Mga Salmo 49–51; 61–66; 69–72; 77–78; 85–86

Ang Salmo 49 adunay mensahe alang sa “mga ubos ug mga dungganan, kabus ug adunahan” (bersikulo 2). Unsa ang inyong isulti kalabot niini nga mensahe? Unsa ang inyong hunahuna ang gidugang sa Salmo 62:5–12 ngadto niana nga mensahe?

Ang pagbasa niini nga mga salmo tingali modasig kaninyo sa pagpamalandong sa mga paagi nga kita gitental sa pagsalig sa usa ka butang gawas sa Dios alang sa katubsanan (tan-awa sa Salmo 49:6–7). Sa unsang paagi ang inyong kinabuhi naimpluwensyahan sa inyong pagpamatuod nga “pagalukaton sa Dios ang [inyong] kalag gikan sa gahom sa lubnganan”? (Salmo 49:15).

Misulat si Hari David sa Salmo 51 human iyang naila ang iyang tuman nga panginahanglan alang sa kapasayloan—usa ka butang nga kitang tanan nanginahanglan. Hain nga mga bersikulo ang naghulagway sa mga pagbati nga kamo aduna? Unsa ang inyong nakaplagan dinhi niini nga salmo nga naghatag kaninyo og paglaom alang sa kapasayloan?

Mahimo usab kamo nga mosiksik sa Salmo 51 alang sa mga ilhanan mahitungod sa gipasabot sa paghinulsol. Paghimo og lista sa unsay inyong nakaplagan. Tan-awa kon makadugang ba kamo sa inyong lista pinaagi sa pagsisik sa mensahe ni Presidente Russell M. Nelson “Kita Makabuhat og Mas Maayo pa ug Mahimong mas Maayo” (Liahona, Mayo 2019, 67–69).

Unsaon ninyo paghulagway kon sama sa unsa ang bation ang pagdawat og kapasayloan pinaagi ni Kristo? Kon kamo nagkinahanglan og tabang sa paghulagway sa inyong mga pagbati, makatan-aw kamo sa Mga Salmo 51:1–2, 7–12; 85:2–9. Ang ubang mga tawo gusto nga magdrowing o mangita og mga larawan sa pagpahayag sa ilang mga pagbati; mahimo kamong mosulay niana. Makaawit usab kamo o makapaminaw ngadto sa usa ka himno mahitungod sa Manluluwas, sama sa “Ako Nagpabilin nga Natingala” (Mga Himno, nu. 114).

Sa paghinulsol, nagkinahanglan kita og hugot nga pagtuo dili lamang nga si Jesukristo makahimo sa paglimpyo kanato apan usab nga Siya buot molimpyo. Unsay inyong nakaplagan sa Salmo 86:5, 13, 15 nga nagtabang kaninyo sa pagkahibalo nga ang Manluluwas makahimo ug andam sa pagpasaylo?

Tan-awa usab sa Alma 36; Peter F. Meurs, “Siya Makaayo Kanako!” Liahona, Mayo 2023, 39–41.

Pamalandonga kon giunsa ninyo pagkaangkon og pagpamatuod kalabot ni Jesukristo ug sa Iyang matubsanong gahom. Dayon, samtang kamo magtuon sa Mga Salmo 51:13–15; 66:5–20; 71:15–24, hunahunaa kon unsaon ninyo pagdapit ang uban nga “umari ug tuman-aw kamo sa mga buhat sa Dios” (Salmo 66:5). Kon inyong “igapahayag ang unsay gibuhat [sa Ginoo] alang sa [inyong] kalag” (Salmo 66:16), unsa ang inyong ipahayag?

Unsa ang kahulogan nganha kanimo sa “magasulti sa [Iyang] pagkamatarong sa tibuok nga adlaw”? (Salmo 71:24).

Tan-awa usab sa Alma 26.

Daghang mga salmo naghulagway kon sama sa unsa ang mobati og napahilayo gikan sa Dios ug nanginahanglan gyod pag-ayo sa Iyang panabang (tan-awa sa Mga Salmo 63:1, 8; 69:1–8, 18–21; 77:1–9). Diha sa Mga Salmo 63; 69; 77–78, unsa ang inyong nakita nga mihatag sa mga salmista og kasiguroan?

Kon kamo naguol, sa unsang paagi kini magtabang kaninyo ang “paghinumdom sa mga buhat sa Ginoo” ug sa Iyang “mga kahibulongan sa kakaraanan”? (Salmo 77:11). Ang pipila niadto nga mga kahibulongan gihulagway diha sa Salmo 78. Samtang kamo magbasa mahitungod niini, pamalandonga unsa ang makatabang kaninyo nga “ibutang ang [inyong] paglaom sa Dios” (bersikulo 7).

