pagpalayo.