Isaias 1–12

Gitudlo sa Manluluwas nga ang “tanan nga mga butang diin si [Isaias] namulong nahimo kaniadto ug mahimo sa umaabot, gani sumala sa mga pulong nga siya namulong” (3 Nephi 23:3). Samtang kamo magtuon sa basahon ni Isaias, hunahunaa ang paghimo og usa ka tsart sa mga panagna nga may ulohan sama niini: Panahon ni Isaias, Ang mortal nga pangalagad sa Manluluwas, ug Ang ulahing mga adlaw. Timan-i nga daghan sa mga panagna ni Isaias natuman sa mas labaw sa usa ka paagi (tan-awa sa Giya ngadto sa mga Kasulatan, “Isaias”).

Si Presidente Dallin H. Oaks mitudlo: “Ang basahon ni Isaias naglangkob og daghang mga panagna nga ingon og adunay daghang mga katumanan. Ang usa ingon og nag-apil sa mga katawhan sa panahon ni Isaias o ang mga kahimtang sa sunod nga henerasyon. Ang lain nga kahulogan, kasagaran simbolikanhon, ingon og nagpasabot ngadto sa mga panghitabo sa tunga-tunga sa kapanahonan, sa dihang ang Jerusalem gilumpag ug ang mga katawhan niini nagkatibulaag human sa paglansang sa Anak sa Dios diha sa krus. Lain pa nga kahulogan o katumanan sa samang panagna ingon og kabahin sa mga panghitabo kalabot sa Ikaduhang Pag-anhi sa Manluluwas. Ang kamatuoran nga daghan niining mga panagna mahimong adunay daghang mga kahulogan nga naghatag og gibug-aton sa kaimportante sa atong pagtinguha og pinadayag gikan sa Espiritu Santo sa pagtabang kanato nga mahubad kini” (“Scripture Reading and Revelation,” Ensign, Jan. 1995, 8).

Sama sa mga propeta sa tanang panahon, si Isaias nagpadayon sa pagpasidaan sa katawhan mahitungod sa ilang espirituhanong kahimtang. Samtang kamo magbasa sa Isaias 1; 3; 5, pangita alang sa mga hugpong sa mga pulong nga naghulagway kon sa unsang paagi ang mga tawo nanaglihok sa espirituhanong paagi (tan-awa, sama pananglit sa, Isaias 1:2–4, 21–23; 3:9, 16–17; 5:11–12, 20–23). Unsang susama nga mga problema ang inyong nakita sa atong panahon? Kamo mahimo usab nga mangita alang sa mga bersikulo mahitungod sa mga sangpotanan sa espirituhanong kahimtang sa mga Israelita (sama sa Isaias 1:7; 3:17–26; 5:5–7, 13–15).

Agig dugang sa mga pasidaan, mihatag si Isaias og mga mensahe sa paglaom alang sa pagtubos pinaagi sa Manluluwas (tan-awa, sama pananglit, sa Isaias 1:16–19, 25–27; 3:10; 4). Unsay inyong nakat-onan mahitungod sa Ginoo gikan niini nga mga mensahe? Sa unsang paagi nga ang mensahe sa Ginoo dinhi niini nga mga bersikulo lahi gikan sa unsay gusto ni Satanas kanato nga tuohan?

Sama ni Isaias, ang mga propeta karon nagpasidaan kanato mahitungod sa sala ug sa mga sangpotanan niini, ug kini naghatag og mga mensahe sa paglaom pinaagi ni Jesukristo. Unsa nga mga ehemplo ang inyong mahunahunaan? Mahimong gusto ninyo nga magrebyo og usa ka mensahe gikan sa miagi nga kinatibuk-ang komperensiya, mangita alang sa ingon nga mga pasidaan ug mga saad.

Daghan sa mga panagna ni Isaias adunay piho nga kahulogan alang sa atong panahon. Sa pagkakaplag niini, pangita og mga berbo nga umaabot ang panahon (sama sa “mamahimo” o “moadto”). Sama pananglit, pangita alang niini nga mga berbo samtang kamo magbasa sa Isaias 2; 4; 11–12. Kamo mahimo gani nga mosulay sa pagpuli niini og mga berbo nga karon ang panahon (sama sa mo o maoy). Hain sa mga panagna ang ilabing makadasig nganha kaninyo? Unsay inyong nakat-onan gikan niini nga mga panagna mahitungod sa Zion, pagtukod og mga templo, ug pagpundok sa Israel?

Isaias 2:2–3 ilabi ka may kalabotan alang sa mga Santos sa Ulahing mga Adlaw. Sa unsang paagi kini nga mga panagna nangatuman? Unsay inyong nakat-onan mahitungod sa mga “dalan” ug “mga alagianan” sa Ginoo diha sa Iyang balay? (bersikulo 3).

Tan-awa usab sa Isaias 5:26; “Ibabaw sa Bukid,” Mga Himno, nu. 5.

Sa Isaias 6, giasoy ni Isaias ang iyang tawag nga mahimong propeta. Samtang ikaw nagbasa niini nga kapitulo, unsa ang nakapadani kaninyo mahitungod sa kasinatian ni Isaias? Sa unsa nga paagi kini nga kapitulo nag-impluwensya sa paagi sa inyong paghunahuna mahitungod sa Ginoo, sa Iyang mga propeta, ug sa buhat nga sila gitawag sa pagpabuhat?