• Sa pagtabang sa inyong mga bata sa pagdiskubre og mga kamatuoran mahitungod sa paghinulsol diha sa Salmo 51, kamo makadrowing og dako nga kasingkasing. Dayon makatabang kamo sa inyong mga bata sa pagsulat sa sulod sa kasingkasing og ngil-ad nga mga butang nga si Satanas nagtental kanato sa pagbuhat. Unsaon nato pagpagawas niini nga mga butang sa atong mga kasingkasing? Hangyoa ang inyong mga bata sa pagpangita sa pulong nga “kasingkasing” diha sa Salmo 51:10, 17. Paghisgot mahitungod kon unsay gitudlo niini nga mga bersikulo mahitungod sa paghinulsol. Ipapapas sa inyong mga bata ang mga pulong sulod sa kasingkasing ug sa pagsulat og bag-ong mga pulong nga naghulagway sa mga paagi si Jesus makausab kanato kon kita maghinulsol.

• Kamo mahimong motabang sa inyong mga bata sa pagkat-on kon unsay ipasabot sa pagbaton og “usa ka nadugmok ug usa ka mahinulsulon nga kasingkasing” (Salmo 51:17). Sila makapuli-puli sa pagbuak og abli sa usa ka butang nga adunay gahi nga bayanan, sama sa itlog o mani. Kamo makatabang kanila sa pagtandi sa bayanan ngadto sa mga butang nga nagpugong kanato gikan sa pagbati sa gugma sa Langitnong Amahan. Unsaon nato pag-abli sa atong kasingkasing ngadto Kaniya?

• Kamo makatan-aw usab og dungan sa usa ka hulagway sa Manluluwas ug mangutana sa inyong mga bata kon unsa nga mga pulong ang ilang gamiton sa paghulagway Kaniya. Dapita sila sa pagpangita og mga pulong nga naghulagway Kaniya diha sa Salmo 86:5, 13, 15. Nganong importante nga mahibalo niining mga butanga mahitungod Kaniya?

• Ang inyong mga bata tingali malingaw sa pagdrowing og mga hulagway sa mga simbolo sa Salmo 61:2–3. Sa unsang paagi si Jesukristo sama sa usa ka hataas nga “bato” (bersikulo 2), “usa ka dalangpanan,” ug “usa ka malig-ong tore”? (bersikulo 3).

• Hangyoa ang inyong mga bata sa pagpakigbahin og pipila sa ilang kinaham nga mga istorya sa kasulatan (mga hulagway gikan sa Libro sa mga Hulagway sa Ebanghelyo mahimong makatabang). Unsa ang gitudlo kanato niini nga mga istorya mahitungod sa Ginoo? Makabasa kamo og dungan sa Salmo 66:16 ug magpuli-puli sa pagtubag sa pangutana “Unsa ang nabuhat sa Ginoo alang sa akong kalag”?

• Samtang kamo nagbasa sa Mga Salmo 77:11; 78:6–7 og dungan, makahimo kamo sa pagpakigbahin ngadto sa usag usa kon giunsa ninyo sa pagpaninguha sa “paghinumdom sa mga buhat sa Ginoo” (Salmo 77:11), lakip ang Iyang mga buhat sa inyong kinabuhi. Sa unsang paagi ang sakramento nagtabang kanato sa “paghinumdom kanunay”? (Moroni 4:3; 5:2).

• Human mabasa ang Salmo 71:8 uban sa inyong mga bata, dapita sila sa pagdrowing og usa ka dako nga ba-ba. Hangyoa sila sa pagtabang kanimo sa “pagpuno” sa ba-ba og mga hulagway o mga pulong nga nagrepresentar og mga butang nga atong ikasulti sa uban mahitungod ni Jesukristo.

• Mahimo ninyong ipalibot og pasa ang usa ka hulagway ni Jesukristo. Ang tawo nga naggunit sa hulagway makasulti og usa ka butang nga ilang nahibaloan mahitungod Kaniya. Sa unsang paagi kita makatabang sa ubang mga tawo nga mahibalo niining mga butanga?

• Daghan sa mga salmo susama sa mga pag-ampo ngadto sa Dios. Samtang inyong basahon ang Mga Salmo uban sa inyong mga bata, mahimo ninyong ipakita nila ang mga butang nga atong magamit sa pagbinayloay og hunahuna ngadto sa mga tawo kinsa tua sa layo, sama sa usa ka telepono o usa ka sulat. Dayon basaha ang Salmo 86:7. Sa unsa nga paagi kita “magasangpit” sa Langitnong Amahan? Sa unsa nga paagi Siya magtubag kanato?

• Makakanta kamo og dungan sa usa ka awit mahitungod sa pag-ampo, sama sa “Ampo sa Usa ka Bata” (Songbook sa mga Bata, 6; tan-awa usab Susan H. Porter, “Pag-ampo Lang,” Liahona, Mayo 2024, 77–79). Sultihi ang usag usa mahitungod sa mga panahon sa dihang ang Dios mitubag sa inyong mga pag-ampo.