Sa panahon sa pangalagad ni Isaias, ang Israel nakig-alyansa sa Syria sa pagdepensa sa kaugalingon batok sa Asiria. Gusto sa Israel ug Syria nga pugson si Achaz, ang hari sa Juda, nga moapil kanila. Apan gipanagna ni Isaias nga ang alyansa mapakyas ug gitambagan si Achaz sa pagsalig diha sa Ginoo (Isaias 7:7–9; 8:12–13).

Samtang gitambagan ni Isaias si Achaz, mihimo siya og daghang nabantog nga mga panagna, sama niadtong makaplagan sa Isaias 7:14; 8:13–14; 9:2, 6–7. Bisag unsa kini nga mga panagna nagkahulogan ngadto ni Achaz, kini tataw nga nagpasabot ngadto ni Jesukristo (tan-awa usab sa Mateo 1:21–23; 4:16; 21:44; Lucas 1:31–33). Nganong ang “Immanuel” usa ka maayong titulo alang sa Manluluwas? (tan-awa sa Mateo 1:23). Sa unsang paagi Siya nahimong usa ka “Magtatambag” o “Prinsipe sa Kalinaw” nganha kaninyo? (Isaias 9:7). Unsa pa ang inyong nakat-onan mahitungod sa Manluluwas gikan niini nga mga bersikulo?

• Sa Isaias 1:2–4, kamo ug ang inyong mga bata makakaplag og mga rason nga ang Ginoo wala malipay sa katawhan. Timan-i ang pagtandi ngadto sa mga hayop diha sa bersikulo 3—kinsa mao ang atong “ginoo”? Unsaon nato pagpakita nga kita nakaila Kaniya?

• Sa paghanduraw sa Isaias 1:16–18, kamo ug ang inyong mga bata makatan-aw sa usa ka butang nga hayag kaayong pagkapula ug usa ka butang nga puros puti. O tingali kamo makatrabaho nga mag-uban sa paglaba og usa ka butang. Unsaon nato pagkahimong hugaw sa espirituhanong paagi? Sa unsang paagi si Jesus makatabang kanato nga mahimong limpyo? Unsay atong makat-onan mahitungod sa Manluluwas gikan niini nga mga bersikulo? Pakigbahin uban sa inyong mga bata kon sa unsang paagi kamo mibati mahitungod Kaniya ug unsay Iyang nabuhat alang kaninyo.

• Nakita nang daan ni Isaias ang panahon sa dihang “ang bukid sa balay sa Ginoo” modani og mga tawo gikan sa “tanang mga nasod” (Isaias 2:2). Unsaon ninyo pagtabang ang inyong mga bata sa pagbati og kahinam mahitungod sa pag-adto sa balay sa Ginoo? Makadapit kamo kanila sa pagdrowing og usa ka hulagway sa ilang panimalay. Dayon basaha og dungan ang Isaias 2:2, ug dapita sila sa pagdrowing og usa ka hulagway sa “balay sa Ginoo,” nga mao ang usa ka templo. Basaha ang Isaias 2:3 nga magdungan. Dapita sila sa pagdugang ngadto sa ilang mga hulagway og daghang tawo nga nagpadulong ngadto sa templo, lakip ang ilang mga pamilya.

• Makabasa usab kamo sa Isaias 2:2–3 nga magdungan ug sa pag-ila og usa ka butang nga nagdasig kaninyo ug sa inyong mga bata sa pag-adto sa templo. Dayon, human mabasa ang Isaias 2:4 nga nagdungan, makahisgot kamo kon giunsa sa templo sa pagdala kanila og kalinaw. Hunahunaa ang pagkanta og dungan sa usa ka awit mahitungod sa templo, sama sa “Gusto Ko nga Makita ang Templo” (Songbook sa mga Bata, 99). Tabangi ang inyong mga bata sa pagpangita og mga pulong diha sa awit nga nagtudlo unsa ang templo ug unsa ang atong buhaton didto.

• Sa pagpaila sa mga panagna ni Isaias kabahin ni Kristo, kamo ug ang inyong mga bata makahisgot mahitungod sa mga titulo sa mga tawo, sama sa presidente, bishop, og magtutudlo. Unsa ang gisulti niini nga mga titulo kabahin niini nga mga tawo? Tabangi ang inyong mga bata sa pagpangita og mga titulo ni Jesukristo diha sa Isaias 7:14 ug 9:6–7 (tan-awa usab ang pahina sa kalihokan niini nga semana). Unsay gitudlo sa matag usa niini nga mga titulo mahitungod Kaniya? Unsa pay lain nga atong makat-onan mahitungod ni Jesukristo gikan niini nga mga bersikulo?

• Makahimo usab kamo sa pagpakigbahin sa inyong mga bata sa “Isaias ang Propeta” (sa Mga Istorya sa Daang Tugon, 150–51). Hunong og panagsa sa pagpangutana kon unsay nahibaloan ni Isaias mahitungod ni Jesukristo sa daghang mga tuig sa wala pa Siya matawo. Kamo dayon makagamit sa Mateo 1:21–23; Lucas 1:31–33 sa paghisgot mahitungod kon giunsa ang mga panagna ni Isaias sa Isaias 7:14; 9:6–7 nangatuman.

  

  1:18